Në gjykimin kundër Abdullah Thaçit i akuzuarit për zbulim të fshehtësisë zyrtare, të hënën vazhdoi dëshminë Arbër Rexhaj nga Lëvizja Vetëvendosje.
Dëshmitari Rexhaj sërish para trupit gjykues dëshmoi se i akuzuari Abdullah Thaçi nuk i kishte ofruar Lëvizjes Vetëvendosje dokumentet me të cilat Vetëvendosje kishte ngritur kallëzimin penal.
“Ne këto dokumente, direkt siç thotë avokati nuk i kemi marrë nga Abdullah Thaçi, ato i kemi gjetur si zakonisht ashtu siç gjejmë edhe dokumente të tjera, pranë zyrës së Lëvizjes Vetëvendosje”, tha ai.
Në pyetjen e të akuzuarit se a kanë qenë të nënvizuara transaksionet e pranuara nga Vetëvendosje, dëshmitari tha se nuk i kujtohej që në momentin e pranimit të kenë qenë të nënvizuara.
“Më duket se kur kanë ardhur dokumentet prej sekretarit… më duket se kanë qenë të bardha, të paprekura”, shtoi Rexhaj.
Përfaqësuesi i autorizuar i bankës, avokati Florin Vërtopi, e ka pyetur dëshmitarin nëse ka shkëmbyer sms me të akuzuarin Abdullah Thaçin, por ai tha se nuk i kujtohet.
Avokati Vërtopi e njoftoi trupin gjykues se vendimi nga seanca e kaluar që prokurori të sjellë kallëzimin penal nuk është realizuar.
“Edhe tani kërkova nga prokurori i shtetit, i cili e zëvendëson prokurorin e çështjes, mirëpo ky vendim nuk u realizua, kuptohet për arsye se prokurori zëvendësues nuk ka pasur mundësi që ta përgatit lëndën”, tha ia.
Trupi gjykues mori vendim me të cilin e obligoi prokurorinë që në afat prej tre ditësh t’ia sjellë trupit gjykues materialin e kërkuar, si dhe dokumentacionin me të cilin ishte ngritur kallëzimi penal. Gjithashtu, trupi gjykues vendosi që kjo dosje të kërkohet nga zyra qendrore e Lëvizjes Vetëvendosje në Prishtinë si dhe në zyrën e saj në Prizren.
Seanca e radhës do të mbahet më 22 shtator 2015, ku pos Arbër Rexhajt, në cilësinë e dëshmitarëve do të dëgjohen drejtori i arsimit Nexhat Çoçaj dhe mësimdhënësi Bekim Thaçi./kallxo.com/