Policia e Stacionit Policor “Veriu” në Prizren ka pranuar një informatë e cila bënte me dije se dy të dyshuar e kishin kanosur me armë zjarri një femër nga Lubizhda në oborrin e saj.

”Pas pranimit të informatës policia ka dalë në vendin e ngjarjes dhe ka kryer bastisje në shtëpinë e personave të dyshuar me ç ‘rast ka gjetur dhe sekuestruar një pushkë automatike AK-47 me 206 fishekë, tetë karikatorë dy çanta për mbajtjen e karikatorëve, pjesë shtesë të armës dhe pajisje për pastrimin e armës”

” Më pas dy të dyshuarit janë sjellë në stacion dhe në prani të avokatëve mbrojtës janë intervistuar e më pas me urdhër të prokurorit të njëjtit ndalën nën masën e arrestit policor”

Sipas policës një i dyshuar tjetër nga familja e kanosur, në shenjë hakmarrje ndaj kanosësve dyshohet të ketë shkuar dhe t’ia ketë dhënë flakën një shtëpie banimi, pronë e të dyshuarve në të cilën janë shkaktuar dëme të konsiderueshme materiale.

Edhe në këtë rast një i dyshuar është arrestuar për zjarrvënie.

Shkas për të gjitha këto probleme thuhet të jetë një kontest pronësor.

Mungesa e anëtares së trupit gjykues, gjyqtares Kimete Kicaj, është bërë shkak për shtyrjen e seancës gjyqësore ndaj përmbaruesit privat Mehdi Reshani.

Seanca ndaj të akuzuarit për keqpërdorim të detyrës zyrtare, ishte paraparë të mbahej të premten në Gjykatën Themelore në Prizren. Mirëpo, kryetarja e trupit gjykues, Ajser Skenderi, paraprakisht kishte njoftuar palët për pamundësinë e mbajtjes së kësaj seance, pasi gjyqtarja Kicaj ndodhet në një udhëtim zyrtar, jashtë vendit.

Në këtë seancë pritej të merrej vendim rreth disa provave të prezantuar në seancën e 24 shkurtit të këtij viti, për të cilat mbrojtja ka kërkuar që të administrohen. Poashtu i akuzuari do të jepte mbrojtjen e tij.

Mirëpo, në mungesë të kushteve ligjore për mbajtjen e seancës në fjalë, vendimi rreth provave të lartpërmendura dhe mbrojtja e të akuzuarit pritet të bëhen me 25 maj 2017, në ora 9:30.

Ky rast zhvillohet në bazë të aktakuzës së Prokurorisë Themelore në Prizren, e cila e akuzon Reshanin se ka tejkaluar kompetencat e tij me qëllim të përfitimit të dobisë pasurore për personin tjetër e njëkohësisht duke i shkaktuar dëm personave tjerë.

Sipas aktakuzës, i akuzuari, përkundër faktit se e kishte përmbaruar lëndën përmbarimore të kreditorit “Gruppo Vinicolo Fantineli”  ndaj debitorit “QMI”, të dy palët si aksionarë në “Agrokosova Holding”, ai ka marrë sërish veprime ekzekutive pa e njoftuar debitorin “QMI”, duke nxjerrë nga objekti i “Agrokosova Holding” të gjithë stafin e të dëmtuarit “QMI”./betimiperdrejtesi/

Drejtori i Drejtorisë Komunale të Arsimit (DKA) në Suharekë, Sherif Berisha, i akuzuar se ka keqpërdorur pozitën e tij zyrtare duke punësuar mësimdhënës pa konkurs, të premten, ka thënë se ka vepruar në të mirë të nxënësve.

Berisha, gjatë mbrojtjes së tij, të dhënë para trupit gjykues, në Gjykatën Themelore në Prizren, ka thënë se obligim i drejtorisë që udhëheqë është që të sigurojë hapësirë dhe mësimdhënës për të shkuar mirë procesi edukativo-arsimor. Andaj sipas tij edhe punësimi i mësimdhënësve që përmend aktakuza, është bërë në kuadër të këtij obligimi. Kjo sepse, sipas Berishës, pas regjistrimit të nxënësve në shkolla, janë shtuar disa orë mësimore andaj ka pasur nevojë urgjente për të gjetur mësimdhënës.

I akuzuari Berisha tutje ka thënë se në momentin kur drejtorët e shkollave kanë kërkuar urgjent mësimdhënës, DKA-ja ka pasur një listë të pritjes e cila ishte formuar nga konkurset paraprake. I njëjti shtoi se nga ajo listë ka punësuar mësimdhënësit, përkohësisht deri sa të pranohen mësimdhënësit me konkurs. Ai ka thënë se ka kontakte edhe me DKA-të e komunave tjera dhe të njëjtat, në raste urgjente, veprojnë njëjtë.

I akuzuari tutje ka shtuar se në disa raste, për të cilat flet aktakuza, janë bërë transferime të mësimdhënësve nga një shkollë në një shkollë tjetër, në bazë të kualifikimit profesional. Sipas tij, një gjë të tillë e lejon Ligji i Punës dhe Udhëzimi Administrativ 14/2011 për arsimin para universitar.

Kryetarja e trupit gjykues, Raime Elezi, ka ndërprerë seancën sepse ka pasur të caktuar një rast tjetër me paraburgim. Seancën e radhës e ka caktuar për 13 prill 2017, në ora 13:15, në të cilën do të vazhdojë mbrojtjen i akuzuari Berisha.

Sherif Berisha akuzohet se duke qenë drejtor i arsimit në Komunën e Suharekës, gjatë periudhës 2014-2016, ka punësuar në shkollat e Komunës së Suharekës, pa konkurs, nëntë mësimdhënës dhe një kontabilist.

Sipas aktakuzës, i akuzuari me këto veprime ka kryer veprën penale të keqpërdorimit të detyrës zyrtare dhe cenimin e të drejtave të barabarta në punësim të personave tjerë./betimiperdrejtesi/

Gazetari shumëvjeçar Fahri Musliu, ka shpalosur sot detaje rreth themelimit të “Alternativës”, në Prizren.

Ai tha se ky subjekt politik ofron “dritën në fund të tunelit”

“Alternativa nuk do të ketë fjalë e premtime boshe, por realizim të premtimeve”, tha ai.

Musliu është anëtar i Këshillit Nismëtar për themelimin e Degës së “Alternativës në Prizren.

Ai , paralajmëroi se takimi themelues i “Alternativës” në Prizren, do të mbahet të shtunën në orën 14:00, në Kompleksin e Lidhjes së Prizrenit./PrizrenPress.com/