Presidentja e Kosovës, Atifete Jahjaga, ka bërë thirrje për një proces zgjedhor demokratik. Ajo ua ka kujtuar të gjithë atyre që duan të manipulojnë me vullnetin e qytetarëve, se ndëshkimi për këtë vepër penale do të jetë rigoroz.
“Kemi hyrë në një proces shumë të rëndësishëm për Kosovën në një periudhë të avancimit të proceseve demokratike për vendin, gjatë së cilës duhet të tregojmë pjekurinë tonë politike dhe përkushtimin për ndërtimin e shtetit demokratik dhe gjithëpërfshirës”, ka thënë Jahjaga, në një konferencë për media, pas takimit që pati me përfaqësuesit e institucioneve përgjegjëse për organizimin, sigurinë dhe mbarëvajtjen e procesit të zgjedhjeve komunale në Kosovë.

Presidentja Jahjaga ka thënë se zgjedhjet e 3 nëntorit janë të rëndësishme për qytetarët e Republikës së Kosovës dhe ato sigurojnë tërësinë territoriale dhe subjektivitetin e vendit. “Zgjedhjet lokale në gjithë territorin e Republikës së Kosovës, njëkohësisht, janë testi ynë i demokracisë dhe mbarëvajtja e tyre garanton rrugën tonë drejt integrimeve evropiane, drejt përparimit dhe një jete më të mirë për të gjithë qytetarët e Kosovës, pa dallim. Zgjedhjet e ndershme, demokratike, të drejta dhe të lira e hapin perspektivën tonë si vend dhe si shoqëri dhe mundësojnë ndërtimin e shtetit tonë mbi parimet demokratike dhe, në veçanti, mbi parimin e sundimit të ligjit”, është shprehur Jahjaga, duke shtuar se e drejta e secilit qytetar për të votuar dhe për t’u votuar është e garantuar me Kushtetutë dhe cenimi i kësaj të drejte, sikurse edhe cenimi i votës së lirë të qytetarit, ndëshkohet me ligj. “Vota e qytetarëve të Republikës së Kosovës është e paprekshme, e pashkelshme dhe e lirë. Çdo përpjekje për të prekur këtë votë dhe çdo përpjekje për të manipuluar me këtë të drejtë të qytetarëve të lirë të Republikës së Kosovës do të ndëshkohet fuqishëm. Shkeljet janë të patolerueshme dhe të papranueshme, sepse ato do ta pengojnë rrugën tonë drejt ndërtimit të shtetit demokratik, të lirë dhe të barabartë me të gjitha shtetet e tjera kudo në Evropë”, ka thënë Jahjaga.

Edhe pse disa prej jush e dini me siguri se ku do të votoni, ka edhe shumë prej tyre që ende nuk e kanë të qartë, lokacionin e tyre.

Për këtë gjë, Komisioni Qendror i Zgjedhjeve, ka krijuar një rubrikë në faqen zyrtare të saj, ku ju shumë lehtë mund ta gjeni lokacionin tuaj.

E tëra që duhet të bëni është që së pari të vizitoni faqen, www.kqz-ks.org pastaj nw anën e djathtë të faqes e keni një rubrikë “Ku me votu”, klikoni aty dhe jepni të dhënat tuaja personale, Emrin, Mbiemrin, datën e lindjes dhe numrin personal të letërnjoftimit dhe ju do të merrni informacionin e duhur.

Ose thjeshtë klikoni këtu: http://www.kqz-ks.org/sq/ku-me-votu

Tre nëntori nuk do të përcaktojë fituesin e zgjedhjeve në Prizren. Analistët e zhvillimeve politike, parashikojnë se fituesi në këtë qytet, do të përcaktohet në balotazh. Sipas tyre, në zgjedhjet e 3 nëntorit në balotazh do të shkojnë PDK-ja dhe LDK-ja.

Analisti politik, Adnan Abrashi thotë se në balotazh do të shkojnë kandidati i PDK-së, Ramadan Muja dhe ai i LDK-së, Eqrem Kryeziu.

