Një nga pengesat serioze që për institucionet e drejtësisë kosovare, në Prokurori dhe në Gjykata, e që do të duhej të ishte pjesë e zgjidhjes sa më të mirë me pakon e reformimit të këtij sistemi në të ardhmen, nga ekspertët e kësaj fushe po konsiderohen mbajtja e nga dy- tre pozitave të ndryshme, përveç asaj primare nga gjykatës dhe prokurorë të shtetit. Sipas njohësve të kësaj fushe, lejimi i mundë- sisë që, përveç ushtrimit të profesionit specifik në drejtësi, disa nga këto kuadro të ligjërojnë edhe nëpër institucione të ndryshme të arsimit të lartë, është edhe një formë konflikti interesi. Njohësi i kësaj fushe, Blerim Burjani thotë se përgjegjësia në adresimin e këtij problemi bie si barrë kryesore të mosreagimi i të parit të shtetit, presidentit të vendit, i cili ka përgjegjësi kushtetuese edhe për të intervenuar në vendosjen e rendit dhe rregullit në sistemin e drejtësisë së bashku me KGJK-në dhe KPK-në.

“Presidenti i Kosovës, KGJK-ja dhe KPK-ja janë përgjegjësit kryesorë pse gjyqtarët dhe prokurorët kanë edhe kontrata dytësore pune në universitetet publike dhe në kolegjet private. Angazhimi i këtyre njerëzve nëpër këto biznese publike dhe private e cenon drejtpërdrejt neutralitetin dhe paanshmërinë e detyrës së tyre primare”, ka theksuar ai

Mijëra lëndë mbesin pa u zgjidhur Eksperti i së drejtës, Muhamet Kelmendi thotë se kjo ndarje e papërcaktuar me ligj ka ndikuar që shumë gjyqtarë, prokurorë, madje edhe deputetë e ministra e shumë të tjerë në nivel të institucioneve të ndryshme të merren edhe me nga dy a tri punë të tjera,veç asaj që e kanë punë kryesore. “Ka raste kur një person i tillë është edhe anëtar i disa bordeve, si dhe e ka vendin e punës, kuptohet se është edhe ligjërues. Mënyra e tillë e lejimit të ushtrimit të disa detyrave ka bërë që punët kryesore, ato të Prokurorisë, të gjykatave, pse jo edhe të ministrive, sikurse ato të deputetëve në Kuvend të mos kryhen në nivelin e duhur”, u shpreh ai.

“Ne kemi, sipas të dhënave zyrtare që publikohen herë pas here, me mijëra raste të pazgjidhura nëpër gjykata. Ndërsa, gjyqtarët merren me punë të tjera, me atë të ligjëratave, të komisioneve, të organizimit të seminareve, e çështje të tjera, të cilat e kanë kufizuar për së tepërmi punën e tyre. Ky është vetëm një fakt pse kanë mbetur shumë lëndë pa u zgjidhur”, tha Kelmendi për “Kosova Sot”.

Ai ka pohuar se, derisa nuk ka reformim të thellë të sistemit të përcjellë edhe me ndryshimet në politikat e qeverisjes së vendit, nuk do të vendoset rregull dhe rend as në sistemin e drejtësisë. “Këto struktura ndryshojnë vetëm me spastrime të mëdha, që duhet të bëhen nëpër gjykata, nëpër prokurori dhe në polici. E, kjo nuk arrihet pas spastrime të politikës. Gjithsesi që këto dy çështje shkojnë në zgjidhje vetëm nëse zgjidhen së bashku”, ka theksuar ai.

Konflikti i interesit të sanksionohet me ligj Sipas Kelmendit, edhe sanksionimi me ligj i ndalimit të ushtrimit të më shumë se një detyrë e ndihmon shumë këtë proces. “Natyrisht se nxjerrja e ligjit, duke e sanksionuar punën dhe duke ndaluar konfliktet me interes, ndikon pozitivisht. Kjo vetëm e hap perspektivën e shërimit të sistemit të drejtësisë dhe të organeve kundër krimit. Po, nuk e shëron atë plotësisht. Shërimi bëhet vetëm me spastrime në kuadër të politikës, të sistemit të drejtësisë dhe me ligjet e tilla që ndalojnë punën e tillë, duke e neglizhuar punën shumë të rëndësishme parësore, sikurse janë gjykatat, policia dhe prokuroria, për disa qindra e mijëra euro që i marrin”, ka thënë ai. Sipas tij, me ligj duhet të ndalohet çdo kund konflikti i interesit. “Nuk mund të jesh gjyqtar a prokuror dhe ligjërues, polic në strukturën komanduese e udhëheqës a deputet, ministër etj., edhe duke qenë në ndonjë pozitë tjetër dhe në shërbim të politikes, anëtar i disa bordeve a në shërbim të sektorit privat. Ky është konflikti madh dhe në dëm të funksionimit të mirëfilltë të shtetit ligjor”, tha Kelmendi për “Kosova Sot”

