Kanë mbetur më pak se 3 muaj deri në mbajtjen e zgjedhjeve lokale në Kosovë të cilat presidenti i vendit, Hashim Thaçi i ka caktuar që të mbahen me 22 tetor. Lidhur me këtë përfaqësues të NISMA-s kanë thënë se janë duke punuar në këtë drejtim që të dalin sa më shumë fitues nëpër komunat e vendit.

Në një prononcim për ‘Indeksonline’, anëtarja e Nismës për Kosovën, Valdete Dushica-Bajrami ka konfirmuar edhe njëherë se Nisma për Kosovën do të jetë pjesë e kuvendit edhe në legjislaturën e Vl.

Sipas saj, e gjithë kjo ka ardhur fal punës dhe angazhimit të gjithë strukturave të tyre dhe besimit të qytetarëve që ua japën me 11 qershor.

Ajo më tej ka thënë se ende nuk janë të përcaktuar zyrtarisht se cilët janë emrat e kandidatëve për kryetarë të komunave. Mirëpo të njëjtit shumë shpejt pritet të bëhen public.

“Nuk e kemi ndalur aktivitetin tonë, çdo dite jemi në takime me degët, nëndegët tona me qëllim të vetëm që edhe në zgjedhjet lokale të dalim me rezultatet sa më të mira nëpër të gjitha komunat. Vendimi i kryesisë së Nismës për Kosovën është që secila degë të dal me kandidatë për kryetarë se bashku me listën e kandidatëve për asamble komunale. Ndërsa, sa i përket çështjes së emrave shumë shpejtë të gjitha degët do t’i sjellin emrat e kandidatëve për asamble por edhe të kandidatëve për kryetar”, ka thënë Dushica- Bajrami.

Më tutje ajo ka informuar qytetarët se me qeverisjen e NISMA-s në nivel lokal, do ta kenë mundësi ta shohin përmisimin e vendit. Ajo ka treguar shembullin siç është komuna e Malishevës.

“Jemi duke punuar pa ndalur me qëllimin e vetëm që qytetarëve tanë anë e kënd Kosovës t’i ofrojmë një qeverisje ndryshe nga ato që i kishim, sepse këtë tash më e kemi dëshmuar se qeverisja e Nismës në nivel lokal dallon nga të tjerat për këtë e keni shembullin e komunës së Malishevës”, ka thënë më tej ajo

Ministria e Punëve të Brendshme (MPB) po përballet me fluks të madh të kërkesave për pajisje me dokumente.

Kjo ka bërë që të ketë vonesa në lëshimin e dokumenteve dhe tollovi nëpër sportele.

Mërgimtarët po ankohen se po ballafaqohen me probleme që po u shkaktojnë vonesa për pajisjen e dokumenteve.

Ardhja e mërgimtarëve ka rritur nivelin e kërkesave për pajisje me dokumente personale dhe rrjedhimisht edhe tollovi nëpër sportelet e Ministrisë së Punëve të Brendshme dhe komunave.

Disa prej tyre ankohen për shërbime jo efikase që po u sjellin probleme të shumta. Selime Gashi i ka thënë Radio Kosovës se sa herë që vjen në Kosovë ka probleme në marrjen e dokumenteve.

“Sikur t’i kryenin për një ditë, ne nuk kishim mbet çdo ditë nëpër komunë. Neve pushimi po na shkon kot. Prej që kam ardhur në Kosovë, që kam filluar me dokument ka një gabim na është bërë”, ka thënë Gashi.

Ndërsa Izet Leci që jeton në Gjermani, tha së gabimet dhe vonesat e shkaktuar nga administrata në Kosovë vitin e kaluar kanë bërë që djali i tij të humbë vendin e punës.

“Djali e ka humbur një muaj ditë pune vitin e kaluar, për me ia ndërruar numrin personal dhe prapë ia kanë lënë të njëjtin, një muaj ditë pune edhe prapë njëjtë, i njëjti problem, problemi krejt një numër personal”, ka thënë Leci.

