Një grua ka pësuar lëndime trupore në një aksident trafiku në Suharekë, bën të ditur Policia e Kosovës përmes një komunikate për media.

“Rreth orës 10:30 minuta, në rrugën “Agron Berisha” në Suharekë, një drejtuese e automjetit Landrover, përderisa po lëvizte me automjet, e kishte humbur kontrollin ndaj automjetit dhe kishte dalë në krahun tjetër të lëvizjes e më pas përplaset në rrethojat e një shtëpie e që në fund përfundon në oborr”, thotë PK.

PK thotë se drejtuesja e automjetit ka pësuar lëndime për të cilat është përkujdesur mjeku i Shtëpisë së Shëndetit në Suharekë.

Dëme materiale janë shkaktuar në automjet dhe në rrethojën e oborrit. Policia ka kryer procedurat hetimore.

Policia e Kosovës ka njoftuar se pas një pune hetimore lidhur me vjedhjen në tentativë, e cila pati ndodhur më datën 22 nëntor të këtij viti rreth orës 09:45 në Dragash, është arrestuar një i dyshuar mashkull i nacinalitetit goran.

“Njësitet policore pas një pune operative e kanë identifikuar dhe e kanë arrestuar me 12.12.2016 të dyshuarin mashkull K/Goran (i mitur), pasi që për të njëjtin ekziston dyshimi i bazuar se është i përfshirë në raste të ndryshme të ‘vjedhjeve’ dhe ‘tentim vjedhje’ të shtëpive”, thuhet në raportin e Policisë, shkruan PrizrenPress.

Me urdhër të prokurorit i dyshuari është dërguar në mbajtje. /PrzrenPress.com/

Në grupin e 14 personave që po gjykohen për krim të organizuar, fajde, detyrim, shpëlarje të parave, organizim të skemave piramidale dhe bixhozit të paligjshëm si dhe të armëmbajtjeve pa leje, gjashtë prej të akuzuarve janë nga familja Kqira e Prizrenit.

Katër nga të akuzuarit e kësaj familje Tunë, Gjon, Marian dhe Kastriot Kqira që 18 muaj vazhdojnë të jenë në paraburgim. Ndërsa paraburgimi u është ndërprerë Gjekson e Gëzim Kqirës, të cilët po vazhdojnë të gjykohen në liri.

KALLXO.com në vazhdimësi ka raportuar për këtë rast, i cili duket të jetë njëri nga rastet më të mëdha që po gjykohet në Departamentin e Krimeve të Rënda në Gjykatën Themelore të Prizrenit.

Gjergj Kqira, kryefamiljari i familjes Kqira përmes KALLXO.com, ka bërë një reagim në emër të familjes Kqira, ku tregon për fitimet e pasurisë së kësaj familje.

Në vazhdim është letra e plotë e Gjergj Kqirës, i cili flet në emër të djemve të tij të ndodhur në paraburgim.

“Duke parë titujt bombastikë dhe skandalozë të disa portaleve dhe gazetave lidhur me gjykimin e padrejtë dhe qesharak ndaj anëtarëve të familjes Kqira nga Prizreni, ne si familje ndihemi të obliguar moralisht që ta sqarojmë për opinionin e gjerë këtë barrë që na peshuan në qafë pa fajin tonë.

Familja jonë ka reaguar edhe herë të tjera kur e kemi parë të arsyeshme dhe ju bëjmë me dije se gjithmonë do të reagojmë kur bëhet fjalë për cenimin e të drejtave tona. Puna na ka shoqëruar çdoherë, qysh nga paraardhësit tanë.

Fillimisht na lejoni të sqarojmë se pasuria e familjes tonë nuk është pasuri marramendëse siç pretendojnë të tjerët, ne nuk kemi dhe as nuk kemi pasur ndonjëherë jetë luksi, por jeta jonë ka qenë gjithmonë me punë, me të mirat që i kemi krijuar vetë, natyrisht të varfër s’kemi qenë asnjëherë. Për të pasur këtë jetë me mirëqenie, familjes tonë iu desh shumë punë, mund e djersë e të gjashtë vëllezërve.

