Presidentja Jahjaga për arrestimet e fundit thotë se janë ndërmarrë për shkak të rrezikut që nuk i kanosej vetëm Kosovës. Hedh poshtë të ketë pasur presion ndërkombëtarë. Ajo fton qytetarët që të mos mbështesin një ideologji që është kundër idealeve, mbi të cilat është ndërtuar shteti i Kosovës.

Presidentja e Kosovës, Atifete Jahjaga, thotë se nuk ka pasur presion ndërkombëtar për inicimin e aksionit në arrestimin e mbi 40 të dyshuarve për përfshirje në radikalizëm dhe terrorizëm.

Ajo ka thënë se të gjithë janë të vetëdijshëm se ky kërcënim nuk e kanos vetëm Kosovën.

“Rreziku del përtej kontekstit tonë të brendshëm”, ka thënë në intervistën për gazetën Zëri, presidentja Jahjaga.

Për të arrestuarit, Jahjaga thotë se janë një grup i izoluar, individë të radikalizuar, të manipuluar , për të cilët ka dyshime të bazuara që janë reshtuar pranë grupeve terroriste, me qëllim që të kryejnë vepra terroriste dhe kriminale në Republikën e Kosovës dhe më gjerë.

“Është fjala për individë që kërcënojnë sigurinë tonë kombëtare”, ka thënë Jahjaga.

E para e vendit, bënë thirrje që të gjithë t’i kundërshtojnë këto ideologji, që shkojnë në dëm të vendit.

“Ashtu sikur institucionet e vendit edhe qytetarët e Kosovës të dënojnë një veprimtari dhe orientim të tillë që bie ndesh me vlerat dhe idealet, mbi të cilat e ndërtuam shtetin tonë”, ka thënë presidentja e Kosovës.

LDK-ja dhe partnerët e saj AAK e Nisma janë pajtuar që deputetja e LDK-së Vjosa Osmani të përfaqësojë Bllokun në përballjen gjyqësore më 22 gusht në Gjykatën Kushtetuese të Kosovës. Teutë Sahatqija, nënkryetare e LDK-së, tha se si koalicion jemi të përgatitur për përballje në kushtetuese me argumentet tona.

“Na është kërkuar që në gjykatë të përfaqësohemi më deputetë dhe koalicioni LDK-AAK-Nisma do të përfaqësohet në Gjykatën Kushtetuese me 22 gush nga deputetja Vjosa Osmani”, bëri të ditur për Botapress Sahatqija.

“Ne si koalicion LDK-AAK-Nisma, jemi të përgatitur për tu përballur në Gjykatën Kushtetuese me 22 gusht. Ne kemi argumentet të cilat janë në favor tonin dhe jemi të përgatitur mjaftueshëm për të mbrojtur dhe dëshmuar argumentet dhe të drejtën si koalicion pas zgjedhor dhe si grup parlamentar të mbështetur edhe nga subjektet tjera”, tha Sahatqija.

Ish-ministri i Administrimit të Pushtetit Lokal, Sadri Ferati, ka thënë se asociacioni i komunave me shumicë serbe duhet të jetë pa fuqi legjislative dhe ekzekutive.

“Asociacioni i komunave është organizim vullnetar, kështu edhe është thënë nga përfaqësuesit e delegacionit të Kosovës, prandaj duhet të mbetet si tillë. Duhet të jemi të qartë se asociacioni i komunave me shumicë serbe nuk duhet të ketë asnjë fuqi ekzekutive dhe legjislative”, ka deklaruar Ferati për “Epokën e re”.

Ai i ka vlerësuar të dëmshme tendencat e Serbisë për të hartuar statut të veçantë për asociacionin e komunave me shumicë serbe, me të cilin parashihet që arsimi dhe shëndetësia të mbesin në sistemin e saj. “Të gjitha çështjet e tjera që Serbia po tenton t’i zgjidhë nga asociacioni janë të dëmshme. Mendoj se edhe nëse ka diçka për t’u diskutuar ajo duhet gjithmonë të diskutohet me Prishtinën, por kurrsesi me asociacionin e komunave me shumicë serbe. Prandaj këto tendenca të Serbisë janë të dëmshme”, është shprehur Ferati.

