Një person ka humbur jetën në një aksident trafiku në në Shirokë të Suharekës. Zëdhënësi i PK-së në Prizren, Hazir Berisha tha se aksidenti ka ndodhur rreth orës 01:50 minuta, në dalje të fshatit Shirokë në drejtim të Prizrenit.“Nga ky aksident ka humbur jetën një person, ndërsa lëndime trupore kanë pësuar pesë persona,prej tyre dy me lëndime të rënda trupore të cilët janë ndalur në spital për trajtim të më tejmë dhe tre të lehta”

“Sipas hetimeve fillestare nga vendi i ngjarjes thuhet se në veturën e llojit BMË udhëtonin gjashtë djem të rinj. Gjatë ngasjes, në momentet kritike shoferi nuk e ka përshtatur shpejtësinë e lëvizjes me kushtet dhe rrethanat në rrugë me ç’rast e ka goditur një qen endacak i cili kishte dalë në rrugë, pastaj vetura humb kontrollin duke u bartur anash për 72 metra e më pas del nga rruga duke u rrokullisur njëherë dhe pas 92 metrave ndalet”

“Të lënduarve u ka dalë në ndihmë emergjenca e Shtëpisë së Shëndetit në Suharekë duke i dërguar në Spitalin e Prizrenit disa nga të lënduarit, ndërsa disa janë dërguar nga kalimtar rasti. Prokurori i shtetit i cili kishte qenë i pranishëm në vendin e ngjarjes ka urdhëruar që trupi i pa jetë të dërgohet për autopsi”./PrizrenPress.com/

Ish kryeadministratori i Kombeve të Bashkuara në Kosovë dhe ish kryediplomati francez, Bernard Kouchner në një shkrim autorial në të përditshmen The Wall Street Journal, e quan politikën e jashtme të Brukselit një ‘triumf diplomatik të Evropës në Kosovë,’ për rolin ndërmjetësues në negociatat midis Prishtinës dhe Beogradit.
“E shtuna shënoi përvjetorin e Marrëveshjes së Brukselit, e ndërmjetësuar nga BE për normalizimin marrdhënieneve në mes të Serbisë dhe Kosovës,” shkruan Kouchner, ndërsa reflekton në (mos)veprimet e
mëhershme kur BE bëri pak për të parandaluar luftërat e viteve në 90-ta në Ballkan.

“Si përfaqësues i posaçëm i Sekretarit të Përgjithshëm të OKB-së në Kosovë 1999-2001, kam kuptuar se pas një konfrontimi të tillë të përgjakshëm nuk kishte asnjë perspektivë për fillim të bashkëjetesës apo pajtimit midis serbëve dhe shqiptarëve të Kosovës dhe ishte e qartë se duhej kohë para se të dy palët do të mund të binden për të folur me njëri-tjetrin”.

Kouchner pastaj përmend ndryshimet që ndodhën në Serbi më 2012 kur qeveria e koalicionit e udhëhequr nga kryeministri, Ivica Daçiq dhe zëvendëskryeministri Aleksandar Vuçiq, ishte e bindur se fati i Serbisë ishte në BE dhe se parakusht i saj në negociatat me Brukselin ishte normalizimi i marrëdhënieve me Prishtinën.

Kryedimplomati francez shkruan për takimet midis kryeministrit të Kosovës, Hashim Thaçi dhe atij serb, Daçiq të cilët pas nëntë raundesh të negociatave nën udhëheqjen e BE-së, nënshkruan marrëveshjen 15 pikëshe për normalizimin e marrëdhënieve më 19 prill, 2013.

“Duke marrë parasysh thellësinë e armiqësisë në të dy anët, marrëveshja me të drejtë mund të quhet një pikë kthese historike, ndërkaq udhëheqësit në Beograd dhe në Prishtinë meritojnë lavdata që treguan guxim politik për marrjen e vendimeve jopopullore. Marrëveshja nuk do të kishte qenë e mundur pa BE-në e cila palët i mbante të fokusuara tek shpërblimi: fillim negociatash anëtarësimi për Serbinë dhe marrëveshja e Stabilizim Asocimit me Kosovën”.

Në fund të këtij shkrimi autorial në të përditshmen njujorkeze ish kryediplomati francez shkruan se “marrëveshja e Brukselit tregoi se me udhëheqje dhe stimuj të duhur edhe konfliktet më të rënda mund të
shqyrtohen dhe të negociohet rruga përpara.”

