Ishte bërë pak kohë që Chloe Sims nuk ishte në qendër të mediave rozë.
Por të enjten në mbrëmje ajo u rikthye, pasi dekolteja e saj tërhoqi vëmendjen e medias.
Modelja po dilte për jetë nate në Londrën Perëndimore.
Erotika në prozën e Martin Amis
Vernon, personazhi i tregimit më të njohur të Martin Amis, mban statistikat e secilës herë që ka pasur dhe do të ketë seks me gruan e tij në tregimin “Let Me Count The Times” (Më lejoni të numëroj herët). Vernon është një personazh i ndrojtur sa në shoqëri dhe në shoqërim, po aq edhe në marrëdhëniet dhe raportet seksuale …
Ballsor Hoxha
A e keni parë se si revistat, gazetat dhe mediumet e tjera herë pas here hapin debate për numrin e marrëdhënieve seksuale ndërmjet një çifti. Jepen numra, episode, këshilla. Jepen edhe këshilla sa herë dhe si duhet pasur seks ndërmjet çifteve. A e keni parë se si seksi është bërë mënyrë e arritjes së atyre “atje”. Se si seksi është shumë më pak kënaqësi sesa shëmbëllim i jetës së mediave. Se si seksi është më shumë obligim i urdhëruar dhe se si seksi ka më pak kënaqësi dhe shumë më shumë nënshtrim të mediave dhe shoubizit. Pak kohë më parë kishte qarkulluar në internet një listë e vërtetë e herëve që gruaja e kishte refuzuar burrin e saj për seks. Dhe kjo ishte bërë lajm në tërë botën. Po nëse nesër fillojmë të planifikojmë, organizojmë, kalkulojmë dhe të matim statistikat e marrëdhënieve seksuale që kemi dhe do të kemi … Po nëse seksi që bëjmë kalon në statistikë që duhet përmbushur për ne, si normë … Për të gjitha këto Vernon, personazhi i tregimit më të njohur të Martin Amis, e ka një zgjidhje. Ai mban statistikat e secilës herë që ka, ka pasur dhe do të ketë seks me gruan e tij në tregimin “Let Me Count The Times” (Më lejoni të numëroj herët). Vernon është një personazh i ndrojtur sa në shoqëri dhe në shoqërim, po aq edhe në marrëdhëniet dhe raportet seksuale. Dhe sa u përket marrëdhënieve seksuale, ai ka organizuar çdo gjë. P.sh., në njërën javë ka shtatë net me radhë seks me gruan e tij dhe në javën tjetër vetëm dy herë; apo nëse në javën aktuale ka katër herë me radhë seks, të dytën do të ketë vetëm tri herë, por me kusht që javën e tretë të ketë seks vetëm një herë dhe kështu me radhë. Pastaj Vernon ka të llogaritur statistikisht, brenda këtij tregimi, secilën herë që do të ketë seks oral me gruan e tij, ndërsa sa u përket gjërave më të thella, siç janë ejakulimi në gojë apo në fytyrë të gruas së tij, ato shkojnë në statistika të detajuara, siç është 14325 herë në vit etj. Ka dy mënyra kryesore si e perceptojmë seksin sot: ose ai na jepet copë nga mediat, na jepet si model i të jetuarit që prej “Fifty Shades of Gray” e deri te modelet e parashikimit të motit ose, mënyra e dytë, është se ne, kryesisht për shkak të ndrojtjes, i mbyllim hermetikisht dëshirat tona seksuale dhe e zhveshim atë në funksion fizik dhe përjetojmë vetëm në këtë mënyrë. Por gjithashtu edhe i tërë konflikti sot i shoqërisë njerëzore është mbi pushtetin e njëri-tjetrit, gruas dhe burrit. Dhe pa asnjë dyshim e tëra shpaloset në episodet seksuale ndërmjet tyre. Vernon, personazhi i tregimit “Let me Count The Times”, është viktimë e këtij konflikti global. Në të vërtetë ai është viktimë e dyfishtë, së pari e dy sistemeve të perceptimit të seksit, atij të dhënë copë dhe atij të fshehur edhe nga vetja; dhe së dyti, nga konflikti burrë/grua për nënshtrimin e njëri-tjetrit.
