Debatet lidhur me tolerancën brenda fetare dhe ndërfetare në Kosovë, të cilat iniciohen në media ose edhe në mjediset joformale, jo rrallë marrin hov për shkak të diskursit të debatuesve dhe krijojnë përshtypjen që toleranca ndërfetare, për të cilën shqiptarët krenohen, është buzë rrezikut, vlerësojnë ekspertët e çështjeve sociologjike në vend.

Profesor Ismajl Hasani, sociolog i religjionit, vlerëson se në debatet publike më tepër i kushtohet rëndësi sot tolerancës brenda një religjioni se sa atij ndërfetar.

Në mjaft raste, sipas tij, debatet e tilla i bëjnë problematike çështjet e caktuara, madje më tepër se sa që, siç thotë ai, ka nevojë të bëhen të tillë.

“Këtë e them për faktin se shqiptarët tradicionalisht e kanë rastin e tolerancës ndër konfesionale të kultivuar. Por, problemet e fundit që janë shfaqur brenda për brenda ndarjeve të ndryshme, do të thosha, sektariste, kanë krijuar probleme, të cilat shoqërinë kosovare nuk mund ta quajnë më si oazë të shfaqjes në kuptimin e tolerancës fetare. Ndërsa, sa i takon tolerancës ndër konfesionale, mendoj se në Kosovë nuk ka probleme”, shprehet Hasani.

Por, sociologu Shemsi Reçica, profesor në Universitetin e Prishtinës, vlerëson se kohët e fundit në Kosovë, kanë dalë në skenë, siç i quan ai, sekte fetare, për të cilat sipas tij, opinioni dhe qytetarët në Kosovë as që kanë pasur informata.

Ai thotë se shoqëria kosovare është hapur dhe si rrjedhojë në vend kanë depërtuar ndikimet e jashtme.

“Papunësia dhe varfëria, në njërën anë, por edhe ndikimet e jashtme, ardhjet e jashtme që shpesh nuk mund të kontrollohen në Kosovë, sigurisht që kanë ndikuar në hapjen e këtyre temave. Mund të them që tash duhet t’i kushtohet një vëmendje shumë më e madhe tolerancës ndërfetare te shqiptarët”.

“Nuk mjafton vetëm të krenohemi me një tolerancë ndërfetare që ka ekzistuar me parë. Për shembull, në Bashkësinë Islame, plasaritjet në kohën e fundit, për të mos thënë përçarjet, ndikimet e jashtme të disa sekteve fetare, të gjitha këto, kanë bërë që njerëzit t’i kthehen ose rikthehen edhe një herë kësaj teme”, thotë Reçica.

Në anën tjetër, profesor Hasani vlerëson se ndikim tejet të madh për t’iu dhënë, siç thotë ai, zjarr temave për besimet dhe tolerancën ndërmjet tyre, janë vetë klerikët fetarë.

“Temat shpirtërore janë shumë të ndjeshme. Bartësit ose të ashtuquajturit udhëheqësit shpirtëror të të gjitha konfesioneve janë njerëz, ata kryejnë edhe misionin e përkujdesjes ndaj besimtarëve”.

“Shpeshherë, këta njerëz që janë bartës shpirtëror dhe predikues të fesë, të veshur me fuqinë e autoritetit, nganjëherë tejkalojnë caqet e komunikimit edhe në raport ndërfetarë, por edhe në raport brenda fetar. Pikërisht, këtu paraqiten problemet dhe krijohet përshtypja e mos tolerancës”, thekson Hasani.

Ndryshe, profesor Reçica shpreh bindjen se temat, siç i quan ai, të nxehta, që kanë të bëjnë me religjionin, kryesisht po ndodhin brenda religjionit Islam dhe përfaqësuesve të këtij religjioni në vend.

Sipas tij, deri më tash, nuk ka pasur ndonjë plasaritje të madhe ndërmjet besimeve të ndryshme.

“Kjo, për mendimin tim, është një gjë pozitive që nuk lë vend për shqetësim, sepse sikur të kishte përçarje, sulme, mosmarrëveshje ndërmjet konfesioneve, kjo do të ishte më e rrezikshme. Mirëpo edhe kjo që brenda konfesionit fetar, brenda Bashkësisë Islame të Kosovës për shembull, këto plasaritjet, këto përçarjet, janë një tregues i qartë fillestar se kah mund të shkojnë këto zhvillime”.

“Do me thënë, në qoftë se këto zhvillime nuk kontrollohen, nuk frenohen dhe nuk pengohen, atëherë këto mund të shkaktojnë telashe jashtëzakonisht të mëdha për Kosovën, si një vend i vogël, i varfër dhe i pazhvilluar”, bën të ditur Reçica.

Profesor Reçica ka shprehur mendimin se të gjitha këto probleme janë evidente në vendet e izoluara dhe sipas tij, edhe Kosova llogaritet si vend i tillë, për shkak se qytetarët e saj nuk mund të lëvizin drejt Evropës.

Ai vlerëson se në qoftë se Bashkimi Evropian vazhdon të jetë i mbyllur ndaj shqiptarëve të Kosovës, atëherë ndikimet e jashtme, siç i ka quajtur ai, mund të kenë më tepër efekt te njerëzit në Kosovë, madje edhe për një orientim që nuk do t’iu konvenonte as vet kosovarëve. /rel/

Qeveria e Kosovës ka marrë vendim që të ndajë 100 mijë euro për organizimin e shënimit të gjashtë vjetorit të pavarësisë së Kosovës.

