Pavarësisht bojkotit nga opozita, iniciativa e presidentit të Kosovës për vazhdimin e reformës zgjedhore të mbetur pezull në mandatin e kaluar ka filluar të marrë formë dhe të përgatitet pakoja ligjore, e cila do t’i dërgohet edhe Kuvendit për miratim. Sado që mbi bazën e Kushtetutës presidenti e ka të drejtën për inicimin e nismave ligjore, në grupet punuese për reformë nuk ka pranuar të marrë pjesë askush nga përfaqësuesit e subjekteve politike opozitare, të cilat kanë paralajmëruar edhe votën kundër në Kuvendin e Kosovës.

Sidoqoftë, analistët politikë theksojnë se derisa e drejta e garantuar me Kushtetutë e presidentit për nisma ligjore është fakt i pamohueshëm, do të ishte në interes të gjerë politik dhe demokratik që së paku gjatë procedimit në Kuvend të kyçet edhe opozita parlamentare ne këtë proces. Ndryshe, reforma nuk e ka legjitimitetin e plotë demokratik vetëm me votat e pozitës.

“Do të ishte me rëndësi për të dyja palët, pozitë dhe opozitë, të japin pëlqimin për të ecë përpara në reformën zgjedhore, pra duhet të ketë konsensus. Ndryshe dihet që në një formë edhe nuk është e thënë që të gjitha palët duhet të pajtohen me gjithë kontekstin që do të ketë reforma, sepse interesat janë të ndryshme”, tha Blerim Burjani për “Kosova Sot.

Vendimet e deritashme arbitrare Sipas Burjanit, dihet mirëfilli që këto dy ligje kanë mbetur të paprekura që nga koha e UNMIK-ut, sepse nuk ka pasur asnjë vullnet nga partitë që t’i bëjnë ndryshimet e nevojshme dhe të reformojnë sistemin zgjedhor.

“Konsideroj se edhe presidenti duhet të duket qasje konsensusale, pra duhet të komunikojë me palët dhe të marrë pëlqimin e pastaj ndryshimet t’i dërgojë në Kuvend. Fatkeqësisht kjo nuk po ndodh dhe tani vendimet e presidentit duken arbitrare në raport me konsensualitetin që paraqet”, theksoi ai.

Sipas tij, në këtë reformë të këtij presidenti nuk ka pasur asnjë ekspert që është marrë me zgjedhjet.

“Pra, s’ka pasur fare seriozitet, thjesht ka pasur vetëm zyrtarë të thjeshtë ligjorë, që shërbejnë për të gjitha punët ligjore. Pra, kjo është dështim dhe mund të ketë dështime edhe brenda strukturës së propozuar ligjore. Në këto situata duhet të vijnë njerëz që janë ekspertë zgjedhorë, të cilët i bëjnë ndryshimet në pajtim me interesat dhe pëlqimin e partive pozitë dhe opozitë, jo si është duke shkuar tani ky proces”, tha Blerim Burjani për ‘Kosova Sot’

Reforma e domosdoshme

Edhe eksperti tjetër i kësaj fushe, Ilir Fetahu, nuk e ka kontestuar të drejtën kushtetuese të presidentit për një iniciativë të tillë, por ai thotë se tani, pavarësisht kush ka qëlluar në këtë pozitë, duhet të lihen anash inatet politike dhe së paku gjatë procedimit të ligjit në Kuvend të japin kontributin e vet pozita dhe opozita, në mënyrë që materia e propozuar ligjore nga zyra e presidentit të jetë një reformë e përkryer dhe përmbajtjesore.

“Konsideroj se, pavarësisht nga kush është iniciuar, reforma zgjedhore është një domosdoshmëri që duhet të ndodhë në Kosovë para zgjedhjeve të reja, sepse është vërtetuar që ligji i tanishëm ka shumë mangësi dhe ka nevojë serioze që të kemi një reformë të gjerë e përmbajtjesore të sistemit zgjedhor. Mirëpo, për fakt të keq, kjo nismë nuk po arrin t’i bashkojë pozitën dhe opozitën, e që parimisht një proces i tillë do të duhej t’i bashkonte gjithë spektrin politik vendor, me pjesëmarrje edhe të shoqërisë civile dhe monitorim të Komisionit Evropian”, theksoi Fetahu.

