Formimi i institucioneve të dala nga zgjedhjet lokale të vitit që lamë pas ende nuk ka përfunduar. Njëra nga dilemat e komunave të ndryshme të Kosovës vazhdon të mbetet nëse ato duhet të kenë ose jo nënkryetarë për komunitete dhe zëvendëskryesues. Kjo dilemë në komuna ka ardhur duke u bazuar në Ligjin për Vetëqeverisje Lokale i cili decidivisht e thekson detyrimin që komunat të cilat kanë mbi 10 për qind komunitete pakicë të emërojnë një nënkryetar për komunitete si dhe zëvendëskryesues të Kuvendit,shkruan tribuna.

Por, meqenëse në mandatin e kaluar, komuna si Ranillugu dhe disa të tjera, edhe pse nuk kanë pasur 10 për qind komunitete pakicë kanë emëruar nënkryetarë për komunitete. Këtë “avaz” edhe sivjet kanë filluar ta ndjekin disa komuna që në to nuk ka as 5 për qind komunitete pakicë.

Sekretari i Ministrisë së Administrimit të Pushtetit Lokal (MAPL v.j.), Besnik Osmani ka treguar për Tribunën se në mandatin e kaluar kishin nxjerrë një shkresë ligjore përmes së cilës i kishin lejuar komunat që nuk i kanë 10 për qind të komuniteteve, të kenë mundësi të emërojnë nënkryetarë për komunitete. Por për këtë mandat ai ka thënë se nuk kanë nxjerrë kurrfarë shkrese ende.

Së pari stabilizimi e më pas zgjidhja e problemit të veriut. Këto janë pritjet e një pjese të lidershipit serb në veri, të cilët nuk shohin arsye të besohet se me pjesëmarrjen e tyre në zgjedhjet e fundit, kanë pranuar pavarësinë dhe integrimin në shtetin e Kosovës. Ndërkaq, analistët politikë parashikojnë që integrimi, sado i brishtë i serbëve verior në institucione, nuk nënkupton edhe integrimin tyre në jetën shoqërore, me çka, sipas tyre, rrezikohet që kjo pjesë të mos integrohet për një kohë të gjatë apo ndoshta asnjëherë.

Njëri nga liderët e serbëve verior që ka pranuar zgjedhjet dhe marrjen e funksioneve sipas në pushtetin lokal, Oliver Ivanoviq, mendon se dialogu i Brukselit ka krijuar disa parakushte për normalizim të gjendjes në veri. Por, zgjidhja e vërtetë e problemit, sipas tij, do të kërkohet në një fazë të mëvonshme,shkruan tribuna.

“Veriu nuk është zgjidhur”, ka thënë Ivanoviq. Zgjidhja, sipas tij, duhet kërkuar dhe ky duhet të jetë një proces i gjatë. “Në atë moment që veriu të rregullohet, stabilizohet, po atë moment do të shtrohet çështja e statusit të tij”, ka vlerësuar ai.

Qysh me fillimin e këtij viti qytetarët e Prizrenit janë ndëshkuar nga ZRRUK me ngritjen e çmimit të ujit të pijes. Ndonëse është një shtrenjtim jo i madh, qytetarët mendojnë se ky veprim është i pa përballueshëm për xhepin e tyre në këtë kohë kur papunësia është e lartë nga njëra anë, e nga ana tjetër rrogat nuk janë aspak të favorshme. E përfaqësuesit e kompanisë së ujit mendojnë se kjo ngritje nuk i dëmton konsumatorët. Ndryshe për konsumatorët e amvisërisë çmimi është ngritur nga 0.35 €/m3 në 0.36 €/m3, kurse për bizneset e institucione tjera tarifa volumetrike është rritur

Qytetari Petrit Besimi nga Prizreni shprehet i mllefosur me vendimin për ngritjen e tarifave të ujit të pijes. Këtë lajm porsa e kishte marrë nga mjetet e informimit ky qytetar menjëherë ishte ankuar tek kompania regjionale e Ujit në Prizren. Petriti thotë se në këtë kohë kur papunësia është e lartë dhe pagat e të punësuarve nuk janë aspak të mira çmimet duhet të ulën e jo të pësojnë ngritje qysh në fillim vit.

E më të zëshmit për këtë vendim janë banorët e atyre lagjeve që përballen me reduktime të ashpra të ujit të pijes, të cilët në mungesë po i shfrytëzojnë puset për ta siguruar atë,shkruan rtk.

Mirëpo, menagjeri për konsumatorë i “Hidroregjionit Jugor”, në Prizren, Hysni Ahmeti mendon se ngritja e tarifave të ujit të pijes për një cent në metër kub nuk e dëmton gjepin e konsumatorit. Ai madje mendon se ky shtrenjtim do t’i vetëdijësojë konsumatorët që ta kursejnë ujin e pijshëm këtyre ditëve kur nevojat për konsum po shtohen.

