(E plotësuar) Ka përfunduar takimi i deputetëve të VLAN-it në Kuvendin e Kosovës. Deputetëve në Kuvend iu drejtuan katër liderët e partive që e formojnë bllokun opozitar: Isa Mustafa, kryetar i LDK-së, lideri i Vetëvendosjes Albin Kurti, kryetari i AAK-së Ramush Haradianj dhe kryetari Nismës Fatmir Limaj.

Ata janë të vendosur për të formuar Kuvendin e Qeverinë.

Liderët e këtyre partive theksuan se më së largu në javën e ardhshme do të vazhdojë seanca konstituive e Kuvendit të Kosovës.

Deputetët e Bllokut hyjnë në sallë – pritet ta zgjedhin Kryetarin dhe Nënkryetarët e Kuvendit

Deputetët e Bllokut LDK-VV-AAK-Nisma duket se kanë përnjëmend; ata para pak minutash kanë hyrë në sallën ku mbahen mbledhjen plenare.

Gazetari i Gazetës Express nga vendi i ngjarjes thotë se informacionet e tanishme janë se ata do t’i zgjedhin organet e reja të legjislativit. Por ne salle nuk kane hyre edhe deputetet minoritare.

Deputetët e VLAN-it në Kuvend

Të gjithë deputetët e bllokut opozitar VLAN tashmë janë mbledhur në Kuvend. Ata kanë paralajmëruar mbajtjen e seancës konstituive të Kuvendit të shtyrë tash e disa herë nga Partia Demokratike e Kosovës, përkatësisht deputetja e saj Flora Brovina.

Deputetët e Bllokut ia mësyjnë Kuvendit

Deri tani në Kuvendin e Kosovës kanë shkuar Sadri Ferati, Jakup Krasniqi, Besa Gaxherri dhe Albulena Haxhiu. Mirëpo, askush prej tyre nuk është prononcuar për media.

Në këto momente Blloku opozitar është duke mbajtur një takim të përbashkët. Derisa për pak minuta thuhet se do të dalin me një qëndrim zyrtar se çfarë do të bëjnë pasi kryesuesja e Kuvendit të Kosovës Flora Brovina e ka shtyrë seancën konstituive.

Burime të Express brenda bllokut kanë thënë se për pak minuta anëtarët e partive do të dalin me një qëndrim dhe do të vendoset se çfarë do të bëjnë për vendimin e djeshëm të Brovinës.

Nuk përjashtohet mundësia e ndonjë performance para Kuvendit të Kosovës.

Në asnjë kombinim, partia e Isa Mustafës nuk do të pranojë të hyjë në ndonjë koalicion me PDK-në e Thaçit.

Menjëherë pas zgjedhjeve parlamentare, më 9 qershor LDK-ja ka filluar takimet fillimisht me Fatmir Limajn e më pastaj dhe me Ramush Haradinajn për arritjen e një marrëveshje për bashkëqeverisje.

“Me apo pa Hashimin, LDK nuk hyn në koalicion me PDK-në”, ka thënë Ismet Beqiri i LDK-së në një intervistë për gazetën Zëri.

Anëtari i Kryesisë së AAK-së, Avni Arifi, ka thënë se shtyrja e vazhdimit të seancës konstituive nga kryesuesja e Kuvendit, Flora Brovina,është e dëmshme për demokracinë dhe parlamentarizmin në Kosovë

Ai ka thënë në një intervistë për “Epokën e re” se një veprim i tillë është një goditje e rëndë e angazhimeve të presidentes Jahjaga për ta tejkaluar ngërçin politik.

“Besoj se ky veprim i Brovinës është goditje ndaj angazhimeve të presidentes Jahjaga dhe nuk i shërben askujt, as PDK-së”, është shprehur Arifi, duke e akuzuar PDK-në për bllokimin e formimit të institucioneve të reja.

“PDK-ja është duke vazhduar bllokimin e formimit të institucioneve të reja, përfshirë edhe konstituimin e Kuvendit të Kosovës. Po ashtu, PDK-ja është duke vazhduar t’i torturojë qytetarët e Kosovës dhe po u shkakton dëme afatgjata institucioneve të Kosovës, me shpresë se blloku do ta marrë përgjegjësinë e tyre”, ka deklaruar Arifi. Në këtë kontekst, Arifi ka thënë se shtyrja e seancës është dëshmi se askush nuk dëshiron të bashkëpunojë me PDK-në.

“Pra, kjo është një dëshmi se asnjëra nga partitë politike shqiptare nuk dëshiron të jetë në koalicion me PDK-në”, ka theksuar Arifi.

Dyshohet se keqpërdorin lejen për kontrolle mjekësore.

