Gjashtë dëshmitarë munguan në gjykimin për fajde dhe vepra tjera të rënda penale në Prizren.

Në gjykimin e 14 të akuzuarve për fajde dhe vepra tjera të rënda penale, nuk ishin të pranishëm gjashtë dëshmitarë të ftuar nga gjykata.

Sipas informatave të trupit gjykues shumë nga ta gjenden në botën e jashtme.

Prokurorja speciale Merita Binaj-Rugova propozoi që ose dëshmitë e këtyre dëshmitarëve të merren, ose të lexohen deklaratat e tyre të dhëna në procedurën paraprake.

“Unë nuk kam evidencë se a janë të arritshëm apo jo ata dëshmitarë, por ata që gjenden në Kosovë, të gjenden dhe të dëshmojnë në këtë shqyrtimin kryesor, ndërsa dëshmitarët të cilët gjenden në botën e jashtme propozoj që në bazë të nenit 338 paragrafi 1 nënparagrafi 1.1, të lexohen deklaratat e tyre” tha Merita Binaj-Rugova.

Propozimin e prokurores e kundërshtuan avokatët mbrojtës, me arsyetimin se gjatë dëshmisë së të mbrojturve të tyre në procedurën paraprake nuk kanë qenë të pranishëm.

Pas kundërshtimeve të mbrojtjes, prokurorja tha se kishte insistuar që të akuzuarit të mbaheshin në paraburgim, pasi sipas saj shumica e dëshmitarëve kanë ndërruar deklaratat e tyre në gjykatë.

Në seancën e 7 prillit gjykata vendosi që dy të akuzuarve-Tunë e Gjon Kqirës paraburgimin t’ua zëvendësojë me arrest shtëpiak.

Trupi gjykues mori vendim që dëshmitarët e ftuar të provohet edhe njëherë të sillen në gjykatë me anë të policisë.

Të martën dëshminë e dha vetëm Shemsedin Berisha, ndërsa ajo lidhej drejtpërdrejt me të akuzuarin Benson Buza.

Dëshmitari Berisha, tha se e njeh nga viti 2004 të akuzuarin Buza, ndërsa tregoi se në vitin 2010 tri herë mori nga 20 mijë euro prej tij-gjithsej 60 mijë euro, me kamatë 2 mijë euro në muaj.

“Pas një muaji gjysmë të rastit të dytë, kam kërkuar njëjtë 20 mijë euro, edhe për herën e tretë afati i kthimit ka qenë një muaj dhe gjithashtu kamata mujoje ka qenë 2 mijë euro” tha Berisha.

Dëshmitari tregoi se i ka marrë nga Buza edhe 2500 euro me kamatë prej 500 eurove, pasi ishte i sëmurë, ndërsa këto para tha se ende nuk i kishte kthyer.

Mbrojtja e të akuzuarve në fund kërkoi ndërprerjen e paraburgimit për katër të akuzuarit, Marjan e Kastriot Kqira, Benson Buza e Besfort Omaj.

Për Besfort Omajn, mbrojtja i propozoi trupit gjykues masën e dorëzanisë, duke i premtuar 25 mijë euro garanci. Ndërsa për Benson Buzën, familjarët e tij kishin premtuar shtëpinë si hipotekë.

Mbrojtësi i Tunë Kqirës, avokati Skender Musa, kërkoi ndërprerjen e masës së arrestit shtëpiak për shkak se Tunë Kqirës sipas tij i duhet një ndërhyrje kirurgjike.

Këto propozime i kundërshtoi prokurorja speciale dhe trupi gjykues refuzoi kërkesat e mbrojtjes për ndryshimin e masës së paraburgimit dhe po ashtu për ndërprerjen e masës së arrestit shtëpiak ndaj Tunë Kqirës, me arsyetimin se Gjykata e Apelit ende nuk ka vendosur lidhur me ankesën për ndërprerjen e paraburgimit ndaj Tunë e Gjon Kqirës.

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal më qëllim të përfitimit të drejtpërdrejtë të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde. Pastaj, duke përdorur kërcënimet e rënda, i kanë detyruar të paguajnë kamata dukshëm joproporcionale ose të kryejnë ndonjë veprim tjetër në dëm të pasurisë së tyre.

KALLXO.com e ka ndjekur vazhdimisht këtë proces gjyqësor

Biznesmeni Faton Hoxha, të martën është dënuar nga Gjykata Themelore në Prizren me gjashtë muaj burgim efektiv, për veprën penale “uzurpim i paligjshëm i pronës së paluajtshme”. Ndërsa i akuzuari tjetër për uzurpim Ilaz Susuri është liruar nga akuza në mungesë të provave.

