Blerim Begaj dhe Bali Krasniqi akuzohen se në bashkëkryerje kanë bërë shpërdorim të detyrës zyrtare dhe marrje të ryshfetit.
Begaj në kohën kur akuzohet për kryerjen e këtyre veprave penale ishte drejtor në Qendrën për Punë Sociale të Malishevës, ndërsa Bali Krasniqi punëtor i kësaj qendreje.
Prokuroria Themelore e Gjakovës akuzon këta dy zyrtarë se kërkuan para nga një i interesuar për adoptimin e një fëmije.
“Blerim Begaj në cilësinë e drejtorit të Qendrës për Punë Sociale në Malishevë dhe Bali Krasniqi si punëtor social i kësaj qendreje duke shfrytëzuar pozitën e tyre zyrtare kanë keqpërdorur detyrën për përfitime të kundërligjshme të dobisë pasurore për vete, në atë mënyrë që nga Sami Omura kanë kërkuar fillimisht shumën prej 1000 eurosh, e kur ta adoptojë fëmijën A.Z. edhe shumën prej 10.000 eurosh, ashtu që kanë marrë nga i dëmtuari shumën prej 1000 eurove,” thuhet në aktakuzë.
Gjatë këtij shqyrtimi u dëgjuan dy dëshmitarë, Zyrafete Mustafa dhe Jusuf Vranesi, ndërsa të akuzuarit u mbrojtën në heshtje.
I dëmtuari Sami Omura, I cili kishte propozuar si dëshmitare Zyrafete Mustafën tha se dëshmitarja po e fsheh të vërtetën dhe se ai posedon prova ku e ka incizuar bisedën telefonike me të.
“Ndoshta ka emocione dhe sun tregon drejt, e keni incizimin ne kasetë dhe muni me ndëgju, aty asht zani jem dhe zani i ksajna ne telefon, incizimet i kam ba vetë prej menes teme,” deklaroi Omura.
Gjykata këto prova të të dëmtuarit i shpalli të papranueshme me arsyetimin se nuk i plotësojnë kushtet ligjore për t’u trajtuar si prova.
Gjatë këtij shqyrtimi u dëgjuan disa video-incizime të propozuara më parë në aktakuzë nga prokuroria.
Fjalën përfundimtare palët do ta japin më 22 korrik. /Kallxo.com/