Vernon, i cili ka shtatë ditë me radhë marrëdhënie seksuale me gruan e tij, magjepset nga udhëtimi i parë dhe i vetëm i tij jashtë qytetit të tij, magjepset seksualisht dhe shpërthen në 18 apo 19 masturbime (nuk është i sigurt për numrin) brenda vetëm 24 orëve të qëndrimit të tij jashtë qytetit ku jeton. Në një interpretim të kësaj simbolike “statistikore” letrare, kjo shpreh shpërthimin e personazhit Vernon tej kufijve që ia ka caktuar vetes (dhe me këtë edhe partneres së tij, bashkëshortes) dhe arrin të thyejë çdo rekord të mundshëm të ejakulimit mashkullor!! Duke qenë se kjo dalje e tij jashtë kufijve të “marres” së tij i jep kënaqësi tejet të madhe, Vernon vazhdon me ejakulimet e tij rekorde, arrin të thyejë çdo parashikim, planifikim, organizim dhe kalkulim të ejakulimeve të veta. Dhe mbi të gjitha, duke pasur marrëdhënie të rregullta me gruan e tij. Por ajo që ndodh, me gjithë hiperbolën e Martin Amis si autor, Vernon fillon të shpërthejë edhe muret e dëshirave të tij seksuale. Vernon, një njeri i druajtur, i tërhequr dhe posaçërisht i turpshëm në seks me gruan e tij, fillon të imagjinojë gruan e tij duke pasur marrëdhënie, një herë me romë, pastaj me një turk, pastaj me dy afrikanë, dhe në fund me të gjithë së bashku, duke përfshirë edhe Vernon. (Jo që autori është i “çmendur”, por edhe personazhi çmendet!!!). Por në aventurat seksuale të Vernon, ky është vetëm pragu, pasi ka shpërthyer të gjitha këto barriera morale dhe të “turpit” të tij, ai më nuk është i kënaqur me këto (megjithëse ndien edhe dhembje psikike nga këto). Ai fillon të pushtojë “starletat” e Hollivudit. Është interesant se pikërisht në këtë ai vendos për gjeneratën e vjetër të tyre, Monroe, Dietrich etj. Por as këto nuk mjaftojnë, Vernon shpejt arrin të pushtojë tërë këtë univers hollivudian dhe kalon në letërsi. Fillon prej klasikëve e arrin deri te masturbimi me Desdemonën (për të cilën Vernon kupton se ajo ka qenë e etur për seks!!!) dhe Ofelinë melankolike. Arrin deri te figurat mitike dhe të historisë së lashtë. Pastaj, pavarësisht mundësive që i ofron vepra e D. H. Lawrence, ai po ashtu pushton dhe “harxhon” tërë universin e letërsisë. Nuk besoj se është lehtë e kuptueshme se kjo “potencë” është vetë pasiguria dhe megalomania e Vernon, njeriut të druajtur, të tërhequr dhe të turpshëm posaçërisht në seks. Tërë këto pushtime të tij janë njëlloj pushtimi i universit para se ai ta pushtojë atë. Është vetë frika nga kastrimi dhe impotenca. Mirëpo as kjo nuk e ndal atë, Vernon vazhdon duke u shndërruar në diell që penetron tokën dhe ndihmëset e saj, Vernon paramendon veten edhe ajër, edhe diell të zi, edhe, edhe çdo gjë që di dhe mund të dihet, vazhdimisht duke penetruar, ejakuluar, duke masturbuar dhe sigurisht në mendjen e tij duke pushtuar dhe nënshtruar. Por është një personazh, megjithëse e ndan shtratin me atë, e cila harrohet tërësisht nga Vernon në pushtimet e tij. Gruaja e tij, asnjë herë, në asnjë rast “nuk vëren” atë që është duke ndodhur. Bashkëshortja e Vernon shfaqet vetëm atëherë kur Vernon fillon të ndiejë dhembjet e “pushtimeve” të tij. Vetëm atëherë kur ai, së pari fillon të ketë ejakulime të hershme dhe pastaj edhe impotencë të përkohshme. Dhe është pikërisht gruaja që e dërgon në një pushim dhe në të cilën ai prapë shpërthen, por këtë herë në fytyrën e gruas së tij. Ata të dy humben në eksplorimet seksuale me njëri-tjetrin dhe kalojnë