Sekretari organizativ i Vetëvendosje’s, Dardan Molliqaj ka kërkuar që Kosova të shkojë në zgjedhje të parakohshme parlamentare. Sipas tij, caktimit i datës së zgjedhjeve nuk varet nga përfundimi i reformës zgjedhore.

Në këtë kontekst, Molliqaj ka thënë për “Epoka e Re” se opozita i ka numrat për ta rrëzuar Qeverinë aktuale.

“Lëvizja Vetëvendosje! Është e gatshme për zgjedhje kurdo që mbahen. Si në qershor, po ashtu edhe në shtator janë kohë të përshtatshme për ne, vetëm se jemi të bindur se kjo Qeveri duhet të rrëzohet nga opozita e jo ajo ta rrëzojë veten”.

“Jemi për zgjedhje të parakohshme prej pozitës, kur opozita do ta rrëzonte Qeverinë duke pasur parasysh se edhe votat i ka në parlament për një veprim të tillë. Zgjedhjet e parakohshme parlamentare janë të domosdoshme, të paktën për dy arsye”.

“E para, sa më gjatë që kjo Qeveri ta qeverisë vendin aq më shumë dëm i bëhet interesit të shtetit dhe qytetarit. E dyta, pas gjithë këtyre dëmeve që ia ka bërë Qeveria Kosovës, duke pasur parasysh edhe faktin se opozita i ka edhe numrat për ta rrëzuar atë”. ka thënë ai për “Epoka e re”.

Dardan Molliqaj, Sekretar Organizativ i Lëvizjes VetëvendosjeDardan Molliqaj, Sekretar Organizativ i Lëvizjes Vetëvendosje
Përgjegjësinë më të madhe se pse kjo Qeveri po shkon me mandate të plotë, ai ia adreson Lidhjes Demokratike të Kosovës.

“Është krejt e pakuptimtë që Qeveria të vendosë se kur dhe si duhet të mbahen zgjedhjet”.

“Përgjegjësinë më të madhe, se pse kjo Qeveri po shkon me mandate pothuajse të plotë, e ka LDK’ja, sepse ky subjekt në radhë të parë ka mundësuar formimin e Qeverisë Thaçi 2, pastaj bashkë me AAK’në deri më sot po ia mundësojnë vazhdimin e qeverisjes Hashim Thaçit”.

Por, në këtë faj e ka futur edhe Aleancën për Ardhmërinë e Kosovës, duke thënë se edhe këta bashkë me LDK’në po i mundësojnë vazhdimin e qeverisjes Hashim Thaçit.

“Pastaj bashkë me AAK’në deri më sot po ia mundësojnë vazhdimin e qeverisjes Hashim Thaçit. Në këtë kuptim, për të gjitha të këqijat që i kanë ndodhur Kosovës gjatë kësaj Qeverie ne e mbajmë fajtor Qeverinë dhe përgjegjëse LDK’në dhe AAK’në”.

Molliqaj ka vlerësuar se i tërë angazhimi rreth reformës zgjedhore është duke u bërë që minoriteteve në Kosovë t’u sigurohen edhe për një mandate vendet e rezervuara në Kuvendin e Kosovës. Në këtë drejtim ai ka thënë se nuk ka nevojë as për reformë dhe as për vazhdimin e vendeve të rezervuara.

“Siç dihet tashmë, nuk po bëhet asnjë reformë në sistemin zgjedhor, krejt çka po del si rezultat i këtyre angazhimeve, është tentimi për vazhdimin, të paktën edhe për një mandate të ulëseve të rezervuara për minoritetet në Kuvendin e Kosovës”.

“Kosova nuk ka nevojë as për vazhdimin e këtyre ulëseve dhe as për reformë zgjedhore, por për disa ndryshime në procesin e administrimit të zgjedhjeve. Dhe, në këtë kuptim nuk kemi çka me pritë për reformë”.

