NISMA për Kosovën, përmes një komunikate për media, ka paralajmëruar një bashkim me partinë Bashkimi Demokratik.

Në komunikatë thuhet sot nënshkruhet marrëveshja e bashkimit të partisë politike, Bashkimi Demokratik, me kryetar Zafir Berisha, në Nisma për Kosovën.

“Nga sot e tutje, të gjitha strukturat e partisë politike, Bashkimi Demokratik, do të veprojnë në kuadër të strukturave të Nisma për Kosovën”, thuhet në këtë njoftim.

Nënshkrimi i marrëveshjes bëhet sot prej orës 15:00, në selinë qendrore të Nisma për Kosovën, në Prishtinë. /PrizrenPress.com/

Institucionet e Kosovës nuk kanë bërë ende ndonjë hap përpara në drejtim të shndërrimit të Forcës së Sigurisë në Kosovës (FSK) në Forca të Armatosura të Kosovës (FAK).

Qeveria dhe Ministria e Forcës së Sigurisë së Kosovës janë deklaruar në vazhdimësi se FSK-ja është e gatshme për marrjen e përgjegjësive të reja, të cilat mund të dalin nga ky transformim. Por, që të bëhet hapi tutje drejt këtij transformimi, do të nevojitet edhe një vendim politik.

Deputetët e Kuvendit të Kosovës nga Komisioni për Siguri dhe Mbikëqyrje të Forcës së Sigurisë, konsiderojnë se çështja e shndërrimit të Forcës së Sigurisë së Kosovë në Forca të Armatosura ka mbetur peng i një konsensusi politik.

Deputeti Daut Haradinaj, kryetar i Komisionit Parlamentar për Punë të Brendshme, Siguri dhe Mbikëqyrjen e FSK-së nga radhët e Aleancës për Ardhmërinë e Kosovës, ka thënë se arsyet pse kjo çështje nuk ka shkuar përpara qëndrojnë tek pasiviteti i institucioneve të Kosovës, të cilat, sipas tij, e kanë injoruar procesin.

“Institucionet e Kosovës nuk e kanë trajtuar seriozisht si temë. Ndërsa, duket se kohët e fundit e kanë marrë më seriozisht edhe për shkak të shumë rrethanave që po ndodhin në rajon dhe jashtë tij, pra shumë kërcënimeve, si nga ekstremizmi, apo edhe nga vetë terrorizmi. Tash po duket se edhe faktorët miq, siç është ShBA-ja, e ka një interesim shumë më të theksuar që transformimi i FSK-së të ndodhë sa më shpejt”, ka thënë Haradinaj.

Zyrtarët nga Ministria e Forcës së Sigurisë së Kosovës kanë përsëritur disa herë se FSK-ja tashmë ka realizuar gjithë programin e saj për arritjen e kapaciteteve të plota operacionale sipas misionit që ka pasur dhe se, sipas tyre, ato kapacitete janë pranuar edhe nga NATO.

Anëtari tjetër i Komisionit për Siguri dhe Mbikëqyrjen e Forcës së Sigurisë së Kosovës, Fadil Demaku, deputet i Partisë Demokratike të Kosovës, ka thënë për “Radion Evropa e Lirë” se të gjitha çështjet në lidhje me proceduarat ligjore kanë përfunduar. Por, sipas tij, ngecjet janë për çështje politike.

“Mendoj se duhet një angazhim edhe më i madh i institucioneve tona, një trysni shumë më e madhe edhe ndaj komunitetit serb, përfaqësuesve politikë të tyre në Kosovë. Ata në fund të fundit janë deputetë me vota të Republikës së Kosovës. Këtu duhet të jetë trysnia shumë më e madhe e faktorit vendor dhe ndërkombëtar, i cili normalisht ka luajtur rol shumë të rëndësishëm në të gjitha proceset”, ka deklaruar Demaku.

Për themelimin e FAK-ut është i nevojshëm edhe ndryshimi i Kushtetutës së Kosovës. Andaj, kjo dikton nevojën e konsensusit politik me Listën Serbe, pasi ky subjekt përfaqëson aktualisht shumicën e komunitetit serb në Kuvendin dhe Qeverinë e Kosovës.

Deputeti Demaku thotë se shndërrimi i FSK-së në Forca të Armatosura nuk mund të bëhet pa dy të tretat e votave të deputetëve nga radhët e komuniteteve.

“Çështje të tjera nuk ka veç nevojës për një konsensus, sepse duhen edhe votat e dy të tretave të pakicave. Mendoj se problemi është politik dhe nuk kemi njohuri për ndonjë problematikë tjetër”, është shprehur Demaku.

