Ditëve të fundit, Komuna e Rahovecit është përballur me temperatura të ulëta dhe ngrica, të cilat kanë shkaktuar dëme të konsiderueshme në sektorin bujqësor, përcjell PrizrenPress.
Në bashkëpunim me Departamentin e Vreshtarisë të MBPZHR-së, ekipet profesionale janë në terren për të bërë një vlerësim të saktë të dëmeve. Nga të dhënat paraprake, kryetari i komunës Smajl Latifi theksoi: “Dëmet më të mëdha janë në kultivarët e hershëm të rrushit, me theks të veçantë rrushi i tryezës, që në disa parcela humbjet shkojnë deri në 90%.”
Përveç vreshtave, janë prekur rëndë edhe kulturat tjera bujqësore. Sipas Latifit, “Pemëtaria, ndonëse jo shumë e zhvilluar në territorin tonë, ka pësuar dëme të mëdha nga ngricat pranverore.” Po ashtu, “Dëme të theksuara janë evidentuar edhe në sektorin e perimekulturës, veçanërisht te patatja e hershme.”
Përkundër dëmeve të pësuara, kryetari i Komunës ka apeluar për vazhdimin e procesëve agroteknikë, duke shtuar: “Apelojmë që proceset agroteknike të vazhdojnë, për të ruajtur vitalitetin e bimëve për vitin e ardhshëm tek kulturat shumëvjeçare.”
Latifi gjithashtu ka theksuar mundësinë e ndikimit afatgjatë të kësaj fatkeqësie: “Ndikimi i kësaj fatkeqësie natyrore, për fat të keq, mund të reflektohet edhe në vitin 2026.”
Komuna e Rahovecit qëndron pranë fermerëve, duke bërë fillimisht vlerësimin e dëmeve për të vazhduar më pas me masa të tjera mbështetëse. “Me ngulm kërkojmë nga Ministria e Bujqësisë dhe Qeveria e Republikës së Kosovës që ta kenë në konsideratë situatën e krijuar dhe të marrin vendimet e duhura për kompensimin e dëmeve.”
Në fund, ai apelon për veprime konkrete: “Është koha për veprim konkret dhe për të dëshmuar se bujqësia është realisht prioritet. Vetëm në këtë mënyrë mund të ruajmë motivin dhe besimin e fermerëve për të vazhduar të punojnë tokën dhe të kontribuojnë në zhvillimin ekonomik dhe për ta ruajtur identitetin bujqësor të kësaj zone.”/PrizrenPress.com
