Zyrtarë të lartë politik serb si në Kosovë ashtu edhe në Serbi, kanë nisur të shpërfaqin haptas bindjen se deputetët serb, e veçmas ata të Listës Srpska, do jenë faktor vendimtar në krijimin e Qeverisë së re të Kosovës. Ndaras, në forma të ndryshme, pothuajse të njëjtën gjë, të hënën e kanë thënë ministri për Komunitete dhe Kthim, Dalibor Jevtiq si dhe shefi i të ashtuquajturës Zyra për Kosovën në Qeverinë e Serbisë, Marko Gjuriq.

Në fakt, pjesëmarrja e serbëve në Qeveri është një lloj obligimi kushtetues, por në rrethanat e krijuara pas zgjedhjeve të fundit, ku PDK si parti fituese ka mbetur pa partner për ta bërë Qeverinë, dhe koalicioni LDK-AAK-Nisma ende nuk kanë bërë marrëveshje me Vetëvendosjen, përfaqësuesit serb kanë fuqizuar rolin e tyre.

Jevtiq dhe deputetët në Kuvendin e Kosovës, Jasmina Zhivkoviq dhe Sasa Milosavljeviq, gjatë një vizite në Ajnovce të Komunës së Kamenicës dhe Kishën e Shën Maria Magdalena, së bashku me shtatëdhjetë besimtarë që morën pjesë në liturgjinë solemne dhe procesion, ka përmendur se ai ishte i sigurt se zgjedhje të reja në Kosovë nuk do të ketë dhe se nëntë deputetë të komunitetit serb do të jenë faktor` vendimtarë për formimin e Qeverisë së re të Kosovës..

Ngërçi politik i krijuar pas zgjedhjeve të fundit parlamentare, po e thyen rekordin e vitit 2001, kur vendi pati mbetur pa Qeveri, për mbi tre muaj. Që prej 7 majit të sivjetmë ditën kur edhe është shpërbërë Kuvendi i Kosovës, ky organ ka zhvilluar vetëm një seancë. Edhe vendimet e dala prej saj kanë përfunduar në Gjykatën Kushtetuese. Për rrjedhojë, Kuvendi është autorizuar që të përmbahet nga marrja e çfarëdo vendimi, të paktën deri më 17 shtator.

Analistët e vlerësojnë se kjo periudhë e gjatë e vakuumit po i kushton shumë Kosovës, si në raport me liberalizimin e vizave dhe rrugës për në Bashkimin Evropian, ashtu edhe në raport me proceset tjera të brendshme. Dren Doli, nga Grupi për Studime Juridike dhe Politike, në një prononcim për gazetën ka thënë se Kosova ndodhet para shumë sfidave dhe se ky vakuum institucional do t’i kushtojë vendit në shumë procese nëpër të cilat po kalon,shkruan Tribuna.

“Kosova ka shumë sfida para vetes dhe natyrisht se humbja e kohës në kuptimin e formimit të Qeverisë dhe konstituimit të Kuvendit, nuk i duhet Kosovës”, ka thënë ai. Kosova, sipas tij, ka nevojë të menjëhershme që të adresojë një numër të madh të sfidave që dalin sidomos nga aspekti i liberalizimit të vizave.

Nënkryetari i AAK’së, Ahmet Isufi ka thënë se në Kosovë nuk ka nevojë për zgjedhje të jashtëzakonshme parlamentare, duke e vlerësuar të rëndësishme që këtë herë nëpërmjet koalicionit LDK-AAK dhe Nisma të instalohet qeveria Haradinaj.

Isufi ka thënë për Epokë e Re se koalicioni LDK-AAK e Nisma, përfshirë edhe partitë e minoriteteve, përbën qeverinë gjithëpërfshirëse, siç është duke propozuar PDK’ja.

Ai ka bërë me dije se koalicioni ndërmjet tri partive i ka votat edhe për ta ndryshuar Kushtetutën në raport me Gjykatën Speciale për Krime Lufte.

E duke folur për vendimet e fundit të Qeverisë në largim, Isufi ka thënë se këto vendime janë antiligjore dhe kanë për qëllim të fusin në borxhe Qeverinë e ardhshme.

Që nga mbajtja e zgjedhjeve të fundit nacionale në vend, në Kosovë është krijuar një ngërç politik dhe nuk po dihet askush çfarë funksioni ka. Deri më tani është zgjedhur Kryetari i Kuvendit në seancën konstituive dhe dy nënkryetar, mirëpo nuk vonoj të pezullohet ky vendim me kërkesën e PDK-së, drejtë Gjykatës Kushtetuese.

Kjo e pamundëson edhe krijimin e Qeverisë, ani pse numrat janë krijuar për Kuvend e Qeveri. Megjithatë Gjykata Kushtetuese po vonon të jap një vendim, madje mund të shtyjë këtë çështje deri në vjeshtë. Ndonëse nuk ka Qeveria, ajo në ikje po merr vendime sikurse para shpërbërjes së Kuvendit dhe nuk po i ‘bëhet vonë’.
Andaj Qeveria në ikje po ‘kujdeset’ që të mos shkaktohet bllokim institucional dhe të marr vendime vetëm me pëlqimin e tyre.

Vakum institucional

Profesori i çështjeve juridike Mazllum Baraliu thotë se nuk është krijuar një bllokim institucional mirëpo më tepër një vakum tek institucionet. Ai i bën apel Gjykatës Kushtetuese që sa më parë të tejkalojë këtë gjendje.

“Mendoj se është krijuar një vakum institucional pikërisht me vendimin paraprak, apo me masën paraprake apo të përkohshme të Gjykatës Kushtetuese që është imponuar me vetë aktin e parashtresës së deputetëve të PDK-së, drejtë Gjykatës Kushtetuese. Pra kemi një vakum institucionale i cili do të duhej shumë më shpejtë të tejkalohej dhe kjo do të thotë se Gjykata Kushtetuese të veprojë shpejt, dhe në kuadër të kësaj të veprohet, mirëpo edhe të shpejtohet dhe duhet të veprojë më shpejtë në mënyrë që të debllokohet kjo gjendje dhe të tejkalohet ky vakum institucional”, thotë Baraliu për “Bota sot”.

Partia Demokratike e Kosovës nuk garanton se Enver Hoxhaj do të jetë sërish ministër i Punëve të Jashtme, nëse ky subjekt politik arrin të formojë qeverinë e re.

Por PDK e vlerëson punën e tij të deritashme.

Ngjashëm me PDK-në, edhe në koalicionin LDK-AAK-Nisma, thonë që se postin e Ministrit të Jashtëm duhet ta ushtrojë një person i pastër dhe me integritet, shkruan sot Koha Ditore.

Nevojën që diplomacinë ta drejtojë një autoritet i pranueshëm ndërkombëtar e mbështesin njohësit e politikës në vend. Kjo, meqë sipas tyre Kosova duhet të përballet me imazhim e dëmtuar pas publikimit të raportit të kryeprokurorit Clint Williamson, i cili drejton hetimet e supozuara në periudhën e luftës dhe pasluftës.