Derisa është konstatim i përgjithshëm, i analistëve dhe ekspertëve të fushës, se të dy institucionet më kryesore të shtetit ligjor, e që janë gjykatat dhe administrata në Kosovë shkelin të drejtat e njeriut me të dyja këmbët në baza ditore dhe pandalshëm, as që mund të pretendojmë se mund të zhvillohemi si shtet. E para është e kapur nga politika e oligarkët, kurse e dyta është e mbushur me militantë partiakë e familjarë, prandaj pa një pastrim të këtyre dy institucioneve nuk do të ketë kurrë funksionim normal të shtetit demokratik e ligjor.

Njohësi i kësaj fushe, Hidajet Ahmeti thotë se është fakt që drejtësia në Kosovë vepron në mënyrë selektive dhe e dirigjuar nga politika. Sipas tij, këtë “hipotezë” e argumentojnë shumë hulumtime e raporte nga organizata vendore e ndërkombëtare.

“Kjo logjikë e funksionimit të sistemit të drejtësisë, e cila vepron nën kthetrat e politikës e jo brenda mandatit kushtetues e ligjor, ka prodhuar një gjendje anarkie në institucionet publike të shtetit. Standardi i mbrapshtë i funksionimit të institucioneve të drejtë- sisë duhet të përfundojë, por pa një vullnet politik që i shtyn proceset reformuese të sistemit e drejtësisë përpara është një demagogji boshe”, u shpreh ai.

Sistemi i kapur

Sipas Ahmetit, kapja e drejtësisë është bërë në mënyrë sistematike dhe të sofistikuar dhe falë kësaj piramide hierarkike është kontrolluar dhe dirigjuar më lehtë. “Mekanizmat kontrollues të sistemit të drejtësisë janë kapur në mënyrë sistematike, duke i pamundësuar të funksionojnë në mënyrë të pavarur hallkës zinxhirore të institucioneve kontrolluese të drejtësisë. Nuk mund të gjeneralizojmë në paragjykimin e deficitit në profesionalizmin e gjyqtarëve e prokurorëve, por hallka zinxhirore, menaxheriale e sistemit të drejtësisë është e kapur nga politika”, potencoi ai. “Kosova si shtet ka marrë obligime kontraktuale me marrëveshjen për MSA-në, ku reforma në sistemin e drejtësisë është kruciale, por institucionet publike, e posaçërisht Qeveria e kaluar nuk ka pasur vullnet për ta bërë reformën në sistemin e drejtësisë, jo duke i kapur me militantë partiakë e njerëz super të dëgjueshëm, por duke e çuar vizionin për reformën e drejtësisë përpara”, tha Hidajet Ahmeti.

Krimi mbetet i pandëshkuar

Sipas ekspertit të kësaj fushe Blerim Burjani, për të shmangur këtë sjellje të kundërligjshme në institucionet e shtetit, për të evituar shkeljen ekstreme të të drejtave të njeriut, duhet të ketë një monitorim më të shprehur në punën e gjykatave në Kosovë, ku tash për tash ka shumë “çudira” dhe shkelje të të drejtave të njeriut. “Së pari hapet procedura, mbahet personi i caktuar 2 vjet nëpër seanca gjyqësore dhe në fund lirohet plotësisht si i pafajshëm. Ose ndodh rasti tjetër, ku gjithmonë gjykatat nxjerrin aktgjykime me dënime kohore prej 10 vjet e më shumë dhe pastaj shkalla e dytë e liron komplet palën nga aktgjykimi, rasti i tretë është kur gjykata pa nxjerr asnjëherë aktgjykim zhvillon seanca pa ndalur për më shume se një vit dhe lirohet i dyshuari i si i pafajshëm”, potencoi ai. “Rastet e tjera janë raste të punës së prokurorisë, kur kapen rastet në flagrancë, siç është rasti me stenta dhe askush deri tash prej të pandehurve nuk është thirrur nga gjykata për seancë. Pra, kjo flet mjaft dhe kjo është e tmerrshme, më shumë se e pabesueshme”, tha Burjani për “Kosova Sot”.

Ai konsideron se tanimë duhet që të gjitha rastet të trajtohen e të rishikohen plotësisht. “Nëse shkalla e parë nxjerr aktgjykim drakonik, pra të lartë, dhe shkalla e dytë e liron plotësisht nga fajësia, kjo i bie se gjykata ka shkelur të drejtat e njeriut, për shkak se ka maltretuar dhe nuk e kompensojnë asnjëherë kohën e humbur për të dyshuarit dhe prishjen e imazhit të tij publik. Për këtë arsye gjyqtarët e shkallës së parë në këto raste të gjithë duhet të merren në pyetje ose ata gjyqtarë të shkallës së dytë, të dihet se çka ka ndodhur dhe si ka ardhur deri te këto aktgjykime dënuese edhe liruese”, theksoi Burjani për “Kosova Sot”.