një natë të pashembullt në martesën e tyre. Vernon rikthehet edhe një herë në kalin e potencës. Krejt pa detaje dhe pa ndonjë dramë, as qortim gruaja ia fal Vernon. Ia fal me porosinë që të mos e përsërisë më. Ajo që ndodh me Vernon është se ai krejtësisht i nënshtruar, jo gruas/femrës, por natyrës dhe pamundësisë së tij si njeri (për të pushtuar tërë atë që ka me penisin e tij), dorëzohet në atë që ka, por edhe me premtimin për ta përsëritur eksplorimin e një nate më parë me gruan e tij. Tregimi “Let me count The Times” i Martin Amis, një nga më të bukurit e tij, mund të lexohet si një parodi e burrit të martuar nën konfliktin e atyre që u cekën më lart, dy sistemeve të perceptimit të seksit dhe marrëdhënies seksuale. Mirëpo në një lexim pak më serioz del krejtësisht e qartë frika e personazhit Vernon në këtë tregim, si simbolikë e burrit të martuar, në ankth nga lufta apo thënë më saktë konflikti global seksual, në ankth për të gjetur një spirancë dhe në ankth për të përjetuar tërë “mitin” e seksit. Personazhi Vernon as nuk do të kishte pasur epsh për pushtimin e tërë universit po të kishte pasur një marrëdhënie me gruan e tij. Dhe ai nuk ka një marrëdhënie, sepse i frikësohet tërë asaj që “shitet” jashtë dhomës së tij të gjumit, e që është kërcënim për atë. Pak më seriozisht, ky tregim “Let Me Count The Times”, është në të vërtetë ankthi global apo i globalizimit: krejt rastësisht në zyrën e vendit ku punon blihet një kompjuter etj. (janë vitet tetëdhjetë të shekullit të kaluar) dhe krejt rastësisht ai dërgohet për të blerë kalkulatorë në qytetin tjetër. Janë pikërisht këto simbole që shfaqin shndërrimin e botës, në statistika, në kalkulime etj. Vetë ky përparim i simbolizuar nga këto simbole është ankthi më i madh i Vernon, për të cilin ai vetë nuk është i vetëdijshëm. Janë këto shenja të përshpejtimit të botës që e fusin në ankth Vernonin për të pushtuar çdo gjë që ka njohur dhe ditur ndonjëherë, me gruan e tij në shtratin e martesës që “nuk merr vesh asgjë”. /Gazeta Shqip/
Hapet ekspozita ‘Qytetet e Kadaresë’
Në kremtimet e vitit kulturor kushtuar Ismail Kadaresë në 80-vjetorin e lindjes, ekspozita Qytetet e Kadaresë, e konceptuar dhe ndërtuar nga Biblioteka Kombëtare, mbasi zhvilloi me sukses dy stacionet e saj të para në Tiranë dhe Prishtinë, udhëtoi drejt qytetit të Gjirokastrës dhe u çel sot më 13 maj në “Shtëpinë Kadare”. Ajo mbërriti në këtë qytet falë bashkëpunimit të këtij institucioni me Bashkinë e Gjirokastrës dhe Ministrinë e Kulturës dhe do të qëndrojë e hapur për publikun deri më datë 20 maj.
Përurimi i saj, në prani të Kryetares së Bashkisë së Gjirokastrës, Zamira Rami, Drejtoreshës së Bibliotekës Kombëtare, Persida Asllani dhe të ftuarve të shumtë, si prefekti i qarkut, drejtorë të institucioneve kulturore e arsimore por dhe personalitete të jetës kulturore të qytetit, u bë në mjediset e posaçme të “Shtëpisë Kadare” në simbolikë të lidhjes emblematike mes shkrimtarit dhe qytetit të tij të lindjes. Një program i posaçëm do të zhvillohet gjatë gjithë javës me nxënës dhe të rinj për të pasuruar njohjen grupmoshave të ndryshme me veprën e një prej bijve më të shquar të qytetit të Gjirokastrës, i cili, me talentin dhe dashurinë për vendlindjen, njerëzit dhe vlerat e këtij qyteti, e shndërroi atë artistikisht në një prej qyteteve më të dashur të letërsisë shqipe dhe të mirënjohur e universal në letërsinë botërore.
