Në kuadër të shënimit të muajit të rinisë në Kosovë, Dita e Rinisë, po shënohet sot në Malishevë.

Në hapjen zyrtare të kësaj dite, u dhanë mesazhe për të rinjtë malishevas. Në këtë hapje zyrtare, krahas të rinjve dhe organizatave rinore, morën pjesë edhe kryetari i Komunës së Malishevës, Ragip Begaj dhe deputeti i Kuvendit të Kosovës, Enver Hoti, të cilët përveç përshëndetjeve, dhanë mesazhe të shumta, për luftimin e dukurive negative, për orientim në karrierë, për ruajtjen e traditës dhe kulturës shqiptare.

“Ne po mundohemi që ti mbështesim aktivitetet rinore dhe të krijojmë infrastrukturën e nevojshme për të rinjtë, në mënyrë që ju të keni mundësi ti tregoni vlerat e vërteta. Krahas ecjes me kohën dhe zhvillimeve tjera, ju duhet ta ruani dhe ta kultivoni edhe traditën dhe kulturën tonë mijëravjeçare. Po ashtu, ju bëj thirrje, që ti luftoni dukuritë negative dhe të ecni me trenin e jetës dhe mos lejoni që ky tren të dal nga binarët. Ju jeni nismëtarët e luftimit të dukurive negative dhe brezat e ardhshëm, do të mburren me juve. Urime Dita e Rinisë dhe shumë suksese në jetë”, ka thënë Begaj.

Ndërsa, deputeti i Kuvendit të Kosovës, Enver Hoti, tha: “Për të pasur sukses në jetë, ju duhet të orientoheni që tani në karrierë. Gjithashtu, ruajtja e traditës dhe kultivimi i vlerave dhe kulturës, ju garanton suksesin tuaj në jetë. Ne e kemi për detyrë të punojmë për ju, të krijojmë kushte për ju, dhe ju këtë angazhim të shoqërisë për ju, duhet ta tregoni me suksesin tuaj. Ju jeni e ardhmja dhe perspektiva e vendit varet nga ju”, ka thënë Hoti, duke ju drejtuar të rinjve të Komunës së Malishevës.

Më pas, aktivitetet për ritën e sotme filluan me një debat me të rinjtë, pikërisht me këtë temë, për orientim në karrierë dhe arritjen e sukseseve grupore dhe jo vetëm individuale. Më pas aktivitetet do të vazhdojnë sipas agjendës së paraparë, ku parashihen shumë aktivitete, kulturore, argëtuese, sportive dhe të cilat do të përfundojnë me një pasdite muzikore në parkun e qytetit. /PrizrenPress.com/

Kryetari i i NISMA për Kosoven Fatmir Limaj do të qëndrojë sot në Prizren.

Ai bashkë me deputetin Zafir Berisha, ka planifikuar të vizitojë Shoqërinë Kulturo Artistike “Agimi”.

Takimi do të mbahet në ora 18:30, në lokalet e ShKA “Agimi” në Prizren. /PrizrenPress.com/

Komuna e Malishevës njofton se vaksinimi i kafshëve kundër sëmundjes gungore, më datën 24. 09. 2016 (e shtunë), do të bëhet në fshatin Vermicë, Fshati i Ri dhe Berishë, duke filluar nga ora 08:00 deri në mbrëmje.

“Ju bëjmë thirrje të gjithë fermerëve të fshatrave të lartcekura që gjatë ditës lopët ti mbajnë të mbyllura mos ti lëshojnë në fushë, deri në përfundimin e vaksinimit nga ekipet që do të vizitojnë çdo familje (fermerë)”, apelon kjo Komunë. /PrizrenPress.com/

Aktivistët e Lidhjes Demokratike përkujtohen një ditë, harrohen një vit.

“Në fushatën elektorale të zgjedhjeve të përgjithshme, Isa Mustafa me përcjellës, përkatësisht tani qeveritarë, jo pak vota i kanë marrë nga elektorati edhe në saje të zotimeve se në rast të marrjes së pushtetit do t’i zbulojnë vrasësit e veprimtarëve, kryesisht nga provenienca e LDK-së, dhe të njëjtit konform me ligjin do t’i ndëshkojnë. Ndërkaq, së paku deri tani, ata asgjë prej gjëje nuk kanë ndërmarrë”, tha prof. Riza Smaka, raporton Gazeta Kosova Sot

Edhe pse po bëhet më shumë se një dekadë e gjysmë nga funksionimi i institucioneve të reja të Kosovës, sa nën autoritetin ndërkombëtar të UNMIK-ut e sa në realitetin e krijuar politik dhe institucional me shpalljen e pavarësisë së Kosovës, zbardhja e vrasjeve politike të pasluftës po vazhdon të mbetet një nga njollat më të errëta të historisë së re të shtetit të Kosovës. Viktima të kësaj periudhe kohore janë kryesisht aktivistë të shquar dhe kontribuues të devotshëm të LDK-së në ditët më të vështira, nën okupimin serb, në luftë dhe në ditët e para të çlirimit. Përkujtimi i veprës së tyre ndodh vetëm kur dikush kujtohet të marrë organizimin e përvjetorit të radhës, të shënimit të ditës së vrasjes së ndonjërit nga këto figura. Përfaqësues të këtij subjekti politik, por edhe njohës të fushës së sundimit të ligjit dhe analistë të pavarur, konsiderojnë se LDK-ja po sillet me një lloj hipokrizie të skajshme ndaj gjithë atyre figurave që u vranë gjatë apo pas luftës. LDK-ja, edhe pse ishte para dy mandatesh në pushtet, është edhe tani me më shumë ndikim në koalicionin qeverisës, me më shumë përgjegjësi institucionale, po kujtohet për vrasjet e aktivistëve të saj pas lufte vetëm në përvjetor, sikur ishte dy ditë më parë rasti i përvjetorit të Ahmet Krasniqit e të tjerëve.

Akademitë përkujtimore, cinike dhe mashtruese

Deputeti i LDK-së, Adem Salihaj, këtë lloj hipokrizie e shpjegon me faktin se LDK-ja vazhdon të bashkëqeverisë pikërisht me atë strukturë individësh që dyshohen për lidhje të drejtpërdrejtë me krimin politik të pasluftës, andaj derisa është kështu i ka duart e lidhura për të bërë diçka më shumë, përveç organizimit të përvjetorëve dhe mbajtjes së fjalimeve politike për ish-aktivistët e saj të privuar nga jeta.

“Zbardhja e vrasjeve politike nuk mund të bëhet nga ata që i kanë kryer ato vrasje. Përderisa janë në hierarkinë më të lartë të shtetit vrasësit, është absurde shpresa se do të bëhet zbardhja e tyre. Akademitë përkujtimore për çdo përvjetor dhe “zotimi” si refren i vazhdueshëm se do të zbardhen këto vrasje është vetëm një cinizëm dhe mashtrim i opinionit, në një situatë të mungesës së shpresës dhe besimit në sistemin politik, duke përfshirë edhe sistemin e drejtësisë”, ka theksuar ai.

“Këto vrasje nuk do të zbardhen asnjëherë derisa në Kosovë nuk qeveris një strukturë politike e pastër dhe e ndershme, derisa në sistemin e drejtësisë nuk punojnë njerëz të pastër e të ndershëm, të cilët nuk janë të vendosur aty përmes aferave “Pronto” dhe nuk i kontrollon vetë mafia e vrasësve’, tha deputeti Salihaj. /Kosova Sot/