Lëvizja Fol ka vlerësuar se viti 2013, ka qenë vit i korrupsionit të lartë dhe efikasitet i ulët në luftimin e tij, nga institucionet përkatëse. FOL sot ka prezantuar statistikat vjetore të Policisë, Prokurorisë dhe Gjykatave në kuadër të Platformës së Statistikave Anti-Korrupsion dhe gjithashtu vendimet dhe veprimet e Kuvendit dhe Qeverisë së Kosovës si dhe Misionit Evropian të Sundimit të Ligjit EULEX në fushën e luftimit të korrupsionit në Kosovë për vitin 2013.

Fidan Kalaja, nga Lëvizja FOL, tha se gjatë vitit 2013, Policia e Kosovës për veprën penale të korrupsionit marrje e ryshfetit ka trajtuar gjithsej 57 raste, ku për 22 persona ka ngritur kallëzim penal dhe 12 persona janë arrestuar. Ndërsa, për veprën penale të korrupsionit dhënie e ryshfetit ka trajtuar gjatë këtij viti 43 raste, ku për 16 persona është ngritur kallëzim penal dhe 10 persona janë arrestuar. Derisa, për veprën penale të korrupsionit keqpërdorim i pozitës zyrtare Policia e Kosovës ka trajtuar 441 raste të korrupsionit, ku për 242 persona është ngritur kallëzim penal dhe 45 persona janë arrestuar.

“Prokuroria e Kosovës gjatë vitit 2013, për veprën penale të korrupsionit marrje e ryshfetit ka pasur gjithsej në punë lëndë në të cilat kanë qenë të implikuar 56 persona, ku nga këto në fund të vitit ka zgjidhur gjithsej lëndë në të cilat kanë qenë të implikuar 30 persona dhe në fund të periudhës kanë mbetur të pazgjidhura gjithsej lëndë në të cilat kanë qenë të implikuar 26 persona. Për veprën penale të korrupsionit dhënie e ryshfetit Prokuroria ka pasur gjithsej në punë lëndë në të cilat kanë qenë të implikuar 59 persona, ku nga këto lëndë që kanë implikuar 36 persona i ka zgjidhur ndërsa nga këto lëndë që kanë implikuar 23 persona janë të pazgjidhura në fund të vitit 2013. Dhe për veprën penale të korrupsionit keqpërdorim i pozitës zyrtare, Prokuroria e Kosovës ka pasur gjithsej në punë lëndë që kanë implikuar 1585 persona gjatë vitit 2013, ku nga këto vetëm janë zgjidhur lëndë që kanë implikuar vetëm 363 persona ndërsa lëndë që kanë implikuar 1222 persona kanë mbetur të pazgjidhura në fund të kësaj periudhe”, tha Kalaja.

Ndërsa sipas tij, përgjatë vitit 2013, Gjykatat e Kosovës për veprën penale të korrupsionit marrje e ryshfetit kanë pasur gjithsej në punë lëndë në të cilat kanë qenë të implikuar 122 persona, ku nga këto lëndë kanë zgjidhur lëndë në të cilat kanë qenë të implikuar vetëm 31 persona ndërsa lëndët ku kanë qenë të implikuar 91 persona kanë mbetur të pazgjidhura në fund të kësaj periudhe. Kurse, për veprën penale të korrupsionit dhënie e ryshfetit, Gjykatat e Kosovës kanë pasur në punë gjithsej lëndë në të cilat kanë qenë të implikuar 67 persona, ku lëndë në të cilat kanë qenë të implikuar vetëm 23 persona i kanë zgjidhur ndërsa lëndët ku kanë qenë të implikuar 44 persona janë të pazgjidhura në fund të vitit 2013. Dhe, për veprën penale të korrupsioni keqpërdorim i pozitës zyrtare, Gjykatat e Kosovës kanë pasur në punë gjithsej lëndë në të cilat kanë qenë të implikuar 603 persona gjatë vitit 2013, ku nga këto janë zgjidhur lëndë në të cilat kanë qenë të implikuar vetëm 66 persona ndërsa lëndët ku kanë qenë të implikuar 5 37 persona kanë mbetur të pazgjidhura në fund të kësaj periudhe.

Kalaja shtojë se përveç tri institucioneve të përfshira në këtë platformë, Lëvizja FOL ka bërë monitorimin e aktiviteteve anti-korrupsion edhe të tri institucioneve tjera siç janë Qeveria, Kuvendi dhe EULEX-i, sa i përket aktiviteteve të tyre në luftën kundër korrupsionit.

