Qeveria e Kosovës në fillim të vitit 2017 pritet se do të bëj ndryshimin e ligjit për pensionet e veteranëve të Ushtrisë Çlirimtare të Kosovës.

Ndërsa veteranët e luftës së UÇK-së shprehen të pakënaqur për këtë ndryshim të ligjit dhe se akuzojnë Qeverinë se janë fajtor për fryrjen e listave e cila kjo e fundit me komisionin e saj i ka fryrë listat e veteranëve.

Në një prononcim për IndeksOnline kryetari i këshillit për Mbrojtjen e Luftëtarëve të UÇK-së, Xhevdet Qeriqi ka treguar se me buxhetin qe ka kjo qeveri është e mundshme që ligji i ri të jetë me pensione të rritura për këtë kategori të veteranëve.

“Ne nuk kemi asnjë informatë, se çfarë po mendon dhe çfarë ndryshime ka për qellim ti bëj qeveria e Republikës së Kosovës në ligjin për veteranët, qeveria në këtë rast është e mbyllur edhe pse na kishin premtuar publikisht se për çdo plotësim apo ndryshim do ta bëjmë bashkë, por si duket qeveria ka vendosur që këto ndryshime ti bëj në mënyrë të fshehtë bile duke ikur larg opinionit duke mbajtur takime në Shqipëri. Për ne pak ka rëndësi a marrim pjesë a jo, a ftohemi nga këta të fundit apo jo, për ne është e rëndësishme që këto ndryshime të bëhen në favor të veteranëve dhe të pranohen nga këta të fundit”, ka thënë Qeriqi.

Sipas tij veteranët nuk do të lejojnë aspak që ky ligj të zbatohet në dëm të tyre, duke paralajmëruar kështu masa të ashpra kundër qeveris.

“Nuk do të lejojmë në asnjë mënyrë që këto ndryshime të jenë në dëm të veteranëve të UÇK-së, në rast se ndodh kjo e fundit ne do të përdorim çdo mjet të mundshëm për ti kundërshtuar,duke mos përjashtuar protesta e demonstrata”, ka thënë më tej ai.

Gjithashtu në fund Qeriqi ka lënë një mesazh për Qeverinë e Kosovës duke i çuar një “selam”, se janë të vendosur në këtë drejtim andaj kjo qeveri ta merr me seriozitet të plotë këtë vendim.

“Jemi të vendosur në këtë drejtim dhe nuk do të lëshojmë pe për asnjë çmim të cilin mund ta paguajmë. Ne kërkojmë nga qeveria që të mendoj më seriozisht për këtë kategori dhe të gjej mundësi që këto pensione të rriten sepse kjo kategori meriton një trajtim më të dinjitetshëm dhe pensione më të larta”, ka përfunduar Qeriqi për IndeksOnline./

Dikur Nasheci i Prizrenit ishte vendi më i bukur për pushime verore dhe gjatë vikendeve, kurse tani është shndërruar në një fshat, ku as banorët lokalë nuk preferojnë të qëndrojnë aty. Krejt kjo vjen si rezultat i derdhjes së ujërave të zeza nga gjithë qyteti i Prizrenit. Banorët ankohen se jeta është bërë e padurueshme. Shukri Quni, kryetar i fshatit, shprehet se kanë bërë disa ankesa, por pa sukses.

“Kjo pjesë e fshatit është duke pasur probleme me ujërat e zeza, si dhe me shtratin e lumit, i cili po mbushet nga të reshurat e ku si rezultat e kësaj lumi po del nga rrjedha normale e tij”, shpjegon Shukri Quni, i cili është edhe asamblist në Kuvendin Komunal të Prizrenit. Ndërkohë, pas inspektimit të gjendjes së lumit, komuna ka ndërmarrë veprime në sanimin e gjendjes së krijuar në atë pjesë, duke ndarë 20 mijë euro, por nevoja është shumë e madhe dhe banorët e fshatit Nashec lusin zyrtarët komunalë që ujërat e zeza të Prizrenit nga Arbana të drejtohen drejt Vlashnjes atje, ku po ndërtohet impianti i ujërave të zeza. Deri atëherë ujërat e zeza do të derdhen në shtratin e lumit Drini i Bardhë, të cilat edhe do të sjellin probleme për banorët e kësaj zone.