Ekspozita synon të ndërtojë përmes titujve, pasazheve, librave por edhe imazhesh simbolike një nga tiparet më interesante të veprës së Kadaresë, “shkrimin e Qytetit”, shndërrimin e tij në një personazh të mirëfilltë letrar.
Natyrshëm, ekspozita “Qytetet e Kadaresë” e nis rrugëtimin me një nga pamjet më mbresëlënëse dhe më ndikuese të veprës së Kadaresë, siç është rrugëtimi brilant në Kujtesën e qytetit të tij të lindjes, Gjirokastrës, për të vijuar me qytetet e tjera që kanë lënë mbresë jo thjeshtë në jetën e autorit por sidomos në tekstet dhe krijimet e tij: Moska, Stambolli, Tirana, Parisi etj. Ato vijnë si qytete jo thjeshtë të përshkruara, por themelore në subjektet e prozës apo në fatet e personazheve të tyre, herë si qytete- kujtesë, herë si qytete-mungesë, herë si qytete-pushteti, herë si qytete-rinie, e herë si qytete-lirie.
Kadares i dorëzohet ‘Dekorata e flamurit kombëtar’
Presidenti i Shqipërisë, Bujar Nishani, i ka dorëzuar shkrimtarit të mirënjohur shqiptar, Ismail Kadare gjatë ditës së premte “Dekoratën e flamurit kombëtar” me motivacionin “Në shenjë nderimi dhe mirënjohjeje të pakufishme për veprat e vyera letrare, për pasurimin e pashtershëm e të çmuar të letrave shqipe, si dhe për kontributin e jashtëzakonshëm dhënë në drejtim të lartësimit të emrit e vlerave të kombit shqiptar anembanë botës”.
Dorëzimi u bë në Konferencën Shkencore Ndërkombëtare “Shekulli i Kadaresë” organizuar nga Akademia e Shkencave e Shqipërisë dhe Akademia e Shkencave dhe e Arteve e Kosovës, me rastin e 80-vjetorit të shkrimtarit.
Presidenti i shtetit shqiptar tha se Kadareja është një shkrimtar që arriti të shkruante letërsi evropiane duke mbijetuar në një regjim të vdekur.
“Në ditët e sotme, vepra juaj në gjuhë të huaj e tejkalon dy deri në tri herë listën e titujve të saj botuar në shqip”, tha Nishani.
Ismail Kadare është autor i shumë veprave në poezi e prozë, laureat i shumë çmimeve kombëtare, kandidat i çmimit Nobel për shumë vite me radhë, anëtar i Akademisë së Shkencave të Shqipërisë dhe anëtar i Akademisë Franceze të Shkencave Morale.
Vepra e tij është përkthyer në mbi 40 gjuhë të huaja.
Rikujtojmë se në fillim të këtij viti ky shkrimtar shqiptar u nderua nga shteti francez me urdhrin e lartë “Komandant i Legjionit të Nderit”.
Ahmeti: Së shpejti shqipja, gjuhë zyrtare në Maqedoni
Lideri i Bashkimit Demokratik për Integrim (BDI), Ali Ahmeti, ka premtuar se pas tejkalimit të krizës politike në Maqedoni, do të sillet ligji që garanton përfaqësimin zyrtar të gjuhës shqipe në këtë shtet.
Në një intervistë për “Teleskopi.net” Ahmeti ka thënë se ka edhe institucione tjera, ku duhet të shihen dhe të rregullohet përfaqësimi i drejtë i shqiptarëve, që njerëzit të kenë besueshmëri më të madhe në institucionet vendore.
