Ende nuk dihet se çfarë do të ndodhë me teatrin e Operës dhe Baletit, i nisur para sa vitesh në Prishtinë. Zyrtarë të Ministrisë së Kulturës, i kanë thënë Radio Kosovës se projekti i Teatrit të Operës dhe Baletit është një problem i trashëguar vite më parë dhe ai i tillë ka mangësi të shumta. Në anën tjetër, firma e cila e ka bërë hartimin e projektit nuk ka dashur të prononcohet nëse do t`i bëjë përmirësimet në projekt apo jo.

E nisur para pesë vjetësh, objekti i Teatrit të Operës dhe Baletit “Ibrahim Rugova” ka mbetur një gropë e thellë, në të cilën këndojnë serenatë vetëm bretkosat. Kjo ka ndodhur për shkak se projektit nuk i është bërë revidimi me kohë.

Punimet ishin ndërprerë pas marrjes së mandatit të ministrit paraprak Lutfi Haziri, i cili kishte urdhëruar revidimin e tij. Por, revidimi ka nxjerrë probleme të shumta, duke rekomanduar që të mos vazhdojë realizimi i projektit, pa u përfshirë përmirësimet në të. Pavarësisht rekomandimeve që janë dalë nga raporti i revidimit, kompanitë që kanë hartuar projektin, “ARW PLANUNGSGEMEINSCHAFT”, nga Gjermania, si dhe ajo “RUBIKON Ltd” nga Malta, ka qenë dashur që brenda një viti t`i bëjnë përmirësimet.

Mirëpo, një gjë e tillë nuk ka ndodhur. Madje, pavarësisht insistimit të Radio Kosovës për të marrë një përgjigje, askush nga të dyja kompanitë nuk kanë dashur të prononcohen rreth kësaj çështje.

Ndërsa, Jehona Shyti, zëdhënëse e Ministrisë së Kulturës, deklaroi për Radio Kosovën se mos ndërhyrjet e firmave hartuese në përmirësim të projektit, e kanë vu në situatë të palakueshme Ministrinë.

“Ne si ministri nuk mund t`i japim dikujt tjetër që të përfshijë këto rekomandime për përmirësime në projekt sepse është ndërhyrje në të drejtën e autorit dhe ne fatkeqësisht si ministri kemi mbet në një situatë shumë të palakmueshme për fajin e dikujt që nuk e ka menduar me kohë këtë projekt”.

Shyti thekson se të gjitha këto probleme e kanë zvarritë projektin dhe e kanë sjellë Ministrinë në një situatë të mjegulluar, duke mos ditur se çfarë të bëjnë me projektin: të vazhdohet apo do të anulohet. Por, siç thekson ajo, problem mbetet edhe përcaktimi i buxhetit.

“Dhe tërë kësaj kur i shtohet edhe një problem tjetër, që ka të bëjë me planifikimin buxhetor atëherë kjo e ka bërë edhe më të pamundur vazhdimin e projektit. Planifikimi buxhetor ka qenë që nga 30 milion euro, sa ka kushtuar projekti, të realizohet çdo vit nga një milion euro gjë që është absurde”.

Defektet që janë nxjerrë nga raporti i revidimit kanë qenë esenciale për projektin. Raporti ka konstatuar probleme në akustikë dhe statikë të objektit.

Ndërkohë, baleti dhe filarmonia e Kosovës vazhdojnë të funksionojnë në kushte jo të mira, në mungesë të një hapësire adekuate për to.

Qeveria e Kosovës ka njoftuar se në mbledhjen e parë të përbashkët me Qeverinë e Shqipërisë janë shqyrtuar marrëveshja për ndërtimin e kalendarit të përbashkët kulturor, propozimi për bashkëfinancimin e Festivalit Ndërkombëtar të Filmit “DOKUFEST” në Prizren, dhe çështja e heqjes së taksës së TVSH-së apo taksës tjetër doganore për importin e librit nga Shqipëria.

Thellimi i bashkëpunimit kulturor ndërmjet Kosovës dhe Shqipërisë ka qenë ndër temat kryesore të takimit të parë të përbashkët të Qeverive të të dyja shteteve, që u mbajt në Prizren.

Siç merr vesh KultPlus, palët janë angazhuar që t`i intensifikojnë përpjekjet e përbashkëta për përafrimin politikave dhe organizimin institucional të ngjarjeve të përbashkëta kulturore në mënyrë që ato të mos mbesin çështje e organizimit spontan.

