Ka vdekur në moshën 86-vjeçare aktori komik italian, Carlo Pedersoli, i njohur nga e gjithë bota si Bud Spenser dhe nga shqiptarët si “polici këmbëmadh”.

Lajmin për vdekjen e tij e dha djali Giuseppe Pedersoli, i cili shkroi: “Babi fluturoi larg në mënyrë paqësore në orën 18:15. Ai nuk vuajti, na kishte ne të gjithë pranë dhe fjala e tij e fundit ishte, faleminderit”.

Bud Spencer ka lindur në Napoli më 31 tetor 1929. Për të gjithë ata që e njohin, ai ishte një burrë i madh, i fortë dhe që qëndronte gjithmonë në shoqërinë e shokut të tij Terence Hill, me të cilin ka realizuar pjesën më të madhe të filmave.

Aktori italian, i cili vdiq mbrëmjen e së hënës në një spital të Romës, ishte në fakt ylli i një karriere të gjatë dhe shumë popullore, në të cilën, kishte hapësirë për filmat komikë, ata triller (të drejtuara nga Dario Argento), madje edhe në dramën e Carlo Lizzani-t.

Shfaqja e tij e fundit në televizion ishte në vitin 2010, në emisionin “I delitti del cuoco”, të Channel 5. Ndërsa vitin e kaluar ai ishte në Napoli ku festoi marrjen e një medaljeje për karrierën e tij të gjatë, që ia dorëzoi kryebashkiaku De Magistris në pallatin San Giacomo në emër të qytetit.

1. Një njeri që bie dy herë në një gropë, është budalla – Proverb Hebre.

2. Ai që pyet bëhet budalla për 5 minuta, Ai që nuk pyet mbetet i tillë (Budalla) tërë jetën – Proverb Kinez
3. I thuaj diturisë Ti je motra ime, Gjykimin quaje vëlla – Proverb Biblik

4. Fundi i madh i jetës nuk janë njohuritë, por veprat – Proverb Amerikan (Benjamin Franklin)

5.Nuk është e vështirë të bëni gjëra të mëdha, por më e vështirë është ti komandoni gjërat e mëdha – Fridirith Nice.

6. Cdo njeri është një copë budalla 5 minuta në ditë. E rëndësishme është të mos kalohen kufinjtë – Elbert Hubart .

7. Pyeti 40 vetë, dhe bëjë si di vetë – Proverb Shqiptar.

8. Përpara se të gjykoni një të moshuar, përpiquni ta kuptoni atë – Xhorxh Santana.

9. Gjëja më e mirë që mund të bëjë një burrë për fëmijët e tij, është ta dojë nënën e tyre – Gëte.

10. Bëni vepra të vogla, por me dashuri të madhe – Nëna Terezë.

11. O edukatë njerëzore, hyjnesha më magjike e botës – Anonim.
12. Nëse takojmë 10 njerëz në rrugë, 9 prej tyre janë të mirë apo të këqinjë, të sjellshëm apo të pasjellshëm, të dobishëm apo të padobishëm. Vetëm njëri është i kompletuar sipas rregullave dhe parimeve të edukatës – Xhon Loku.

13. Së pari mësoni kuptimin e asaj që duhet të flisni, Pastaj Flisni – Epitekti

14. Mos gjyko, nëse nuk do të gjykohesh – Proverb Biblik.

15. Lëre qenin të ngordhë, ndoshta ai do të të ndjekë – Proverb Arab.

16. Eksperienca ime tregon që mësuesit të cilëve ua kemi më shumë nevojën, janë pikërisht njerëzit me të cilët jemi duke jetuar pikërisht tani – Byron Katie.