Sipas tij, në këtë proces do të duhej gjetur praktikat më të mira evropiane dhe ato të përshtaten me rrethanat në Kosovë, që të lehtësohet procesi zgjedhor dhe që vota të jetë e pastër, e besueshme dhe assesi me mundësi cenimi dhe manipulimi, që ajo votë të konvertohet besnikërisht në mandatet e të zgjedhurve të qytetarëve. Fetahu për ‘Kosova Sot’ tha se aktualisht barrikadimi kundër dhe bojkoti nga opozita nuk i bën mirë shëndetit të demokracisë së re kosovare, prandaj do të duhej tejkaluar kjo situatë e kundërshtimeve për interesa politike.

“Unë konsideroj që institucionet e Kosovës dhe klasa politike nuk duhet të tregojnë arrogancë dhe ky proces nuk do të duhej shkuar deri në fund pa opozitën, por do të duhej gjetur mënyra dhe forma e bashkëpunimit që edhe opozita të marrë pjesë në proces”, potencoi më tej ai. /Kosova Sot/

Shndërrimi i Forcës së Sigurisë së Kosovës (FSK) në Forca të Armatosura të Kosovës (FAK) vazhdon të mbetet peng nga politika, sidomos nga Lista Serbia e cila duhet të votojë ndryshimet kushtetuese që mundësojnë këtë transferim.

E derisa nuk arrihet një marrëveshje ndërmjet Prishtinës dhe Beogradit, vështirë se do të ketë ushtri të re, shkruan sot Gazeta “Zëri”.

Kështu konsiderojnë njohësit e çështjeve ushtarake në Kosovë, të cilët thonë se mbajtja e krijimit të ushtrisë peng për shkaqe politike është një gabim tejet i madh i institucioneve dhe partive politike kosovare.

Ndërkaq, sipas përfaqësuesve të Komisionit për Siguri dhe Mbikëqyrje të FSK-së, Kosova nuk duhet të jetë peng i Listës Serbe.

Ata madje thonë se institucionet e Kosovës duhet të veprojmë shpejt dhe ta bindin edhe palën serbe se krijimi i ushtrisë së Kosovës është edhe në të mirë të tyre, jo vetëm të palës kosovare.

Mundësitë që FSK-ja të transferohet në FAK, të vogla

Njohësi i çështjeve të sigurisë dhe çështjeve ushtarake, Ramadan Qehaja, ka vlerësuar se mundësia që FSK-ja të kthehet në FAK, është shumë e vogël, për shkak të mosgatishmërisë së Listës serbe.

“Mundësitë janë shumë të vogla. Kjo për faktin që spektri politik serb në Kosovë është i vendosur që mos ta mbështesë ndryshimin e Kushtetutës”, ka deklaruar Qehaja, sipas të cilit, deri në ndryshimin e rrethanave politike e të sigurisë, Qeveria e Kosovës duhet të mendojë në aktivizimin e të ashtuquajturit “Plan B”. /Zëri/

Institucionet kosovare, edhe pse kanë kaluar plot pesë vjet nga fillimi i bisedimeve të ndërmjetësuara nga Bashkimi Evropian në Bruksel me palën serbe, akoma, në asnjë moment dhe në asnjë pikë të vetme, nuk kanë mundur ta diktojnë agjendën e tyre në bisedimet me Serbinë, për tema të rëndësishme që janë kërkuar nga opinioni publik të jenë pjesë e këtyre bisedimeve, siç janë dëmet e luftës.

Zyrtarët e Qeverisë së Kosovës vazhdojnë akoma ta mbajnë në heshtje një dështim të tillë, derisa analistët politikë dhe ekspertët e fushës së të Drejtës Kushtetuese konsiderojnë se duke biseduar me agjenda të imponuara nga Serbia, sot kemi provokime nga Serbia, si kjo me trenin dhe me çështjet e tjera si Asociacioni etj. Duke iu shmangur temave të mëdha, sipas njohësve të këtyre rrethanave, Kosova e ka treguar dobësinë e vet në bisedime.