Megjithatë, Ahmeti u bën thirrje qytetarëve që t’i paguajnë borxhet e akumuluara, të cilat vetëm për vitin 2013 sillen rreth një milion euro.

Ministri i Punëve të Jashtme, Enver Hoxhaj pas një jave qëndrimi në Evropë ka vazhduar turneun diplomatik dhe lobimin për njohjen e pavarësisë së Kosovës nga vendet afrikane. Shkarko me rezolucion më të madhShkarko me rezolucion më të madh.

Në agjendën e tij lobuese, ministri Hoxhaj ka takuar presidentin e Asamblesë së Kamerunit, Yeguie Djibril, nga i cili ka kërkuar njohjen e pavarësisë së Kosovës dhe mundësinë e vendosjes së marrëdhënieve diplomatike pas vendimit të mundshëm për njohjen e shtetit.

“Krahas agjendës evropiane dhe multilaterale të Kosovës për këtë vit si prioritet mbi prioritetet, sigurimi i njohjeve për Kosovën është në planet e mija dhe të Qeverisë së Kosovës për ta përmbyllur procesin e njohjes ndërkombëtare të Kosovës. Mund të them se zhvillova një takim shumë produktiv dhe në një të ardhme të afërt presim njohjen nga ky vend”, ka thënë Hoxhaj.

Nga ana e tij, presidenti Djibril u shpreh i kënaqur dhe optimist për të ardhmen e përbashkët ndërmjet vendeve pas vendimit për njohjen e Kosovës nga ana e Kamerunit.

Në shenjë falënderimi për njohjen e Kosovës nga ana e Nigerit, ministri Hoxhaj ka takuar edhe presidentin e Republikës së Nigerit, Mahamadou Issoufou.

Shefi i diplomacisë kosovare përgjatë nja jave ka vizituar Irlandën, Francën, Andorrën e Monakon për ta shtyrë përpara agjendën evropiane dhe të sigurimit të votave dhe mbështetjes politike për anëtarësim në organizata të ndryshme. /PrizrenPress.com/

Shpend Thaçi 20 vjeçar nga Prizreni, ka tetë muaj që është ndarë nga bashkëshortja Mirëjeta. Mospajtimet dhe botëkuptimet e ndryshme të bashkëshortësisë e kanë shtyrë atë që t’i jap fund martesës.

”Kurrë nuk kam menduar se do të vijë një ditë dhe të ndahem nga Mirëjeta, por fatkeqësisht tre muaj pas martesës na u shfaqen disa probleme dhe vendosa ma mirë me u nda me kohë se sa tërë jetën të përballem me to”, tregon Thaçi.

Ndonëse,nguron t’i tregojë publikisht arsyet e mosmarrëveshjet të cilat kanë ndikuar në ndarjen nga Mirëjeta, Shpedi, shprehet se njëra prej tyre ka qenë parashikimi i gabueshëm i bashkëjetesës. ”Pasi e kemi parë se gjërat nuk po rrjedhin ashtu siç e kishim parashikuar para martesës, jemi pajtuar që më mirë të ndahemi me kohë”, tregon ai, duke shtuar se në fillim martesën e ka shikuar në një prizëm krejt tjetër nga ajo që i ka ndodhur.

Thaçi, tregon se gjatë ndarjes nga Mirëjeta, është ndjerë shumë keq,ndërsa tash i është rikthyer jetës normale. ”Në fillim e kam marrë shumë tragjike ndarjen, mirëpo tash i jam rkthyer jetës, e cila më ka munguar gjatë martesës. Tash jam pajtuar se edhe ndarja me bashkëshorten është pjesë e jetës…”, shprehet ai. Në zyrën e ofiqarisë në Prizren,vitin e kaluar,sipas statistikave janë shkurorëzuar 244 çifte bashkëshortores.

Ruzhdi Hoxha, koordinator i kësaj drejtorie, thotë se krahasuar me vitin 2012 vitin e kaluar numri i divorcit ka shënuar rënie.

Të ndikuar nga plagët sociale, që përjetojnë çdo ditë, si papunësia, gjendja e rënduar ekonomike, mungesa e mirëqenies për të rritur fëmijë, emigrimi, mospërputhje karakteri, tradhti bashkëshortore dhe dhuna fizike, sipas Hoxhës, kanë detyruar 244 çifte bashkëshortorë t’i drejtohen Gjykatës, për t’i thënë lamtumirën e fundit martesës. “Ne nuk i dimë arsyet e sakta ,sepse ndarjet realizohen përmes gjykatës, mirëpo sipas rrëfimeve që i bëjnë gjatë shkurorëzimit në zyrën tonë, shumica prej tyre tregojnë se kjo ndodhë për shkak të mosmarrëveshjeve, kushteve të rënda ekonomike, emigrimi…”, thotë Hoxha.