Fëmijëria jonë e hershme ishte me sakrifcë e punë. Ne ishim gjashtë vëllezër dhe dy motra që u rritëm pa praninë e babës tonë pasiqë baba jonë punonte në furrën e tij në atë kohë në qendër të Zagrebit në Kroaci dhe kishte edhe një dyqan në Bosnje dhe Hercegovinë.

Babën tonë e takonim një herë në vit dhe kjo ishte kënaqësia jonë më e madhe. Gjithashtu në kohën kur baba jonë punonte jashtë vendit me bizneset e tij, axha jonë merrej me bujqësi përkatësisht me rritjen e deleve në fshatin tonë, Serbicë e Epërme.

Kjo i vërteton edhe fjalët në fillim se familja jonë asnjëherë nuk ka jetuar në luks, por gjithmonë duke u munduar me punë për sigurimin e jetesës së familjes. Atë rrugë më pas e vazhduam edhe ne gjashtë vëllezërit disa duke u marrë me kultivimin e bujqësisë e disa edhe vazhduan rrugëtimin jashtë vendit në Gjermani.

Puna ecte gjithmonë mirë, një sezon me shitblerjen e pemëve dhe perimeve ka shkuar deri në vlerën e 100 mijë markave gjermane.

Pas disa vitesh punë e fitime të disa vëllezërve në Gjermani, ata vendosën të kthehen dhe vendosën të marrin një restorant në Ulqin aty ku do të angazhoheshim e gjithë familja. Fitimet në atë kohë ishin të mëdha dhe puna në restorant na siguronte të ardhurat tona, pasiqë asokohe Ulqini frekuentohej nga një numër i madh i turistëve nga e gjithë Evropa.

Për vite me radhë familja kurseu paratë nga gjithë ajo punë disavjeçare, derisa në Ulqin filloi periudha kur turizmi filloi të bie dhe kështu ne u kthyem sërish në vendin tonë, në Prizren.

Pas kthimit tonë, ne morëm me qera restorantin ”Flamengo” dhe aty vazhduam punën së bashku. Duhet cekur se të gjitha shpenzimet e restorantit si: verën, mishin, rakinë, pemët e perimet, i siguruam të gjitha këto nga punimet e tokës tonë dhe i vetmi shpenzim që kishim ishte qeraja e restorantit.

Në të njëjtën kohë e zgjeruam biznesin tonë dhe vazhduam me hapjen edhe të dyqanit të rrobave (tekstilit) emri i të cilit ishte “6 vëllezërit”.

Falë Zotit bizneset po ecnin shumë mirë dhe fitimet po rriteshin shumë. Nga kërkesa e madhe e blerësve, njëri nga vëllezërit udhëtonte çdo javë në Turqi për t’u furnizuar me mall, madje udhëtimi i tij bëhej me autobus vetëm me qëllim që të mos bënim shpenzime të panevojshme dhe gjithmonë duke e ruajtur traditën e kursimit.

Me kursimet e mbledhura ne arritëm ta blejmë kafiterinë “Shatërvan 2”. Kjo erdhi pas një marrëveshje që familja jonë bëri me ish pronarin e lokalit me të cilin njiheshim personalisht.

Të gjithë ata që jetojnë me vite në qytetin e Prizrenit e dinë se sa fitime sjell ky lokal. Pra me një fjalë pas shumë punëve dhe angazhimeve pa hile familja jonë arriti të bëhej pronare e këtij lokali. Rrugëtimi jonë vazhdonte të përparonte dhe secili nga ne vëllezërit ishim në kërkim të hapjes së bizneseve të reja.

Në kuadër të angazhimeve që kishim familja jonë, përkatësisht vëllai ynë i ndjerë u mor edhe me tregtimin e ligjshëm të arit. I ndjeri gjatë punës së tij si argjendar la pas vetes një sasi të madhe të arit.

