Kryeministri Hashim Thaçi, njëherit kryetari i PDK-së, është shprehur optimist se PDK do të vazhdojë të qeverisë edhe pas zgjedhjeve të ardhshme parlamentare që pritet të mbahen këtë vit.

“Sapo filluam vitin 2014, që ndër të tjera do jetë edhe vit elektoral i zgjedhjeve nacionale. Partia Demokratike e Kosovës vazhdon e sigurt me besimin e qytetarëve, të jetë partia e parë në nivel vendit”, ka shkruar kreu i PDK-së, Hashim Thaçi sot, në profilin e tij në Facebook.

“PDK punon me optimizmin dhe besimin për fitoren e sigurtë në zgjedhjet nacionale të këtij viti. PDK duke qenë partia më e madhe e qendrës së dhjathtë në Kosovë, do t’i kultivon vlerat tona tradicionale dhe vlerat themelore të së djathtës europiane si familja, shteti i së drejtës, tregu i lirë dhe orientimi i paluhatshëm Euro-Atlantik”.

Sipas Thaçit, PDK do të korrë fitore edhe më 2014. /PrizrenPress.com/

Ahmet Isufi thotë se qëndrimi i partisë së tij është që Kosova duhet të tërhiqet nga bisedimet me Serbinë. Sipas tij, ky proces ka degraduar dhe si i tillë s’do ta ketë mbështetjen e AAK’së. Ai paralajmëron që së shpejti AAK do të dalë me qëndrim të prerë.

Nënkryetari i Aleancës për Ardhmërinë e Kosovës, Ahmet Isufi, thotë se procesi i bisedimeve politike Kosovë-Serbi është duke u degraduar dhe si i tillë nuk do ta ketë më mbështetjen e AAK’së.

Në një prononcim për lajmi.net, Isufi pohon se qëndrimi i partisë së tij është që Kosova duhet të tërhiqet nga bisedimet.

“Duke e parë se procesi ka degraduar dhe po mbahen takime të cilat vetëm po përsëriten dhe janë bërë më shumë kurtuazi sesa zbatim i marrëveshjeve, atëherë Kosova duhet të tërhiqet nga këto bisedime dhe ky është qëndrimi ynë”.

“Ne vetëm jemi në fillim të vitit dhe nuk e kemi pasur temë deri më tani brenda kuadrit të partisë. Megjithatë, do të kemi një analizë të këtij procesi, gjatë këtyre ditëve, e do ta kemi qëndrimin tonë”.

“Me vetë faktin që procesi ka degraduar, atëherë nuk kemi asnjë arsye që ta mbështesim një dialog të tillë, i cili ka kaluar në absurd”.

AAK ka mbështetur deri më tash Dialogun në Bruksel dhe është përfaqësuar nga Nënkryetari i Parë i saj, Blerim Shala.

Zyrtarë të kësaj partie, sa herë që janë prononcuar lidhur me Dialogun, kanë pohuar se Blerim Shala është duke bërë një punë të madhe në këtë proces, njësoj siç ai ka marrë lëvdata për punën e tij edhe nga Kryeministri Hashim Thaçi.

Ndërkohë qëndrimi i AAK’së për Dialogun duket se po ndryshon, e në opinion është përfolur edhe mundësia e tërheqjes së Nënkryetarit Blerim Shala nga ky proces.

Ahmet Isufi, megjithatë, nuk ka dhënë ndonjë përgjigje të qartë lidhur me këtë.

“Normalisht do ta kemi vlerësimin dhe do t’i bëjmë veprimet e duhura”, ka thënë ai.

Marrëveshja e 19 Prillit e arritur në Bruksel mes Kryeministrit të Kosovës, Hashim Thaçi dhe atij serb Ivica Dacic, kishte marrë mbështetjen e dy partive opozitare LDK dhe AAK, me përjashtim të Vetëvendosjes.

Por, Ahmet Isufi shpjegon se partia e tij i ka dhënë mbështetje këtij procesi, në mënyrë që vendi të përfitojë nga këto bisedime.