Sipas të gjeturave të Lëvizjes FOL, Qeveria e Kosovës përgjatë vitit 2013 ka nxjerrë gjithsej 427 vendime ku vetëm 4 vendime janë marrë në kuadër të luftës kundër korrupsion në krahasim me vitin 2012 ku 5 vendime kanë qenë në luftë kundër korrupsionit.

Ndërsa, Kuvendi i Kosovës nga 23 seanca plenare sa ka mbajtur gjithsej për vitin 2013, vetëm në 6 prej tyre kanë diskutuar për luftën kundër-korrupsion në krahasim me vitin 2012 ku në vetëm 3 seanca Kuvendi ka diskutuar për luftën anti-korrupsion.

Sipas statistikave anti-korrupsion për vitin 2013 nga EULEX-i, gjykatat e EULEX kanë shpallur vetëm 9 aktgjykime për raste të korrupsionit ndërsa prokuroria e EULEX gjatë vitit 2013 ka trajtuar 9 raste të reja, ka zhvilluar 29 hetime paraprake, ka pasur 15 hetime në vazhdim, ka ngritur 5 aktakuza, ka ndryshuar 2 aktakuza, dhe i janë konfirmuar 2 aktakuza. /PrizrenPress.com/

Kryetari i Partisë Konservatore të Kosovës, Munir Basha, vlerëson se në njëqind ditëshin e tretë të qeverisjesë, Ramadan Muja, kaloi në korridoret e gjykatës.  Sipas tij, edhe pas vendimit të gjykatës, në panik, Muja vazhdoi tutje me shkeljen e ligjit.

Basha thekson se spektri politik dhe qytetarët e Prizrenit këtë kohë e shoqëruan kryetarin e tyre: tabori qeveritar i shtanguar mos po dënohet ai, ndersa tabori opozitar dhe shoqeria civile ishin në pritje të verdiktit për kryetarin e komunës dhe në pritje të zgjedhjeve të jashtëzakonshme per kryetar komune.

“Natyrishtë që ky ambient nuk ishte i favorshëm për asnjë tabor. Në pritje të verdiktit, kryetari nuk e emroi drejtorët në 60 ditët e para. Kuvendi, pos mbledhjeve inauguruese, solemne dhe jashtezakonshme, nuk mbajti asnjë mbledhje ku u trajtuan problemet reale të qytetarëve”, thekson Basha. Sipas tij, shoqeria civile dhe qytetaret nuk e realizuan deri në fund pakenaqesinë e tyre për shkak të gjendjes së krijuar në komunë.

Basha vlerëson se ky 100 ditësh u karakterizua me pritje të percjellur me shpresë dhe ngërç.

“Dhe nëse kemi parasysh se procesi gjyqësor ndaj kryetarit të komunës ende vazhdon, bile i përforcuar edhe me një padi të ngritur për shkelje të radhës me rastin e vetë-pezullimit, atëherë është shumë e sigurtë që ngërçi qeverisës i “Qeverisë Muja 3″, do të vazhdojë me intenzitet akoma më të madh. Andaj, në këto kushte nuk mund të llogarisim që do të kemi një qeveri efikase dhe të suksesshme edhe muajt apo vitet e ardhshme që duhet të kalojmë në pritje të verdiktit përfundimtar të gjyqësisë”, vlerëson ai.

Nën presionin e aktivizimit të denimit në çdo moment, sipas Munir Bashës, nuk ka qeverisje të mirë.

“Me vazhdimin e qeverisjes në këto kushte, kryetari Ramadan Muja e traumatizon vetën dhe qytetarët e Prizrenit. Këtë nuk e meriton Prizreni. Nuk meriton as z. Muja. Andaj, me respektimin e vendimit të gjykatës, ai duhet të liroj edhe vetën edhe qytetarët!”, vlerëson Basha. /PrizrenPress.com/

Ish-pjesëtarët e Brigadës 138 “Agim Ramadani”, të Ushtrisë Çlirimtare të Kosovës, kanë shprehur pakënaqësitë e tyre me procesin e miratimit dhe me përmbajtjen përfundimtare të Ligjit për Veteranët.

Sipas komandantit të kësaj brigade, Rrustem Berisha, ky ligj dështon të jetë gjithëpërfshirës dhe të jetë shembull pozitiv i bashkimit kombëtar, siç ishte lufta e Ushtrisë Çlirimtare e Kosovës, duke mos i përfshirë të gjitha këto organizime, si ata që janë regjistruar në Shtabit të Përgjithshëm, Shtabeve të Zonave, Ministrisë së Mbrojtjes apo cilitdo organizim tjetër, raporton KTV.