“Gjithashtu ka mbetur akoma pa u rregulluar ligjërisht, përdorimi zyrtar i gjuhës shqipe dhe deri tash janë bërë disa hapa në drejtim të avancimit të gjuhës, por akoma nuk kemi një ligj që përfundimisht e rregullon sipas Kushtetutës së Republikës së Maqedonisë dhe sipas Marrëveshjes së Ohrit”, ka deklaruar Ahmeti dhe ka sqaruar se në Marrëveshjen e Ohrit dhe në Kushtetutën e Republikës së Maqedonisë është e sanksionuar që gjuha, e cila flitet nga më shumë se 20 për qind e qytetarëve, është gjuhë zyrtare.
Ahmeti ka bërë me dije se arsyen se pse BDI-ja nuk do të marrë pjesë në zgjedhjet e 5 qershorit dhe nëse ato mbahen, sipas tij, vendi do të shkojë sërish në zgjedhje pas 2-3 muajve. Ai ka treguar se janë duke biseduar edhe me forcat politike në vend dhe me përfaqësuesit ndërkombëtarë, që të gjejnë një zgjidhje të pranueshme për të gjithë.
“Nëse shkon një parti në zgjedhje më 5 qershor, tani unë prej këtu do t’ju garantoj se në një periudhë brenda 2-3 muajve në Republikën e Maqedonisë do të ketë zgjedhje të përgjithshme. Është e pakuptimtë, që një parti e vetme të qeverisë në vend për një mandat katërvjeçar”, ka deklaruar Ahmeti.
Nis largimi i deponive ilegale të mbeturinave në Malishevë
Drejtoria e Shërbimeve Publike, në bashkëpunim me njësinë e “Ekoregjionit” në Malishevë, kanë filluar aksionin për largimin e deponive ilegale të mbeturinave, në tërë territorin e Komunës së Malishevës. Sot është dita e tretë e këtij aksioni dhe brenda disa ditëve, pritet të largohen të gjitha pikat e evidentuara të grumbullimit ilegal të mbeturinave dhe në të njëjtën kohë ju bëhet thirrje qytetarëve, që të ruajnë ambientin.
Drejtori i Drejtorisë së Shërbimeve Publike, Milazim Morina tha se deri më sot janë pastruar këto fshatra: Mleqan, Plloqicë e epërme, Llazicë, Gollubovc, Plloqicë e poshtme, Bellanicë, Balincë, Drenoc dhe Shkarashnik”.
“Drejtoria ka evidentuar 124 pika ilegale të grumbullimit të mbeturinave dhe brenda njëzet ditëve, pritet të përfundoj ky aksion”, tha ai.
Morina i lut të gjithë qytetarët që të mos i hedhin mbeturinat në ambient, por ta ruajnë ambientin. Po ashtu, ai kujton se përjashtuar tri fshatra të Komunës së Malishevës, të gjitha vendbanimet tjera janë nën menaxhimin njësisë së “Ekoregjionit” në Malishevë dhe mbeturinat largohen rregullisht.
“Edhe pse janë këto pika të evidentuara, mund të them se këtë vit, vërehet një dallim i konsiderueshëm me vitet tjera, pasi edhe pikat e evidentuara, edhe sasia e mbeturinave, janë dukshëm më pakta dhe kjo tregon se çdo ditë e më tepër po e ruajmë ambientin”, tha Morina.
“Nuk do të ndalen së punuari, edhe në forma të ndryshme vetëdijesimi, në mënyrë që ambienti që na rrethon të jetë i pastër”, shtoi ai. /PrizrenPress.com/
Prizren: 30 ditë paraburgim të dyshuarit për tentim vrasje
Departamenti i Krimeve të Rënda i Gjykatës Themelore të Prizrenit ka caktuar masën e paraburgimit prej 30 ditësh ndaj të pandehurit me iniciale K.B. nga Prizreni, për shkak të dyshimit të bazuar se ka kryer veprën penale lëndim i rëndë trupor nga neni 189 parg.5 lidhur me para.1 pika 1.1 të KP-së, dhe mbajtja në pronësi, kontroll ose në posedim të paautorizuar të armëve nga neni 374 par.1 të KP-së, vendosur sipas kërkesës së Prokurorisë Themelore në Prizren-Departamenti i Krimeve të Rënda, njofton Gjykata e Prizrenit, raporton PrizrenPress.