Sipas komunikatës së Qeverisë së Kosovës, në këtë mbledhje, janë shqyrtuar marrëveshja për bashkëpunim në fushën e kulturës dhe aktivitetet për ndërtimin e kalendarit të përbashkët kulturor, pastaj propozimi për bashkëfinancimin e Festivalit Ndërkombëtar të Filmit “DOKUFEST” në Prizren, dhe çështja e heqjes së taksës së TVSH-së apo taksës tjetër doganore për importin e librit nga Shqipëria.

Ndërsa Ministri i Kulturës Memli Krasniqi, përmes faqes së tij në facebook e ka vlerësuar mbledhjen e përbashkët të dy qeverive si një moment për të marr përgjegjësi të reja për avancimin e përgjithshëm të të dyja vendeve dhe kombit shqiptar.

Ndërkohë, ministria e Kulturës e Shqipërisë ka njoftuar se ministrja e Kulturës Mirela Kumbaro Furxhi gjatë takimit me homologun kosovar Memli Krasniqi në Prizren, ka diskutuar për vijimësinë e platformës së përbashkët të kalendarit artistik dhe detyrave të takimit të datës 21 nëntor 2013 në Tiranë.

Në vazhdën e kësaj Ministria e Kulturës e Shqipërisë paralajmëron se shumë shpejt, do të fillojnë përgatitjet për një takim të madh mes drejtuesve të institucioneve artistike Kosovë – Shqipëri për konkretizimin e kalendarit të përbashkët kulturor si dhe do të fillojnë analizat për kujdes dhe veprim të përbashkët për trashëgiminë kulturore.

“U vlerësuan veprimtaritë e deritanishme, në një afat të shkurtër kohor dhe u diskutua për aksione konkrete në vazhdim. Bashkëpunimi rajonal në fushën e kulturës është një nga prioritetet e Ministrisë së Kulturës por edhe e vetë Qeverisës së re të Shqipërisë”, thuhet në njoftimin e Ministrisë së Kulturës së Shqipërisë.

Kjo ministri thekson se në vazhdën e këtij bashkëpunimi synohet të krijohet një hapësire kulturore mbarëshqiptare e mbështetur në formë institucionale, ku hapësira kulturore e dy vendeve të trajtohet si një, por me më shumë qendra siç janë Tirana, Prishtina, por edhe të tjera ku do të duhej të komunikojnë lirshëm veprat artistike dhe kultura. Nuk i duhet lënë më spontanitetit, qarkullimi i veprave artistike dhe kulturës, theksohet në njoftimin e Ministrisë së Kulturës pas mbledhjes së takimit të parë të përbashkët mes Qeverisë së Kosovës dhe asaj të Shqipërisë në Prizren.

Studentët, banorë të konvikteve në Qendrën e Studentëve në Prishtinë, ankohen për kushte jo të mira.

Edhe pse drejtori i Qendrës thotë se kanë përfunduar disa projekte me të cilat janë përmirësuar dukshëm kushtet e banimit, shumica e studentëve ankohen për mungesë të ujit të ngrohtë dhe ngrohjes në dhoma.

Drejtori i Qendrës së Studentëve, Fatmir Sfishta, ka thënë për Kosovapress, se deri më tani, ka arritur që ta përmirësoj dukshëm çështjen e furnizimit me energji elektrike, pasi, sipas tij, në të shumtën e rasteve, rryma nuk ndalet, pasi kjo Qendër është ndër furnizuesit e veçantë të KEDS-i. Kurse për ujë, ai thotë se është duke u bërë furnizimi më i mirë i mundshëm, duke e pasur parasysh gjendjen e përgjithshme të furnizimit në qytet.

Sfishta, thotë se studentët nuk kanë të drejtë të ankohen për ngrohje, edhe pse nuk e mohon se studentët, ndonjëherë, përdorin edhe ngrohëse me rrymë në dhomat e tyre.

“Nuk mund të them që s’ka, por në masën më të madhe mund të them që studentët edhe nuk kanë nevojë që të kenë ngrohje alternative me rrymë. Në rast se ne e vërejmë se ka ngrohje alternative ne ua konfiskojmë ato ngrohje, sepse nuk kanë nevojë. Në rastet kur e shohim se nuk funksionon, ne jemi të vetëdijshëm që studenti nuk bënë ta ketë ftohtë, i lejojmë, mirëpo, në shumicën e rasteve, tash edhe nuk po ndodh që studentët të kenë probleme me ngrohje”, është shprehur Sfishta.