“Sa i përket zgjedhjes së kryetarit të Komunës për Prizrenin, edhe shumë më përpara kam paraparë një balotazh në mes të kandidatit të LDK-së, Eqrem Kryeziut, dhe atij të PDK-së, Ramadan Muja. Kjo tregon se, pa marrë parasysh shumë mangësi që realisht kanë si personalitete këta kandidatë, qytetari prizrenas edhe këtë herë do të votojë sipas inercionit të militantizmit partiak”, thotë Abrashi për “PrizrenPress”.

Sipas tij, shkuarja e këtyre dy kandidatëve në balotazh, do ta dëshmonte si të pasuksesshme marrëveshjen paraprake të kryetarit të PDK-së Hashim Thaçit të bëra me tetë parti minoritare të Prizrenit. “Shkuarja e pashmangshme në balotazh, njëkohësisht, do ta demaskonte edhe atë iniciativë gjoja se taktike-strategjike të Thacit që gjatë fushate në Prizren ta keqpërdori edhe vizitën shumë miqësore dhe dashamirëse të dy kryeministra tejet respektiv dhe reputativ nga ana e qytetarëve të këtij qyteti: kryeministrin Turk, Rexhep Taib Erdoganin ,dhe atë Shqiptar, Edi Rama”.

Abrashi parashikon se PDK-ja për të marrë pushtetin edhe një mandat para balotazhit do të lidhë koalicion me AAK-LDD. “Do të tentoj të lidh marrëveshje parazgjedhore edhe me koalicionin AAK-LDD, duke ja ofruar me këtë rast kandidatit të tyre, Lulëzim Kabashit, postin e zëvendëskryetarit të komunës?!!”.

Sipas tij, LDK-ja për të siguruar fitorën do të duhej të bëjë koalicion me se paku edhe dy subjekte tjera politike. “Oferta do t’i shkoj lëvizjes Vetëvendosje!, Bashkimit Demokratik të Zafir Berishës, si dhe asaj Konservatore, subjekte këto që do të kenë një numër të konsiderueshëm asamblistësh”.

Analisti Abrashi vlerëson se fushata zgjedhore e këtij viti nuk ka pasur risi dhe nuk ka dalluar shumë nga fushatat e kaluara.

“Shikuar për nga mënyra dhe performacat vizuale të fushatës prezantuese në përgjithësi , krahasuar me ato të mëparshme, edhe kjo e sivjetme nuk ka pas ndonjë risi të theksuar. Kuptohet edhe këtë herë kemi pasur përurime inventive në ditët e fushatës, premtimet boshe të natyrave të ndryshme megalomane, veprime groteske të politikanëve në opinion, përuljet dhe përgjërimet për një votë para qytetarëve…”

Edhe gazetar i “Zërit” nga Prizreni, Qazim Morina, thotë se Prizreni nuk mund t’i ikë balotazhit.

“Nuk është diçka e re të thuhet se Prizreni, do të shkojë në balotazh, që parashoh të zhvillohet në mes PDK-së, që lufton ta mbaj pushtetin dhe LDK-së, që pos përpjekjes për ta rikthyer, sikur është dukur që është përpjekur shumë edhe për t’ia nxjerrë “hakun” humbjes së Eqrem Kryeziut nga Ramadan Muja me 2007. Pra sa i përket kryetarit, edhe sivjet Prizreni do të jetë interesant vetëm në balotazh. Po ashtu nga ajo që është parë gjatë tubimeve parazgjedhore, edhe kandidati i koalicionit AAK-LDD kësaj radhe do të ketë një përkrahje më të madhe se herëve tjera”, tha Morina për “PrizrenPress”.

Morina vlerëson se edhe kjo fushatë nuk ka dalluar shumë nga ato paraprake. “Pos që mund të thuhet se kanë qenë më e varfër se herëve tjera, duke bërë që subjektet politike, e sidomos pjesa më e madhe e kandidatëve në Prizren, të kenë një lloj “skepticizimi” për fitoren e tyre, në një garë që do të jetë e fortë, sidomos për kandidatët meshkuj”.

Ai thotë se karakteristikë e këtyre zgjedhjeve ka qenë “varfëria” e listave me njerëz.

