Ish-deputeti i PDK’së, Ramë Vataj, sa ishte Kryetar i Komisionit për Arsim, kishte marrë pjesë në hartimin e Statutit të Universitetit të Prizrenit. Në atë kohë ishte vendosur që kandidati për Rektor duhet të ketë gradën e profesorit të asocuar e jo të profesorit asistent siç është në Statutin e UP’së.

Vataj, i cili prej vitit 2009 e ka gradën e prof.asoc, ka konkurruar për pozitën e Rektorit në Prizren, në ditën e fundit të konkursit.

I kontaktuar nga Express, Vataj ka thënë se nuk dëshiron të deklarohet, sepse nuk ka asgjë kontroverse në kandidimin e tij.

Kur është pyetur se pse ishte vendosur kriteret më të larta për Universitetin e Prizrenit se në Universitetin e Prishtinës, ai nuk është përgjigjur dhe e ka ndalur telefonin.

Në anën tjetër, ish-kolegu i Ramë Vatajt në Komisionin për Arsim, Sadri Ferati, thotë se është e çuditshme se si është e mundur të ketë kritere më të larta për pranimin e Rektorit në Prizren se sa për Universitetin e Prishtinës.

Ai thotë se nuk i kujtohet se si ishte vepruar në kohën kur Statuti i UPZ’së ishte dërguar në Komisionin për Arsim pasi shumica e punësi ishte kryer nga Universiteti dhe nga Ministria e Arsimit.

“Për mua është e çuditshme se si Universiteti i Prizrenit të ketë kritere më të larta se i Prishtinës, sepse kriteret duhet të jenë të njëjta për universitetet”, thotë Ferati, për Express.

Sidoqoftë, ai thotë se Vataj edhe mund të behet Rektor nëse ia lejon ligji dhe nëse nuk është konflikt interesi.

Megjithëkëtë, kolegu tjetër i Vatajt në Komision, Jeton Svirca, thotë se qëllimi i tyre ka qenë ngritja e kritereve për pranimin e Rektorit të Prizrenit si mundësi e mirë për ngritjen edhe të cilësisë.

Ai thotë senuk beson se ngritja e kritereve ishte bërë për t’ia përshtatur dikujt pozitën me thirrjen akademike.

Ish-kandidati i PDK’së për Kryetar të Suharekës, Ramë Vataj, në zgjedhjet e fundit kishte marrë vetëm 7 mijë e 246 vota, të cilat nuk i kanë mjaftuar për t’u bërë deputet. Ai është profesor në Universitetin e Prishtinës në Departamentin e Kimisë.

Ndryshe, Vataj sa ishte deputet kishte arritur të regjistronte djalin, Atdheun, në Fakultetin e Mjekësisë përmes një vendimi të Ramë Bujës për pranimin e studentëve me shtetësi të huaj.

Qendra e Studentëve e Universitetit të Prishtinës, ka publikuar listën me emrat e studentëve të pranuar në konvikte.

Drejtues të Qendrës bëjnë të ditur se janë bërë të gjitha përgatitjet për akomodimin e studentëve, ndërkohë kapaciteti është për 3 mijë e 600 vende. Studentët kanë mundësi të ankohen në dy ditët e ardhshme, ankesat e të cilëve do të shqyrtohen nga një komision i veçantë.

Qendra e Studentëve të Universitetit të Prishtinës ka bërë të gjitha përgatitjet për fillimin e vitit të ri akademik, ku do të presë 3 mijë e 600 studentë, të cilët janë pranuar për banim në konvikte. Drejtori i Qendrës së Studentëve, Fatmir Sfishta, tha për Radio Kosovën, se konkurrenca ishte shumë e madhe, ku për 3 mijë e 600 vende kanë aplikuar rreth 8 mijë studentë.

“Kur ke kapacitet 3 mijë e 600 vende dhe kur ke numër kaq të madh të aplikuesve normal që presioni është evident. Vet fakti që ne jemi detyruar që nga tre studentë dy prej tyre janë refuzuar e një është pranuar është presion në veti. Por ne jemi detyruar që të zbatojmë kriteret që kemi. Sa i përket punëve teknike jemi të përgatitur që të presim këtë numër që kemi pranuar dhe çdo gjë është gati që studentët të vijnë të akomodohen”, tha ai.