Me këtë rast, u formua edhe komisioni organizativ që do të udhëhiqet nga Ministri i FSK-së, Agim Çeku dhe pjesë e komisionit do të jenë edhe anëtar të institucioneve të tjera,transmeton indeksonline.

Po ashtu, në këtë mbledhje të qeverisë u mor vendimi për aplikimin e masave të reciprocitetit për regjimin e vizave me Bosnje dhe Hercegovinën

Lëvizja Vetëvendosje! Në Prizren vlerëson se propozimet e PDK-së nuk mund të paraqesin asnjë lloj ndryshimi.

“Përbërja politike e këtij organi të dalë nga zgjedhjet lokale të vitit që e lamë pas, fare pak dallon nga përbërja e kuvendit të kaluar. Përpos disa ndryshime në radhët opozitare, përbërja e forcave politike në pushtet është pothuajse e njejtë. Rrjedhimisht, në këtë seance të kuvendit të sapoformuar, çdo gjë mund të pritej përpos ndryshimit”,thuhet në komunikatën për media të VV-së në Prizren.

“Subjekti politik që aktualisht kryeson me numra në kuvend, nga radhët e veta propozoi Kujtim Gashin si kandidat për pozitën e kryesuesit. Ndër të tjera është theksuar se një propozim i tillë është bërë me qëllim të “sjelljes së një vizioni të ri e bashkëkohor të jetës parlamentare në qytet”.

“Sigurisht se një arsyetim si ky do të ishte i mirëseardhur nga të gjithë sikurse të mos e kishim pasur parasysh hipotekën e subjektit politik nga i cili propozohet”.

“Lëvizja Vetëvendosje! konsideron propozimet e ardhura nga radhët e PDK-së nuk mund të paraqesin asnjë lloj ndryshimi. Servimi i figurave të reja shkon në funksion të krijimit të iluzionit për një udhëheqjeje gjoja më të mirë se ç’ishte më parë, si dhe orvatje për ta shkëputur lidhjen që subjekti në fjalë ka me të kaluarën e errët të saj. Problemi i këtij subjekti nuk ka qenë asnjëherë mosha, shterja apo konsumimi i figurave politike te saj. Problemi i kësaj force politike ka qenë dhe mbetet mendësia kriminale nga e cila dominohet”.

“Rrjedhimisht, Lëvizja Vetëvendosje! nuk e ka mbështetur këtë kandidat dhe nuk do ta mbështeste asnjë propozim tjetër të mundshëm nga koalicioni qeverisës”

“Gjithashtu, duke shprehur keqardhje për mungesën e vullnetit të subjekteve opozitare për koordinim të përbashkët për këtë çështje, indiferenca dhe pasiviteti i të cilave rezultoi me dorëzim para pushtetit, grupi i këshilltarëve të VV-së ka braktisur seancën e sotme të Kuvendit Komunal./PrizrenPress.com/

Drejtoria për Hetime të Krimeve Ekonomike dhe Korrupsion (DHKEK), gjatë hetimit të një rasti kanë arrestuar katër persona, me dyshimin se kanë kryer veprën penale ‘keqpërdorim i pozitës apo autoritetit zyrtar’.

Arrestimi i të dyshuarve, nën dyshimin e bazuar se kanë kryer veprën penale ‘keqpërdorim i pozitës apo autoritetit zyrtar’, është realizuar me 21 janar 2014, me ç’rast janë shoqëruar katër të dyshuar zyrtarë të Kuvendit Komunal të Obiliqit dhe pronari i një kompanie private.

Gjatë procedurës hetimorejanë mbledhur dëshmi materiale, si rezultat i të cilave policia ka arrestuar katër të dyshuar: H.R., Z.K, Sh.B., B.P.

Të njëjtit janë intervistuar dhe pas prezantimit të provave materiale në Prokurorinë Themelore në Prishtinë, me vendim të të njëjtit, të dyshuarve u është caktuar masa e ndalimit për 48 orë deri në vazhdimin e procedurave të tjera gjyqësore.

Një i mitur është arrestuar nga policia, pasi që dyshohet se ka vjedhur ari në vlerë 1450 euro. Zëdhënësi i PK-së në Prizren,Hazir Berisha tha se pas denoncimit vjedhja është zbardhur nga policia brenda 24 orëve.

“Një i dyshuar i mitur, rreth orës 20:50 min, kishte hyrë në një shtëpi në fshatin Sllapuzhan dhe aty kishte vjedhur gjësende të arta në vlerë rreth 1450 euro”.
“Policia ka arritur që arin e vjedhur t’ia kthejë pronarit, ndërkaq gjatë hetimit të rastit është mësuar se i dyshuari ka bashkëvepruar edhe me të dyshuar të tjerë të cilët kanë kryer edhe vjedhje tjera kryesisht nga automjete”.

“Tri vjedhje të tilla tanimë veç janë dokumentuar. Me urdhër të prokurorit të shtetit i dyshuari është ndalur nën masën e arrestit policor ndërsa policia po heton edhe për implikime tjera në vepra penale të këtij grupi”./PrizrenPress.com/