Gjykata Themelore në Prizren, të hënën, e ka shpallur të pafajshëm drejtorin e Drejtorisë Komunale për Arsim në Komunën e Suharekës, Sherif Berisha, i cili akuzohej se ka keqpërdorur pozitën e tij zyrtare, duke mos e ekzekutuar një vendim të Sektorit të Inspeksionit për Arsim (SIA).
Kryetari i trupit gjykues, Xheladin Osmani, duke shpallur aktgjykimin, ka thënë se i akuzuari lirohet nga akuza sepse nuk është arritur të provohet se ai ka kryer veprën penale me të cilën ngarkohet.
Osmani tutje ka sqaruar se trupi gjykues gjatë shqyrtimit të shkresave të lëndës, i ka kushtuar rëndësi të veçantë vendimit të lëshuar nga Ministria e Arsimit, Shkencës dhe Teknologjisë (MASHT) me të cilin e ka anuluar vendimin e SIA-së, të cilin, Berisha akuzohej se nuk e ka zbatuar.
Ndryshe, në dhjetor 2016, Prokuroria Themelore në Prizren, kishte ngritur aktakuzë ndaj Sherif Berishës, të cilin e akuzonte për keqpërdorim të detyrës apo autoritetit zyrtar, duke mos e zbatuar një vendim të Sektorit të Inspeksionit për Arsim.
Sipas aktakuzës, i akuzuari Berisha, në cilësinë e drejtorit të Drejtorisë Komunale të Arsimit në Suharekë, nuk e kishte respektuar një rekomandim të SIA në Prizren, për anulimin e konkursit për mësimdhënës.
SIA kishte rekomanduar që konkursi për rekrutimin e mësimdhënësve për shkollën e mesme profesionale “Abdyl Rama” në Suharekë, të anulohet dhe të ri-shpallet në afat prej 8 ditësh.
Organit i akuzës pretendonte se i akuzuari kishte kryer veprën penale të keqpërdorimit të detyrës zyrtare dhe se kishte shkelur rëndë të drejtat e personave tjerë, konkurrues në konkursin në fjalë.
Sherif Berisha është gjykuar edhe në një rast tjetër penal, ku është gjetur fajtor dhe është dënuar me 4 mijë euro gjobë, nën akuzën se ka punësuar, pa konkurs, rreth 9 mësimdhënës në shkollat e Komunës së Suharekës.