Ndërkaq, studentët e pakënaqur me rezultatin, kanë mundësi të ankohen. Drejtori Sfishta bëri të ditur se afati i ankesave do të jetë dy ditë, ku më pas do të shqyrtohen nga një komision i veçantë.

“Komisioni i caktuar nga ne, në përbërje nga menaxhmenti i Qendrës, MASHT dhe Parlamenti i studentëve, që vlerësojnë ankesat, nëse ankesat janë të bazuara, atëherë studentët do të pranohen në Qendrën e Studentëve. Sigurojë që çdo ankesë që është e bazuar do ta m arrë përgjigjen e merituar”, tha ai.

Sfishta gjithashtu njoftoi se kanë marrë leje nga Komuna e Prishtinës për ndërtimin e një konvikti të ri me kapacitet prej 300 shtretër. Akomodimi i studentëve të pranuar në Qendrën Studentore do të fillojë më 29 shtator. Ndërkohë, sivjet janë ulur tarifat për banim në konvikte, ku nga 70 euro sa kanë paguar për banim dhe ushqim, tani studentët do të paguajnë nga 35 euro në muaj.

Përmes një njoftimi për media, rektori i UP-së, Ramadan Zejnullahu, ka sqaruar se nuk do të ketë konkurs për pranim studentësh në departamentin e matematikës pa u akredituar programi. Ai këtë sqarim e bëri pas keqinterpretimit në medie, siç thotë në sqarim, të deklarimeve të tij gjatë konferencës së djeshme.

Mediet raportuan se rektori i Universitetit të Prishtinës, Ramadan Zejnullahu, ka paralajmëruar hapjen e konkursit për programin e paakredituar të matematikës.

“Rektori nuk e ka bërë një paralajmërim të tillë, por, duke u përgjigjur në pyetjen rreth programit të matematikës, ka shpjeguar rrjedhën e ngjarjeve, e që mund të jetë keqkuptuar”, thuhet në njoftim.

Në njoftim thuhet se rektori ka dhënë shpjegime për disa vende të mbetura nga afati i parë, por jo për kandidatët e ri, pa u akredituar nga MASHT.

“Para se konkursi të nxjerrët në Senat, Universiteti ka dërguar në MASHT propozimin e konkursit plotësues ku figurojnë vendet e mbetura nga afati i parë dhe është propozuar të shpallet konkursi edhe për programin e matematikës me kusht që regjistrimi i kandidatëve të bëhet vetëm pas akreditimit të programit. MASHT ka miratuar gjithë konkursin, por jo edhe propozimin që ka të bëj me programin e matematikës”, thuhet më tutje në njoftimin lëshuar nga Rektorati.

Në raste të tilla, vendimi i MASHT është përfundimtar dhe rektori, sipas njoftimit, nuk ka pasur asnjë plan që të procedojë këtë pjesë të konkursit në mbledhjen e nesërme të Senatit.

“Pra, Senatit do t’i propozohet nesër konkursi pa programin e matematikës dhe është gabim nëse shpjegimi i detajuar që është dhënë sot interpretohet ndryshe”, thuhet në fund të njoftimit.

“Goditje nën brez”, kështu titullohet shkrimi që ish – kryeparlamentari Jakup Krasniqi e ka publikuar në llogarinë e tij në rrjetin social facebook, për t’iu përgjigjur një reagimi të studentëve të pavarur, që po kundërshtojnë zgjedhjen e rektorit të ri.

Studentët, që për Jakup Krasniqin janë ‘studentë të pavarur’, nuk po ia ndryshojnë mendimin se ata janë të ndikuar nga politika.

Krasniqi po ashtu u është përgjigjur këtyre studentëve edhe për regjistrimin e vajzës së tij në Universitet, që studentët pretendojnë se është bërë me ndërhyrje të tij.

Krasniqi, madje reagimin e studentëve e quan lloj primitivizmi.

Ky është reagimi i plotë i ish – kryeparlamentarit Jakup Krasniqi:

Tentimi i studentëve të “pavarur” te Universitetit “Hasan Prishtina”, për të ma mbyllur gojën, që mos të prononcohem për deformimet në shoqërinë tonë është një lloj primitivizmi.