Masa e paraburgimit do të llogaritet në kohëzgjatje prej 30 (tridhjetë) ditëve prej datës 12.05.2016 ora 14:20 dhe do të zgjasë deri me datën 11.06.2016.
I pandehuri dyshohet për shkelje të Kodit Penal, sepse pas mosmarrëveshjes paraprake që ka pasur me të dëmtuarin me iniciale S.Sh. shkon në shtëpi pajiset me armë dhe shkon në vendin ku ishte duke punuar i dëmtuari dhe me një pistoletë të tipit të panjohur që e kishte pasur, shkrep në drejtim të këmbëve të dëmtuarit, duke i shkaktuar lëndim të rëndë trupor. /PrizrenPress.com/
Në Korishë përkujtohen 77 martirët e vrarë
Me një manifestim përkujtimor, në kompleksin e varrezave të martirëve në Korishë të Prizrenit, janë përkujtuar 77 civilët e vrarë para 17 vitesh, të cilët ishin përdorur mburojë e gjallë nga serbët karshi sulmeve ajrore të NATO-s.
Pjesë e këtij tubimi ishin familjarë të dëshmorëve dhe martirëve, banorë të Korishës dhe fshatrave përreth, si dhe përfaqësues të institucioneve të ndryshme dhe zyrtarë të partive politike.
Në emër të Këshillit Organizativ të manifestimit ka folur Rexhë Ukaj, i cili tha se në këtë ditë para 17 vitesh, korishasit i kaploi tmerri i përgjakur pas kurthit që bënë armiqtë ndaj popullatës civile, duke shkaktuar dhjetëra të vrarë e të plagosur në mesin e të cilëve të moshuar dhe fëmijë.
Sekretari i degës së OVL të UÇK-së në Prizren, Isa Berisha tha se se 13 maji i vitit 1999 ka lënë dhimbje dhe trishtim për të gjithë ne, sepse barbarët e paskrupulltë humbjet në fushën e nderit u munduan t’i zbusin duke vrarë e masakruar civilë të shumtë që është rast i pashembullt në botë.
Ndërkaq, Ramadan Muja, tha se gjaku i dëshmorëve dhe martirëve në luftën çlirimtare vulosi themelet e shtetit të Kosovës.
Pjesë e këtij tubimi përkujtimor ishte edhe kryetari i AAK-së, Ramush Haradinaj, i cili tha se barbaria e armikut ishte që gjithmonë për shekuj me radhë të na shkaktojë dhimbje përmes metodave më të liga njerëzore. Sipas tij, kjo ngjarje është një përkujtim i kujtesës sonë se sa e shtrenjtë ishte rruga e lirisë të cilën e gëzojmë sot.
Në emër të familjeve të dëshmorëve dhe martirëve të Korishës, ka folur Hasan Ahmetaj, i cili tha se karvanit të gjatë të sakrificës së shqiptarëve për liri iu bashkuan edhe civilët e vrarë në Korishë. Për këtë gjë, sipas tij, duhet të ndjehemi krenar për të kaluarën tonë ku është derdhur shumë gjak për çlirimin e vendit.