Nëse dëshirojmë që zgjedhjet parlamentare të mbahen në fund të majit ose fillim të qershorit, atëherë shpërbërja e Kuvendit duhet të ndodhë këtë javë
Analisti politik Shkëlzen Maliqi ka vlerësuar se Kuvendi i Kosovës duhet të shpërbëhet këtë javë nëse ka disponim nga partitë politike që zgjedhjet të mbahen në fund të majit apo në fillim të qershorit – shkruan Epoka e re.

“Nëse nuk shpërndahet Kuvendi këtë javë, atëherë mund të ndodhë të shtyhen zgjedhjet deri kah fundi i qershorit”, ka thënë Maliqi, duke vlerësuar se do të ishte më mirë që deputetët e kësaj legjislature të vendosnin për themelimin e Gjykatës Speciale dhe transformimin e FSK-së në Forca të Armatosura.

Duke folur për shanset e partive politike për fitore në zgjedhjet parlamentare, Maliqi ka thënë se Hashim Thaçi e ka shansin më të madh për të triumfuar përballë kundërkandidatëve.

“Mendoj se Thaçi e ka shansin të fitojë edhe një mandat, sepse po duket më i gjindshmi dhe është duke punuar më së shumti”, ka thënë Maliqi.

/Epoka e re

Kuvendit do t’i shkojë nga Presidenca materiali i munguar për seancën e së mërkurës. Të martën Kabineti qeveritar do të mblidhet për ta aprovuar dhe proceduar në Legjislativ Projektligjin për ratifikimin e marrëveshjes ndërkombëtare mes Republikës së Kosovës dhe BE-së mbi Misionin e Bashkimit Europian për sundim të ligjit në Kosovë
Qeveria është dorëzuar para presidentes Atifete Jahjaga.

Të martën Kabineti qeveritar do të mblidhet për ta aprovuar dhe proceduar për në Kuvend Projektligjin për ratifikimin e marrëveshjes ndërkombëtare mes Republikës së Kosovës dhe Bashkimit Evropian mbi Misionin e Bashkimit Evropian për sundim të ligjit në Kosovë – shkruan Koha Ditore.

Projektligji përpos që ia zgjat mandatin EULEX-it, përbën bazën legale për krijimin e Gjykatës Speciale që do të trajtojë akuzat e mundshme që dalin nga raporti i senatorit Dick Marty, i miratuar edhe nga Këshilli i Evropës.

Ekzekutivi ka refuzuar deri tash të marrë rol në krijimin e kësaj gjykate. Në fund është dorëzuar në betejën me Presidencën, që ishte përcaktuar të mos e sponsorizojë Projektligjin për në Kuvend.

(Koha Ditore)

Naim Maloku thotë se vazhdon të ketë një respekt të veçantë për ish subjektin e tij, AAK-në. Maloku sot edhe zyrtarisht iu bashkua partisw së Behgjet Pacollit, AKR-së.

Ai në një prononcim për Indeksonline vlerësoi se deklaratat e deputetit të Daut Haradinajt se “largimi i tij nga AAK-ja është një problem me pak për këtë parti” janë një thjesht një mendim personal i Haradinajt dhe se këto deklarata nuk ndikojnë në prishjen e “marrëdhënieve të mira” me AAK-në.

“Është mendim I tij personal, unë e çmoj shumë atë njeri, e sidomos në kohën e luftës ku të dy kemi marrë pjesë”, ka thënë shkurt Maloku.

Ndërkaq, aderimin e tij në AKR, Maloku e ka arsyetuar duke thënë se përfomanca e mirë qeverisëse e ministrave dhe kryetarëve që vijnë nga ajo parti e ka shtyrë që ti bashkohet siç ka thënë ai “ partisë që ka prioritet zhvillimin e vendit”.

“Që 3 vjet e kam vrojtuar AKR-në, e cila e ka në fokus zhvillimin ekonomik. Më ka shtyrë përformanca e ministrave dhe kryetarëve të AKR-së për një qasje pozitive për vendin”, është shprehur Maloku.

E për “fatin” e AAK-së nëse do të kalojë pragun zgjedhor ose jo në zgjedhjet e ardhshme nacionale, ai nuk ka dashur që të komentojë shumë duke thënë shkurt se qytetarët do të vendosin për këtë.

“Unë e çmoj AAK-në për politikat e sigurisë dhe infrastrukturës meqë, janë shumë të rëndësishme për vendin, andaj unë do të kem një bashkëpunim dhe shkëmbime të ideve të vazhdueshme me ketë parti për të mirën e vendit”, tha Maloku.