Analisti Halil Matoshi nuk mendon se Lista Serbe, që në zgjedhjet e 8 qershorit doli me më së shumti deputetë nga të gjitha partitë e komuniteteve, do të ketë rolin kryesor në formimin e Qeverisë së Kosovës.
Në një prononcim për Politiko.net, Matoshi thotë se pavarësisht se kush me kë do ta krijojë Qeverinë, Lista Serbe do të jetë pjesë e Ekzekutivit.
Megjithatë, ai mendon se rolin e Kingmaker’it po e merr Lëvizja e Kurtit, pa të cilën thotë se do të jetë e vështirë të sigurohen numrat nga cilido kamp.
“Jo, nuk e shoh Listen Serbe si ‘Kingmaker’, sepse komunitetet jo shumicë e kanë të drejtën kushtetuese që të jenë pjesë e Qeverise së Kosovës, prandaj ata këtë të drejtë mund ta realizojnë në secilin variant qeverisës, pra ata do të jenë pjesë e ekzekutivit pa marrë para sysh se kush me kë e krijon Qeverinë e Kosovës”.
“Rolin e ‘Kingmaker’it’ në konfigurimin politik kosovar po e merr Lëvizja Vetëvendosje, pa të cilën, në të ardhmën, duket se asnjëri bllok nuk do të mund të krijojë Qeverinë”.
E udhëhequr dhe e formuar nga Beogradi, Lista Serbe që për herë të parë mori pjesë në zgjedhjet parlamentare, ka 9 deputetë në Kuvendin e Kosovës.
Së bashku me minoritetet tjera në seancën e tensionuar konstituive të 17 korrikut, ata votuan pro zgjedhjes së Isa Mustafës, Kryeparlamentar, post ky që pas u pezullua përkohësisht nga Gjykata Kushtetuese, pas kërkesës së deputetëve të Partisë Demokratike të Kosovës.
Me hyrjen e Listës në Kuvend është thënë se Beogradi do ta dirigjonte Qeverinë e Kosovës, në rast se në përbërjen e saj nuk do të kishte një shumicë shqiptare.
Por, Halil Matoshi mendon ndryshe.
Thotë se këto janë ekzagjerime të shtetit serb, sepse, sipas tij, asgjë nuk ka ndryshuar në qeverisjen e Kosovës pas zgjedhjeve të 8 qershorit.
“Përfaqësuesit e komuniteteve jo shumicë në Kosovë kanë qenë pjesë e të gjitha qeverive të vendit që nga paslufta e këtej. Dhe Lista Serbe nuk bën përjashtim, ajo nuk mundet ta dirigjojë me asgjë Qeverinë e Kosovës, pos që natyrisht do t’i realizojë të drejtat e veta kushtetuese”.
“E mira është se kjo listë i pranon institucionet shtetërore kosovare dhe kontributi i saj pritet të jetë konstruktiv dhe i baraspeshuar”.