17. Kënaqu me atë që ke, gëzoju gjërave ashtu si janë – Proverb Zen.

18. Mësuesi për nxënësit, është sikur dielli për gjithësinë – Ëilhem Distervegu.

19. Nuk është e rëndësishme sa jemi të mencur, Por si jemi të mencur – Hoëard Gardner.

20. Diturinë kërkoje nga djepi deri në varr – Profeti Muhamed.

21. Shpirti do dritë, Mendja dituri, Zemra dashuri – Sevasti Qiriazi

22. Nëse të tjerët flasin, Ti hesht. Bën që heshtja jote të jetë krenari njerëzore –
Përzgjodhi: Argjira Ukimeri

Sa mund ta kuptojmë atë çfarë ndodh sot me shoqërinë dhe individin përmes gjuhës së trupit? A mundet arti të hulumtojë këtë gjuhë kaq të mistershme dhe njëkohësisht shprehëse?

Anri Sala, një nga emrat më të njohur të artit bashkëkohor, do të vijë më 7 korrik në Art House në qytetin e Shkodrës, në një bashkëbisedim për këtë komunikim, dhënë përmes vizionit të një artisti që gjithnjë sheh përmes veprave të tij përtej. Pas një karriere ndërkombëtare, kjo është hera e parë që Sala vjen në Shqipëri për të prezantuar para publikut një grup punimesh që ka krijuar gjatë veprimtarisë së tij artistike dhe për të diskutuar mbi motivet që e shtyjnë në krijimtarinë e tij.

“Në krijimtarinë time kam ndeshur një interes të veçantë për gjestin, qoftë kur ai që shfaqet si reagim fizik ndaj një situate apo rrethane imediate, apo si një element komunikues – ndonëse jo gjuhësor apo verbal – nëpërmjet të cilit trupi ‘mban mend’ dhe kultivon një aftësi të veçantë për të kujtuar një periudhë të caktuar në kohë. Trupi mishëron nëpërmjet gjestit, lëvizjeve apo shprehive të tij koreografike memorien e tij, duke përcjellë të shkuarën, impaktin, mbresat dhe gjurmët e saj në të tashmen. Në këtë kuptim, gjestet janë gjurmë të së shkuarës, të cilat nuk janë prezervuar nga procese natyrore sikurse fosilet apo gjetjet arkeologjike, por nga aftësia e qenies sociale nëpërmjet trupit të saj për të kujtuar dhe për të mos harruar”, thotë Sala.

Sipas tij, “natyra e këtyre gjesteve, shprehive koreografike apo lëvizjeve trupore merr një kuptim edhe më të plote në situata tranzicioni kur zhvillime politike apo sociale provokojnë një thyerje në besim apo ideologji, duke nxjerrë nga binarët shtyllat e botëkuptimit (common-sense) të shoqërisë dhe duke ndërprerë rrjedhën familjare të gjërave apo sistemin ekzistues të vlerave. Duke tejkaluar limitet e gjuhës, trupi i individit dhe i shoqërisë gjen nëpërmjet gjesteve, lëvizjeve dhe shprehive koreografike, aftësinë që të procedojë, memorizojë dhe kapërcejë këto momente thyerjesh, pështjellimi politik dhe çrregullimi social, duke krijuar rrugë alternative për të trashëguar historinë e vet”.

Anri Sala lindi në Tiranë, në vitin 1974. Aktualisht jeton dhe punon në Berlin. Ndër ekspozitat personale mund të veçojmë: në vitin 2016 Neë Museum, Nju Jork “Anri Sala: Answer Me”. Në vitin 2014 Haus der Kunst “The present moment”, Mynih, Gjermani. Në 2013-n, La Biennale di Venezia ku ka përfaqësuar Francën me “Ravel Ravel Unravel”. Në vitin 2011, Museé d’Art Contemporain Montreal, Quebec, Kanada. Në 2005-n, Fondazione Nico – la Trussardi “Long Sorrow” Milano, Itali.

Ndër ekspozitat e shumta kolektive mund të përmendim: në 2015-n “12th Havana Biennial” Havana; në 2014-n, Fondazione Prada “Art or Sound” Venecia, Itali; në vitin 2013, “The National Museum of Modern Art” Reading Cinema, finding works: Art after Marcel Broodthaers”, Kioto, Japoni; në vitin 2011 National Museum of Contemporary Art “Art of Communication” Seul, Kore; në vitin 2010, Jeu de Paume “Faux Amis/An Ephemeral, Video Library” Paris, Francë; në 2007 Museé National d’Art Moderne, Centre Pompidou “Airs de Paris” Paris, Francë.