Lokalin që e kishim marrë me qera në qendër të Shatërvanit “Hollyëood”, kishim vendosur ta mbyllim për një periudhë sepse pikërisht para atij lokali vëllai ynë kishte ndërruar jetë. Pasi pronari i lokalit “Hollyëood” vendosi ta nxjerrë në shitje lokalin, ne vendosëm ta blejmë atë lokal sepse aty kishim pasur fitime të mira dhe tanimë me atë lokal e kishim krijuar një lidhje të fortë emocionale në shenjë kujtimi për vëllain e ndjerë.

Lokali në fjalë vazhdon të punon ende por tani me emrin “Kristal”. Bizneset tona përparonin vazhdimisht dhe një fitim e sillte tjetrin. Përpos bizneseve që ne i zotërojmë edhe sot e që luhaten kohë pas kohe nga kriza ekonomike në Kosovë, ne vazhdojmë t’i qëndrojmë besnik punës tonë në fshat me bujqësi e blegtori, duke punuar tokën e gjithashtu duke u marrë me tri ferma që i posedojmë tani.

Toka jonë e punuar përpos që siguron ushqim për tri fermat tona, ajo sjellë edhe mijëra kilogramë grurë që i dorëzojmë në mullinj vit për vit.

Ne si familje kemi shumë për të treguar për rrugëtimet tona të gjata e të shoqëruara me shumë vështirësi dhe do të duheshin ditë të tëra për ta përmbledhur me fjalë punën tonë. Nëse ka të tillë që mendojnë se pasuria jonë u krijua në mënyrë të kundërligjshme gabohen rëndë. Ne e kemi dëshmitar Zotin, djersën dhe mundin e gjithë familjes.

Dhe krejt në fund, ne ende besojmë fuqishëm në organet e drejtësisë. Kemi shpresë se drejtësia do ta zbardhë këtë çështje duke mos anuar nga grupet e caktuara, individë të caktuar dhe interesat e tyre që shihet qartë se përparimtarët nuk i duan dhe i kanë therrë në sy.

Me respekt,

Gjergj Kqira

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal me qëllim të përfitimit të drejtpërdrejt të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde. Pastaj, duke përdorur kërcënimet e rënda, i kanë detyruar të paguajnë kamata dukshëm joproporcionale ose të kryejnë ndonjë veprim tjetër në dëm të pasurisë së tyre.

Të akuzuar në këtë rast janë: Tunë, Kastriot, Gjon, Marjan, Gjekson e Gëzim Kqira, Benson Buza, Besfort Omaj, Zyrafete Hukolli, Ragip Fazlija, Ekrem Leci, Hil Katinari, Sejdë Kaqorraj dhe Zef Oroshi.

KALLXO.com ka raportuar që nga fillimi i këtij rasti, e në vazhdimësi.

Presidenti i vendit, Hashim Thaçi ka nderuar 84 serbë të Kosovës të rënë në Hoçë të Madhe të Rahovecit gjatë viteve 1998-2000.
“Sot sapo vumë lule në këtë pllakë përkujtimore për 84 qytetarë serb të Kosovës, jemi sot këtu për të kujtuar dhe lutur për viktimat gjatë dhe pas luftës pa dallim nacionaliteti”, tha Thaçi, njofton Klan Kosova.

Sipas Thaçit, familjarët e të pagjeturve janë shembull për të gjithë të tjerët që siç tha ai “duhet të bashkëpunojmë me njëri-tjetrin për të ardhmen e vendit tonë dhe se duhet që njëherë e përgjithmonë ta përfundojmë agoninë e familjarëve”.

“Nga familjarët e pagjeturve dhe takimet që kemi zhvilluar me ta mësojmë se dhimbja është e njëjtë për të gjithë, për secilin prind, për secilën familje, për secilin komunitet”.

