Vendi ka nevojë për prokurorë e gjyqtarë të guximshëm e të aftë

“Ne nuk kemi asnjë gjykatës edhe as prokuror, i cili është vrarë nga krimi i organizuar, që kjo flet edhe për atë se nuk i kanë shpallur luftë krimit, dhe kësisoj përderisa nuk i kanë shpallur një luftë të tillë krimit, ky i fundit nuk i ka ngacmuar ata. Por, në këtë aspekt së pari duhet të krijohet ideja në medie që na duhen heronj në mesin e prokurorëve dhe gjyqtarëve”, shprehet analisti Nexhmedin Spahiu

Analistët dhe njohësit e fushës së drejtësisë, por edhe opozita e vendit kanë sugjeruar se për ta ndryshuar këtë gjendje të brishtë në drejtësi, kërkohet një gjeneratë e re e cila do të vinte në krye të drejtësisë dhe do ishte pa etiketime, por njëkohësisht të bëhej edhe një reformë e thellë dhe mirëfilltë në këtë sistem. Krahas kësaj, ata kanë thënë se duhet të ngrihet edhe ideja e heroizmit në mesin e gjyqtarëve dhe prokurorëve, ngase në të kundërtën nuk mund të ngrihet në këmbë as institucioni i drejtësisë.

Shtrohet pyetje a ka shpresë dhe mundësi reale Kosova që të krijojë një brez të ri nga dhe nga e para të prokurorëve e gjyqtarëve të painkriminuar, të shkolluar dhe të aftë e me etikë dhe integritet profesional, të cilët do të zëvendësonin të gjithë të korruptuarit e të inkriminuarit ekzistues në sistemin e drejtë- sisë, dhe po ashtu a mund të gjinden së paku ‘disa heronj të drejtësisë’ në këtë vend për t’ia kthyer shpresën dhe besimin qytetarëve në ‘drejtësinë e ardhshme kosovare’?

Analisti Shefqet Dibrani në një prononcim për gazetën “Kosova Sot” ka thënë se Kosova ka mundësi reale për të dalë nga kriza e thellë, e cila e ka kapluar jo vetëm në rrafshin e drejtësisë, por në të gjitha drejtimet, por mbetet enigmë dhe pikëpyetje nëse e ka një vullnet të tillë për të dalë nga kriza, shkruan gazeta Kosova Sot.

Sipas Dibranit, oligarkët janë në gjendja ta shtyjnë vendin drejt anarkisë, drejt kaosit dhe drejt luftës civile, ngase, siç tha, ata kështu mendojnë se do t’i shmangen gjykimit të pjesërishëm ose të tërësishëm.

“Shpresat janë më të vogla, prandaj mundësitë nuk duken në horizont, pasi fillimisht duhet vullnet dhe vendosmëri, për t’ia shtuar shpresat këtij populli se Kosova nuk ka përfunduar. Jo vetëm nga brezi i ri, por Kosova ka një garniturë prokurorësh dhe gjyqtarësh, të cilët nuk janë të involvuar deri në atë shkallë sa të mos e kenë të drejtën morale për ta ushtruar detyrën e tyre profesionale. Por, mbi drejtësinë është krijuar një mjegullnajë, ndërsa kualifikimet e përgjithshme e pengojnë vullnetin e mirë për të lëvizur në këtë plan. Gjithsesi e tashmja kaq e rënduar dhe ardhmëria e drejtësisë në Kosovë duhet të shikohet nga një brez i ri, i cili nuk i ka hipotekat e sistemit të kaluar dhe as nuk janë të shantazhuar nga e tashmja mbytëse dhe pa perspektivë”, ka vijuar më tej ai, derisa ka thënë se nuk e di se sa janë të interesuar vendet mike për të bërë reforma, për të dhënë instruksione dhe për ta përgatitur një brez tjetër që do ta kthente drejtësinë në binarë dhe do të jepte shpresën se këtu do të bëhet mirë.

“E nëse sot fillohet me reforma, rezultati i kësaj përpjekjeje do të shihet pas dy vitesh e nëse ne nuk fillojmë diku sot, të mos presim as pas katër vitesh se do të bëhet mirë. Prandaj shtresa intelektuale, njerëzit e ndërgjegjshëm nuk duhet të presin se mrekullia vjen nga Zoti dhe nga Amerika”.

Ndërsa sa u përket heronjve të drejtësisë, Dibrani thotë se ata janë në mesin tonë, por vetëm se ata duhet inkurajuar për t’u flijuar për të marrë përgjegjësinë për një proces i cili duhet të ndodhë.