Është fitues i disa çmimeve si: në vitin 2014 The Vincent Award 2014, The Hague, The Netherlandas; në vitin 2001 La Biennale di Venezia “Young Artist Prize” Venezia, Itali.

Në bisedën e tij në Art House, ai do të përqendrohet në interesin për gjestin, shprehitë koreografike dhe lëvizjet trupore. Gjatë prezantimit, do të shfaqen pjesë nga punët e tij: Intervista, Nocturnes, Uomoduomo, Naturalmystic, Time after Time, Long Sorrow, 1395 Days without Red, Ravel Ravel dhe Unravel. /Shqip/

Dy intervista me shkrimtarin dhe poetin e njohur, Roberto Bolanjo

Roberto Bolanjo jeton nja dyqind metra nga deti, në Blanes, një qytezë me tridhjetë mijë banorë, gjysmë ore larg Barcelonës. Jeton në një shtëpi me të shoqen dhe dy fëmijët që tani po flenë. Kërkon qetësi në zhurmë, preferon burgun e heshtur e nganjëherë të padurueshëm të të shkruarit. Jashtë, një hënë vjeshtake ndriçon atë çka ka lënë nata. Në korridoret e shtëpisë ka nja tre mijë libra. Bolanjo tymos cigare gjithë lakmi dhe pi Coca-Cola, ngaqë likeri i ka acaruar mëlçinë. Në sytë e tij shkëlqen ironia. Shkrimtari 50-vjeçar kilian nuk i ka qejf intervistat, ai mendon se gjithçka që ka rëndësi janë librat e tij, por, më në fund, pranon të bisedojë mbi disa çështje.

Ju keni punuar me poezinë, gjini çdo ditë më e izoluar nga rrethi botues. Ç’mendoni për poezinë si art dhe si fenomen në kohën e tanishme?

Nuk besoj se poezia do të zhduket. Dyshoj se për njëfarë kohe, poezia po pëson metamorfozë, transformim, hibridim. Sigurisht, sot është e vështirë të shiten shumë libra me poezi, siç ndodhte me librat e Bajronit, ama Lord Bajroni vazhdon të jetë dhe kjo mjafton. Ndoshta poezia tani mbijeton te disa romane. Ose në forma jo të vlerësueshme, forma bastarde, produkte të getove dhe të margjinacionit. Mbase, kur të vdesë poeti i fundit lirik, poezia do të rilindë prej hirit të vet.

Te “Detektivët e egër” ka tema kryesore që spikatin. Një prej tyre është mërgimi, një mërgim që, midis vendeve të tjera, përfshin Meksikën dhe Spanjën…

Interesante është se kurrë nuk jam ndier i mërguar. Ndoshta po, nëse do të kisha jetuar në Suedi, por dyshoj se edhe në Suedi, jo. Ajo që është e vërtetë është se në këto vende jam ndier i huaj, ama i huaj jam ndier kudo, edhe në vendin tim, në Kili. Kam qenë një fëmijë pedant, kësisoj, qysh fëmijë ndihesha i huaj.

A jeni një i zhgënjyer nga politika apo mërgimi juaj ka të bëjë më shumë me kërkimin e lirisë individuale?

E vetmja liri tek e cila besoj është liria e individit, ose në tërësi te liritë e individëve. Një liri individuale, të cilën e kemi në dorë, mjaft e ndryshueshme, mjaft e paqartë, veç, tani për tani, është e vetmja që kemi. Unë nuk jam një i zhgënjyer nga politika, edhe pse motivet për këtë nuk më mungojnë as mua dhe askujt tjetër, sepse politika, sipas një rregulli të përgjithshëm, është një çerdhe gjarpërinjsh. Vazhdoj të prirem nga e majta, edhe pse e di që e majta, qysh prej më se gjashtëdhjetë vjetësh, qëndron mbi një arsyetim bosh, mbi një shpallje të fryrë që mund t’u shërbejë (kjo ujëvarë e vendeve të zakonshme) horrave sentimentalë. Në të vërtetë, e majta reale është horrllëku sentimental i rafinuar.