“Për të vërtetën dhe pajtimin për të vërtetën kërkohet sakrificë dhe që kërkoj për të gjithë që të ngriten mbi vetveten mbi përkatësinë nacionale në shërbim të demokracisë, në shërbim të së ardhmes, në shërbim të europianizimit të Kosovës dhe shoqërisë multietnike në emër dhe shërbim të së ardhmes euroatlantike dhe evropiane të Kosovë”.
“Duhet të zbardhet fati i të pagjeturve, të ngadhënjejë drejtësia e të ndodh pajtim. Kosova nuk duhet të mbetet peng i së kaluarës së errët por me mirëbesim dhe bashkërisht ta ndërtojmë të ardhmen të gjithë pa dallim, ky është misioni ynë, vizioni ynë që të punojmë të gjithë pa asnjë dallim, qoftë politik, qoftë etnik, qoftë të besimit”, ka thënë ai.

Gjatë muajit korrik, kryetari i shtetit ka vendosur kurore lulesh në memorialin e 14 qytetarëve serbë të vrarë menjëherë pas luftës në fshatin Grackë të Lipjanit, vizitë kjo që pati nxitur reagime të mëdha, njofton Klan Kosova.

Sot është mbajtur mbledhja e rregullt e Këshillit të Drejtorëve, që udhëhiqet nga kryetari i Komunës së Malishevës, Ragip Begaj. Në mbledhjen e sotme, gjatë raportimit të drejtorëve të drejtorive komunale, u tha se janë bërë të gjitha përgatitjet për sezonin dimëror, si në mirëmbajtjen e rrugëve, ashtu edhe në ofrimin e shërbimeve komunale, ku në fund vit ka fluks më të madh të qytetarëve, kryesisht mërgimtarë që duhet t’iu ofrohen shërbime të shpejta.

Fillimisht kryetari i Komunës së Malishevës, Ragip Begaj, ka kërkuar nga drejtoritë përkatëse, që të jenë më shumë të angazhuar në këtë fund të vitit, si në ofrimin e shërbimeve administrative komunale, ashtu edhe në mirëmbajtjen e rrugëve, por edhe në përfundimin e projekteve në të cilat për shkaqe të ndryshme, ka mundur të kenë vonesa eventuale.

Drejtori i Shërbimeve Publike, Milazim Krasniqi, tha se “janë kryer të gjitha përgatitjet për sezonin dimëror, përkatësisht, mirëmbajtjen e rrugëve dhe pastrimin e borës”, ndërsa drejtori i administratës Hajrullah Mazreku, deklaroi se drejtoria është përgatitur për ofrimin e shërbimeve komunale administrative, pasi në fund vit ka fluks më të madh të qytetarëve që kërkojnë dokumente, përkatësisht ardhja e mërgimtarëve gjatë festave të fund vitit.

Edhe drejtori i Inspektoratit, Fadil Shala, ka treguar se inspektorët komunal, janë më aktiv në këtë periudhë në kontrollimin e mallrave, përkatësisht produkteve ushqimore, pasi konsumimi i ushqimit është më i madh, prandaj të gjitha marketet dhe dyqanet, do të inspektohen vazhdimisht për afatet e përdorimit të mallrave.

Sa i përket shpenzimit të buxhetit, drejtori për buxhet Vesel Krasniqi, tha se “qëndrojnë mirë në shpenzimin e buxhetit, përkatësisht realizimin e projekteve të parapara, dhe se drejtoria është duke u përgatitur për fillimin e vitit të ri buxhetor 2017”.

Situata shëndetësore në Malishevë duket e mirë, edhe pse ka fluks më të madh të pacientëve në QKMF, për shkak të gripit sezonal. Sipas drejtorit për Shëndetësi, Hajdin Berisha, “është rritur numri i pacientëve, si pasojë e gripit, por stafi mjekësor në QKMF, është mirë i përgatitur për tu përballur me këtë fluks, ndërsa ka pak vonesa të furnizimit me barna nga lista esenciale, të cilën e bën ministria”. Drejtori Berisha, po ashtu njoftoi se është duke vazhduar projekti i vizitave sistematike shëndetësore në shkollat e Komunës së Malishevës.

