Trajneri kroat ka ftuar të gjitha yjet, njofton faqja zyrtare e Federatës së Futbollit të Kroacisë.
Lojtarë si Modriç, Manxhukiç, Rakitiç, dhe Lovren, janë në listën e 21 futbollistëve për ndeshjet eliminatore për Kampionatin Botëror.
Ndeshja Kosovë – Kroaci luhet më 6 tetor.
Veteranët e Ushtrisë Çlirimtare të Kosovës (UÇK) kanë paralajmëruar protestë për të premten (sot). Protesta e veteranëve do të mbahet para objektit të Qeverisë, duke filluar nga ora 12:00.
Protesta është thirrur nga Këshilli për Mbrojtjen e Veteranëve të UÇK-së. Xhevdet Qeriqi, kryetar i këtij Këshilli, ka thënë se duke u bazuar në padrejtësitë që u janë bërë familjeve të dëshmorëve dhe kategorive të tjera të luftës së UÇK-së nga ana e Ministrisë të Punës dhe Mirëqenies Sociale, veteranët, sipas tij, kanë vendosur se nuk do të tolerojnë më të nëpërkëmbet dinjiteti i tyre.
“Ne për dy ditë kemi pasur takime me përfaqësues të kësaj Ministrie, ku kemi kërkuar shfuqizimin e vendimit të fundit të marrë nga ana e tyre, por që nuk kemi arritur një zgjidhje. Po ashtu vonesat e padrejta të pensioneve për veteranët e luftës na kanë shtyrë ta marrim këtë vendim”, ka thënë Qeriqi në një reagim të tij.
Ai ka apeluar tek veteranët që sot të protestojnë para Qeverisë, duke filluar nga ora 12:00.
“Ju bëj thirrje të gjithëve që jeni të pakënaqur me këto padrejtësi që t’i bashkëngjiteni protestës. Kjo protestë vjen pa dëshirën tonë, por që kjo po na imponohet nga vetë Qeveria. Kërkesa e madhe e shumë familjeve të dëshmorëve dhe e kategorive të tjera na ka shtyrë që ta marrim vendimin për protestë”, ka thënë Qeriqi. /Zëri/
Edhe pse sezona e verës ka përfunduar, artistë të shumtë po vazhdojnë të lansojnë projekte.
Ndërsa qyteti i Prizrenit njihet si vend kulturor, ka bashkuar dy artistët Flori Cocaj dhe Dardanin për të realizuar bashkë projektin ‘Zemër sonte me mu rri / ZSMR’.
Një këngë mjaftë ritmike që i përshtatet trendeve të kohës dhe me një videoklip të realizuar mjeshtërisht nga Blerdi Malushi, neve na bën të pyesim vetën se ku ishin këta artistë deri tani?
Mirëpo, zico.tv raporton se të dy kanë shumë plane dhe presim që brenda disa muajve të lansojnë këngë dhe videoklipe të tjera.
https://youtu.be/FP9POC8dJWQ
Policia e Kosovës përmes një komunikate për media bën të ditur se ka arrestuar një person, i cili kërkohej për kanosje ndaj një polici.
“Pak pas mesnate, një patrullë policore e Stacionit policor Veriu në Prizren ka ndaluar një automjet furgon Mercedes mbi bazën e dyshimit se posa është vërejtur policia, një pasagjer e kishte hedhur jashtë automjetit një pistoletë të llojit Bereta. Policia e ka sekuestruar pistoletën dhe tre të dyshuarit që ndodheshin në automjet janë sjellë në stacion për intervistë”, thuhet në komunikatë.
Më tutje thuhet se, “gjatë intervistës është bërë e ditur se pistoleta i përkiste shoferit, i cili kërkohej nga Policia e Rahovecit për kanosjen e një polici”.
Lidhur me rastin është informuar prokurori i shtetit, i cili ka nënshkruar vendimin për ndalimin e të dyshuarit për 48 orë.
29 shtatori Shqipërinë e gjen me shumë aktivitete, kjo për arsye se kjo datë shënon “Ditën Kombëtare të Trashëgimisë Kulturore”. Kjo ditë ka hyrë në kalendarin kulturor në Shqipëri në kuadër të Ditëve Evropiane të Trashëgimisë Kulturore që festohen në 50-të vende të Evropës. Në kuadër të kësaj dite në Tiranë në Muzeun Historik Kombëtar do të hapet ekspozita ikonografike dhe ornamentike “Thesare të Shpëtuara”, ndërsa aktivitetete do të mbahen edhe në qytete të tjera të vendit, shkruan KultPlus.