“Ne kemi dy-tre raste të heronjve, por ata ose u mbyten nga injoranca ose u injoruan, por intelektuali kurrë nuk duhet të dorëzohet, nga hipokrizia dhe hipokritët që e rrethojnë atë dhe shoqërinë. Dikush duhet ta marrë primatin e heroit të drejtësisë në Kosovë”, është shprehur Dibrani. /Kosova Sot/

Prokuroria Speciale e Kosovës, e cila që nga viti 2014 ka marrë kompetencën e hetimit të krimeve të luftës, nuk ka asnjë hetim të hapur për ato çfarë ndodhën në këtë fshat gjatë dhe pas luftës.

Thirrjet e protestat e banorëve të Mushtishtit për t’u hetuar krimet e luftës të cilat ndodhën në këtë fshat kanë hasur në veshë të shurdhër të Prokurorisë së Shtetit.

Prokuroria Speciale e Kosovës, e cila që nga viti 2014 ka marrë kompetencën e hetimit të krimeve të luftës, nuk ka asnjë hetim të hapur për ato çfarë ndodhën në këtë fshat.

Të dhënat tregojnë për 17 shqiptarë dhe 2 serbë të vrarë e po ashtu 16 serbë dhe 12 shqiptarë të zhdukur në këtë fshat gjatë dhe pas luftës.

Por, përkundër krimeve të kryera, në Prokurorinë Speciale nuk ka asnjë hetim të hapur për ngjarjen.

Banorët e fshatit ankohen se 17 vite pas luftës nuk janë intervistuar nga askush për ato çfarë ndodhën.

Banorët synojnë që duke bllokuar kthimin e serbëve në fshat të tërheqin vëmendjen e Prokurorisë për të nisur një hetim

“I bëjmë thirrje Prokurorisë së Shtetit le të vjen edhe të bën hulumtime në Mushtisht. Ka argumente faktike, duke u bazuar edhe ne fotot që posedojmë pranë nesh dhe atëherë le të fillon dënim dhe në hapet e mëtutjeshme shohim a janë relevante për kthimin e tyre a jo”, thotë Bislim Ibrahimi banor i fshatit.

Kërkesë për hetime ka edhe Xhemajli Muharremi, dy prindërit e të cilit konsiderohen të zhdukur që nga viti 1999. “Ata unë s’un i nali me ardhë, po prindërit e mi ku janë? Ku i kanë lanë ata ushtria, le të kallxojnë ku i kanë lanë, tani nëse vijnë prindërit e mi gjallë, tani edhe ata tjerët që janë të zhdukur le të vinë”, thotë Muharremi.

Për fshatin me 19 të vrarë, përfshirë 17 shqiptarë dhe 2 serbë, dhe 28 të zhdukur, përfshirë 16 serbë dhe 12 shqiptarë, nuk ka hetime të hapura.

Zëdhënsja e Prokurorsië Speciale, Liridona Kozmaqi, thotë për KALLXO.com se Prokuroria ka të regjisturara vetëm dy raste për këtë rast, të cilat figurojnë të mbyllura pasi kallëzimet penale janë hedhur poshtë.

Ndërsa, Bekim Blakaj nga Fondi për të Drejtën Humanitare, thotë se kundërshtimi i banoreve shqiptarë të fshatit Mushtisht është i arsyeshëm.

“Është i arsyeshëm mllefi i tyre sepse kanë kaluar 17 vite prej luftës, ku sipas të dhënave që ne i posedojmë vetëm në fshatin Mushtisht 16 shqiptarë janë vrarë apo janë zhdukur, ka pasur vrasje makabre dhe nuk kanë pa drejtësi këto familje”, thotë Blakaj.

Debati për krimet e luftës në Mushtisht rinisi gjatë tentativës për të rikthyer serbët e fshatit.

Në kundërshtim të kthimit të serbëve pati edhe një protestë më 28 gusht. Banorët e Mushtishtit thanë se nuk ka kthim të serbëve pa u hetuar krimet e luftës dhe pa u dënuar kriminelet.
Para kësaj proteste, më 21 gusht disa të rinj nga ky fshat vendosën një pllakat në qendër të Mushtishtit. Në këtë pllakat janë emrat e shqiptarëve të vrarë dhe fotografitë e shtëpive të djegura e të shkatërruara, sipas tyre, nga ish-bashkëfshatarët e tyre bashkë me policinë dhe ushtrinë serbe.

Në protestën e 28 gushtit pati përleshje mes protestuesve dhe policisë, me ç’rast pat të lënduar e të arrestuar. E serbët që tentuan të vizitonin pronat e tyre u kthyen mbrapshtë pa e realizuar një synim të tillë.

Për pjesmarrësit e protestës kanë nisur hetimet nga Prokuroria e Prizrenit.

Ngjarjet gjatë protestës së 28 gushtit i pati dënuar presidenti i Kosovës, Hashim Thaçi. /Kallxo.com/