Pas fjalimeve dhe shfaqjes së një programi artistik nga nxënësit e shkollës “Dëshmorët e Kabashit”, janë bërë homazhe dhe janë vendosur buqeta lulesh në varret e martirëve/ TV Prizreni/
NË KORISHË U PËRKUJTUAN 77 MARTIRËT E VRARË NGA KURTHI I ARMIKUTMe një manifestim përkujtimor, në kompleksin e varrezave të martirëve në Korishë, janë përkujtuar 77 civilët e vrarë para 17 vitesh, të cilët ishin përdorur mburojë e gjallë nga serbët karshi sulmeve ajrore të Nato-s. Pjesë e këtij tubimi ishin familjarë të dëshmorëve dhe martirëve, banorë të Korishës dhe fshatrave përreth si dhe përfaqësues të institucioneve të ndryshme dhe zyrtarë të partive politike.Në emër të Këshillit Organizativ të manifestimit, ka folur Rexhë Ukaj, i cili në mes tjerash tha se në këtë ditë para 17 vitesh, korishasit i kaploi tmerri i përgjakur pas kurthit që bënë armiqtë ndaj popullatës civile, duke shkaktuar dhjetëra të vrarë e të plagosur në mesin e të cilëve të moshuar dhe fëmijë. Në emër të shoqatave të dala nga lufta, ka folur sekretari i degës së OVL të UÇK-së në Prizren, Isa Berisha, i cili tha se tha se 13 maji i vitit 1999 ka lënë dhimbje dhe trishtim për të gjithë ne,sepse barbarët e paskrupulltë humbjet në fushën e nderit u munduan t’i zbusin duke vrarë e masakruar civilë të shumtë që është rast i pashembullt në Botë. Ndërkaq, Ramadan Muja, tha se gjaku i dëshmorëve dhe martirëve në luftën çlirimtare vulosi themelet e shtetit të Kosovës. Pjesë e këtij tubimi përkujtimor ishte edhe kryetari i AAK-së, Ramush Haradinaj, i cili tha se barbaria e armikut ishte që gjithmonë për shekuj me radhë të na shkaktojë dhimbje përmes metodave më të liga njerëzore. Kjo ngjarje tha ai, është një përkujtim i kujtesës sonë se sa e shtrenjtë ishte rruga e lirisë të cilën e gëzojmë sot. Në emër të familjeve të dëshmorëve dhe martirëve të Korishës, ka folur Hasan Ahmetaj, i cili tha se kalvarit të gjatë të sakrificës së shqiptarëve për Liri i’u bashkuan edhe civilët e vrarë në Korishë, dhe për këtë gjë tha ai, duhet të ndjehemi krenar për të kaluarën tonë ku është derdhur shumë gjak për çlirimin e vendit. Pas fjalimeve dhe shfaqjes së një programi artistik nga nxënësit e shkollës “ Dëshmorët e Kabashit”, janë bërë homazhe dhe janë vendosur buqeta lulesh në varret e martirëve ….
Gepostet von Televizioni Prizrenit am Freitag, 13. Mai 2016
Arrestohen dhe dërgohen në burg tre persona në Prizren
Policia e Kosovës njofton se ka arrestuar tre meshkuj shqiptar në Prizren. Arrestimi i tyre është bërë me urdhër të Gjykatës Themelore në Prizren, raporton PrizrenPress.
Sipas Policisë, njëri mashkull është arrestuar në rrugën “Sezai Surroi” të qytetit, kurse dy meshkujt tjerë janë arrestuar në fshatin Lubizhdë.
Të arrestuarit janë dërguar në vuajtje të dënimit në burgun e Prizrenit. /PrizrenPress.com/
Albulena godet Shpendin
Deputetes së Vetëvendosjes, Albulena Haxhiut, nuk i ka ardhur mirë që Shpend Ahmeti ka shtrënguar duart me Hashim Thaçin mbrëmjen e së enjtes në një ndeshje basketbolli në Prishtinë.
Ajo ka thënë se Kryetari i Prishtinës është dashur ta gjente forcën për të mos e takuar Presidentin e Kosovës – të cilin e ka quajtur “kriminel e tradhtar”.
“Shpendi dukej në siklet në ato fotografi të asaj situate të mbrëmshme. Pra, nuk dukej aspak i kënaqur. Por, mendoj që është dashur ta gjejë forcën e të mos ia japë dorën Thaçit. Ajo përshëndetje e ndihmon Thaçin”.
“Thaçi është përgjegjësi kryesor për mjerimin ekonomik, politik e social në Kosovë. Është kriminel e tradhtar”, ka shkruar Haxhiu në llogarinë e saj në Facebook.
Presidenti Hashim Thaçi dhe Shpend Ahmeti ishin bërë mbrëmë së bashku nga Kryeministri i Shqipërisë, Edi Rama, i cili kishte ardhur ta ndiqte një ndeshje basketbolli në Prishtinë.