Drejtuesit e Lidhjes Demokratike e Kosovës shprehen të gatshëm për të shkuar në zgjedhje të parakohshme në vend, nëse partneri i madh i koalicionit, PDK, insiston për një gjë të tillë.

Ditë më parë kreu i PDK-së, Kadri Veseli, ka deklaruar se Kosova mund të shkojë në zgjedhje të parakohshme, siç ka thënë ai, nëse partitë politike në pozitë dhe opozitë dakordohen. “Organizimi i zgjedhjeve të jashtëzakonshme nuk është fundi i botës, në qoftë se vlerësohet që është në të mirë të vendit”, ka deklaruar Veseli.

Në anën tjetër, nënkryetari i LDK-së, Haki Rugova, thotë për gazetën “Zëri” se koalicioni qeverisës mes këtyre dy partive është duke funksionuar mirë dhe pa probleme. Porse, siç thotë ai, në qoftë se duhet të shkohet në zgjedhje edhe mund të shkojnë.

“Nëse duhet të shkojmë në zgjedhje, shkojmë, nuk është problem. Por, marrëveshjet nuk mund të prishen ashtu. Ato mund të diskutohen, por nuk besoj që koalicioni ka problem. Janë deklarata që kohë pas kohe jepen, edhe Kadri Veseli apo cilido prej nesh lëshon deklarata të tilla”, ka thënë Rugova, i cili thotë se nuk është tradhti nga partneri i koalicionit edhe nëse e prishin marrëveshjen për bashkëqeverisje me PDK-në.

Deputeti i Kuvendit të Kosovës, Zafir Berisha akuzon portalet se kanë nxjerrë nga kontesti deklarimin e tij në Klan Kosova për “Kombin kosovarë”.

“Disa portale qenkan shqetësuar shumë se mediat serbe janë marrë sot me një të vërtetë që e kam thënë për ,,kombin kosovarë,, në Tv.Klan Kosova”,shkruan ai në Facebook.

“Këto paçavure informative më shumë emocione i paskan citu mediatë serbe lidhurë me deklaratë time edhe aty ku fjalët e mija i kanë nxjerrë nga kontesti, duke harruar se ata vetë dje e kanë botuar deklaratën time origjinale. Kjo tregon se çfarë media kemi ne, nga padija e manipulon veten dhe lexuesit ose thënë ndryshe edhe gënjeshtrës së vetë i besojnë. Pavarësisht si komenton politika Beogradit dhe mbetjet e saj në Kosovë, unë qëndroj fuqishëm në atë që e kam thënë ,,sot apo nesër, herët apo vonë, Kosova, do të jetë pjesë e Shqipërisë Natyrale”.

“Nuk e di këta plehra që udhëhqin portalet degjeneruese në Kosovë ku e kanë pa atë gëzim të serbët, apo nuk dinë me dallu gëzimin dhe zhgënjimin e tyre, apo edhe për me marrë ndonjë ,,like,, s’ka lidhje që ja fusin kotë”

“Qenët le të lehin, karvani ecën përpara,, popullore…”/PrizrenPress.com/

Festim Avdylit është zgjedhur kryetar i Forumit Rinor të LDK-së në Prizren.

Në garë për këtë post, kanë qenë dy kandidatë, Festim Avdylit dhe Kimete Shatri.

Nga 101 delegatë të pranishëm kanë qenë vetëm 83, prej të cilëve 76 votuan për Festim Avdylit./PrizrenPress.com/

Deklarata e deputetit të Nismës për Kosovën, Zafir Berisha, se Kosova “është krahinë e Shqipërisë” ka marrë vëmendje të madhe edhe në mediat serbe.

Me këtë deklaratë, duket se Berisha u është “përshtatë opinionit të gjerë serb dhe mediave atje”.

Kjo deklaratë është cituar nga të gjitha mediat e fuqishme në Serbi dhe ka zënë vend në ballina, transmeton lajmi.net.

“Kosova është krahinë e Shqipërisë dhe askush nuk ka hequr dorë nga bashkimi kombëtar”, citon Tanjug, B92, Blic, etj, deklaratën e Berishës.

Nuk është hera e parë që ky deputet deklarohet ‘kuturu’ për çështje të caktuara, pa e ditur se çfarë dëmi mund të bëjë në fuqizimin e shtetit të Kosovës.

“Nuk ka kosovar, nuk ekziston ai komb. Është i shpikur. Kjo është më shumë sesa qesharake. Ne jemi shqiptar, të cilët jetojmë në krahinën e Shqipërisë, e cila quhet Kosovë. Dhe, sot apo nesër, vonë apo herët, do të jetë Shqipëri”, ka thënë Berisha, i cituar nga mediat serbe.

Dihet dhe më nuk është fshehtësi, se politika serbe në vazhdimësi ka projektuar ide që për Kosovën të bisedojë me Shqipërinë, duke mos e njohur fare ekzistimin e shtetit të Kosovë. Një negociim i drejtpërdrejt me Shqipërinë do të thoshte edhe ndarje e Kosovë.

Megjithatë, duket se ka të tillë, edhe deputet, që nuk e kanë idenë se sa dëm i shkaktojnë Kosovës me këso deklaratash.

Presidenti i Kosovës, Hashim Thaçi ka deklaruar se askush nuk ka ndonjë aspiratë për ndryshimin e kufijve me Shqipërinë, përkundrazi synojnë hapjen e kufijve sipas standardeve evropiane.

Thaçi në punimet e Seminarit të 93-të Rose-Roth të Asamblesë Parlamentare të NATO-s, në Prishtinë, ka thënë se bashkëpunimi me Shqipërinë, duhet t’i gëzojë të gjithë.