Mbeturinat e ngurta hedhen në shtratin e lumit

Në kilometrin gjashtë të Prizrenit në perëndim të Prizrenit, breg Drinit të Bardhë është fshati Nashec. Dikur ky fshat ishte me një atmosferë të bukur e të pastër, që përmbushte me plot kuptimin e fjalës idilin e jetës së qetë fshatare. Shukri Quni shprehet se ka ekzistuar një iniciativë, që sivjet Nasheci të shpallet fshat turistik, por, sipas tij, me gjendjen e krijuar një gjë e tillë është e pamundur dhe thjesht e pakuptimtë.

“Për çudi, Nasheci gjatë këtij viti vazhdoi të mbetej vendtubimi i mbi 70 për qind të ujërave të zeza të Prizrenit te Livadhet e Egra, e që ka ndotur fshatin dhe Drinin e Bardhë”, ka thënë Quni. Sipas tij, gjatë tërë vit për fat të keq, nga qytetarë të papërgjegjshëm të Prizrenit, fshati është bërë edhe vend për hedhjen e mbeturinave të ngurta. “Sado që komuna pikërisht në grykën e quajtur Tyrbja e Soziut ka bërë investime duke rregulluar ambientin, aty ka lloj-lloj mbeturina të ngurta, deri eshtra bagëtish të ngordhura e të cilat edhe i hedhin vetë thertoret e Prizrenit. Kështu fshati dikur i pushimit tash është shndërruar në fshat të papastërtisë dhe fshat i kundërmimit”, tregon për “Kosova Sot” asamblisti Quni. Ai kujton se madje edhe kryeministri i parë i Lidhjes Shqiptare të Prizrenit, Ymer Prizreni, kishte një shtëpi të tijën pikërisht tek tyrbja e Soziut. Sipas tij, “çdo gjë e bukur po zhduket”.

Ai rrëfen se, në këtë rrugë pastaj, gjatë viteve 1960 deri para luftës fundit, shumë veta atje ndërtuan edhe shtëpi verore. “Ata atje krijuan një vend të bukur me pushimoret e Nashecit, sepse ajri i pastër pastaj lumi afër, burimet e tjera të shumta të pastra krijonin një pamje të bukur, por nga paslufta e këtej në këtë fshat tashmë është bërë një tmerr të jetohet”, tregon Shukri Quni.

Sipas tij, tash tek vendi i quajtur “Lugu i Gradinës” derdhen të gjitha ujërat e zeza të pjesë veriore të Prizrenit. “Derdhja është pak mbi fshat dhe e gjitha përfundon në Drin. Por, aq ndyrësira ka tash atje sa fshati Nashec prej një fshati të pushimeve tash është shndërruar një në fshat të mbeturinave dhe ujërave të zeza dhe era e keqe të zë frymën që në mëngjes e deri në orët e vona të natës”, shprehet Quni. Zhdukja e peshkut Nasheci aktualisht ka 230 shtëpi dhe mbi 1800 banorë rezidentë dhe ata që jetojnë jashtë këtij fshati.

“Nashecasit dikur këtu jetonin mirë, por kushtet aktuale vërtet e kanë bërë të vështirë jetën”, tregon Feim Krasniqi, i cili ankohet për erën që vjen nga ujërat e zeza. Ai shpreh brengën se edhe peshku i Drinit, i njohur në këtë pjesë, është zhdukur gati në tërësi. “Këto ujëra të zeza, që aktualisht derdhen këtu, për të gjithë këta banorë kanë krijuar kushte të rënda banimi dhe jetese në Nashec”, tregon Krasniqi. Sa i përket ish-pushimores së Nashecit, atje ku pas lufte ishte e vendosur Brigada e TMK-së, shprehet se tani kjo pushimore është Punës dhe Mirëqenies Sociale.

“Ne nuk e dimë se çka po ndodh aty. Ajo ka vetëm katër roje”, shprehet Krasniqi. Ndryshe, infrastruktura në fshat është e rregulluar mirë, kurse shtëpitë e pushueseve, që ishin kryesisht të prizrenasve, tani ende shfrytëzohen si shtëpi pushimi. Por, Drini i Bardhë më nuk mund të shfrytëzohet as për t’u larë e as për t’u freskuar, ngase ujërat këtu tashmë duken skëterrë të zeza dhe kanë filluar të vrasin gjithë faunën e Drinit.