Nga ana tjetër, deputeti nga radhët e Listës Serbe në Kuvendin e Kosovës, Nenad Rashiq, ka thënë për “Radion Evropa e Lirë” se deputetët serbë ende nuk kanë marrë një vendim lidhur me këtë çështje.

“Kryeministri disa herë ka theksuar se do të formohet FAK-u, por nga ana tjetër sa u takon deputetëve serbë në Kuvendin e Kosovës, askush me ne nuk ka biseduar. Se a do të ketë ndryshime në të ardhmen unë nuk e di, por tash për tash sa i takon FAK-ut nuk kemi zhvilluar bisedime”, ka thënë Rashiq.

Plator Avdiu, hulumtues nga Qendra Kosovare për Studime të Sigurisë, i ka thënë “Radios Evropa e Lirë” se si duket ende nuk po ekziston një angazhim konkret dhe serioz i institucioneve të Kosovës për shndërrimin e Forcës së Sigurisë së Kosovës në Forca të Armatosura të Kosovës. Po ashtu, ai ka thënë se kjo çështje më së shumti është shfrytëzuar për konsum të brendshëm politik.

“Mungon një lobim i fuqishëm nga ana e Qeverisë për ta shtyrë përpara agjendën për kompletimin e arkitekturës së sigurisë për themelimin e Forcave të Armatosura të Kosovës, përkatësisht shndërrimit të FSK-në në FAK. Siç po duket, Qeveria ende nuk i ka kuptuar peshën dhe rëndësinë e themelimit të FAK-ut, duke mos e vendosur si prioritet kryesor në këtë fazë të shtetndërtimit”, ka theksuar Avdiu.

Në Qendrën Kosovare për Studime të Sigurisë thonë se Qeveria dhe Kuvendi i Kosovës duhet sa më parë t’i kalojnë amendamentet kushtetuese për votim në Kuvend lidhur me themelimin e FAK-ut.

“Për këtë duhet të ndodhë një debat i brendshëm në vend, duke përfshirë edhe partitë politike serbe në Kosovë. Nëse marrëveshjet e bisedimeve me Serbinë vendoset të dërgohen për miratim në Kuvend, atëherë parakusht për këtë të jetë pëlqimi i subjekteve serbe në Kuvendin e Kosovës për ndryshimet kushtetuese për themelimin e FAK-ut”, ka thënë Avdiu.

Këto forca, sipas ekspertëve të çështjeve ushtarake dhe sigurisë, do të formohen gradualisht dhe nën mbikëqyrjen dhe koordinimin e plotë të NATO-s brenda pesë deri 10 vjetët e ardhshëm, ngjashëm siç ka ndodhur edhe me Forcat e Sigurisë së Kosovës. Formimi i Forcave të Armatosura të Kosovës pritet të prezantohet në Kuvend nga Qeveria nëpërmjet projektligjit që përcakton ndryshimet e nevojshme ligjore, të cilat do ta diktojnë edhe nevojën e ndryshimeve kushtetuese. Forcat e Armatosura të Kosovës do të jenë pasardhëse të Forcave të Sigurisë së Kosovës, të cilat kanë më shumë kompetenca të ndërhyrjeve emergjente sesa ushtarake.

Forcat e Armatosura mund të themelohen vetëm nën mbikëqyrjen e NATO-s, me numër të caktuar ushtarësh dhe me armatim dhe pajisje të përcaktuara në marrëveshje me NATO-n.

Nga 750 ushtarë gjermanë sa janë tani në kuadër të KFOR-it në Kosovë, në vjeshtë do të mbeten rreth 650, pasi gjendja e sigurisë në Kosovë vlerësohet “esencialisht e qetë dhe stabile”.

Kufiri maksimal i angazhimit të ushtarëve gjermanë në Kosovë në kuadër të KFOR-it nga 1850 sa është tani, do të zvogëlohet në 1350. Kështu ka vendosur Qeveria gjermane. Për këtë qëllim ministrja gjermane e Mbrojtjes Ursula von der Leyen dhe Ministri i Jashtëm Frank Valter Steinmeier kanë informuar të hënën me shkrim shefat e grupeve parlamentare në Bundestagun gjerman.

Sipas revistës gjermane “Der Spiegel”, misioni i NATO-s në Kosovë, KFOR, edhe për një kohë të gjatë nuk do të përfundojë. Vendimi i Qeverisë gjermane për zvogëlimin e numrit të ushtarëve gjermanë në Kosovë, që është marrë mbrëmë, sipas revistës “Der Spiegel” pritet të miratohet tani edhe nga Bundestagu. Për 16 vjet rresht, Bundestagu ka miratuar çdo vit vazhdimin e mandatit të ushtarëve të Bundeswehrit në Kosovë. Të vetmit nga fraksionet parlamentare që kanë qenë kundër vazhdimit të këtij mandati janë partia e majtë (die Linken).