Dy të dyshuarit për krime lufte nga “Grupi i Drenicës”, Sami Lushtaku dhe Sylejman Selimi, pavarësisht se janë në paraburgim, për më shumë se një orë e gjysmë, të mërkurën, kanë qëndruar në lokalin ”Klubi”, që gjendet në oborrin e QKUK-së, shkruan sot Koha Ditore.

Zyrtarët e QKUK-së kanë thënë të mos jenë në dijeni nëse ata u janë nënshtruar kontrollove mjekësore, ndërsa ata të Burgut të Dubravës konfirmojnë se të dytë kanë pasur leje për kontroll dhe se kjo ndodh shumë shpesh.

OSHP-ja i jep të drejtë Policisë, hedh poshtë ankesat për parregullsi.

Për shkak se operatori që ka ofertuar me 6 milionë euro nuk i ka specifikuar si duhet disa detaje në ofertë, siç janë numri i vjegëzave për rripat e pantallonave, butonave të fshehur të uniformës dhe cilësinë e pëlhurës së kapelave për femra, Policia e Kosovës e ka përzgjedhur operatorin tjetër me ofertë prej 13 milionë eurosh, shkruan sot Koha Ditore.

Këtë përzgjedhje e ka përkrahur edhe OSHP-ja. Kompania e refuzuar UNIKAT ka thënë se lëndën do ta dërgojë te krimet ekonomike.

“Gjykata e Tenderëve” e ka hedhur poshtë ankesën e kompanisë UNIKAT, e cila kishte ofertuar me ofertë vjetore prej 1 milion e 988 mijë euro, apo kontratë trevjeçare për 5 milionë e 966 mijë euro.

Oferta e kompanisë UNIKAT është për 7.1 milionë euro më e lirë se ajo e konsorciumit të rekomanduar për kontratë, “Steda Kosova & Albkos International & Hidro Forca”.

Adem Demaçi thotë se është bërë tepër me zvarritjen e krijimit të institucioneve, që do të buronin nga zgjedhjet e qershorit, ndërkohë që partitë politike vazhdojnë ta lënë vendin në bllokadë tash e katër muaj.

Tentimi i dytë i Presidentes Atifete Jahjaha, për të dalë nga ngërçi politik, me takimet e liderëve, ka dështuar edhe të mërkurën, për shkak të këmbënguljes në qëndrimet e tyre për Kryeparlamentarin, nga PDK dhe Blloku.

Seanca e paraparë për të enjten, ndërkaq, është shtyrë për shkak të mungesës së një konsensusi.

Në një prononcim për Politiko.net, Demaçi vlerëson se lakmia për pushtet ka shtyrë që secila palë ta shikojë interesin e vet.

“Për t’u tepruar, është tepruar. Mirëpo, po duket se pushteti është më i ëmbël sesa interesi i Kombit dhe i Atdheut. E kanë harruar interesin e Kombit dhe Atdheut. Çdo palë po shikon për të mbërritur aty ku ata e kanë menduar”.

“Njëra palë juridikisht ka të drejtë, por nuk i ka numrat. Tjetra i ka numrat, por juridikisht ka probleme. Kështu që, ra edhe bota në telashe me ne, edhe ne me veten”.

“Nuk di çka të them për këta vëllezërit e mi të luftës”.

“Ju kam thënë edhe më herët, do të vijë koha kur do ta hani kokën e njëri-tjetrit, por nuk më kanë dëgjuar dhe kanë shkuar gjithkush në të veten”.

Demaçi ka thënë se situata e krijuar nuk mund të shkojë deri në pakufi. Duke folur për Politiko.net, ai është shprehur se institucionet janë ndalur dhe nuk po funksionojnë si duhet.

“Kjo nuk mund të shkojë deri në pakufi. Duhet të mendohet edhe për interesin e Kombit. Institucionet janë ndalur, nuk po mund të funksionojnë si duhet. Edhe kur ishin të gjithë njerëzit të vendosur nëpër institucione, kishte probleme, e lëre më tash që nuk kemi institucione të krijuara”.

“Në vend që të ketë përpjekje që të gjendet cilësia, në mes këtyre partive, tash po mundohen të krijojnë pushtet secili për vete”.

“Mua më vjen keq. Po flasin disa për imazh. Imazh ne nuk kemi pasur kurrë”.

“Kemi problem me kulturë, me bujqësi, ekonomi… Të gjitha punët që i përfshinë shteti, na kanë mbetur në gjysmë të rrugës”.

“Sikur të ndaleshin një herë, këta vëllezërit e mi dhe motrat e mia, ta vendosin gishtin në kokë dhe të mendonin: Athua për këtë punë na kanë zgjedhur ata votues, apo na kanë zgjedhur për t’u shtyrë njëri me tjetrin, vetëm t’u jepet njëfarë statusi në dorë dhe të thonë se tash mund të bëjnë çfarë të duan”, ka deklaruar Demaçi për Politiko.net.