Shteti i pakonsoliduar

Analisti Arsim Haziri konsideron se sipas atributeve që i posedon tani, Kosova akoma nuk mund të konsiderohet shtet normal dhe i mundshëm për konsolidimin e vetvetes si shtet i sundimit të drejtë të ligjit. “Kjo është më se e qartë! Përderisa ato dy institucione relevante për fuqizimin e shteti tonë influencohen nga ndikimi politik, çdo gjë e pritshme mund të jetë e kotë dhe e parealizueshme. Shteti nuk konsolidohet kur i mungojnë organet, të cilat përbëjnë premtim për avancimin e tij. Kosova, përkatësisht institucionet e saj, sidomos ato pa të cilat nuk mund të garantohet stabiliteti, nuk mund të ketë stabilitet të qëndrueshëm, ashtu edhe sistem të fuqishëm ligjor kur mungojnë së vepruar në mënyrë të paanshme sistemi i gjykatave dhe ai i administratës, që në përkthim lateral nënkupton një lloj timoni juridik”, ka thënë ai.

“Kosova, fatkeqësisht, nuk funksionon mbi baza juridike dhe ekonomike, po ajo ndikohet skajshmërisht nga dominimi i tepërt politik, kahe e cila ka instaluar pamundësinë për të dhënë kontribut të pashmangshëm shtetëror. Mundësia potenciale për të eliminuar këtë ndikimin politik është ndëshkimi përmes këtyre zgjedhjeve të subjekteve të caktuara, të ndëshkohen ato subjekt të cilat mbajnë faturën kryesore për degjenerimin e vendit”, tha Haziri për “Kosova Sot”.

Keqbërësit larg pozitave

Edhe Skënder Mulliqi pohon se është fakt që të gjitha sistemet nuk po funksionojnë si duhet, e jo vetëm organet e drejtësisë dhe administrata . “Drejtësia po ndikohet nga politika ditore, po ndikohet nga njerëzit e fuqishëm në pushtet, të cilët në një mënyrë apo tjetër janë ngritur mbi ligjin. Pa reformë thelbësore në organet e drejtësisë nuk mund të funksionojë asnjë shtet si duhet, porse kulimi është drejtësia jofunksionale”, theksoi ai. “Organet e drejtësisë duhet domosdo të shkë- puten nga ndikimi i politikës. Derisa kemi drejtësi seleksionuese nuk mund të flasim se kemi gjyqësor në nivel të duhur. Janë mbushur të gjitha sistemet me militantë të partive politike, me njerëz të dëgjueshëm dhe servilë karshi strukturave pushtetare. I kanë inkuadruar në administratë njerëzit jokredibilë dhe krejt me qëllime të caktuara profitereske”, u shpreh Mulliqi. “Punësimi pothuajse pa asnjë kriter ka bërë që të kemi institucione fragjile, që të kemi shkelje të rënda edhe të lirive dhe të të drejtave elementare njerëzore. Po mbesin jashtë sistemeve njerëzit, të cilët kanë kualifikime përkatëse, vetëm pse nuk kanë lidhje me strukturat politike. Këto marifete e kanë sjellë këtë gjendje çfarë e kemi aktualisht, shumë të keqe politike dhe të ecurive ekonomike. Nevojitet një reformim i thellë, duke i larguar të gjithë ata të cilët kanë bërë keqpërdorime të detyrës zyrtare”, ka thënë Mulliqi.

(Kosova Sot)

Paneli Zgjedhor për Ankesa dhe Parashtresa thotë se ka pranuar 18 apele në këtë institucion pas vendimit të Komisionit Qendror të Zgjedhjeve që t’i decertifikojë ata kandidatë që kanë aktgjykime të formës së prerë nga Gjykatat e Kosovës.
Në mesin e atyre që i kanë bërë këto ankesa mësohet se është edhe deputeti i Nismës, Zafir Berisha.

Mulë Desku nga PZAP ka treguar për Express se nga cilat subjekte politike kanë ardh këto ankesa.

“Ju informoj se PZAP, ka pranuar 18 apele, 7 nga PDK, 2 PSHDK, 4 LDK, 3 NISMA, 1 AKR, 1 PD”, ka sqaruar ai.

Vendimi për decertifikimin e kandidatëve që kanë aktgjykime të formës së prerë u morë me 8 vota pro, një abstenim dhe një kundër.

Zyrtarët e misioneve të huaja e kanë mirëpritur këtë vendim të KQZ-së duke thënë se votuesit e Kosovës kanë të drejtë të kenë përfaqësues etikë.

Ndërkaq, Zafir Berisha të cilit iu mohua e drejta që të kandidojë për kryetar të Prizrenit është shprehur i habitur me vendimin e KQZ-së pasi sipas tij, këta të fundit pak muaj më parë e kishin lejuar që të marrë pjesë në garën për deputet në Parlamentin e Kosovës, ndërsa po i mohohet mundësia për të garuar në nivel lokal.