Ndryshe, aktualisht në Kosovë janë të angazhuar rreth 750 ushtarë gjeramnë dhe ky numër në rast nevoje mund të rritet nga forcat rezerve në Gjermani deri në kufirin maksimal prej 1850 ushtarësh. Nga vjeshta e këtij viti Gejrmania në Kosovë do të ketë rreth 650 ushtarë dhe dhe po kaq do të jetë numri i trupave rezerve në Gjermani në rast nevoje në Kosovë.

Reduktimi i trupave gjermane në Kosovë vjen pas vlerësimit që i bëhet gjendjes në Kosovë, e cila në raportet e shkruara në aspektin ushtarak vlerësoeht si “esencialisht e qetë dhe stabile”, raporton “Der Spiegel”, percjellë RTK. Në planin e brendshëm gjendja vlerësohet edhe më tej si fragjile për shkak se herë pas here organizohen demonstrata të dhunshme.

Në raportin intern të shkruar për deputetët e Budnestagut thuhet se vetëm në veri të këtij shteti të vogël ka here pas here incidente midis popullatës serbe e cila dominon në katër komuant veriore dhe “popullatës minore islame”.

Megjithatë, as në veri gjatë vitit të kalur nuk ka pasur asnjëherë nevojë për ndërhyrjen e NATO-s, prandaj dhe Aleanca veri-atlantike ka miratur reduktimin e trupave gjermane në Kosovë. Në rat nevoje të rritjes së tensioneve, NATO mund të alarmohet dhe të ndërhyjë në rast se vie deri te tensionet masive ndëretnike në veri.

Bundesveri ndodhet në Kosovë me trupat e veta që nga qershori vitit 1999. Në kudër të KFOR-it, Gjermania përbënte më 1999 pjesëmarrjen e dytë me të madhe me 6500 ushtarë në Kosovë, numër ky që është zbvogluar gradualisht për gjashtëmbjetë vite rresht.

Për faktin që Kosova akoma është një demokraci e brishtë, një shtet me çalim të madh në fushën e forcimit të shtetit ligjor, perspektivës zhvillimore, mundësia e vetme për të arritur një hap simbolik në jetë, qoftë në një segment minimal të profesionit, në karrierë apo edhe në biznes, mbetet lidhja e ngushtë me politikën dhe bërja e një lloj lidhjeje reciproke “aksionare” e biznesit të cilësdo fushe me partitë politike, veçmas me ato në pushtet. Kjo formë e degradimit të demokracisë në një shtet të ri, sikur është Kosova, ka bërë që edhe shoqëria të politizohet skajshmërisht, ngase mundësia e veprimit të lirë është e kufizuar, për shkak të hapësirës së ngushtë nga veprimi dhe kushtëzimet e një brezi politik të inkriminuar, shkruan gazeta Kosova Sot.

Njohësit e realitetit aktual në Kosovë theksojnë se kjo është ngufatja më e rëndë që mund t’i shkaktohet përpjekjes për ndërtimin e një shoqërie moderne, demokratike. Profesori i mirënjohur Muhamet Kelmendi tha për “Kosova Sot” se është realitet i pamohueshëm që në shoqërinë re transitore të Kosovës, për të arritur suksese qoftë në politikë si një profesionist meritor, qoftë në organet e shtetit dhe në ekonomi, deri edhe në diplomaci, madje edhe po të jesh ekspert me kualifikim të lartë e pasuniversitar, një kriter kryesor që duhet të përmbushet është lidhja e fortë me politikën.

Sipas Kelmendit, nuk ka mundësi askush të arrijë ndonjë punë në hierarki dhe as në kualifikim pa lidhje politike.

“Askush nuk mund të futet, madje as në biznes, në skenën ekonomike, pa lidhje me politiken, dhe pa i bërë kompetentët e skenës politike “bashkëpronarë” të ekonomisë- biznesit. Ndërsa, kur është çështja e tenderëve, asnjë subjekt ekonomik nuk mund të marrë tender pa e marr politika përqindjen e vet, e cila po reflektohet shumë ashpër në kualitetin e punës në terren, sepse përqindja po e kushtëzon kualitetin, e cila varet kryesisht nga puna që është vjedhur”, theksoi ai.

“Kjo ndërlidhje midis ekonomisë, politikës dhe partive është e thellë. Ajo fillon nëpër komuna dhe kalon te pushteti shtetëror, deri te lidhjet e ashpra midis bordeve dhe ekonomisë, lidhje e cila po shpërfaqet në formë të korrupsionit dhe të krimit të organizuar”, tha prof. Kelmendi.

Ai ka pohuar se, aktualisht, këtë formë të veprimtarisë është vështirë ta luftosh, sepse shteti dhe mekanizmat e tij janë të korruptuar.