Ndryshe nga Shqipëria, Kosova nuk ka një datë të caktuar sa i përket festimit të Ditëve Evropiane të Trashëgimisë Kulturore. Por, kjo nuk do të thotë që këto ditë nuk po festohen.
Fillimisht, Muzeu i Kosovës në shënim të Ditëve të Trashëgimisë ka pasur si aktivitet katër ditë të kulinarisë Ilire në Etno Fest.
“Muzeu i Kosovës këto ditë i ka shënuar me diçka të re që e ka prekur temën e kulinarisë Ilire, ky ka qenë mesazhi ynë për këtë vit”, tha drejtori i Muzeut të Kosovës, Skender Boshtrakaj, për KultPlus.
Ndërsa drejtoresha e Departamentit të Trashëgimisë Kulturore në Ministrinë e Kulturës, Vjollca Aliu, tha që Kosova nuk ka një datë të caktuar, por në kuadër të Ditëve Evropiane të Trashëgimisë për këtë vit, aktivitetet i kanë zhvendosur kryesisht për fundin e muajit tetor.
“Ne këtë vit jemi fokusuar në hapjen e lokalitetit Ulpiana – Park Arkeologjik si dhe në Konferencën Ndërkombëtare për Menaxhimin dhe Promovimin e Trashëgimisë Kulturore e cila do të mbahet prej datës 27 deri më 29 tetor. Aktivitete ka pasur edhe prej organizatave të ndryshme joqeveritare, si CHWB-ja të cilëve ju kemi mundësuar vizitën në lokalitetin Dresnik, tutje mund të ketë aktivitete të ngjashme, nuk është diçka e kufizuar”, ka thënë Vjollca Aliu për KultPlus, e cila tutje tha që sa i përket caktimit të një date, deri në këto momente nuk ka një datë të caktuar, por nuk është diçka që nuk është diskutuar.
Ditët e Trashëgimisë Evropiane është një festë e cila zhvillohet gjatë tërë muajit shtator, në këtë aspekt Sali Shoshi nga CHWB, mendon që është në rregull edhe nëse nuk ka një ditë të caktuar gjatë shtatorit sepse mund të festohet gjatë tërë muajit.
“Por, përndryshe çdo vend e cakton një ditë, por nuk është e thënë që të jetë në muajin shtator, mund të jetë një ditë që lidhet me ndonjë moment, ndonjë ngjarje, diçka që e karakterizon Kosovën. Ideja e këtij muaji, është që të ketë mobilizim të njerëzve që të marrin pjesë në aktivitete, dhe ideja është që të hapen vendet që janë të mbyllura gjatë vitit”, ka thënë Shoshi për KultPlus. Përderisa nuk e sheh problematike se pse nuk ka një ditë të muajit shtator, Shoshi pohoi se do të ishte mirë të kishte diçka konkrete sepse mund të reflektosh se çfarë ke bërë dhe ku ke mbërri prej asaj date të vitit të kaluar e deri në atë moment.
Rikujtojmë se së fundmi Ministria e Kulturës, Rinisë dhe Sportit ka nxjerrë rregullore për dhënien e Çmimit për Veprimtari në Fushën e Trashëgimisë Kulturore.
Këto çmime u jepen personaliteteve të shquara për mbrojtjen, ruajtjen dhe promovimin e trashëgimisë kulturore. Ministria e Kulturës, nëpërmjet këtyre çmimeve, synon të përkrahë personalitet që kontribuojnë në ruajtjen, studimin dhe promovimin e trashëgimisë kulturore të Kosovës. / KultPlus.com
Persona të pandërgjegjshëm gjatë ditës së djeshme kanë hedhur kafshë të ngordhura në rrugën Prizren-Lybeçevë, në një nga pikat e zeza të deponive të egra që janë krijuar përreth kësaj rruge.
Hedhja e kafshëve të ngordhura që kundërmonin rëndë përreth rrugës Prizren-Lybeçevë, kishte revoltuar shumë banorë të kësaj të fundit të cilët gjatë ditës së sotme na kishin njoftuar për këtë shqetësim të tyre.
Hazër Memedaj, thotë se ai praninë e kafshëve të ngrodhura e kishtë vërejtur gjatë pasdites së djeshme në vendin ku prej kohësh hudhen mbeturina të shumta, dhe se tashmë ky vend mu përreth rrugës ëshët shndërruar në deponi të egër.
