Hapësira e kinemasë Lumbardhi nga sot do të jetë shtëpi e përkohshme e veprimtarisë artistike të SHKA Agimit.

Përmes një komunikate për media bëhet e ditur se në këtë kinema sot u nënshkrua memorandumi i bashkëpunimit për shfrytëzimin e hapësirës së kinemasë Lumbardhi në Prizren për nevojat e seksioneve artistike të SHKA Agimit. Në praninë e anëtarëve të kryesisë dhe bordit të të dyja organizatave, memorandumin e nënshkruan Besim Berisha, drejtor artistik i SHKA Agimit dhe Ares Shporta, drejtor ekzekutiv i Fondacionit Lumbardhi.

Më tutje thuhet se objektivi themelor i këtij bashkëpunimi është mbështetja që Fondacioni Lumbardhi u ofron përpjekjeve të anëtarëve të SHKA Agimit për të aktivizuar veprimtarinë artistike të shoqatës. Për shkak të pamundësisë për të ushtruar veprimtarinë artistike në objektin e SHKA Agimit, anëtarët e shoqatës, anëtarët aktivë të seksioneve artistike, udhëheqësit e seksioneve artistike, drejtori Artistik dhe Kryesia e shoqatës janë mobilizuar për të mbajtur gjallë veprimtarinë. Hapësira e kinemasë Lumbardhi do të shfrytëzohet për një periudhë të përkohshme, derisa të krijohen kushtet për t’u kthyer në objektin e shoqatës. Aktivizimi i veprimtarisë artistike të SHKA Agimit po bëhet paralelisht me përpjekjet për të vendosur rend në shoqatë përmes rrugëve ligjore dhe institucionale.

Ky bashkëpunim, për Ares Shportën nga Fondacioni Lumbardhi është dëshmia e radhës e hapjes dhe mikpritjes së Lumbardhit ndaj të gjithëve, ndërsa njoftoi se në fund të këtij muaji përfundojnë edhe punimet për funksionalizimin e sallës së mbyllur të kësaj hapësire kulturore. Në anën tjetër, Besim Berisha nga SHKA Agimi ofroi detaje rreth organizimit të komponentës artistike.

“Kryesia e SHKA Agimit, me propozimin e drejtorit artistik ka vendosur të aktivizojë gjashtë seksione artistike, ndërsa janë caktuar edhe udhëheqësit e këtyre seksioneve: Fikrim Emra (kori), Kastriot Marku (orkestri), Mazllum Karamani (veteranët), Xhevdet Doda (drama) dhe Besim Berisha (okteti). Udhëheqësi i seksionit të folklorit do të caktohet ditëve në vijim, pas përfundimit të diskutimeve që drejtori artistik i SHKA Agimit po i zhvillon me disa nga profesionistët e kësaj dege”, thuhet në komunikatë.

Para disa ditësh, SHKA Agimi ka publikuar thirrjen për anëtarësim në seksionet artistike. Anëtarësimi është i hapur për të gjithë, ndërsa të interesuarit për të qenë pjesë aktive e seksioneve duhet të shkruajnë në email adresën zyrtare [email protected]. Afati për shprehjen e interesimit për të qenë pjesë e seksioneve të SHKA Agimit për aktivitetin e sivjetmë artistik mbetet i hapur deri më 20 gusht 2017, ndërsa provat e seksioneve do të nisin nga java e parë e Shtatorit 2017 në hapësirën e kinemasë Lumbardhi.

Gjatë këtij viti, sipas drejtorit artistik të SHKA Agimit, do të realizohet një ngjarje e madhe koncertale më 28 nëntor, për të shënuar 73 vjetorin e themelimit të SHKA Agimit dhe Ditën e Flamurit. Gjatë vitit 2017 do të organizohen edhe ngjarje të tjera artistike të seksioneve të veçanta artistike.

