Mësuesit që kanë pretenduar çmimin “Shaban Jashari” e që nuk e kanë fituar atë, nuk kanë shumë arsye të ndihen keq. Së paku, keqardhje nuk duhet të ndjejnë ata që nuk kanë një librezë të Partisë Demokratike të Kosovës. Ndonëse libreza partiake nuk ka qenë kusht për marrjen e çmimit “Shaban Jashari”, që ndahet për mësuesin e ‘vitit’ nga Ministria e Arsimit, Shkencës dhe Teknologjisë, sivjet një çmim i tillë i ka takuar pikërisht një aktivisteje të PDK-së – mësimdhënëses Beatrisa Demiri.
Ajo, përveç se është mësuese në Shkollën Fillore dhe të Mesme të Ulët “Mihal Grameno” në Rahovec, është edhe këshilltare e Partisë Demokratike të Kosovës në komunën e Rahovecit. Kjo vërtetohet me të hyrë në uebfaqen e Komunës së Rahovecit, e cila udhëhiqet nga Idriz Vehapi i PDK-së. Në këtë uebfaqe janë paraqitur të dhënat e mësueses – këshilltare. Kjo e fundit sipas të dhënave zyrtare të prezantuara në uebfaqen e Komunës së Rahovecit, është e lindur më 11 janar të vitit 1983 në Prizren, është e martuar dhe ka dy fëmijë,shkruan Tribuna.
Gazeta në momentin që ka mësuar se mësuesja Beatrisa Demiri është këshilltare komunale e Partisë Demokratike të Kosovës, ka provuar të kontaktojë me kryetarin e Komunës së Rahovecit, Idriz Vehapin, për ta pyetur se cila ka qenë arsyeja e nominimit të kësaj mësimdhënëse për çmimin “Shaban Jashari”, duke pasur parasysh moshën e saj të re dhe pozitën e këshilltares politike