Kryetari Quni shprehet ndërkaq se ajo që brengos këtë fshat, është edhe trendi i ikjes në kurbet. Sipas tij, shumë prej banorëve të fshatit ushtrojnë zejen e bukëpjekësit qoftë në Prizren apo gjetiu. Sipas tij, fshati ka edhe objekte me vlerë siç është Tyrbja e Soziut në Nashec, atje ku është një gur përbirues dhe ku vizitorët shkojnë atje për pjellshmëri. Lidhur më këtë tyrbe banorët tregojnë se që me shekuj këtë vend të shenjtë e kanë nderuar banorët e këtushëm, sepse ata mendojnë se kjo tyrbe u jep shëndet dhe është vend për plleshmëri. Mirëpo, ky vend vizitohet nga njerëz jo vetëm të Prizrenit e Hasit, por nga shumë vende të Kosovës. Këtu njerëzit vijnë dhe ziejnë diçka, pastaj e ndajnë me ata që qëllojnë këtu. Ndërsa besimi në gurin përbirues ka një histori të lashtë sa vetë ky fshat, tregojnë banorët e fshatit.

Apeli i banorëve

Nasheci tash ka 320 nxënës dhe ka një objekt të bukur shkollor. Drejtoresha e kësaj shkolle, Merita Mazrreku, tregon se kuadri i kësaj shkolle është mjaft punëtor. “Domosdo se puna dhe angazhimi i këtyre mësimdhënësve ka bërë që rezultatet e nxënësve mos të mungojnë. Sidomos dallohen në garat komunale dhe ato në nivel të Kosovës”, shprehet Mazrreku. Kryetari Shukri Quni, derisa flet për “Kosova Sot”, tregon se Nasheci është në hall të madh sidomos nga ujërat e zeza. “Drini i Bardhë nga këtu është ndotur në masë që peshqit nuk jetojnë aty, është ndotur dhe jeta po vështirësohet në këtë fshat”, potencon ai. Banorët e fshatit Nashec kërkojnë që ujërat e zeza të Prizrenit nga Arbana të drejtohen drejt Vlashnjes atje ku pritet të ndërtohet Impianti i ujërave të zeza. Kurse apel i përbashkët i të gjithë banoreve të këtij fshati ishte.

“Mos na i sillni të gjithë mbeturinat këtu, sepse edhe ne kemi fëmijë, kemi nxënës e kemi frymë njerëzish. Ato tashmë janë vendet ku mund të dërgohen në Zhur, ku atje ka deponi pikërisht për këto mbetje inerte”, thonë banorët, të cilët shtojnë se vështirë mund të vazhdojnë të jetojnë në kushte të tilla.

(Kosova Sot)

Kryetari i Komunës së Prizrenit Ramadan Muja, uron Kancelarin e Ipeshkvisë së Kosovës, shkëlqesinë e tij, Don Shan Zefi dhe të gjithë qytetaret e besimit katolik të komunës së Prizrenit, me rastin e festës së Krishtlindjes.

“Të nderuar qytetar të besimin katolik, uroj që kjo festë të na shërbejë në forcimin dhe kultivimin e tolerancës, si vlerë e demokracisë dhe qytetarisë për ne dhe brezat qe do të vijnë.

Komuna e Prizrenit do vazhdojë të jetë e angazhuar maksimalisht në ngritjen e mirëqenies së qytetarëve dhe të ardhmen e sigurtë për të gjithë”, thuhet në urimin e Mujës.

“Lindja e Krishtit, uroj qe të sjellë shëndet, shumë të mira dhe lumturi në familjet tona”./PrizrenPress.com/

Të premten është përuruar aneksi i ri i objektit të Qendrës së Shëndetit Mendor në Prizren.

Drejtori Naim Fanaj, tha se me vënien në funksion edhe të këtij aneksi, dukshëm përmirësohen kushtet për punë në trajtimin e shumë personave që vuajnë nga ç’ rregullime të ndryshme mentale.

“Në këtë Qendër vetëm për një muaj trajtohen mbi 500 raste të ndryshme si dhe bëhen vizita nëpër shtëpi të kësaj kategorie në fshatrat më të largëta të Dragashit dhe Suharekës”, tha ai.

