Në Komunën e Rahovecit është mbajtur mbledhja e parë e rregullt për tremujorin e parë të vitit 2025 e Mekanizmit Koordinues kundër dhunës në familje, dhunës ndaj grave dhe dhunës me bazë gjinore. Mbledhja u kryesua nga Zyrtari për Barazi Gjinore, Alban Gashi.
Në njoftimin e komunës thuhet se gjatë takimit u shqyrtua rregullorja e re e mekanizmit, e cila ndër të tjera parashikon që kryetari i komunës, si autoriteti më i lartë administrativ, të udhëheqë mbledhjet e këtij mekanizmi.
Po ashtu, anëtarët e mekanizmit prezantuan të dhënat dhe statistikat për rastet e raportuara gjatë tremujorit të parë të këtij viti, me qëllim të analizimit të gjendjes aktuale dhe forcimit të koordinimit ndërinstitucional për parandalimin dhe trajtimin e rasteve të dhunës./PrizrenPress.com