Edhe avokati Esat Gutaj, thotë se njëra prej shkaqeve kryesore i ndarjeve nga martesa është baza e rëndë ekonomike dhe largimi i bashkëshortit nga shtëpia.

”Largimi i bashkëshortit nga Kosova, për një periudhë të gjatë , i cili ka mërguar për të siguruar ekzistencën ekonomike të familjes, dhe humbja e lidhshmërisë me bashkëshorten e kurorëzuar është njëri prej shumë faktorëve që ndikon në ndarjen e tyre”, shprehet ai.

Gutaj tregon se gjatë vitit të kaluar, ka ndodhur kur shkurorëzimi i bashkëshortëve është bërë edhe me marrëveshje. “Ka edhe shkurorëzime me marrëveshje, të cilët nuk tregojnë arsyet e ndarjes”, tregon ai. /PrizrenPress.com/

Numri i fëmijëve kosovarë që vuajnë nga sëmundjet malinje për vitin 2013 ka qenë më i madh, krahasuar me vitin 2012. Ndërkohë, përkundër asaj që trajtimi i këtyre sëmundjeve është i kushtueshëm, Ministria e Shëndetësisë i përgjigjet pak këtyre rasteve.

Numri i rasteve të regjistruara në Qendrën Klinike Universitare të Kosovës, për vitin 2013, ka qenë 48, ndërsa në vitin 2012, ishin 44 raste. Nga këto më së shumti dominonë sëmundja e leukemisë me 25 raste, ndërsa përqindja tjetër i përfshinë sëmundjet e tjera malinje siç janë, tumoret e trurit, tumoret solide, limfomat, e tumor e të tjerë, që i përkasin sëmundjes fëmijërore.

Ndërsa, në gjashtë mujorin e parë të vitit 2013 në Kosovë, por jo të trajtuara të gjitha në QKUK, ka pasur të regjistruarazyrtarisht 735 raste të sëmundjeve malinje te fëmijët.

Violeta Grajqevci, doktoreshë kryesore në Repartin e Hematologjisë, Leukemisë dhe Onkologjisë, në Klinikën e Pediatrisë në QKUK, ka thënë për Kosovapress, se rreth 70 për qind të rasteve të cilat janë lajmëruar në repartin e tyre janë trajtuar.

Ajo ka thënë se ka raste kur me një periudhë të caktuar kohore, pacientit mos t’i reagoi terapia dhe në këtë rast duhet të kërkojë trajtim jashtë vendit, për të shkuar me një protokoll shumë më agresiv ose që mund të vijë deri te transplantimi i palcës kockore.

Megjithëse, trajtimi i këtyre sëmundjeve bëhet edhe në QKUK me protokolle të avancuara si në gjithë Evropën, Grajqevci, ka thënë se në disa raste pacientët udhëzohen të dalin jashtë vendit për shërim.

Terapia për sëmundjet malinje kushton shumë, kurse familjeve në shumicën e rasteve i duhët që mjetet t’i sigurojë vet.

Zëdhënësi i Ministrisë së Shëndetësisë, Faik Hoti ka thënë për Kosovapress, se për ministrinë, prioritet kanë moshat e reja, sidomos trajtimi i fëmijëve, pasi shërimi i sëmundjeve malinje është jashtëzakonisht i kushtueshëm.

Hoti, ka thënë se rreth ¼ e buxhetit të përgjithshëm është i ndarë për farmaceutikën, mbulimin e nevojave të barnave, materialin shpenzues dhe citostatikë.

“Mund të them se rreth ¼ e buxhetit të përgjithshëm të ndarë për farmaceutikën, për mbulimin e nevojave të barnave, materialin shpenzues dhe citostatikë ka qenë e dedikuar vetëm për kategorinë e fundit, pra, për blerjen e citostatikëve me të cilët trajtohen personat e prekur nga sëmundjet malinje. Diku rreth 4 deri 6 milionë euro në kuadër të buxhetit prej 21 milionë euro që ka qenë për sektorin farmaceutik iu ka dedikuar vetëm këtyre sëmundjeve”, ka theksuar Hoti.

Sipas tij, duke qenë se këto janë sëmundje që kërkojnë trajtim afatgjatë dhe janë të kushtueshme, nuk janë të përmbushura të gjitha kërkesat. Ai ka thënë se për trajtimin e sëmundjeve jashtë vendit, ministria ofron deri në 30 mijë euro ndihmë, ndërsa, kur kjo shumë tejkalohet, Hoti ka thënë se është kompetencë ekskluzive e Qeverisë që të merret me këtë çështje.