“Sfida më e madhe për këtë institucion është numri i vogël i stafit profesional në trajtimin e personave me të meta mendore”.

Realizimin e projektit për ndërtimin e aneksit të ri të objektit të kësaj Qendreje e ka mbështetur financiarisht Qeveria e Kosovës nga buxheti i saj me 95 mijë euro/TV Prizreni/

Nxënësit e shkollave fillore dhe të mesme të ultë, konkretisht 89 për qind e të anketuarave të një hulumtimi, kanë qenë të gatshëm që krahas lëndëve të tjera të marrin edhe mësim shtesë sa i përket njohjes së rregullave dhe shenjave të trafikut.
Kështu u tha në konferencën e dytë ndërkombëtare për sigurinë në rrugë, ku u publikua edhe një hulumtim, sipas së cilit është shqetësuese se gjysma e nxënësve nuk kanë njohuri për numrat e thirrjeve emergjente.

Sipas hulumtimit, vetëm 51% e kanë dhënë numrin e saktë të policisë, 2% e tyre, dinë për ndihmën e shpejtë, kurse, asnjë nuk e dinë numrin e zjarrfikësve.

Qëllimi i këtij hulumtimi ka qenë për ‘Identifikimin e faktorëve kryesorë që ndikojnë në sigurinë e lëvizjes së nxënësve në rrugë’.

Me këtë rast, drejtori i Kolegjit “Tempulli”, Muhamed Krasniqi tha se këtij hulumtimi ia kanë shtuar të dhënat zyrtare të Policisë së Kosovës.
Sipas tij, për kategoria më e rrezikuar gjatë lëvizjes në rrugë janë fëmijët.

Në anën tjetër, këshilltari i kabinetit të Ministrisë së Arsimit, Azem Grui, tha se siguria në rrugë arrihet duke i informuar nxënësit.

Sipas tij, rreth 400.000, nxënës frekuentojnë institucionet arsimore.

Me këtë hulumtim është gjetur një mostër shumë e mirë, në mënyrë që këto institucione të reflektojnë për sigurinë në rrugë.

Kurse, major Jeton Rexhepi nga Policia e Kosovës, tha se numri i viktimave të aksidentit ka shënuar rënie, në krahasim me vitin e kaluar.
“Numri i aksidenteve ku njerëzit kanë humbur jetën shënon një rënie, për 20 persona më pak apo diku rreth 16 %. Në vitin e kaluar ka të vdekur 129 persona, ndërsa, sot me datën 23 dhjetor janë 106. Ky është një rezultat i angazhimeve të përbashkëta dhe vetë angazhimit të pjesëmarrësve në rrugë në respektim të rregullave. Në vitin 2015, numri i personave si këmbësorë ka qenë në ngritje dhe brenda vitit, kemi pasur 50 këmbësor që kanë humbur jetën duke përfshirë edhe moshat e reja”, ka bërë të ditur Rexhepi.

Kurse, Burim Krasniqi nga Ministria e Infrastrukturës, thotë se mosha e fëmijëve prej 0 deri në 12 vjeç janë moshat me numër më të vogël të të vdekurve, në komunikacion të trafikut.

Sipas tij, është shqetësuese se pjesa tjetër, mbi moshën 19 vjeçare, ku fillojnë të ngasin automjetet, ka numër më të madh të vdekurve. /Telegrafi/

Hapja e të dhënave në funksion të transparencës dhe zhvillimit lokal ka qenë temë e një tryeze të organizuar të enjten nga Instituti Demokratik i Kosovës (KDI) në Prizren, me ç’rast pjesëmarrësit kryesisht kanë vënë në pah nivelin e ultë të transparencës së Komunës së Prizrenit, shkruan sot Koha Ditore.

Ky aktivitet i KDI-së është realizuar me qëllim të nxitjes së lidershipit komunal për publikimin e të dhënave statistikore, prej atyre bazikeve deri tek ato shtesë në ueb faqen zyrtare të komunës sikurse edhe shkëmbimin e përvojave me komunat që kanë arritur të investojnë në hapjen e të dhënave.

Sipas njoftimit të KDI-së, në këtë tryezë kryesuesi i Kuvendit të Komunës së Prizrenit, Kujtim Gashi ka shprehur gatishmërinë për hapjen e të dhënave bazuar në kapacitetet dhe mundësitë që i ka administrata komunale.