Megjithë hapësirën e kufizuar, banimi ilegal i një numri të studentëve, e bënë Qendrën edhe më të ngarkuar.

“Sa i përket ilegalëve, ne nga ana njerëzore e dimë që ka ilegal, ka pas ilegalë, ne me vetëdije thuajse i kemi lejuar që në ndonjë dhomë ta mbajë ndonjë ilegal për strehim, por, sa i përket anës humanitare. Mirëpo, e kam vërejtur një dukuri që studentët e kanë marrë një ilegal për ta përgjysmuar pagesën, ta ndajnë pagesën që i bëjnë Qendrës së Studentëve dhe nga aspekti humanitar është kthyer në aspektin material dhe, gjatë këtij viti, e kam ndaluar që të mos ketë më ilegal në Qendrën e Studentëve, sepse, edhe problemet që ndodhshin, ndodhshin kryesisht në ato dhoma, në ato korridore, ku numri i ilegalëve është më i madhë”, është shprehur Sfishta.

Mirëpo, njëjtë nuk thonë edhe ata që banojnë dhe i përjetojnë vet kushtet e banimit në këto konvikte.

Driton Beqiraj, student i vitit të tretë në Fakultetin Ekonomik dhe banues në konviktin numër 2 në Qendrën e Studentëve, tregon për Kosovapress, se kushtet e banimit nuk janë aq të mira sa flitet.

“Kushtet e banimit nuk janë edhe aq të mira ashtu si thonë që janë. Uji i ngrohtë, shembull, nuk vjen, nuk janë disa kushte tjera, domethënë, nuk i plotësojnë bash mirë ato kushte që ata thonë. Ujë të nxehtë nuk ka, ngrohtorja e qytetit nuk punon, tash a është këtu problemi a në qytet nuk e dimë… vetëm me nxehëse ilegale se kështu nuk ka shansë m’u ngrohë”, thotë ai.

Beqiraj thotë se nuk është i kënaqur as me ushqimin që u servohet në mensë. Siç tregon ai, servohet ushqim i pashijshëm dhe i pakonsumueshëm.

E, ajo që më së paku mungon në konvikte, sipas Beqirajt, është zhurma dhe jodiciplina e studentëve.

“Ka probleme shembull në 2 apo 3 të natës. Nuk i flihet dikujt, zgjohet, duke bërtitur, askujt s’i pengon nëse na zgjon neve një kat, apo krejt një konvikt, nuk është problem për të. Recepsionisti vetëm rri aty, nuk ka kurrfarë efekti që me thënë diçka, hiq nuk u bëhet vonë për atë punë”, tregon Driton Beqiraj.

Mirëpo, ndryshe nga Dritoni mendon një bashkëbanuese në këtë Qendër.

Miradije Buliqi, studente e vitit të parë në Fakultetin Filozofik dhe banore e konviktit numër 3, thotë se është e kënaqur me kushtet që i ofrohen në këtë Qendër.

“Kushtet në Qendrën Studentore, pra në konviktet studentore, janë mjaft të mira, si nga drejtoria e Qendrës Studentore të gjitha kushtet i përmbush, për shembull, me energji elektrike 24 orë, me ngrohje qendrore, edhe pse ka pak mangësi në ngrohje qendrore, me ujë mirë, me higjienë shumë mirë, dhe kushtet në përgjithësi janë shumë të mira”.

Ajo thotë se nuk i pengojnë banorët ilegal. Për të është normale që një studentë të strehojë dikë në dhomën e tij ose saj.

Qendra e Studentëve në Prishtinë i ka 7 konvikte me rreth 3600 vende, ndërsa në vitin e ardhshëm pritet të fillojë edhe ndërtimi i konviktit numër 8.

Kurse, në mensën e studentëve, aktualisht janë të abonuar rreth 4500 studentë, pasi në mensë kanë të drejtë të abonohen edhe studentë, të cilët nuk janë banorë të Qendrës.

Çmimi për banim në konvikt, për një muaj, kushton 40 euro, ndërsa në mensë 30 euro. /Kosovapress/