Ai shpreh revolten e tij ndaj personave që bëjnë akte të këtilla, por edhe institucioneve që nuk merren me luftimin e kësaj dukurie.
Memedaj i cili na priste në vendngjarje, para arritjes sonë kishte rastisur të takojë edhe kryetarin e Prizrenit, Ramadan Muja, të cilin e kishte informuar me rastin dhe nga i cili kishte kërkuar të merren masa urgjente për të larguar kafshët e ngordhura, por edhe mbeturinat tjera që janë hedhur jo vetëm në këtë vend, por edhe përgjatë tërë kësaj rruge.
Edhe banori tjetër i fshatit Lybeçevë, Abdulla Maçkaj, shpreh shqetësimin e tij për këtë dukuri të shëmtuar që mund të haset në shumë pjesë të kësaj rruge.
Hazër Memedaj paralajmëron institucionet se në rast se nuk marrin masa konkrete dhe në mënyrë efikase, ai do të apelojë te bashkëfshatarët e tij që në të ardhmen mbeturinat t’i sjellin për t’i hedhur nëpër rrugët e qytetit të Prizrenit dhe para objekteve komunale./TV Prizreni/
Afërdita Kicaj
Besimi i qytetarëve në gjyqësor varet nga mënyra se si mediat e portretizojnë sistemin ligjor. Gjyqësori ynë do të flasë me një zë të qartë dhe të qëndrueshëm, dhe do të dëgjoj me kujdes zërin e njerëzve. Sistemi gjyqësor mbron sundimin e ligjit duke i shërbyer interesit publik.Ekzistojnë mendime të ndryshme që e përcaktojnë demokracinë, por vetëm dy janë që e mbrojnë demokracinë si: shtypi i lirë dhe gjyqësori I pavarur.
Qeverisja e mirë nuk nënkupton vetëm shërbimin ndaj qytetarit, por edhe komunikimin e duhur madje më shumë se gjysma e qeverisjes së mirë është komunikimi, ndërsa pjesa tjetër është shërbimi. Zyra e Informimit, si një segment shumë i rëndësishëm brenda një sistemi demokratik, shërben si urë lidhëse mes gjykatës dhe publikut. Në janarin e vitit 2013 filluan reformat gjyqësore në sistemin e drejtësisë. Me këto reforma ndryshoi edhe struktura e brendshme e gjykatës. Në këtë vit filloi punën edhe Zyra për informim publik e cila u paraqit si domosdoshmëri në brendinë e gjykatës, në atë mënyrë që opinioni publik të njihet më për së afërmi me punën që bëhet brenda këtij institucioni të drejtësisë.
Përmes kësaj zyre, informacioni shpërndahet në mënyrë më të drejtë, më të shpejtë dhe më të saktë, prandaj do të jetë e hapur për të gjithë ata që dëshirojnë të marrin informacion për punën e gjykatës. Kjo zyre është urë lidhëse në mes gjykatës dhe qytetarit, duke lehtësuar komunikimin mes të dyja palëve.Gjykata Themelore e Prizrenit është duke punuar intensivisht në rritjen e komunikimit me qytetarët.
Për këtë qëllim gjykata në bashkëpunim me organizatën joqeveritare “EC Ma Ndryshe” ka hapur një dritare të re të transparencës, ku kemi promovuar produkte të reja të komunikimit të cilat kanë për qëllim rritjen e transparencës dhe forcimin e komunikimit me qytetarët, siç janë: Strategjia e Komunikimit, broshura “Si ti qasemi gjykatës”, të cilat përmbajnë informacione relevante për punën e gjykatës dhe të drejtat e qytetarëve, si dhe spotin televiziv që ka përmbajtje informative për punën e gjykatës dhe është transmetuar në të gjitha televizionet lokale dhe e njëjta po transmetohet në televizionin publik.
Produkti i katërt është Buletini informativ në baza tremujore “Gjykatë e Hapur” e cila është edhe një dritare e re e transparencës dhe punës së Gjykatës Themelore Prizrenit që synon fuqizimin e besimit të qytetarëve në sistemin e drejtësisë në përgjithësi, dhe në punën e gjykatës në veçanti. Pra me sukses po publikohet numri i 6-të i këtij buletini. Gjykata e Prizrenit ka bashkëpunim të mirë me të gjitha mediat, me shkollat dhe Universitetin e Prizrenit. Gjykata së bashku me Universitetin “Ukshin Hoti” në Prizren dhe OJQ “EC Ma Ndryshe” ka krijuar një program të praktikantëve, i cili mbështet Zyrën për informim publik të gjykatës dhe që është zyrtarizuar me nënshkrimin e marrëveshjes së mirëkuptimit.