Drejtoresha për kulturë, rini dhe sport, Blerta Krasniqi, njoftoi se janë drejt përfundimit të aktiviteteve që i takojnë këtyre tre sektorëve, sikur edhe drejtori i arsimit Avdi Morina, gjithashtu bëri të ditur se janë drejt përgatitjeve për përfundimin e gjysmë vjetorit të parë të këtij viti shkollor.

Sa i përket sigurisë, drejtori për Mbrojtje dhe Shpëtim, Sejdi Paçarizi, njoftoi se gjatë fundjavës janë regjistruar tri intervenime të njësisë së zjarrfikësve.

Janë arrestuar dy të dyshuar meshkuj, pasi që të njëjti janë kapur në flagrancë duke kryer vjedhje në çatinë e shtëpisë së viktimës mashkull në Suharekë

Kurse me vendim të prokurorit dy të dyshuarit janë dërguar në mbajtje, thuhet në raportin e policisë

Është arratisur ish-drejtori i Inspektoratit në Prizren, Nysret Durmishi. Ai nuk është dërguar në vuajtje të dënimit me burg, në bazë të vendimit të gjyqësorit. Policia nuk e di vendndodhjen e tij.

Zëdhënësja e Gjykatës Themelore në Prizren, Afërdita Kicaj ka thënë se kjo gjykatë i ka marrë të gjitha veprimet e duhura.

“Kemi lëshuar fletëarrest, por Policia ka deklaruar se i kërkuari nuk gjendet në territorin e Kosovës”, ka thënë Kicaj për Koha Ditore.

Ish-drejtori i Inspektoratit në Prizren, Nysret Durmishi është dënuar me tetë muaj burg efektiv nga Gjykata Themelore në Prizren.

Ai është dënuar për veprën penale të keqpërdorimit të detyrës zyrtare.

“Pala kundër vendimit të Gjykatës Themelore të Prizrenit ka bërë ankesë në Gjykatën e Shkallës së Dyt, gjegjësisht në Gjykatën e Apelit, dhe e njëjta e ka vërtetuar vendimin e Gjykatës Themelore të Prizrenit”, pat thënë ditë më parë, Kicaj, për PrizrenPress.

Sipas saj, me kërkesën e palës lënda, lënda është dërguar në Gjykatën Supreme për mbrojtjen e ligjshmërisë.

Nysret Durmishi ka qenë drejtor i Inspektoratit në mandatin e parë të Qeverisë së Ramadan Mujës.

Ai është dënuar për shkak të disa mbindërtimeve, që kanë ndodhur në kohën sa ka qenë drejtor.

Kryeprokurori i kësaj prokurorie, Sylë Hoxha, në kohën kur është ngritur aktakuza, pat sqaruar se ish-drejtori, Durmishi dhe dy punonjësit e Drejtorisë së Inspektorateve, qenë akuzuar për keqpërdorim të detyrës zyrtare apo autorizimit, për shkak të disa mbindërtimeve.

“Si persona përgjegjës në Drejtorinë e Inspektorateve kanë pasë për obligim që t’i përcjellin tejkalimet e shkeljet urbanistike. Për shkak të dyshimit të bazuar se nuk e kanë bërë këtë ndaj tyre është ngritur aktakuza dhe Gjykata pas shqyrtimit gjyqësor ka shpallur aktgjykimin”, pat deklaruar Hoxha.

Inspektorët e ndërtimit në Komunën e Prizrenit dhe drejtues të këtij dikasteri, vite më parë, i kanë mbyllur sytë përballë tejkalimeve pa leje në ndërtimin e objekteve shumëbanesore, gjë që është konstatuar nga Gjykata Themelore e Prizrenit, në tri aktgjykime të ndara.