Aktgjykim lirues është shpallur edhe ndaj zyrtarëve të Komunës së Prizrenit, Bedri Bytyqi dhe Bashkim Krasniqi, për veprën penale “keqpërdorim i pozitës apo autoritetit zyrtar”.

Aktgjykimin e ka shpallur kryetari i trupit gjykues, Xhevdet Elshani, i cili ka thënë se për të akuzuarit Bytyqi dhe Krasniqi, nuk është vërtetuar se kanë vepruar kundërligjshëm duke mos rrëzuar objektin afarist e të akuzuarit Faton Hoxha. Ai ka thënë se ligjet në fuqi ia japin të drejtën institucionit që të vendos nëse duhet apo jo të rrëzohet një objekt e sidomos në rast kur ka ankesë ndaj konkluzionit për rrëzim.

Elshani tutje ka thënë se për të akuzuarin Ilaz Susuri nuk është vërtetuar se i njëjti e ka uzurpuar pronën në fjalë, pasi që i njëjti vetëm e shfrytëzon dhe nuk pretendon për pronësi ndaj saj. Ndërsa për një objekt që  posedon në atë pronë, paguan edhe shërbimet komunale të tatimit, ujit dhe rrymës.

Ndërsa sa i përket Faton Hoxhës, Elshani ka thënë se trupi gjykues e ka gjetur fajtor për veprën penale të uzurpimit pasi që ai e ka blerë pronën nga Ilaz Susuri pa asnjë dokument mbi pronësinë dhe pa një kontratë të vërtetuar nga organet kompetente.

Aktakuza e përfaqësuar nga prokurori Metush Biraj, i ngarkonte të akuzuarit për keqpërdorim të detyrës zyrtare dhe uzurpim të paligjshëm të pronës së paluajtshme.

Sipas aktakuzës, Bashkim Krasniqi, akuzohej se në cilësinë e inspektorit komunal për ndërtim, nuk ka vepruar për rrëzimin e objektit afarist-banesor të të pandehurit Faton Hoxha, të ndërtuar pa leje në pronë komunale.

I akuzuari tjetër Bedri Bytyqi akuzohej se duke qenë drejtor i Inspektoratit, megjithëse ka nënshkruar aktvendimin për rrënim të objektit, nuk ka vepruar për të realizuar atë, duke i mundësuar Faton Hoxhës që të vazhdojë ndërtimin.

Ndërsa i akuzuari, Ilaz Susuri akuzohej se ka uzurpuar në mënyrë të paligjshme pronën ku është ndërtuar objekti, ku të njëjtën, pa fletë-poseduese, ia ka shitur të pandehurit Faton Hoxha për 35 mijë euro.

Poashtu i akuzuari Faton Hoxha akuzohej se pa kontratë të vërtetuar dhe pa dokumentacionin përkatës ka blerë pronën në fjalë nga i pandehuri, Ilaz Susuri dhe më pas ka ndërtuar objekt afarist në atë pronë./betimiperdrejtesi/

Një këmbësor është shkelur mbrëm në rrugën “Wesley Clark” në Prizren.

Policia e Kosovës, njofton se viktima ka pësuar lëndime të rëndatrupore.

“Është arrestuar i dyshuari, pasi që i njëjti përderisa ishte duke lëvizur me veturën, duke mos e përshtatur shpejtësinë e lëvizjes godet këmbësorin”, njofton PK, shkruan PrizrenPress.

“Viktima ka pësuar lëndime trupore dhe i njëjti dërgohet në spitalin e Prizrenit, e më pas në QKUK-Prishtinë për tretman të mëtutjeshëm”.

Me urdhër të prokurorit i dyshuari dërgohet në mbajtje.

Ambasadori i Francës në Kosovë, Didier Chabert është i vetmi ambasador në Kosovë, që ka vizituar kryetarin e dënuar të Prizrenit, Ramadan Mujën.
Chabert dhe Muja, në takimin e përbashkët, kanë biseduar për tema të ndryshme, por që lidhen me interesin e përgjithëshëm të Prizrenit.

“Jam shumë i kënaqur me shumësinë e e temave që kemi biseduar së bashku me kryetarin Muja”, tha Chabert.

Kryetari i Prizrenit, Ramadan Muja, nga viti që është dënuar për keqpërdorim të detyrës zyrtare nga Gjykata Themelore në Prizren, nuk është vizituar nga

personalitetet e shteteve të huaja, shkruan PrizrenPress.

“Biseduam për strukturën nacionale dhe fetare në Prizren dhe në fshatrave, për zhvillimin e kulturës multietnike, të arsimit në tri gjuhë”, tha kryetari Muja,

Ai tregoi se ambasadori është interesuar për kthimin e serbëve në Prizren./PrizrenPress.com/