Vendimi i Aleancës për Ardhmërinë e Kosovës që ta braktisë Kuvendin nuk po i pëlqen deputetëve të koalicionit qeverisës. Këta të fundit po e ftojnë opozitën të rikthehet në Kuvend, siç thonë ata, për të marrë vendime historike për vendin

Partitë në koalicionin qeverisës po iu kërkojnë partive opozitare të rikthehen në Kuvend, pas njoftimit për braktisje të këtij të fundit.

Megjithëse deri më tani vetëm Aleanca për Ardhmërinë e Kosovës (AAK) zyrtarisht ka braktisur Kuvendin për një kohë të pacaktuar, një vendim të tillë janë duke e shqyrtuar edhe dy partitë tjera të opozitës së bashkuar, Lëvizja “Vetëvendosje” dhe “Nisma për Kosovën”.

Vendimi i Aleancës për të mos marrë pjesë në seancat e Kuvendit nuk po i pëlqen deputetit të partisë më të madhe në vend.

“Nëse në zgjedhje shkojmë kështu, me dhunë, me procese të dhunshme e të njëanshme, atëherë kjo nuk do t’i shërbejë askujt dhe as qytetarëve të vendit tonë. Unë personalisht mendoj se opozita nuk duhet të ngutet me një vendim të tillë.

Të kthehen, ‘jo të normalizojnë’ funksionimin e Kuvendit, por ata të kthehen që të kontribuojnë në normalizimin e zhvillimit të vendit”, ka thënë për “Zërin” deputeti i PDK-së, Zenun Pajaziti.

Nisma për Kosovën ka thirrur një konferencë për media për sot, siç thuhet në njoftim, për të zbuluar një skandal të Kuvendit të Kosovës, që përfshinëMinistrinë e Financave së bashku me Presidencën dhe që ka të bëjë me shkeljet ligjore në plotësim-ndryshimin e Ligjit për Menaxhimin e Financave Publike dhe Përgjegjësitë.

“Nisma për Kosovën thërret konferencë për medie, (Tema: skandali i Kuvendit të Kosovës në lidhje me shkeljet ligjore në plotësim-ndryshimin e Ligjit për Menaxhimin e Financave Publike dhe Përgjegjësitë), i zbuluar nga NISMA për Kosovën”, thuhet në njoftim.

Sipas Nismës, në këtë skandal janë të përfshirë Ministria e Financave, Kuvendi, Kryetari i Kuvendit, Administrata e Kuvendit dhe Presidenca.

“Nisma për Kosovën ka bërë gati të gjitha dëshmitë që do t’u përcillen mediave të interesuara. Konferenca do të mbahet nesër (e shtunë, 12 mars 2016), në orën 14:00, në selinë qendrore të Nisma për Kosovën, në Prishtinë”, thuhet në komunikatë.

Donika Kadaj-Bujupi ka bërë të ditur se pas bojkotimit të Kuvendit opozita do të organizohet në terren, siç ka thënë ajo, për t’i dhënë fund këtij regjimi. Sipas saj, protesta e 26 marsit do të jetë më e madhe që është organizuar ndonjëherë në Prishtinë, përderisa kundërshtimi opozitar do të vazhdojë deri në rënien e Qeverisë.

Shefja e deputetëve të Aleancës për Ardhmërinë e Kosovës, Donika Kadaj-Bujupi, thotë se trajtimi fyes, i padrejtë dhe ç’njerëzor ndaj deputetëve të opozitës, të cilët kishin kurajën të viheshin në mbrojtje të Kushtetutës së Republikës së Kosovës, janë disa nga arsyet pse konsiderojnë se legjislativi e ka humbur legjitimitetin dhe se opozita nuk do të vazhdojë të jetë pjesë e tij.

Këto komente Kadaj-Bujupi i ka bërë gjatë një interviste për gazetën “Zëri”, duke shtuar se më 26 mars 2016 do të organizohet protesta më e madhe nga opozita në Prishtinë.

“Protestë paqësore, ku qytetarët do të kundërshtojnë regjimin. Kundërshtimi do të vazhdojë deri në rënie sepse Kosova është vend demokratik, është Evropë dhe ngufatja e tillë nuk mund të zgjasë”, ka bërë të ditur nënkryetarja e AAK-së./Zëri/

Në sallën e Kuvendit Komunal të Rahovecit, sot u mbajt debat me qytetarë për Planin e Veprimit për Transparencë dhe Rregulloren për Transparencë. Qëllimi i mbajtjes së këtij debati ishte që të debatohet për dy dokumente të cilat janë të një rëndësie të veçantë për transparencë dhe llogaridhënie në Komunën e Rahovecit.

Rregulloren për Transparencë e prezantoi drejtori i Administratës së Përgjithshme në Komunën e Rahovecit, Sali Sallteku, i cili tha se Rregullorja e deritanishme ishte miratuar nga Kuvendi i Komunës së Rahovecit me 2 prill të vitit 2013, ndërsa me datë 12.07.2013 është nxjerrë Udhëzimi Administrativ, për Transparencë në komuna, e që rregullorja e deritanishme është në kundërshtim me një sërë nenesh.

“Prandaj duke u bazuar në Ligjin për Vetëqeverisjen Lokale, Udhëzimit Administrativ, Nr. 01/2015 për Transparencë në komuna, të hartuar nga Ministria e Administrimit të Pushtetit Lokal, të datës 12.07.2013, ka lindur nevoja për hartimin e këtyre akteve juridike, të cilat do të vihen në funksion të zbatimit sa më të lehtë të transparencës dhe llogaridhënies në Komunën e Rahovecit”, tha Sallteku.

Planin e Veprimit për Transparencë u prezantua nga shef i kabinetit të kryetarit të Komunës së Rahovecit, Haziz Krasniqi, i cili tha se qëllimi i këtij Draft-Plani është promovimi dhe avancimi i transparencës së organeve të Komunës së Rahovecit dhe administratës komunale në informimin efektiv të qytetarëve dhe grupeve tjera të interesit, që kanë të bëjnë me aktivitetet e ndërmarra për ushtrimin e kompetencave.

“Draft-Plani i Veprimit për Transparencë në Komunën e Rahovecit ka për synim t’i ofroi publikut qasje në monitorimin dhe zbatimin e publikimit të akteve të Komunës dhe aktiviteteve tjera, duke përfshirë edhe menaxhimin e financave dhe prokurimin publik, si dhe përgjegjësive të tjera që ndërlidhen me interesin e publikut”, tha Krasniqi.

Në lidhje me të dy dokumentet të cilat lidhën me transparencë dhe llogaridhënie në Komunën e Rahovecit foli Kadri Dellova, kuvendar në Kuvendin Komunal të Rahovecit, i cili tha se të dy dokumentet kanë kaluar edhe nëpër mbledhjen e mbajtur në muajin janarit 2016.

“Konsideroj se të dy dokumentet janë dokumente mjaftë të rëndësishme për transparencë dhe llogari dhënie nga ana e Komunës së Rahovecit”, tha Dellova. /PrizrenPress.com/