Shkurte Hajdaraj, nëna e Ron Hajdaraj, i cili po shërohet në Klinikën Pediatrike në QKUK, nga një sëmundje malinje, e quajtur Medullapllastom ka thënë se djali i saj është diagnostifikuar në Tiranë, ndërsa pas operacionit terapinë ka ardhur ta vazhdoi në QKUK.

Ajo ka thënë për Kosovapress, se janë të kënaqur me trajtimin që iu bëhet nga mjekët, ndërsa ka thënë se që nga muaji qershor, kanë harxhuar rreth 10 mijë euro për blerjen e terapisë dhe barnave.

Edhe Doktoresha Grajqevci, ka shtuar se sa i përket kushteve në repart, janë shumë të mira, ndërsa sa i përket sigurimit të terapisë, ajo ka thënë se një pjesë sigurohet nga ana e barnatores qendrore, përmes Ministrisë së Shëndetësisë, kurse pjesën tjetër e cila mungon prej këtyre barnave, atëherë sigurohet qoftë përmes prindërve ose shoqatave humanitare që u dalin në ndihmë këtyre fëmijëve për sigurimin e citostatikëve.

Ndërkaq, zëdhënësi i ministrisë, ka thënë se sa i përket Ministrisë së Shëndetësisë, ajo ka qenë e fokusuar që përmes bordit për kontrollin e kancerit, ta hartoi planin nacional për kontrollin e këtyre sëmundjeve. Ai ka thënë se në vazhdim do të krijohet edhe plani i zbatimit të kësaj strategjie në mënyrë që në Kosovë përfundimisht të kenë të dhëna më të sakta apo të ketë edhe programe të ndryshme që lufta kundër sëmundjeve malinje të jetë më gjithëpërfshirëse.

Lirimi nga akuzat i 8 anëtarëve të ish Ushtrisë Jugosllave për vrasjen e 15 refugjatëve nga Kosova në fshatin Husaj pranë Rozhajës në Mal të Zi, ka shkaktuar reagime të ashpra në opinion. Verdikti i sjellur nga Gjykata e Lartë e Bjelo Poles , u cilësua si legalizim i krimit dhe i politikës gjenocide, por edhe si një krim kundër njerëzimit ku akterët kryesor mbesin të padëshkuar dhe në liri.

Avokati i viktimave, Velija Muriq në një deklaratë dhënë ”Zërit të Amerikës”, lirimin e të akuzuarëve e cilësoi si shqetësues dhe fajësoi gjyqësorin për politizim të skajshëm.

Muriq tha “se ky fakt sinjalizon që Mali i Zi nuk është i gatshëm dhe nuk dëshiron që të ballafaqohet me të kaluarën. Dështimet ligjore dhe pasiviteti i prokurorisë dhe gjykatave vendore kanë bërë që në Mal të Zi të mos ketë asnjë dënim për krime lufte”.

Velija Muriq , i cili njëherit është edhe kryetar i Odës së Avoketëve të Malit të Zi paralajmëroi se për qëndrimin e gjyqësorit në rastin e vrasjes së refugjatëve kosovarë do ti njoftojë të gjitha institucionet ndërkombëtare duke apeluar tek ata që të ndikojnë që krimet e luftës në Mal të Zi të trajtohen në mënyrë të drejtë.

Ndaj vendimit të Gjykatës së Lartë të Bjelo Poles reagoi Bashkësia Demokratike Boshnjake , e cila në një letër të hapur kritikon gjyqësorin në vend , i cili sipas tyre, po legalizon krimin dhe po mbështetë politikën gjenocide. Ndërkaq, partitë politike shqiptare si dhe Këshilli Nacional i Shqiptarëve në Mal të Zi nuk reaguan ndaj këtij rasti edhe pse shoqatat e shoqërisë civile disaherë kanë protestuar ndaj zvarritjes së aktgjykimit dhe ndaj pavarësisë së gjyqësorit.

Komandanti Predrag Strugar dhe shtatë oficerë të tjerë të ish Ushtrisë Jugosllave janë paditur për vrasjen e 15 civilëve shqiptarë nga Kosova dhe për plagosjen e pesë të tjerëve në prill dhe maj të vitit 1999, gjatë bombardimeve të NATO-së në zonën e Husajt afër kufirit të Malit të Zi me Kosovën.

Gjyqi për rastin e refugjatëve kosovarë ka filluar në vitin 2009 dhe është gjyqi i vetëm për krime lufte në Mal të Zi ku aktgjykimi për lirimin e të akuzuarëve u dha këto ditë.