Kësisoj janë shqiptuar tri aktgjykime fajësuese ndaj një punonjësi, një ish-punonjësi dhe një ish-drejtuesi të Drejtorisë së Inspektorateve në Komunën e Prizrenit për shpërdorim të detyrës zyrtare gjatë mbikëqyrjes inspektuese në objekte shumëbanesore në lagje të ndryshme të qytetit. Në dy rastet e para punonjësi dhe ish-punonjësi i DI-së patën pranuar fajësinë dhe qenë gjobitur me nga 4 mijë euro.

Ndërsa në aktgjykimin ndaj Nysret Durmishit, Gjykata Themelore e Prizrenit pat theksuar se ai ka kryer veprën penale të keqpërdorimit të pozitës apo autoritetit zyrtar, sepse si drejtor i Inspektorateve gjatë viteve 2009-2010 nuk i ka përmbushur detyrat e tij zyrtare, me qëllim që të përfitojë personi tjetër dobi pasurore dhe të shkelen të drejtat e personit tjetër, pasi që nuk i ka ushtruar autorizimet e tij rreth ndalimit të kryerjes së punëve ndërtimore pa leje ndërtimi, në një kompleks banesor në rrugën “Jeronim de Rada”, ashtu që investitori ndërton katin e tetë dhe të nëntë në kundërshtim me lejen ndërtimore të lëshuar nga DUPH-ja. Gjykata Themelore e pat dënuar Durmishin me tetë muaj burg, gjë që sipas zëdhënëses Kicaj është konfirmuar edhe me vendim të Apelit. Gjatë shqyrtimit gjyqësor në shkallën e parë, Durmishi pat mohuar fajësinë lidhur me këtë vepër penale.

Nysret Durmishi ka qenë drejtor i Inspektoratit në mandatin e parë të Qeverisë së Ramadan Mujës./PrizrenPress.com/

Drejtësia në Kosovë po amniston politikanët e korruptuar, dhe ata me dosje të grumbulluara, të cilëve po ua zvarritin lëndët, gjersa atyre t’u skadojë afati ligjor, në mënyrë që dikur të njëjtit të rehabilitohen dhe sistemohen diku nëpër kthinat qeveritare, të cilat janë mbushur me udhëheqës debilë e të papërgjegjshëm. Kështu të paktën kanë vlerësuar analistët dhe njohësit e fushës së drejtësisë, të cilët kanë thënë po ashtu se korrupsioni i këtij niveli dhe këtyre përmasave veç tjerash në mënyrë direkte e pengon edhe zhvillimin ekonomik të vendit, e sidomos i pengon investitorët e huaj që të vijnë dhe të investojnë në Kosovë, për shkak se investitorët e vendeve perëndimore nuk investojnë në vende ku duhet dhënë dhjetë apo njëzet për qind për ta marrë një licencë ose për të hapur ndonjë biznes. Ndaj në këtë drejtim është ngritur edhe çështja se a po amnistohen politikanët e korruptuar përmes parashkrimit të lëndëve, dhe se çfarë drejtësie po ndërton Kosova në këtë aspekt, kur politikanët që vjedhin paranë publike shpëtojnë pa ferrë në këmbë, qoftë duke i hedhur në sirtar këto lëndë apo edhe më keq, duke i parashkruar fare, derisa sot nëpër gjykata nuk kemi vendime të prera për politikanë të korruptuar, por vetëm disa hetime e aktakuza që nuk përfundojnë asnjëherë.

Dibrani: Sistemi i drejtësisë në vendin tonë ka dështuar Analisti Shefqet Dibrani në një prononcim për gazetën, “Kosova Sot”, ka thënë se tashmë është e qartë se politikanët e Kosovës e kanë kapur shtetin, kurse me Kosovën dhe pasurinë e saj po sillen sikur ta kishin pronë private, derisa, sipas tij, sot nuk ka sferë e jetës që nuk është rrezikuar, kurse drejtësia është në një gjendje të mjeruar. Sipas tij, gjendja e mjeruar është edhe në arsim dhe në siguri që është katandisur si mos më keq.