Studentët e “pavarur” duhet ta dinë që 15 vjet, Shoqata e Veteranëve të Luftës ka dërguar lista me emra të shumtë për t’u regjistruar në fakultetet e Universitetit publik dhe asnjëherë nuk kanë reaguar.

Asnjëherë në jetën time nuk kam kërkuar që të fitoj diçka për kontributin tim të shkuar, të burgut apo të luftës, nëse nuk e kam merituar me kontributin tim në se paku në kohë të tashme. Pra nuk kam kërkuar që të avancohem për merita të burgut apo të luftës. Ata që kanë punuar me mua e dinë ketë. Sa i përket regjistrimit të vajzës sime në Fakultetin e Mjekësisë, nuk e konsideroj farë “mëkati”, mëkate të tilla do të kryeja për çdo fëmijë të Republikës sonë, për t’ia dhënë një mundësi për shkollim.

E them me përgjegjësi, asnjë e më asnjë ndërhyrje devijuese në dëm të arsimit për asnjë nivel të arsimit, e as për arsimin e lartë nuk e kam bërë në jetë time, përveç ndihmës së pakursyer, bile edhe me rreziqe të shumta për jetën time dhe më shumë se kaq. Ketë nuk e kam bërë as atëherë kur kam pasur pushtet, e as atëherë kur kam qenë student ( 1972 – 1976).

Kjo që e bënë studentët e “pavarur” ishte një “goditje nën brez”, por me goditje të ultë jam mësuar, jo më pak se tash e 33 vjet. I njoftoj studentët se asnjë goditje gjatë jetës sime politike mbi 40 vjeçare nuk e kam marrë për interesin tim a të familjes sime. As kjo goditja e “pavarur”, nuk ka ardhur pse kam mbrojtur interesin tim apo të ndonjë të afërmi, por pse kam kryer obligimin tim qytetar. Me vjen mirë që personalisht nuk e njohë rektorin e posazgjedhur të Universitetit “Hasan Prishtina” në Prishtinë.

Jam i lumtur që studentët e “pavarur” e paskan gjetur një “mëkat” timin të “madh”, regjistrimin e vajzës sime në Universitetin publik!? Në kohën kur njerëzit me pushtet kanë zgjedhje të tjera, për ç’gjë studentët e “pavarur” kanë heshtje varri!?

P. S.
Studentëve të “pavarur”, po ua tregoj dy fotografi. E para e vitit 1982 në Gjykatoren e Prishtinës dhe e dyta kuptohet vet.

Rektori i Universitetit të Prishtinës, Ramadan Zejnullahu, premtoi se do të luftojë pakompormis keqpërdorimet me të cilat ballafaqohet Universiteti i Prishtinës.

Në një konferencë për media, ai njoftoi për përgatitjet e fillimit të vitit akademik 2014/2015, i cili do të fillojë më 6 tetor. Ndërkaq, sa i përket konkursit plotësues për pranimin e studentëve të rinj, rektori Zejnullahu, tha se do të mblidhet senati i universitetit për të marrë vendimin për shpalljen e konkursit plotësues si dhe do të kompletohet ekipi i rektorit me prorektorë.

Rektori i Universitetit të Prishtinës, Ramadan Zejnullahu, në konferencën e parë për media ka premtuar se gjatë mandatit të tij do ta luftojë pa kompromise korrupsionin në Universitet.

Ai theksoi se do të denoncojë të gjitha keqpërdorimet sidomos ato gjatë afatit të regjistrimit të studenteve.

Rektori tha se do të bëjë përpjekje që ligjëratat të jenë cilësore, të mos ketë vonesa të profesorëve, kurse përpjekjet e tij në përgjithësi do të jenë për ta normalizuar gjendjen në Universitet.

Ndërkaq, sa i përket një grupi të studentëve të cilët kanë protestuar për shkarkimin e rektorit, Zejnullahu tha se ai është një grup i cili po përfiton nga një ambient jo i shëndoshë, duke shpërdoruar vetveten. Ai i ftoi studentët për debat për të gjitha problemet që ata shqetësohen.

Rektori Zejnullahu, gjithashtu tha se do të merren masa edhe për profesorët të cilët kanë nga dy kontrata pune. Po ashtu do të ketë edhe një hulumtim të punimeve shkencore, ku më pas Rektorati do t’i prezantojë edhe me statistika.