Përveç përkrahjes nga Fondacioni Lumbardhi për shfrytëzimin e hapësirës, SHKA Agimi ka siguruar përkrahje edhe nga organizata, biznese, institucione e individë të shumtë, të cilët po solidarizohen në forma të ndryshme, përfshi pajisje, hapësirë, instrumente, financim, shërbime dhe të tjera.

SHKA Agimi i fton edhe një herë të gjithë dashamirët e kulturës dhe të SHKA Agimit që të vazhdojnë përkrahjen në forma të ndryshme varësisht nga vullneti dhe mundësitë e tyre për të siguruar vazhdimësinë e traditës artistike mbi 70 vjeçare dhe kthimin përfundimtar të të gjitha seksioneve, artistëve dhe anëtarëve në objektin e shoqatës, i cili vazhdon të mbahet i uzurpuar nga një grup individësh të papërgjegjshëm.

Përgjatë datave 28-31 korrik 2017, në një ndër qytetet më të vjetra dhe si qendër kulturore e Kosovës, në Prizreni, nën organizimin e Shoqatës së Strip-Artistëve Kosovarë “Xhcomic”, do të mbahet edicioni i 14-të i festivalit ndërkombëtar të stripit, karikaturës dhe të satirës.

Edicioni i 14-ë i këtij festivali përbëhet prej dy temave të posaçme, tema për strip është e lidhur me historinë kosovare “Historia e Legjendave Kosovare” me tema ngacmuese dhe shumë domethënëse për karikaturë dhe satirë është “Barazia Gjinore”.

“Puna e palodhur dhe shpresa ka dhënë fruta marramendëse të suksesit, ku në këtë edicion kanë mbërritur 2978 punime nga 671 artistë prej 86 shteteve. Vetë pjesëmarrja dhe interesimi i artistëve vendorë dhe botërorë paraqet suksesin dhe peshën e festivalit në platformën botërore”, thuhet në komunikatën e këtij festivali.

Festivali ka qëllimin e paqes të së nesërmes dhe të bashkëpunimit të ndërsjellë me artistët botërorë duke shkëmbyer eksperiencat, duke ndarë miqësinë, të ndjejnë shijen e lirisë së artit kosovar dhe atë botëror.

“Me këtë edicion jemi të asaj shprese që pas 14 viteve jemi në një karvan të mirëfilltë, me shpresë që ky karvan do të ecë edhe për shumë vite duke ekspozuar kulturën dhe historinë kosovare dhe duke dhënë shpresa të reja për artistët e rinj”, theksohet më tej në komunikatë.

Përgjatë 4 ditëve të festivalit do të behet ekspozimi i 320 punimeve dhe do të mbahen punëtoritë katër ditore. Hapja e ekspozitës do të bëhet më datën 29 korrik 2017 në ora 19:30 në galerinë e Gazi Mehmet Pashës “Hamam” në Prizren, ku do të jenë të pranishëm edhe artistët vendorë dhe botërorë si: Vehap Kokalari (Shqipëri), Yasar Firat (Turqi), Devrim Kunter (Turqi), Erdogan Karayel (Gjermani), Vesna Nichevska (Maqedoni), Darko Bogdanov (Maqedoni), Jordan Kocevski (Maqedoni), Alla dhe Chavdar Georgievi (Bulgari), Tchavdar Nikollov (Bulgari), Christo Komarnitski (Bulgari), Vjekoslav Bojat ( Mali i zi), Nenad Ostojic (Kroaci), Faton Kryeziu (Kosovë), Erdina Fetahu ( Kosovë), Dilara Kogjakatët (Kosovë), Gani Sunduri (Kosovë) dhe Ardita Shehu (Kosovë).

Realizimi i festivalit mundësohet nga: Ministria e Kulturës, Rinisë dhe Sportit, Komuna e Prizrenit, Konsullata Turke, Strip Arti 9, PDH Poloni, PDH Kosovë.