“Nëse kthejmë kokën tek zhvillimi ekonomik, Kosova është vendi më i pazhvilluar dhe me një ekonomi, që nuk i përmbush as gjërat elementare të shoqërisë, tek një gjendje aspak më e mirë nuk është as në sektorin e shëndetësisë dhe të kulturës, të cilat në mënyrën e vet janë pasqyrë e realitetit të zymtë në Kosovë. Këtyre ditëve opinioni u alarmua me publikimet e testit PISA, ku Kosovën e radhit në vendet me nivelin më të ulët arsimor në botë?! As ky rast nuk e tronditi dhe as nuk e alarmoi prokurorinë e as drejtësinë e Kosovës, për të kërkuar llogari nga përgjegjësit shtetërorë. Po vite më parë problemin në arsim e ka trajtuar gjerë e gjatë edhe gazeta “Kosova Sot”, por sigurisht ato fakte dhe dëshmi nuk paskan qenë të mjaftueshme për drejtësinë në Kosovë për t’i ushtruar kompetencat e saj në këtë fushë, për të mos lejuar kësisoj degradimin e vlerave nacionale deri në këtë masë ku ka rënë Kosova”, shprehet Dibrani.

Sipas tij, vetëm në Kosovë ndodhin anomali politike ku zyrtarët kryesorë të vendit mashtrojnë popullin e tyre, ndërsa të nesërmen ndodhin ndërtime të mureve mes për mes qytetit, dhe askush nuk merr përgjegjësi për këtë dështim, e për fat të keq edhe drejtësia po hesht. “Ajo po hesht aq shumë sa tashmë me të drejtë qytetarët dyshojnë se kupola e krimit në të gjitha sferat e dështimit është pikërisht drejtësia, e cila po dëshmohet e paaftë dhe shumë e papërgjegjshme”, është shprehur më tej Dibrani. Ai ka shtuar se të gjitha këto anomali që kanë ndodhur dhe po ndodhin për çdo ditë, sikur po amnistohen nga vetë drejtësia, e cila nuk është në gjendje ta ndalë avazin e këtij degradimi kaq shqetësues.

“Drejtësia po amniston politikanët që vjedhin, politikanët e korruptuar, politikanët e papërgjegjshëm dhe politikanët me dosje të grumbulluara, të cilëve po ua zvarritin lëndët gjersa atyre t’u skadojë afati ligjor, në mënyrë që dikur ata të rehabilitohen dhe të sistemohen diku nëpër kthinat qeveritare, të cilat janë mbushur me udhëheqës debilë dhe të papërgjegjshëm. Andaj, për rrjedhojë kjo gjendje e bën edhe më të rëndë jetën në Kosovë, pasi gjykatat nuk marrin vendime të prera dhe deri më tani nuk kanë dhënë sinjale të mjaftueshme se po nis zbardhja e krimit politik, e krimit ekonomik, dhe se do të ndodhë dënimi i politikanëve të papërgjegjshëm dhe të gjithë atyre, që janë të paaftë, ndonëse i gëzojnë gradat më të larta akademike”, theksoi Dibrani.

Sipas Dibranit, si duket sistemi i drejtësisë në vendin tonë ka dështuar, por gjendja e tillë bëhet edhe më shqetë- suese, pasi vetëdija qytetare është e ulët. “Në vende të tjera, pra edhe të rajonit kanë dhënë shembuj se ata dinë të qeverisin dhe t’ua ndalin hovin degradimeve të kësaj natyre. Por, qytetari ynë sikur nuk e di për gjendjen reale, në të cilën ndodhet sistemi i drejtësisë e bashkë me të edhe sistemi arsimor, i cili përcillet edhe me dështime të tjera në fushën e sigurisë, shëndetësor dhe segmenteve të tjera, të cilat po të ishin më mirë do ta bënin jetën e qytetarit më të sigurt dhe më të lumtur”, është shprehur analisti Shefqet Dibrani./Kosova Sot/