Deputeti i Kuvendit të Kosovës nga Lëvizja Vetëvendosje, Rexhep Selimi, ka reaguar pas një shkrimi të ish-kryetarit të Kuvendit, Jakup Krasniqi, i cili ka thënë se në seancën e 19 prillit 2013, një deputet i VV-së e ka lutur atë që ta fusë Policinë në Kuvend.

“E lexova me vëmendje reagimin e e Kryeyarit të atëhershëm të Kuvendit Jakup Krasniqit dhe detajet në lidhje me seancën e Kuvendit ku është miratuar marrëveshja e 19 Prillit 2013, e cila hodhi bazat për krijimin e “Zajednicës” në Kosovë.

Pra siç thash më lartë dhe siç mund të gjendet në gjithë procesverbal dhe në video-materialet e asaj dite në seancë, kemi kërkuar nga Jakup Krasniqi që ta ndërpres seancën. Të rezistojë bashkë me ne dhe të mos e lejojë miratimin e Marrëveshjes për “Zajednicën”. Si kryetar Kuvendi ai vërtetë do të kishte ndikuar shumë, së paku në vështirësimin e miratimit të asaj marrëveshjeje. Ai po arsyetohet se nuk e ka bërë këtë ngase shumica e deputetëve ishin PRO miratimit të marrëveshjes dhe se në Kuvend vendosë vota e shumicës së deputetëve.

Por a nuk e kemi thënë, bashkë me Jakup Krasniqin dhe krejt opozitën, tash e 7 muaj, që nuk mund të ketë numra kundër sovranitetit shtetëror?! A nuk kemi qenë pakicë gjatë gjithë rezistencës tonë opozitare dhe a nuk kemi thënë që nuk ka shumicë që mund ta zhbëjë shtetin?! Kush mendon ndryshe, po thotë Jakup Krasniqi, nuk ka lidhje me demokracinë. Por cila demokraci mund të votojë për zhbërjen e Republikës?! Këtë e kemi thënë dhe kundërshtuar, bashkë me Jakupin, tash e 7 muaj. Argumenti i pushtetit vazhdimisht ka qenë “ju nuk e keni idenë çka është demokracia”, “nuk po e respektoni vendimin e shumicës”, etj. Nuk mund të ketë numra kundër Republikës. Pozicioni i sulmit mbi Republikën nuk mund të jetë kurrsesi demokratik. Me numra kalon edhe ‘Zajednica’ edhe ‘Demarkacioni’, por aksioni direkt i opozitës i ndali e do t’i ndalë.

Jakup Krasniqi po e justifikon futjen e Policisë në Kuvend, me një “kërkesë” që i paskësh bërë një deputet Vetëvendosjes!

Unë kam qenë në atë seancë dhe e di që vetëm dy njerëz kanë mundur të flasin dhe të bëjnë kërkesa në emër të VETËVENDOSJE!-s dhe/apo Grupit të saj parlamentar. Ata njerëz kanë qenë Albin Kurti (atëbotë kryetar i Lëvizjes) dhe Visar Ymeri (në atë kohë Drejtues i Grupit tonë Parlamentar). Unë e di që nuk ka shanse që ndonjëri nga ta të ketë kërkuar intervenimin e policisë.

Por ja po e zëmë që dikush të paska kërkuar intervenimin e policisë. Nëse për Kryetari e atëhershme të kuvendit, futja e policisë në Kuvend ka qenë e papranueshme dhe i ka rezistuar kësaj ideje kur është kërkuar nga kryeministri, atëherë si është e mundur që e paska komprometuar qëndrimin e vet, për shkak të një kërkese nga një deputet i cilësdo parti qoftë ai.

Problemi i dytë është ky: pse e paska dëgjuar atë deputet që paska kërkuar ta sjellë policinë, e nuk e ka degjuar gjithë Grupin Parlamentar të VETËVENDOSJE!-s që bënte lutje të ndërpritej dhe anulohej ajo seancë, ku po miratohej ndarja etnike dhe cenimi i sovranitetit të Republikës sonë. Aq më tepër që për ta bërë këtë ka pasur edhe hapësirë që Kryetari I kuvendit të bazohet në rregullore të Kuvendit.

Baca Jakup, nuk ka heshtje parimore. E vërteta duhet të nxirret në shesh. Çdo e vërtetë e përgjysmuar është e pavërtetë dhe joparimore.

Baca Jakup, kur ta pranosh që ke marrë urdhëra nga deputetët e Vetëvendosjes trego se sa i ke zbatuar ato!

P.S. Një detaj që e vërejta është që Jakupi qenka marrë vetëm me një paragraf nga shkrimi i Dardan Molliqajt. Më intereson shumë ta di se a nënkupton kjo që ai është dakord me pjesën tjetër të artikullit të tij?” (sic.), ka shkruar Selimi në profilin e tij në Facebook.

Kryetari i Nismës për Kosovën, Fatmir Limaj, ka thënë se janë duke i bashkërenduar aktivitetet që protesta e 14 majit do të jetë sa më masovike.

Në emisionin Rubikon të Kohavisionit, ai ka thënë se sinjalet nga terreni janë të mira, duke shtuar se ftojnë që protestës t’i bashkohën të gjithë të pakënaqurit me këtë Qeveri dhe me marrëveshjet për Demarkacionin e kufirit të Kosovës me Malin e Zi dhe Asociacionin e Komunave me shumicë serbe.

“I bëjmë thirrje edhe VV-së t’i bashkohet protestës. Ka ende kohë që drejtuesit e VV-së ta mendojnë që të bëhen pjesë të protestës”, ka shtuar Limaj.