“Ne i kemi dhënë mbështetje bisedimeve, në mënyrë që Kosova të përfitojë nga këto bisedime, duke mos luajtur nga qëndrimet e veta”.

“Meqë kemi një degradim dhe humbje të interesave të Kosovës, atëherë nuk kemi arsye që më ta përkrahim një proces të tillë”.

“Nuk mund të them asgjë më tepër përveç se në bazë të analizës që do ta bëjmë, do ta kemi një qëndrim të prerë për këtë çështje”.

Të enjten, në një intervistë për Epoka e Re, lideri i Aleancës për Ardhmërinë e Kosovës, Ramush Haradinaj, duke folur për Dialogun e Brukselit, është shprehur se partia e tij po kërkon që ta largojë Kosovën nga një proces, i cili, sipas tij, po shkon drejt abuzimit.

Drejtuesja e Fondit për të Drejtën Humanitare në Beograd, Natasha Kandic, ka vlerësuar se bisedimet në mes Kosovës dhe Serbisë mund të japin rezultat për fatin e 1700 personave të pagjetur.

Në një intervistë për “Koha Ditore” ajo ka vlerësuar se kjo çështje e cila po del se është diskutuar veç një herë në Bruksel, duhet të merret më seriozisht nga të dyja palët Kosova dhe Serbia.

Madje ajo ka vlerësuar se nuk ka pasur asnjë arsye që të ndërpriten gërmimet në Rashkë, ky dyshohet se janë rreth 250 viktima të luftës në Kosovë.

Ndërkohë është e pakënaqur me epilogun e proceseve gjyqësore që janë zhvilluar në Beograd për krime të luftës që janë bërë në Kosovë.

Gjithashtu ka thënë se EULEX veproi gabimisht kur e liroi kryetarin e Skenderajt Sami Lushtakun për ta bërë betimin.

Në Kosovë çdo ditë e më shumë po hapen diskutime e debate për fenë, ndërsa kontribut të madh në këtë drejtim po japin edhe rrjetet sociale ku më së miri klerikë fetarë, persona të ndryshëm, por edhe personalitet publike po japin përshtypjet e tyre që shume shpesh po nxisin debate të ashpra mes grupacioneve ekstreme, e të cilët kur reagojnë nuk zgjedhin fjalët për ta sulmuar individin që kritikojnë qasjen e tyre.

Debati i fundit është hapur nga deklaratat e kreut të AAK-së, Ramush Haradinaj. “Nuk i respektoj flliqtanat me mjekra”, ka thënë Haradinaj gjatë një interviste televizive për të shtuar se i respekton të gjitha besimet fetare në Kosovë, por qytetarët e këtij vendi sipas tij janë shqiptarë.

Por, debatet të tilla kanë filluar të marrin zjarr edhe nga prijësit fetarë dhe intelektualë të shquar në vend, të cilët kanë filluar të lëshojnë “shkëndija”, se çka është feja myslimane, ajo katolike, cila është feja më e vjetër e çështje të tilla

Të zgjedhur me votën e popullit, zyrtar të lartë komunal, ata nga sistemi gjyqësor, doganierë, nga administrata tatimore si dhe udhëheqës dhe drejtues të kompanive publike, polic e ata nga institucione tjera, të gjithë janë hetuar gjatë vitit që e lamë pas nga Prokuroria Themelore e Gjilanit.
Sipas kryeprokurorit Jetish Maloku janë paraqitur plot 63 kallëzime penale dhe mbi 90 persona të dyshuar se kanë qenë të përfshirë në vepra penale të krimit ekonomik.

Nga mbi 90 për qind e këtyre rasteve kanë pushuar hetimet, krejt në mungesë të provave gjatë hetimeve që janë bërë, shkruan Zëri.

Ai tha se të gjitha këto raste janë hetuar për korrupsion, krim të organizuar, lloje të ndryshme të trafikimit e kontrabandës.

Me prioritet sipas tij janë trajtuar shpërdorimet e detyrës zyrtare dhe veprat e korrupsionit.

“Në hetime kanë qenë të përfshirë zyrtar të lartë komunal dhe sistemi gjyqësor”./Zeri/