Në një përgjigje përmes postës elektronike, Ministria e Punëve të Brendshme i ka thënë Radio Kosovës se disa nga procedurat e nxjerrjes së dokumenteve janë ndryshuar, por ka mohuar se kjo përbën problem për pajisjen e qytetarëve me dokumente.

Sipas Ministrisë së Brendshme, janë bërë të gjitha përgatitjet që mërgimtarëve t’u ofrohen shërbimet e nevojshme.

Deputeti i Nismës, Zafir Berisha dhe ai i Lëvizjes Vetëvendosje, Arbër Rexhaj, kërkojnë që vendi të shkojë në zgjedhje.

Berisha thotë se në zgjedhjet e 11 qershorit, aksidentalisht janë bërë deputetë, siç i quan ai, “legenë”.

“Prandaj, Kosova është mirë me shku në zgjedhje edhe një herë”, thotë Berisha, shkruan PrizrenPress.
Sipas tij, këta deputetë janë bërë mendjemëdhenj ende pa filluar punën.

“Shumë legeni është bërë deputetë aksidentalisht dhe ju ka rritur mendja deri atje ku i japin të drejtë vetes me shitë mend deri në atë shkallë, sa që bllokimin e bërjes së qeverisë e shohin si vlerë dhe objektivë politike, ndërsa harrojnë se gjatë fushatës e kanë kërkuar votën prej sovranit për interes të Kosovës”, shprehet ai.

Ndërkaq, deputeti i Lëvizjes Vetëvendosje, Arbër Rexhaj thotë se nëse Vetëvendosje nuk e formon qeverinë, vendi duhet të shkojë në zgjedhje.

“Dy rrugë kanë mbetur, ose Vetëvendosje! në qeveri ose sërish në zgjedhje”, thotë Rexhaj.
“Jo pse këtë e duam ne por PAN-i, i cili po këmbëngul pa pasur deputetët e nevojshëm të krijoj një qeveri ” të lodhtë” nuk do të krijoj stabilitet afatgjatë në vend”.

“Në zgjedhjet e reja Vetëvendosje! pa asnjë problem në koalicion me qytetarët, do të fitonte mjaftueshëm për ta krijuar qeverinë”./PrizrenPress.com/

Besnik Velija, i akuzuar për grabitje, ka dhënë fjalën e tij përfundimtare të premten në Gjykatën Themelore në Prizren.

Velija, ka deklaruar se po gjykohet padrejtësisht sepse, sipas tij, prokuroria nuk ka arritur të dëshmojë se ai ka kryer grabitje në rastin “Las Vegas” dhe “Western Union”, për të cilat raste ai është shpallur fajtor në shkallë të parë, por që kjo lëndë ishte kthyer në rigjykim nga Gjykata Supreme e Kosovës.

Ai ka thënë se është i pafajshëm në të dy rastet, duke shtuar se organi i akuzës ka fshehur provat të cilat atë e shfajësojnë. I akuzuari Velija, ka kërkuar përsëritjen e gjykimit edhe në rastin “Las Vegas”, pasi thotë se është dënuar padrejtësisht, e këtë e dëshmon sipas tij, edhe aktgjykimi i Gjykatës Supreme në këtë rast.

Po ashtu edhe mbrojtësi i të akuzuarit, avokati Blerim Mazreku, ka kërkuar nga trupi gjykues që klientin e tij ta lirojë nga akuza, sepse sipas tij, një gjë e tillë nuk është arritur të dëshmohet nga ana e prokurorisë.

Mazreku ka thënë se gjatë rigjykimit të këtij rasti, gjykata nuk ka mundur të mënjanojë parregullsitë e gjetura nga Gjykata Supreme e për të cilat e ka kthyer rastin në rigjykim. Sipas tij, gjatë rigjykimit, gjykata nuk ka mundur të sigurojë deklaratën e të akuzuarit tjetër Remzi Kuqi, i cili është në arrati, nuk e ka dëgjuar të dëmtuarën dhe dëshmitarët tjerë, e po ashtu nuk ka administruar ndonjë provë tjetër.

