11 trupa të personave të zhdukur janë gjetur në varrezën masive në Bishtazhin.

Këto viktima më 2 prill 1999, bashkë me qindra burra dhe djem shqiptarë, u grumbulluan me dhunë nga forcat ushtarake dhe policore të Serbisë, në një fushë në Kralan, rrethuar me tanke.

Aty u mbajtën nën tortura të vazhdueshme, pa ujë dhe ushqim për dy ditë. Më 4 prill, nga ta u ndaluan 86 burra dhe djem, ndër të cilët 11 ishin të mitur. Që nga ajo ditë, askush nga ta më nuk është parë i gjallë. Disa prej tyre ishin gjetur në afërsi të liqenit Peruqac në Bajina Bashta të Serbisë. Pas zhvarrosjes nga Bishtazhini, Serbia i rrëmbeu kufomat.

Pas 26 viteve, në varrezën masive në Bishtazhin, janë gjetur dhe identifikuar:

Adem Gashi;

Sahit Gashi;

Bekim Hasani;

Sheremet Ismajli;

Mentor Myrtaj;

Osman Fejza;

Shkelzen Hajdaraj;

Bekim Gashi;

Sabedin Kryeziu;

Mentor Kryeziu;

Vehbi Halilaj.

Për këtë çështje ka shkruajtur edhe kryeministri Albin Kurti, i cili ka thënë se plagët e hapura të zhdukjeve me dhunë janë e vërteta e krimeve çnjerëzore dhe gjenocidit të kryer nga Serbia gjatë luftës në Kosovë.

“Në këto ditë të rënda nuk është e lehtë të gjenden fjalë ngushëllimi që mund të plotësojnë zbrazëtinë që ka lënë mungesa e tyre. Është e vështirë të gjejmë fjalë mjaftueshëm të fuqishme për të përshkruar forcën dhe durimin e palëkundshëm të familjarëve përgjatë këtyre viteve”.

“Në këto ditë, e çdo ditë tjetër, të përbashkët e kemi dhembjen dhe nderimin për martirët e dëshmorët e kombit në Kosovë. Qëndrojmë bashkë për të mos lejuar harresën të mbulojë mizoritë që ndodhën në luftë”, ka thënë Kurti.

Drejtoria për Urbanizëm, Planifikim dhe Mjedis në Komunën e Suharekës të mërkurën ka organizuar prezantimin e dytë publik lidhur me dy plane rregulluese të hollësishme.

Në këtë takim janë shpalosur hollësi lidhur me procesin për Planin Rregullues të Hollësishëm “Zona Ekonomike” në Duhël dhe Planin Rregullues të Hollësishëm “Zona Industriale” në Shirokë.

“Qytetarët patën mundësinë të shprehin mendimet, vërejtjet dhe sugjerimet e tyre në lidhje me draft-dokumentet e këtyre planeve”, thuhet në njoftimin e Komunës së Suharekës.

Ndërkaq Kryetari i Komunës, Bali Muharremaj, ka theksuar rëndësinë e përfshirjes së qytetarëve në këto procese, për të siguruar zhvillim të qëndrueshëm në përputhje me nevojat e qytetarëve.

Përpjekja e Komunës së Prizrenit për të angazhuar një operator ekonomik për organizimin e trajnimit për ruajtjen e zejes së filigranit ka dështuar në tentimin e parë të sivjetshëm.  Aktiviteti i prokurimit për këtë trajnim është anuluar.

Njoftimi për anulim është publikuar të mërkurën, në platformën e prokurimit elektronik.

Si arsye nga Komuna e Prizrenit është cekur se një dispozitë në Ligjin e Prokurimit Publik kërkon anulimin e këtij aktiviteti të prokurimit.

“Nuk kemi operator ekonomik të përgjegjshëm”, thuhet në pjesën dedikuar për informatat shtesë, raporton Telegrafi.

Ky aktivitet i Prokurimit ishte iniciuar në muajin shkurt.

Në njoftimin për kontratë thuhej se operatori ekonomik duhet të sigurojë 4 mjeshtër të diplomuar të filigranit, për 8 muaj, bashkë me mjetet dhe materialet adekuate të punës për këtë artizanat.

Vlera e paraparë e kontratës, sipas njoftimit për kontratë, ka qenë 9,900 euro.

Pavarësisht kësaj, drejtori i Turizmit dhe Zhvillimit Ekonomik, Ramadan Tarashaj ka theksuar se aktiviteti i prokurimit do të zhvillohet sërish me qëllim që të organizohet trajnimi për zejen e filigranit.

“DTZHE ka bërë kërkesë që sërish të zhvillohet aktiviteti i prokurimit, pasi synimi ynë është që të realizohet trajnimi për filigranin, ashtu siç është organizuar në vitet e shkuara”, ka thënë Tarashaj për Telegrafin.

Në punëtorinë e improvizuar të Filigranit në qendër të Prizrenit prej disa vjetësh organizohet trajnimi i filigranit për dhjetëra pjesëmarrës, me qëllim të ruajtjes së zanatit të vjetër.

Trajnimi realizohet nën mentorimin e një mjeshtreje dhe tre mjeshtërve të dalluar të këtij artizanati, me mjetet nga buxheti i Drejtorisë së Turizmit dhe Zhvillimit Ekonomik. /Telegrafi/