“Kjo gjendje është kështu, sepse përfaqësuesit tanë nuk kanë vizion kombëtar. Së pari, ata as që e dinë çfarë është kombi i tyre apo flamuri i tyre kombëtar, e aq më pak interesi i tyre kombëtar. E dyta, nuk i kanë dijet e duhura për të mbrojtur interesat kombëtare”, tha prof. Nexhmedin Spahiu për “Kosova Sot”

Lidershipi i shantazhuar

Sipas analistit Florim Zeqa, shkaqet pse institucionet kosovare, gjegjësisht ekipi negociator nuk ka arritur asnjëherë të diktojë agjendën e bisedimeve me Serbinë për tema të mëdha, janë dy.

“E para, e kanë “bishtin e zënë” me akuza për vepra të rënda kriminale dhe korruptive, dhe e dyta, edhe mund të jenë korruptuar nga palët ndërmjetësuese apo pala kundërshtare në bisedime! Ndryshe nuk ka si shpjegohet mosngritja e temave të mëdha në bisedime, siç janë krimet serbe në Kosovë dhe dëmet e luftës, të cilat do të ishin kartë e fortë e negociatorëve kosovarë në bisedimet e Brukselit dhe adut i fuqishëm i institucioneve tona në shtrirjen e sovranitetit në konsolidimin e shtetit”, theksoi ai.

“Me ngritjen e të paktën vetëm dy temave të sipërpërmendura, do ta kishin mbështetur Serbinë për muri, duke e detyruar të lëshojë pe në shuma fusha të tjera. Negociatorët kosovarë në bisedimet e Brukselit në vend që të sillen si palë e barabartë në bisedime, me ngritjen e temave të rëndësishme për të ardhmen e vendit të tyre, janë sjellë si pengje të Beogradit dhe Brukselit, për të shërbyer vetëm si dekor i bisedimeve,pa qenë në gjendje të ngritin as çështjen e të zhdukurve gjatë luftës, të paktën as si çështje humanitare”, tha Zeqa për “Kosova Sot”.

Ai vlerëson se pushtetarët tanë, duke u sjellë në mënyrë inferiore dhe nënshtruese para Serbisë në bisedimet e Brukselit, kanë bërë që kjo e fundit të imponojë me lehtësi agjendat e veta, të përgatitura paraprakisht në kuzhinat e Akademisë së Shkencave dhe Kishës serbe.

“Për pasojë të kësaj, sot kemi provokime të koordinuara të Serbisë, siç janë; muri në veri, ndalimi i Haradinajt në Francë, treni provokues serb, nesër do të vazhdojë me “Zajednicën” e kështu më radhë”, tha Zeqa për “Kosova Sot”.

24 vjeçari që duke skijuar në Brezovicë u godit për vdekje nga një ortek bore të enjten rreth orës 14:15 minuta.

Policia menjëherë pas aksidentit ka dalë në vendin e ngjarjes dhe vetëm në orët e mbrëmjes ka arritur ta gjejë dhe ta nxjerrë nga bora kufomën e të ndjerit me inicialet F.Ç., njofton Klan Kosova.

Me urdhër të prokurorit trupi i pajetë i është dorëzuar familjarëve për proceduar e varrimit, pasi është rasti është cilësuar si vdekje aksidentale.

Një djalë ka humbur jetën në Brezovicë pasiqë gjersa ishte duke skijuar ka rënë në një humnerë.

Lajmin për Klan Kosovën e ka konfirmuar zëdhënësi i Policisë rajonale të Ferizajt, Agim Gashi.

“Lajmin e kemi marr rreth orës 14:40 dhe të gjitha ekipet tashmë janë duke shkuar në vendin e ngjarjes”.

Ai ishte student i arkitekturës dhe vinte nga Ferizaj.

Klan Kosova ende nuk ka informacione më të detajuara rreth këtij rasti.