Avokati Mazreku, ka theksuar se klienti i tij, akuzohet për dy raste të grabitjeve vetëm duke u bazuar ne instinktet e policisë dhe prokurorisë, të cilat kanë nxjerrë paralele sipas mendimit të tyre në mes ngjashmërive të rasteve “Las Vegas” dhe “Western Union”.

Por, ai ka thënë se një gjë e tillë mund të bëhet vetëm duke bërë ekspertiza profesionale nga profesionistë të fushave përkatëse që analizojnë dhe konkludojnë me siguri të plotë se kemi të bëjmë me të njëjtit persona.

Në anën tjetër, prokurori i rastit, Mehdi Sefa, ka qëndruar pranë aktakuzës duke shtuar se gjatë seancave të gjykimit të parë dhe rigjykimit, me administrimin e provave dhe dëgjimin e dëshmitarëve dhe ekspertëve është dëshmuar se i akuzuari ka kryer veprën penale për të cilën akuzohet. Prokurori Sefa, po ashtu ka kërkuar që pas plotfuqishmërisë së aktgjykimit në këtë rast, i akuzuari Velija të dëbohet nga vendi dhe t’i ndalohet për një kohë që i njëjti të hyjë në territorin e Kosovës.

Kryetari i trupit gjykues, Artan Sejrani, shpalljen e aktgjykimit  e ka caktuar për 31 korrik 2017, në ora 13:30.

Ndryshe, ky rast zhvillohet në bazë të aktakuzë së Prokurorisë Themelore në Prizren, sipas së cilës i akuzuari Besnik Velija ngarkohet me veprën penale të grabitjes në bashkëkryerje.

Sipas aktakuzës i akuzuari Velija së bashku me të akuzuarin tjetër i cili është na arrati,  Remzi Kuqi, kanë hyrë me dhunë në firmën “Nisa” e cila kryente shërbime të transferit të parave për “Western Union” dhe duke e kërcënuar me armë zjarri kanë marrë nga kasaforta rreth 2.500 euro.

I akuzuari Velija, më 4 maj 2016, është gjetur fajtor nga Gjykata Themelore në Prizren, me ç’rast është dënuar me 3 vite burgim efektiv.

Poashtu edhe Gjykata e Apelit më 16 shtator 2016, ka vërtetuar aktgjykimin e shkallës së parë dhe ka refuzuar ankesat e mbrojtjes si të pabazuara.

Por mbrojtja e të akuzuarit, ka atakuar vendimin e Apelit në Gjykatën Supreme, për shkelje të procedurës penale dhe ligjit penal, me ç’rast Supremja ka vendosur që rasti të kthehet në rigjykim në shkallë të parë.

Sipas Gjykatës Supreme në këtë rast nuk janë vërtetuar saktë provat nga vendi i ngjarjes pasi që sipas tij ekzekutorët kanë mbajtur maska dhe nuk mund të vërehen nga kamerat se kush janë. Tutje, në Aktgjykimin e Supremes, thuhet se as punëtorja e lokalit të sulmuar nuk ka mundur të bëjë identifikimin e personave që e kanë sulmuar, e poashtu i akuzuari tjetër është arratisur dhe nuk e ka inkriminuar të akuzuarin si bashkëkryerës.

Ndërsa, sipas Supremes, nuk është e mjaftueshme arsyetimi i gjykatës se i akuzuari ka pasur veshë një trenerkë me vija, e cila, poashtu është përdorur në një rast tjetër të grabitjes (Las Vegas) dhe se është vërtetuar se është e të akuzuarit në fjalë, për të cilin rast poashtu nuk ka vendim përfundimtar të çështjes.