Kaq vite pas rënies së dhunshme të Salvador Aljendes, si e kuptoni Kilin që nga larg?

Kam përshtypjen se demokracia po vendoset, e cila tashmë është gjë e madhe, dhe se shoqëria dalëngadalë po mëson të bashkëjetojë. Sigurisht, me koston e sakrificës së kujtesës për disa gjëra, pra, me disa lobotomí.

Cilët shkrimtarë kanë qenë themeli i edukimit tuaj sentimental letrar dhe cilët nuk do t’i këshillonit për t’i lexuar?

Servantes, Stendal, Rimbó, Poe. Nga secili lexoj çfarë dua dhe çfarë mundem. Të paktën, këtë natë e kam të pamundur të jap këshilla se cili shkrimtar nuk duhet lexuar.

Nga proza aktuale çfarë ju tërheq?

Nga proza latino-amerikane: Rodrigo Rey Rosa, Daniel Sada, Rodrigo Fresán, Alan Pauls.

Ç’mendoni për autobiografiken në letërsi?

Në njëfarë mënyre, gjithçka është autobiografike, ajo
çfarë tregohet, kalimthi, kotësia e të shkruarit autobiografi.

Ç’do të thotë për ju data 11 shtator?

Një fatkeqësi. Fillimi i një valleje të ngjashme me atë
të San Vitos. Do të thotë rënia e Aljendes, festa kombëtare e Katalunjës që të kujton një tjetër disfatë, sulmi i kamikazëve mbi Kullat Binjake që ishte një disfatë e tretë e kulturës përballë fesë. 11 shtatorin katalan nuk e kam provuar në mishin tim, por, nëse do ta kisha provuar, do të heshtja, ndryshe do të isha një vampir apo një i pavdekshëm. 11 shtatorin kilian e jetova, e vuajta dhe, meqë isha njëzet vjeç, po ashtu e shijova. 11 shtatori njujorkez më kapi në Milano, ku ndodhesha me time shoqe dhe dy fëmijët tanë. Kur pashë shpërthimin, menjëherë më shkoi mendja tek imazhet që kishim për Luftën e Tretë Botërore, gjatë viteve tetëdhjetë.

Jeni duke shkruar një roman voluminoz, ç’mund të thoni lidhur me këtë?

Ka më shumë se një mijë faqe dhe, siç mund ta marrësh me mend, nuk mund ta thuash me pak fjalë. Të shkruash diçka kaq të gjatë, të lodh. Siç thotë Pavese, të punosh, lodhesh. Edhe unë lodhem, çuditërisht, me një lehtësi të paparë. Por kjo është puna ime dhe duhet të vazhdoj.

Çfarë ju vjen në mendje kur dëgjoni këta emra: Sesar Vajeho (César Vallejo)?

Virtyt dhe shtrembërim. Lirika që vetushqehet.

Huan Karlos Onetti (Juan Carlos Onetti)?

Për më të mëdhenj se tridhjetetre vjeç.

Horhe Luis Borhes (Jorge Luis Borges)?

Zemra e modelit të Amerikës Latine.

Pablo Neruda?

Dy libra të jashtëzakonshëm dhe asgjë më.

Gabriel Garsia Markes (G. García Márquez)?

Një njeri i kënaqur që ka takuar gjithë ata presidentë e kryepeshkopë.

Mario Vargas Josa (Mario Vargas Llosa)?

Njësoj si tjetri, por më i hijshëm.

Gijermo Kabrera Infante (Guillermo Cabrera Infante)?

Një shkrimtar i çuditshëm. Në të vërtetë, nga gjithë këta shkrimtarë që më përmendët, më interesojnë vetëm Vajeho, Oneti dhe Borhes. /Shqip/