“Me Shqipërinë kemi raporte të shkëlqyera të bashkëpunimit institucional. Para dy ditësh jam takuar me kryeministrin Rama, pasnesër do të kemi drekë me kryeministrin Rama në Prizren. Po ky bashkëpunim i yni duhet t’i gëzojë, sepse është bashkëpunim i standardeve dhe vlerave euroatlantike dhe në asnjë mënyrë nuk duhet shikuar me dyshim. Ne nuk e kemi asnjë aspiratë as si Kosovë, as si Shqipëri ndryshimin e kufijve përkundrazi hapjen e kufijve sipas standardeve evropiane “, tha ai.

Tha[i po ashtu ka lavdëruar deklarimin e kryeministrit të Shqipërisë, në vizitën e fundit në Beograd, duke thënë se ishin fjalë të qëlluara dhe të sakta.

Të organizuar nga vetë fshatarët dhe të motivuar nga thirrjet që kohët e fundit po iu bëhen nga diaspora, përmes rrjeteve sociale, banorët goranë nga fshati Vraniç, në komunën e Dragashit, sot kanë protestuar kundër ndërtimit të njërit prej disa hidrocentraleve që po ndërtohen në këtë trevë. Ata kanë kërkuar që lumi, i cili kalon në afërsi të pronave të tyre, të mos shfrytëzohet për, siç thanë, përfitime të një kompanie. Protesta u organizua tek ura e fshati Mlikë, ku edhe kanë filluar punimet në ndërtimin e kampit të punëtorëve, të cilët më pas do të punojnë në ndërtimin e një hidrocentrali nga kompania “Eurokos JH”, kompani kjo që tashmë i ka përfunduar së ndërtuari disa sosh në këtë trevë.

Redaksia jonë ka biseduar në vendin e ngjarjes me këta banorë, të cilët kanë thënë se nuk janë të motivuar politikisht, por thjeshtë duan ti mbrojnë tokat e tyre dhe lumin, pa të cilin thonë se tokat e tyre nuk do të kishin vlerë.

“Sikur të ishte ky një investim i shtetit ose i komunës, duke përfillur interesin e këtij komuniteti, gjithçka do të ishte në rregull. Por, ne nuk i japim tokat tona dhe as lumin që na e ka dhuruar Zoti, për interesa të një kompanie private, të cilës i intereson vetëm përfitimi material dhe jo interesi i përgjithshëm”, tha për Radio Sharrin, Fejzo Kamberi, një aktivist nga fshati Vraniç, dikur edhe gazetar.

Kujtojmë se në këtë fshat ndodhet selia e Komunës paralele të Gorës, e cila vepron me ligjet e Serbisë dhe si e tillë dirigjohet nga Beogradi. Prandaj, rreth këtij problemi ka shkruar sot edhe agjencia informative serbe “Tanjug”, e cila e ka cituar koordinatorin për medie të kësaj Komune, Nazim Mehmedin, i cili ka deklaruar se po e mbrojnë tokën e tyre. “Kryesit e punimeve, në mënyrë të paskrupullt po punojnë me makineri të rëndë, duke i shkelur tokat e tyre private, pa kurrfarë leje paraprake nga pronarët”, i ka thënë Mehmedi Tanjugut.

Në protestën e sotme banorët e rrethuan me gardh pronën e parë private, skaj parcelës ku po ndërtohet kampi i punëtorëve, si dhe kërkuan që organet përkatëse që t’i ndërpresin këto punime dhe ta mbrojnë lumin nga devijimi i rrjedhjes së tij. Njëherësh, banorët paralajmëruan se protestat do të zhvillohen çdo ditë, derisa të mos ndërpriten këto punime./Radio Sharri/

Dy femra,  të nacionalitetit rom, janë shkelur me veturë në rrugën “Ismail Kryeziu” në Prizren. Viktimat kanë marrë lëndime trupore me c’rast janë dërguar për trajtim mjekësor.

Policia njofton ato janë shkelur për shkak moskujdesit të vozitësit të veturës./PrizrenPress.com/

Policia në Suharekë ka arrit të gjejë dhe të arrestojë hajnat e veturës së vjedhur në fshatin Budakovë.

“Viktima ka njoftuar se të dyshuar të pa njohur kanë hyrë në oborrin e shtëpisë së tij dhe nga aty kanë vjedhur veturën”, thuhet në komunikatën e Policisë së Kosovës.

“Pas hetimeve intensive të zhvilluara nga njësitet policore janë identifikuar dhe arrestuar dy të dyshuar me urdhër të prokurorit dërgohen në mbajtje, ndërsa vetura është konfiskuar dhe e njëjta gjendet në stacioni policor në Suharekë”./PrizrenPress.com/

Gjashtë persona kanë kërcënuar me armë dhe sulmuar fizikisht borxhliun e tyre. Viktima ka pësuar lëndime trupore.
“Të dyshuarit kanë hyrë në lokalin e viktimës dhe kanë kanosur dhe sulmuar”, raporton Policia e Kosovës.

Me urdhër të prokurorit, ndërkaq janë bastisur dy shtëpi të dyshuarave me ç’ rast është gjetur dhe konfiskuar një armë AK-47 me një karikator dhe 22 fishekë të kalibrit të pa njohur.

“ Një i dyshuar është arrestuar dhe me urdhër të prokurorit dërgohet në mbajtje ndërsa të dyshuarit tjerë gjenden në arrati”./PrizrenPress.com/