Berisha bashkë me disa bashkëluftëtarë të tjerë, kanë pohuar se nëse nuk do të ndodhin përmirësime në këtë ligj, do të ndërpresin të gjitha ngjarjet dhe manifestimet e parapara në kuadër të përvjetorit të 15 të Betejës së Kosharës.

Krijimi i një Tribunali për krimet e supozuara të luftës së UÇK-së, shkel mbi sovranitetin e Kosovës dhe si i tillë do të kundërshtohet nga veteranët e UÇK-së. Kështu tha kryetari i Shoqatës së Veteraneve të Luftës, Muharrem Xhemajli, gjatë një takimi që zhvilluan sot me kryeministrin e Kosovës,Hashim Thaçi.

Kryeministri Thaçi theksoi se Kosova ka sistemin e drejtësisë për t’u përballur me çdo sfidë.

Gjatë këtij takimi, menjëherë pas miratimit të ligjit për veteranët, Thaçi pranoi se ky ligj do të bëjë që të gjithë ushtarët me emblemë të UÇK-së t’i gëzojnë të drejtat e tyre.

Kryetari i Shoqatës së Veteraneve të Luftës, Muharrem Xhemajli, tha se ky ligj nuk përjashton asnjë pjesëtar të UÇK-së që ka dhënë kontribut në luftë.

Thaçi ka folur edhe për verifikimin e pjesëtarëve të UÇK-së duke thënë se më së largu deri më një korrik verifikimi do të kryhet.

Ai tha se në asnjë mënyrë zgjedhjet nuk do të ndikojnë në punën e komisionit për verifikim. /Telegrafi/

Vetëvendosje! në Prizren vlerëson se kryetari i Prizrenit, Ramadan Muja, në 100 ditëshin e mandatit të tretë nuk ka bërë asgjë për qytetarët.

Asambleisti i VV-së, Arbër Rexhaj thotë se Muja gjatë kësaj kohe më shumë është marrë me seancat gjyqësore se sa me zgjidhjen e problemeve të qytetarëve.

“Nuk mundem ta vlëroj punën 100 ditore të prof. Mujës, sepse në këto 100 ditë ai nuk ka bërë asgjë përveç se është marrë me seancat gjyqësore që në fund rezultuan me denimin e tij me burg”, thotë Rexhaj.

Sipas tij, kryetari Ranmadan Muja për shkak përplasjeve të brendshme nuk ka arrit deri vonë t’i përzgjedhë edhe drejtorët e rinj të Ekzekutivit.

“Deri vonë me përplasje të brendshme, me interesa të klaneve brenda partiake, ai nuk ka mundur t’i përzgjedhë drejtorët e vetë”.

“Në Asamble ka futur në rend dite pika të cilat kanë të bëjnë me çeshtje solemne. Aasnjë hap e projekt konkret nuk e ka zhvilluar”.

“Nuk është marrë me qytetarin e qytetin. Në këtë 100 ditësh veç një gjë e mirë ka ndodhur, por jo nga Muja, por nga drejtësia. Ajo e ka thënë fjalën e vet dhe e ka dënuar Mujën, i cili në formë morale është dashur të dorëhiqet”. /PrizrenPress.com/

Deputetja e Kuvendit të Kosovës, Ganimete Musliu, e ka ftuar shefin e EULEX-it, Bernd Borchardt që të merr pjesë në ceremoninë përkujtimore të masakrës së Rezallës.

Me anë të një postimi në Facebook, Musliu i ka kërkuar Borchardt-it që të i bashkangjitet dhe ta përjetojë nga afër dhimbjen e saj dhe popullit të Kosovës.

Ajo ka thënë se ndoshta pas kësaj, Borchardt do të kuptojë se për kënd duhet te themelohen Tribunalet për krime lufte.

Ja postimi i plotë i Ganimete Musliut në Facebook:

“I nderuari z. Borchardt. Nesër në Drenicë përkujtohet masakra e Rezallës”.

“Përkujtohet gjenocidi serb mbi popullatën e pafajshme civile.”

“Z. Borchardt, po mbushen 15 vite qe në këtë fshat u vranë dhe u masakruan 88 shqiptarë”.

“U bënë 15 vite qe familjarët ende presin me 42 varre të hapura”.

“Si qytetare e kësaj treve, ju bëjë ftesë publike juve z. Borchardt që të merrni pjesë në këtë ceremoni përkujtimore.”

“Ejani dhe përjetoni për se afërmi dhimbjen e popullit tim. Ndoshta vetëm atëherë do të kuptoni se për kë duhet te themelohen Tribunalet për krime lufte!”.

Ceremonia mbahet ne Fshatin Rezallë Komuna e Skenderajt me 5 Prill Ora 12:00”.