Shefi i Nisma-s, ka theksuar se largimet e disa individëve nuk duhet të shihen se trazim i partisë, por se këto lëvizje sipas tij, janë krejt normale.

Ai, duke folur për arsyet pse partia e tij nuk ka marrë më shumë vota në zgjedhjet nacionale të vitit 2014, ka thënë se partia e tij është dëmtuar në këtë process.

“Ne kemi pasur informata se I kemi marrë rreth 50 mijë vota, por kemi pasur mungesë të komisionerëve dhe vëzhgeusve në terren, por në fund kanë dalur 15 miëj vota më pak”, ka thënë Limaj.

Sipas tij, Nisma në zgjedhjet e ardhshme nacionale do ta fitoj dyshimin e votive që i ka marrë votat në zgjedhjet nacionale të vitit 2014. /Telegrafi/

Kryetari i Këshillit Kombëtar të Nismës për Kosovën, Jakup Krasniqi sot përmes një postimi në Facebook ka sqaruar momentin e votimit të Marrëveshjes së 19 prillit të vitit 2013, si dhe ndërhyrjen e sigurimit për t’i larguar nga foltorja deputetët e Vetëvendosjes.

“Deri sa unë po mendoja edhe në dorëheqje (ishin shumë miq që nuk më patën lënë të dorëheqësha edhe para kësaj seance), mora telefonat nga një deputet i VV-së, ai kërkoi nga unë: “që të intervenoja me polici se ata nuk po dinin sesi të dilnin nga situata në të cilin ishin futur”. Vetëm pas kësaj telefonate, u kam thënë policisë së Kuvendit që të ndërhynin në largimin e deputetëve të VV-së. Deputetët edhe nuk kanë bërë ndonjë rezistencë. Pra, sikur mos të ishte kërkesa e deputetit të VV-së, kurrën e kurrës nuk do ta urdhëroja ndërhyrjen e policisë në Kuvend!”, ka shkruar Krasniqi.

Indeksonline merr vesh se ky deputet që e thirri në telefon Krasniqin dhe kërkoi nga ai futjen e policisë në Kuvend është Rexhep Selimi.
I kontaktuar nga Indeksonline, Jakup Krasniqi nuk e ka mohuar se Rexhep Selimi e ka thirr në telefon.

“Për këtë më mirë pyetni ata të Vetëvendosjes. Unë as nuk po e konfirmoj as nuk po e mohoj, mirëpo ata e dinë më së miri. Ata pasi po flasin le të tregojnë pse e kanë bërë. Atyre duhet tua drejtoni pyetjen”, ka thënë Jakup Krasniqi për Indeksonline.

Vendimmarrja e kryetarëve të komunave vazhdon të jetë jo transparente. Baza ligjore që rregullonte transparencën në nivel lokal përjashtonte në mënyrë absolute transparencën dhe vendimmarrjen e kryetarëve të komunave. Ky boshllëk ligjor ka bërë që kryetarët e komunave t’i ikin përgjegjësisë dhe llogaridhënies për vendimet e tyre në raport me publikun, thuhet në një njoftim nga KDI.

Amandamentimet e fundit në Udhëzimin Administrativ për transparencë komunale 01/2015 nga Ministria e Administrimit dhe Pushtetit Lokal (MAPL) i hyrë në fuqi nga janari i vitit 2016, në mënyrë decidive obligojnë kryetarët e komunave që t’i publikojnë vendimet e tyre edhe në ueb faqen zyrtare të Komunave, transmeton Indeksonline.

Sic thuhet në njoftim, pavarësisht këtyre ndryshimeve të rëndësishme, 8 nga 11 kryetarët e komunave në të cilat KDI monitoron institucionet lokale (Prishtinë, Prizren, Gjakovë, Gjilan, Malishevë, Suharekë, Rahovec, Graçanicë, Deçan, Dragash dhe Mamushë) vazhdojnë të mos u përmbahen këtyre parimeve bazë të qeverisjes llogaridhënëse. Të përgjegjshëm në këtë drejtim janë treguar vetëm kryetarët e komunave të Prizrenit, Prishtinës dhe Rahovecit, të cilët kanë publikuar vendimet e tyre për periudhën janar – maj 2016. Megjithatë, duke marrë parasysh karakterin e vendimeve të kryetarëve të komunave të cilët kanë karakter administrativ dhe hynë në fuqi menjëherë, edhe kryetarët të cilët kanë filluar në publikimin e vendimeve kanë vonesa të konsiderueshme.

Si të zgjedhur të drejtpërdrejtë nga qytetarët, kryetarët e komunave duhet të jenë shumë më të hapur dhe më llogaridhënës në bërjen publike të vendimeve të tyre. Artikulimi publik i këtyre vendimeve që prekin direkt jetën e qytetarëve, përveç që i kontribuon qeverisjes së mirë, ndihmon në promovimin e vetë punës së kryetarëve.

KDI kërkon nga Kryetarët e Komunave të bëjnë publike vendimet e tyre konform përgjegjësive me legjislacionin aktual. Për më tepër, kërkon nga Ministria e Administrimit dhe Pushtetit Lokal (MAPL) të ushtrojë autoritetin e saj drejt krerëve të komunave në përmbushjen e obligimeve ligjore, e me këtë publikimin e vendimeve të tyre në ueb faqet zyrtare.

Instituti Demokratik i Kosovës (KDI) që nga janari i vitit 2016 ka filluar zbatimin e projektit në 11 komunat e Kosovës. Projekti ka për qëllim rritjen e transparencës dhe llogaridhënies institucionale në nivel lokal me theks të veçantë rritjen e transparencës së shpenzimeve financiare të komunave dhe hapjen e këtyre të dhënave karshi publikut të gjerë. /PrizrenPress.com/