Në orët e mbrëmjes se djeshme në Prizren ka rënë shi dhe breshër. Shiu është përcjell me erëra të fuqishme duke shkaktuar dëme të konsiderueshme në shumë zona të komunës.

Këto erëra kanë rrëzuar një plep të madh në Parkun e Marashit, duke rënë në tarracën e restaurant “Mulliri”, me ç’rast në masë të madhe është dëmtuar një pjesë e konsiderueshme e inventarit.

Pronari i objektit, Shyqyri Çela thotë se plepi është rrëzuar për një kohë të shkurtër pas një intensiteti të lartë të, duke thënë se gjithçka ka ndodhur brenda një minute.

Ai thotë se nga rrëzimi i plepit janë dëmtuar tavolina, karrige , muri, si dhe një pjesë e tarracës, ndërsa janë këputur edhe shumë tela të energjisë elektrike.

Pronari i këtij lokali apelon tek organet kompetente komunale që në afat sa më të shkurtër, në zonën e Marashit të angazhohen në krasitjen e drunjtëve, të cilët gjatë erërave të ngjashme po paraqesin rrezik për qytetarët të cilët në numër të madh lëvizin në këtë vend të veçantë të Prizrenit.

Gjatë kohës sa ne ndodheshim në vendngjarje, për të verifikuar gjendjen dhe dëmet nga rrëzimi i këtij plepi kishin dalur edhe zyrtarë të sektorit të mjedisit të drejtorisë komunale të shërbimeve publike. /TV Prizreni

Rreth orës 12:05, Policia e Suharekës është informuar se në fshatin Savrovë ka të shtëna me armë zjarri. Pas daljes në terren është bërë e ditur se krismat ishin dëgjuar nga një shtëpi, ku po bëhej dasmë, shkruan PrizrenPress.

Pasi është kontaktuar i zoti i shtëpisë dhe është njoftuar për prezencën e policisë, ai pa hezitim e ka dorëzuar një kallashnikov me 5 fishekë, një gëzhojë dhe një pistoletë të kalibrit 9mm me 64 fishekë.

Lidhur me rastin është njoftuar prokurori i shtetit, i cili ka vendosur që ndaj të dyshuarit të lëshohet urdhri për ndalim policor.

Drejtoria Rajonale e Policisë në Prizren apelon të qytetarët e rajonit që të tregojnë përmbajtje në përdorimin e armëve të zjarrit në çfarëdo rrethane, në të kundërtën të gjithë shkelësit e ligjit do të vihen para drejtësisë. /PrizrenPress.com/

Policia Rajonale e Prizrenit njofton se rreth orës 05:00 në ambientet e hotelit “Meka” në Dragash ka ndodhur një përleshje në mes të katër personave, të gjithë të dyshuar ngase në një mënyrë ose tjetër kanë qenë të përfshirë në rrahje ku është përdor një thikë, shkruan PrizrenPress.

Dy të plagosur kanë marrë ndihmën e parë në Shtëpinë e shëndetit në Dragash e më pas janë transferuar në Spitalin Rajonal në Prizren për shkak të natyrës së lëndimeve, ndërsa dy të tjerë, pas përfundimit të rrahjes kthehen në dhomën e hotelit në të cilën ishin vendosur tre ditë më parë për pushime.

Pasi kishte arritur policia në hotel, këta të dyshuar tentojnë të ikin duke kërcyer nga tarraca e hotelit mirëpo kapën dhe arrestohen.

Dyshohet se motivi i krejt ngjarjes mund të jetë një lidhje e njërit nga të dyshuarit me një vajzë. Pritet vendimi i prokurorit të shtetit për procedura të më tejme. /PrizrenPress.com/

Shumica e aktakuzave të ngritura që nga paslufta, por edhe tani janë larg qëllimit të kapjes së të ashtuquajturve “peshqit e mëdhenj”, që kryesisht vijnë nga spektri politik. Në këtë drejtim njohësit e kësaj fushe thonë se një kontribut për të keq e ka dhënë edhe drejtësia ndërkombëtare, që ishte dhe vazhdon të jetë me mision në Kosovë. Ndaj, është shtuar dilema se përse këto aktakuza që po ngriten, rëndom janë të tilla që e pësojnë zakonisht peshqit e vegjël derisa ata të mëdhenjtë shpëtojnë, “pa therrë në këmbë”?.

Eksperti i fushës së sundimit të ligjit, Blerim Burjani, në një prononcim për gazetën “Kosova Sot” ka thënë se aktakuzat e caktuara po ngriten, por, sipas tij, tek to shpeshherë mungojnë faktet, të cilat janë të vështira për t’u gjendur, pasi siç tha, të gjitha manipulimet dhe mashtrimet janë bërë në emra të të tjerëve.

“Andaj, në këtë aspekt është shumë e vështirë që Prokuroria të gjejë fakte, ani pse është e interesuar, por që të dhënat e tilla i posedon EULEX-i deri në një masë, si dhe disa ambasada në Kosovë”.

Oligarkët e zhytur

Burjani në këtë aspekt ka nënvizuar se deri më tani ka pasur probleme të theksuara për të gjetur prova për një numër të madh të zyrtarëve politikë, të cilët cilësohen si të ashtuquajturit ‘peshqit e mëdhenj’.

“Pra, përplot politikanë dyshohet se janë të zhytur në këto gjëra, por që vështirësitë qëndrojnë tek hulumtimi dhe gjetja e provave të sakta, përkundër asaj se EULEX-i i ka disa nga provat e mundshme, të cilat mund të shërbejnë”, është shprehur Burjani.

Analisti Shefqet Dibrani thotë se arrestimet e ditëve të fundit dhe marrja në pyetje e zyrtarëve politikë flasin për zhvillime pozitive dhe, sipas tij, janë shenja inkurajuese se Gjykata Speciale veçse ka nisur të veprojë, duke shtuar se pavarësisht asaj se kjo e fundit mund të hasë në pengesa nga oligarkët politikë të involvuar në krim dhe kriminalitet, madje ku disa prej tyre dyshohet se janë bosët e krimit ekonomik dhe atij politik, Dibrani shpreson se ajo nuk do të ndalet.

“Por, në këtë aspekt janë edhe mediet e shumta në Kosovë, pastaj shoqëria civile, si dhe njerëzit e ndërgjegjshëm, që duhet të ngrehin zërin e tyre në mbështetje të drejtësisë, e cila ka nevojë edhe për inkurajim qytetar”.

Më tej, Dibrani ka bërë një krahasim të krimeve ekonomike, që janë bërë me ato të luftës, duke thënë se krimi mbetet krim, sikurse vrasja me plumb ashtu edhe vrasja duke ia marrë kafshatën e gojës qytetarit, ngase, sipas tij, të dyja përfundimin e kanë të njëjtë, por siç thotë ai, i vetmi dallim është se e para kryhet shpejt, ndërsa e dyta zvarritet deri në pakufi, me ç’rast kjo shkakton edhe vuajtje dhe trauma tek qytetarët. /Kosova Sot

Pas një ditë të nxehtë, në shumë qytete të Kosovës ka rënë shi në orët e mbrëmjes.

Shiu është përcjell me vetëtima dhe erëra të forta.

Ngjashëm ka ndodh edhe në Prizren siç edhe mund ta shihni në videon e mëposhtme.

https://youtu.be/LBha1SEq9Ss