Kryetari i Organizatës së Veteranëve të Luftës së UÇK’së, Muharrem Xhemjali ka thënë se nëse ligji për luftën e UÇK’së nuk miratohet deri më 10 mars në Kuvendin e Kosovës, atëherë veteranët do të dalin në protesta për t’i kërkuar të drejtat e tyre.
Nëse edhe kjo nuk bën punë, Xhemjali ka thënë se do ta kenë mundësinë e fundit për tu organizuar politikisht, pasi sipas tij ashtu-kështu 2014 është vit i zgjedhjeve të përgjithshme në Kosovë.
“Këtë vit janë zgjedhjet parlamentare. Nëse i shterim të gjitha mundësitë dhe Ligji nuk miratohet, atëherë pse të mos mendojmë të organizohemi edhe politikisht, në mënyrë që të kemi një përfaqësim më dinjitoz. Pra të dimë se kujt t’i besohet vota jonë për t’i ngritur e rregulluar edhe këtë çështje”, ka thënë Xhemjali për Epokën e Re.

Agjencia e Pyjeve ka paditur kryetarin e komisionit Parlamentar për Pylltari, Nait Hasanin.
Hasani është paditur pasi që për shfrytëzimin e një prone në fshatin Brod të Dragashit, ai nuk ka paguar qira, ashtu siç ishte paraparë me kontratë.

Në vitin 2009 deputeti Hasani kishte kërkuar nga AKP që tija mundësojë dhënien në shfrytëzim të një prone dhe një objekti të Shoqatës së Gjahtarëve me sipërfaqe prej rreth 37 ari kundrejt një qiraje vjetore prej 735 eurosh, përkatësisht 0.20 cent për metër katror, apo rreth 60 euro në muaj, shkruan Zëri.

AKP ia kishte pranuar kërkesën Hasanit, mirëpo pa dhënë detaje se në çfarë rrethana është nënshkruar marrëveshja. Agjencia nuk ka bërë të ditur nëse në atë kohë për shfrytëzimin e pronës së Shoqatës së Gjahtarëve, ka pas apo jo tender të hapur publik.

Zgjedhjet lokale posa kanë përfunduar, por partitë politike nuk kanë shumë kohë për pushim, pasi këtë vit janë zgjedhjet nacionale. Kryetari i Lëvizjes Vetëvendosje Albin Kurti, fushatën e ka filluar jashtë Kosovës.

Ai bashkë me aktivistë të tjerë po qëndron në Londër të Anglisë, ku po takohet me komunitetin shqiptarë atje. Në një takim ai ka kërkuar nga mërgimtarët që ta shfrytëzojnë të drejtën e tyre për të votuar në zgjedhjet nacionale, të cilat do të mbahen në mesin e këtij viti, shkruan Reporteri.

Kurti ka ftuar ata që të votojnë duke thënë se më shumë se sa qytetarët që jetojnë në Kosovë, mërgata e dëshiron ndryshimin, sepse e din se si është të jetohet mirë. “Ju këtu e dini se si është të jetohet mirë. Ne atje, duket se kemi harruar për këtë”, ka thënë Kurti.

Ai ndër të tjera ka thënë se mërgata meriton më shumë të drejta se sa ka aktualisht, pasi duke iu referuar regjistrimit të fundit të popullsisë, Kurti ka thënë se një e treta e qytetarëve të Kosovës jetojnë jashtë vendit.

Lideri i Lëvizjes Vetëvendosje, u ka kërkuar bashkatdhetarëve, që paratë e tyre të mos i harxhojnë duke blerë shtëpi e banesa në Kosovë, por ato t’i investojnë në arsimimin e fëmijëve të tyre.

Nënkryetari i Aleancës për Ardhmërinë e Kosovës, Ahmet Isufi, në një konferencë për shtyp tha sot se partia e tij kërkesat e veteranëve të luftës së UÇK-së, do të plotësohen nga qeveria e ardhshme, “që do të udhëhiqet nga Ramush Haradinaj”.

Ndaj kësaj deklarate, ka reaguar shkurt ministri i Forcës së Sigurisë, Agim Çeku, në profilin e tij në Facebook.

“Kërkesat e veteranëve do të plotësohen me ligj shumë shpejt dhe nga kjo Qeveri e udhëhequr nga kryeministri Hashim Thaçi”, ka shkruar Çeku.