“Listat pothuajse të të gjitha partive në Prizren janë për të ardhur keq, sa që shumëkush këto ditë edhe më ka pyetur për kë të votohet. Asesi nuk mendoj që ky është “harxhi” i Prizrenit. Ata që meritojnë pengohen të kyçen, ndërsa ata nuk imponohen, aq më keq kur shohin, kush u del para sa herë shkojnë në zyre të partisë, ku më së shpeshti sillen përfituesit pa ndonjë profesion. E votimi siç duket do të shkojë për njerëz të fisit, e jo ata të merituarit, të cilët edhe ashtu të paktë i ke nëpër lista”./PrizrenPress.com/

Presidentja e Republikës së Kosovës, Atifete Jahjaga u takua sot me përfaqësues të institucioneve përgjegjëse për organizimin, sigurinë dhe mbarëvajtjen e zgjedhjeve komunale në Kosovë, kryetaren e KQZ-së, Valdete Daka, kryetarin e KGJK-së, Enver Peci, kryetarin e Gjykatës Supreme, Fejzullah Hasani, kryeprokurorin e shtetit, Ismet Kabashi, prokuroren e shtetit, Laura Pula, kryetarin e PZAP, Shukri Sulejmani, dhe drejtorin e përgjithshëm të Policisë së Kosovës, Shpend Maxhuni.

Si thuhet në komunikatën për media të Presidencës, përfaqësuesit e këtyre institucioneve e njoftuan Jahjagën me përgatitjet e deritashme për zgjedhjet dhe angazhimin e tyre për të siguruar dhe garantuar një proces të rregullt e të qetë zgjedhor. Ata thanë se kanë shtuar kapacitet për ditën e zgjedhjeve për të garantuar proces demokratik zgjedhor. Njëkohësisht, ata dhe Presidentja theksuan rëndësinë e mbajtjes së zgjedhjeve të drejta, demokratike, të lira, të ndershme dhe gjithëpërfshirëse në gjithë territorin e vendit.

Pas këtij takimi, Jahjaga dha një deklaratë për media, në të cilën tha se vota e qytetarëve është e paprekshme, e pashkelshme dhe e lirë. “Çdo përpjekje për të prekur këtë votë dhe çdo përpjekje për të manipuluar me këtë të drejtë të qytetarëve të lirë të Republikës së Kosovës do të ndëshkohet fuqishëm. Shkeljet janë të patolerueshme dhe të papranueshme, sepse ato do ta pengojnë rrugën tonë drejt ndërtimit të shtetit demokratik, të lirë dhe të barabartë me të gjitha shtetet e tjera kudo në Evropë”.

Në fund të kësaj deklarate, Jahjaga ftoi të gjithë qytetarët, pa marrë parasysh përkatësinë e tyre kombëtare, fetare apo gjinore, që të dalin të gjithë në zgjedhje dhe të votojnë njerëzit që konsiderojnë se e meritojnë t’i përfaqësojnë interesat e tyre në zbatim të kushtetutshmërisë dhe ligjshmërisë, të rendit dhe të sundimit të ligjit.

Komisioni Qendror i zgjedhjeve ka vlerësuar se janë bërë të gjitha përgatitjet për mbarëvajtjen e zgjedhjeve lokale që do të mbahen nesër.
Në mbledhje u diskutua edhe raporti i OSBE-së për procesin në Veri të vendit, të cilin Betim Gjoshi, anëtar në KQZ, e ka quajtur më shumë si informatë se si raport, ndërsa disa anëtarë të tjerë e kanë quajtur si të vonuar, duke kritikuar po ashtu komunikimin me këtë institucion.

Kryetarja e KQZ-së, Valdete Daka, përkundër kësaj ka falënderuar OSBE-në për punën që po bënë në rolin e lehtësuesit.

Sekretariati i KQZ-së, ka thënë se ka përfunduar pothuajse i gjithë procesi i shpërndarjes së materialit sensitiv. Po ashtu, Qendra e numërimit të rezultateve është e përgatitur.

Në mbledhje u vendos që për të dhënat zyrtare do të deklarohet vetëm KQZ-ja, asnjë KKZ, OSBE-ja, apo ndonjë organizatë joqeveritare.