Deputeti Berisha nuk e ka mohuar mundësinë që një vendim i tillë i KQZ-së të ndërlidhet edhe me abstenimin e tij në Parlament për qeverinë “Haradinaj”./GazetaExpress/

Lexo më shumë në: http://www.gazetaexpress.com/lajme/pzap-pranon-18-ankesa-pas-decertifimit-nga-kqz-njeri-nga-ta-eshte-edhe-zafir-berisha-434428/?utm_source=referral&utm_medium=web&utm_campaign=copyright

Zafir Berisha deputet i NISMA për Kosovën, i cili u decertifikua nga KQZ-ja për kandidat për kryetar të Prizrenit nga kjo parti, u ka parashtruar disa pyetje shteteve të Kuint-it.

Kujtojmë se ambasadat e Shteteve të Kuintit në Kosovë, (SHBA, Britania e Madhe, Franca, Italia, Gjermania), i kanë bërë thirrje KQZ-së që të decertifikojë kandidatët për zgjedhjet lokale të cilët janë të dënuar.

Postimi në Facebook
Pyetje për ambasadorët e huaj në Kosovë, të shteteve të Kuintit!

1).- A ndodhë në vendet tuaja, që një organ ekzekutiv, si shebull KQZ-ja në Kosovë, që para dy dite, me votu për zbatimin e ligjit, kur dihet se ligjet zbatohen nga të gjitha organet dhe qytetarët, që nga momenti kur miratohen në Kuvend ?

2).-Në rastin konkret sipas praktikës së krijuar, a ka të drejtë KQZ-ja, me votu për moszbatimin e ligjit, siç nuk e ka respektuar afër 10 vite, pasi e ka praktiku të drejtën me votu për me respektu ?

3).- Në vendet nga vini ju, a ka përgjegjësi ligjore dhe juridike për mosrespektim të ligjeve me vite të tëra, nga organet e caktuara siç është rasti te ne me KQZ-n ?

4).-Në vendet nga vini ju, çka ndodhë me organet dhe personat fizik që i përbëjnë ato organe, kur e marrin rolin e organit ligjëvënës (në rastin tonë Kuvendit), a e llogaritni këtë si logjikë “lladrovcijane” se ligji është si lastiku?

Me respekt deputeti /ligjëvensi/ i Kuvendit të Kosovës: Z.Berisha

I akuzuari për vjedhje grabitqare, Fabijan Gjugja, të mërkurën, është dënuar nga Gjykata Themelore në Prizren, me 10 muaj burgim efektiv, në të cilin dënim do t’i llogaritet edhe koha e kaluar në paraburgim dhe arrest shtëpiak, prej rreth 5 muajsh.

Derisa pritej që në këtë seancë të vazhdonte gjykimi i rregullt i të akuzuarit Gjugja, prokurori i rastit, Metush Biraj, ka shprehur gatishmëri që me të akuzuarin të negociohet një marrëveshje për pranimin e fajësisë.

I akuzuari dhe mbrojtësja e tij, avokatja Hana Cana, kanë pranuar propozimin e prokurorit, ndërsa trupi gjykues u ka dhënë kohë atyre disa orë që të arrijnë një marrëveshje të tillë.

Pasdite, prokurori Biraj së bashku me avokaten Cana kanë paraqitur para trupit gjykues marrëveshjen për pranimin e fajësisë, në të cilën parashihej dënim me burgim efektiv për të akuzuarin prej 8 deri në 12 muaj.

Trupi gjykues, i kryesuar nga gjyqtari Xheladin Osmani, ka pranuar marrëveshjen e arritur mes palëve, ndërsa të akuzuarit i ka shqiptuar dënim me burgim efektiv, në lartësi prej 10 muajsh.

Po ashtu, i akuzuari Gjugja është obliguar që të paguajë shpenzimet procedurale prej 400 euro.

Ky rast zhvillohej në bazë të aktakuzës së ngritur nga ish-Prokuroria e Qarkut në Prizren, e cila e akuzonte Fabijan Gjugjajn se më 4 dhjetor 2012, rreth orës 2:00, pas mesnate, ka hyrë në shtëpinë e të dëmtuarit Ahmet Çertik dhe ka vjedhur një telefon celular.

Tutje, sipas aktakuzës, i akuzuari Gjugja, në momentin kur po largohej nga shtëpia, është ndeshur me pronarin Çertik dhe me qëllim që të mbajë sendin e vjedhur dhe të largohej nga shtëpia, ka përdorur forcën fizike kundër tij.

Ky rast, për disa vjet nuk ka mundur të gjykohej, sepse i akuzuari ka qenë i pakapshëm për forcat e rendit, pasi që i njëjti ka qenë jashtë Kosovës./betimiperdrejtesi/