Me angazhimin e praktikantëve kemi realizuar një numër të madh veprimesh në emër të rritjes së komunikimit të gjykatës me qytetarët. Në emër të Gjykatës Themelore të Prizrenit i falënderoj të gjithë bashkëpunëtorët nga shoqëria civile, mediat, Universitetin, kolegjet, shkollat dhe segmentet tjera të shoqërisë të cilët japin kontributin e tyre, për një gjykatë të hapur dhe transparente.
Zyrtare për Informim Publik-Zëdhënëse
Në fshatin Vërmicë të Prizrenit është shkelur me veturë një këbësor. Policia njofton se viktima ka pësuar lëndime trupore.
“ I dyshuari përderisa ishte duke lëvizur mbrapa me veturën e tij, nga pakujdesia ka goditur këmbësorin”, njofton Policia e Kosovës.
Viktima ka pësuar lëndime trupore dhe i njëjti ka pranuar tretman mjekësor. Me urdhër të prokurorit rasti është dërguar në procedurë të rregullt./PrizrenPres.com/
Në kuadër të procesit të brendshëm zgjedhor, Dega e Aleancës Kosova e Re në Prizren, ka mbajtur Kuvendin Zgjedhor të Forumit Rinor në këtë qytet. Në prani të 115 delegatëve, me shumicë votash, kryetar i Forumit Rinor në Degën e AKR-së në Prizren, është zgjedhur Rinor Rexhaj.
Kryetari i sapozgjedhur Rinor Rexhaj, ka thënë se “shumë njerëz janë bërë pjesë e partive me qëllim të arritjes në pushtet apo qëllimeve klienteliste, por me AKR-në dhe me presidentin Behgjet Pacolli, do t’ia kthejmë dinjitetin vendit”.
Kuvendin e ka përshëndetur edhe koordinatori nga qendra, Vesel Makolli, i cili ka shpjeguar se në programin e AKR-së është i paraparë një prosperitet ekonomik me një rritje zhvillimore, që, sipas tij, do të mundësojë krijimin e shumë vendeve të reja të punës, arsim dhe shëndetësi cilësore. Ndërsa koordinatori i Forumit Rinor nga qendra, Sami Borovci, ka deklaruar se Aleanca Kosova e Re, fuqinë e saj e bazon te rinia.
Në Kuvend ka folur edhe Valbona Mazreku nga grupi koordinues i AKR-së në Prizren, e cila ka thënë se në krye me Behgjet Pacollin, AKR-ja do të qëndrojë stoike në skenën shumëpartiake të Kosovës, e gatshme dhe e vendosur që të përballet me të gjitha sfidat.
Kuvendi më pas ka zgjedhur edhe strukturat tjera udhëheqëse të Forumit të Degës, si dhe kryesinë e forumit të përbërë prej 11 anëtarësh.
Përveç mysafirëve dhe delegatëve, punimet e Kuvendit kishin ardhur që t’i përcillnin edhe koordinatori i zgjedhjeve në AKR, Vesel Makolli, koordinatori i Degës së AKR-së në Prizren, Osman Krasniqi, koordinatorët e Forumit Rinor në nivel qendror Sami Borovci dhe Zijadin Geci, drejtori për Kulturë, Rini dhe Sport në Komunën e Prishtinës nga radhët e AKR-së, Besart Vllahinja, dhe shumë të tjerë.
Policia e Suharekës në bashkëpunim me rojat e parkut nacional kanë identifikuar e më pas i kanë arrestuar katër të dyshuar mbi bazën e dyshimit se të njëjtit në tri raste me datën 27 shtator janë hasur në flagrancë duke prerë dru në vendin e quajtur “Maqurishte” në parkun nacional të bjeshkëve mbi fshatin Mushtisht, shkruan PrizrenPress.
Të dyshuarit, sipas kumtesës së policisë, janë intervistuar në polici dhe më pas është informuar prokurori i shtetit i cili ka urdhëruar që të dyshuarit të ndalën nën masën e arrestit policor, ndërkaq drutë dhe mjetet bartëse janë sekuestruar. /PrizrenPress.com/