Adidas ka deklaruar se po e rishikon partneritetin e saj me reperin Kanye West, disa ditë pasi ai u shfaq me një bluzë ku shkruante “White Lives Matter” në Javën e Modës në Paris.
Kompania nuk e përmendi polemikën, por tha se “partneritetet e suksesshme janë të rrënjosura në respektin reciprok dhe vlerat e përbashkëta”.
Reperi dhe stilisti u përgjigj në Instagram, duke pretenduar se firma i “vjedhi” dizajnet e tij, raportoi BBC-ja të premten. Ky postim tani duket se është fshirë nga reperi.
Adidas i tha BBC-së se kishte marrë vendimin për të vënë në shqyrtim partneritetin pas “përpjekjeve të përsëritura për të zgjidhur privatisht situatën”.
Një zëdhënës i kompanisë gjermane të veshjeve sportive tha gjithashtu se “partneriteti Adidas Yeezy është një nga bashkëpunimet më të suksesshme në historinë e industrisë sonë”.
Në fillim të kësaj jave, Yeezy ai u kritikua pasi prezantoi një koleksion në Javën e Modës në Paris që përfshinte bluza me sloganin “White Lives Matter”.
Fraza “Black Lives Matter”, e cila përfaqëson kundërshtimin ndaj racizmit dhe brutalitetit të policisë, u përdor gjerësisht pasi George Floyd, një zezak i paarmatosur, u vra nga një oficer policie në Minneapolis në verën e vitit 2020.