Ai ka thënë se institucionet e Kosovës duhet të reagojnë ndaj këtyre tendencave dhe në asnjë mënyrë të mos lejojnë realizimin e tyre. “Republika e Kosovës jo vetëm se duhet të reagojë, por nuk duhet të lejojë që kjo të diskutohet për të qenë çështje e asociacionit të komunave me shumicë serbe ngaqë, siç dihet edhe me pakon e Ahtisarit, në sistemin arsimor dhe atë shëndetësor janë paraparë kompetenca të zgjeruara për këto komuna dhe janë shumë të mjaftueshme ato. Prandaj kjo nuk duhet të ndodhë që ato të menaxhohen nga asociacioni i komunave serbe ngase atëherë veç po ndryshon statusi i komunave veriore. Kjo do të jetë e dëmshme”, ka theksuar Ferati. Sipas tij, Serbia është duke tentuar të deformojë çdo gjë. “Bazuar në deklaratat e tyre, mund të lexohet se Serbia po konsideron se kjo çështje është një pjesë e punës. Dhe duke vazhduar kështu, Serbia gjithë procesin e dialogut më tutje do ta kushtëzojë me kompromise të vazhdueshme derisa në një moment të gjitha t’i deformojë”, ka deklaruar Ferati. Në këtë kontekst, Ferati ka thënë se Kosova duhet të ketë kujdes shumë të madh në mënyrë që me krijimin e asociacionit të komunave me shumicë serbe të mos lihet përshtypja se është formuar një qeveri apo një parlament. “Sa i përket funksionimit, mendoj se nuk duhet të lejohet derë e vogël që nëpërmjet asociacionit të komunave me shumicë serbe të lihet përshtypja se është formuar një qeveri apo ndonjë parlament. Në këtë drejtim duhet një kujdes i madh i Prishtinës që diçka e të tillë mos të ndodhë”, është shprehur Ferati, duke shtuar se ende ka paqartësi se çfarë asociacioni do të formohet. “Dokumenti nuk ka kaluar në Kuvend. Ky dokument është ndalur në komisionin në të cilin isha edhe unë. Pikërisht është ndal për këto çështje që po diskutohen sepse është kërkuar një qartësi se çfarë asociacioni të komunave do të ketë dhe cila do të jetë veprimtaria e tij konkrete. Presim që të funksionalizohet kuvendi, pastaj të vijë ai dokument për t’u miratuar”, ka thënë Ferati.

Ndërkohë, shefi i Zyrës për Kosovën në Qeverinë e Serbisë, Marko Gjuriq, një ditë më parë ka deklaruar se Qeveria e Serbisë është duke e hartuar një statut për krijimin e asociacionit të komunave me shumicë serbe në Kosovë, me të cilin do të parashihet që arsimi dhe shëndetësia të mbesin në sistemin e saj. “Ne duam që sa më parë të flasim me politikën shqiptare në Kosovë, që ta miratojmë statutin e asociacionit dhe të themelojmë atë. Kontribuuesit serbë të arsimit e të shëndetësisë në Kosovë paguhen nga Qeveria e Serbisë dhe Beogradi nuk e ka ndërmend ta ndalojë këtë. Kjo do të rregullohet edhe me anë të statutit të asociacionit të komunave serbe”, ka theksuar Gjuriq.

BIK-u, e pranon se duhet të ketë reforma, po jo vetëm kur ka “sherre apo konflikte”. Imamë dhe politikanë kosovarë kritikojnë tolerimin e hoxhallarëve kontroversë.

Arrestimet e ditëve të fundit të mbi 40 personave, që dyshohet se kanë lidhje me organizatat terroriste ISIS dhe Al Nusra, si dhe prangosja e një imami në Gjilan, i ka rikthyer debatet për Bashkësinë Islame të Kosovës dhe miratimin e Ligjit për Bashkësitë fetare.

Në përgjigjet e Zyrës për Informim të BIK-ut dërguar gazetës “Kosova Sot”, pohohet se si çdo institucion tjetër, qoftë fetar apo laik kudo në botë që ka nevojë për reforma, ashtu edhe BIK-u ka nevojë për reforma të sofistikuara.

“Por, reformat nuk duhet të ndodhin vetëm kur ndodhë ndonjë sherr apo konflikt, por ato duhet të ndodhin në vazhdimësi. Sidomos në kohët e sotme moderne kur po përballemi me zhvillime të hovshme shkencore, kulturore, politike, fetare, informative, teknologjike e tjera”, thuhet në përgjigjen e BIK-ut.

Por profesori i Studimeve Islame në Universitetin e Prishtinës dhe njëherësh kryetar i Sindikatës në BIK, imami Idriz Bilalli, thotë se përgjegjësi kryesor për këtë gjendje është myftiu Naim Tërnava, që nuk mori masa ndaj imamëve kontroversë.

“Ne si Sindikatë e Punëtorëve të Bashkësisë Islame, shqetësimin tonë për dukuri jo të mirë e kemi ngritur qysh herët – para katër pesë viteve – përmes Sindikatës i kemi bërë publike qëndrimet tona. Mirëpo, kjo është çështje e institucioneve të rendit dhe të sigurisë publike të vendit që kanë paraparë të ndërmarrin një hap të tillë”, ka thënë ai.

Edhe deputetja e LDK-së, Alma Lama thotë se, BIK-u ka toleruar imamë radikalë nëpër xhami, që nxisin urrejtje fetare, gjinore dhe kombëtare. Ndërsa sipas saj u takon besimtarëve të vlerësojnë nëse BIK-u po i përfaqëson interesat e tyre dhe a po e justifikojnë ekzistencën e tyre.

Ndërsa deputeti i Partisë së Drejtësisë, Gëzim Kelmendi, thotë se në Kosovë nuk kemi ende ligjin për bashkësi fetare, por sa i përket ekstremizmit, Kosova ka policinë, dhe Agjencinë për Inteligjencë, të cilat janë të gatshme të ballafaqohen me çdo rrezik potencial që i kanoset Kosovës.

Me dhjetëra herë kanë shkuar në Serbi për gjetjen e trupave shqiptare të zhdukura, ndërsa nuk u është paguar as ushqimi e as rruga.

Mëditjen e parë e kanë marrë në vitin 2010, që nga mbarimi i luftës. Para vetëm një jave ekipi kërkimor i të pagjeturve është pajisur me rroba pune dhe fotoaparat, shkruan Zëri.