Aleanca për Ardhmërinë e Kosovës dhe Nisma për Kosovën edhe një herë u kanë bërë thirrje deputetëve të Kuvendit të Kosovës që të mos e votojnë marrëveshjen për demarkacionin me Malin e Zi.

Lideri i AAK-së, Ramush Haradinaj, tha që ky projektligj është i gabuar, e që është vërtetuar edhe nga njohësit e kësaj çështje, por edhe përkundër kësaj ai tha se qeveria po insiston që ta kalojë sa më parë këtë projektligj të gabuar.

“Ajo po bënë një gabim të madh, sipas bindjes sime më mirë parlamenti është mos me diskutua një version dhe në rast se përfundon në parlament besoj që deputetët do ta rrëzojnë këtë version dhe nëse rrëzohet një version krijohet mundësia po mbetet zgjidhje politike dhe nëse është votimi pro atëherë do të jetë një tragjedi për Kosovën”, tha Haradinaj, raporton KP.

Nga ana tjetër, edhe lideri i NISMA-së Fatmir Limaj tha se dy partitë opozitare janë duke u bërë thirrje serioze deputetëve që mos ta kalojnë këtë pikë.

Ai tha se qeveria ka treguar mungesë vullneti, dëshire dhe përgjegjësie për mbrojtjen e stabilitetit dhe interesit të vendit.

Opozita flet për Demarkacionin

Dy partitë opozitare, AAK dhe Nisma, sot do të flasin sot për Demarkacionin me Malin e Zi.

Në një njoftim për media, bëhet e ditur se liderët e këtyre partive, Ramush Haradinaj dhe Fatmir Limaj, do të mbajnë një konferencë për media.

Në njoftim thuhet se konferenca do të mbahet në orën 12:00, ndërsa temë kryesore do të jetë qëndrimi i këtyre partive rreth ratifikimit të Demarkacionit.

Deputeti i Nismës, Zafir Berisha, në emisionin “Interaktiv” të KTV-së, ka thënë se deputetët e Kuvendit të Kosovës janë duke u shantazhuar për të votuar demarkacionin me Malin e Zi.

Ai është shprehur i bindur se Marrëveshja për Demarkacion me Malin e Zi nuk do të votohet në Kuvend, pasi sipas tij, shumica e deputetëve kanë mendim kundër marrëveshjes së tanishme, por ka shtuar se ndaj tyre ka shantazhe të ndryshme.

“Ne jemi kolegë dhe ne jetën e përditshme takohemi, jam i bindur se partitë tjera opozitare nuk do ta votojnë këtë, por po u bëhen shantazhe të ndryshme për të votuar demarkacionin”, ka thënë Berisha.

Duke mos dashur që të tregojë se çfarë lloje të shantazheve po u bëhen deputetëve, Berisha ka thënë se kjo është vërejtur më herët kur është votuar Gjykata Speciale dhe votimi i Hashim Thaçit për president të Kosovës.

“Këtë e kemi parë kur është votuar ligji për Gjykatën Speciale dhe me votimin e Hashim Thaçit për president. Në opinion kanë dalë lëvizjet prapa perdes me joshje të ndryshme. Ne nuk duhet të biem viktimë e politikës ditore që në kurriz të vendit të bëjmë lëshime që nuk ua fal historia”.

Berisha në “Interaktiv” ka thënë se shtyrja e mbledhjes së Kryesisë së Kuvendit për nesër, tregon se pozita nuk i ka votat për të votuar demarkacionin me Malin e Zi.

“Unë kam pritur që pasdite të mbahet mbledhja e Kryesisë por ata nuk i kanë votat. Mendoj se ka tendencë që me çdo kusht të votohet Demarkacioni para vizitës së zëvendëspresidenti i SHBA-ve, Joe Biden”.