Grupi për monitorimin e rekomandimeve të dhëna nga Zyra e Auditorit të Përgjithshëm (ZAP) për vitin 2015, ka mbajtur të premten mbledhjen e dytë të radhës.
Në takim, përveç anëtarëve të grupit për monitorimin e rekomandimeve, kanë marrë pjesë edhe zyrtari për regjistrimin e aseteve, kryesuesit e komisioneve për regjistrimin inventarizimit të pasurive jofinanciare komunale dhe kryesuesi i Komisionit për vlerësimin e pasurisë jo financiare komunale. Lulzim Sylejmani, drejtor i Drejtorisë për Buxhet dhe Financa dhe kryesues i Grupit për monitorimin e rekomandimeve të dhëna nga ZAP-i, ka kërkuar nga zyrtari për regjistrimin e aseteve dhe kryesuesit e komisioneve që të raportojnë se deri ku kanë shkuar me regjistrimin e aseteve dhe pasurisë komunale. Drejtori Sylejmani u ka thënë kryesuesve të komisioneve dhe zyrtarit të regjistrimit të aseteve që t’i njoftojnë me kohë anëtarët e grupit për monitorimin e rekomandimeve, në rast të ndonjë ngecje në kryerjen e punës së tyre.

Avdullah Kryeziu, drejtor i Drejtorisë për Ekonomi, Zhvillim dhe Turizëm, anëtar i grupit për monitorimin e rekomandimeve të dhëna nga ZAP-i, ka thënë se “pas marrjes së raportit final nga ZAP-i, me kërkesë të kryetarit, kemi formuar dy komisione – atë për regjistrimin inventarizimin e pasurive jo financiare komunale dhe komisionin për vlerësimin e pasurisë jo financiare komunale”. “Pas formimit të këtyre dy komisioneve, në vazhdimësi jemi duke u marrë me të gjeturat e ZAP-it dhe të dy komisionet po ashtu edhe zyrtari për regjistrimin e aseteve komunale është duke e bërë një punë të mirë që besoj që kjo punë e tyre do të ketë edhe rezultat”, ka thënë ai.

Për regjistrimin e aseteve komunale ka folur Asllan Mazreku, zyrtar përgjegjës për regjistrimin e aseteve, i cili ka thënë se “është duke u vërejtur që komisionet janë duke punuar dhe këto komisione, kanë filluar të sjellin edhe materiale dhe deri në fund të vitit mund të them se do të kemi një pasqyrë shumë më të mirë sa i përket regjistrimit të pasurisë komunale”.

Esat Hoti, kryesues i komisionit për vlerësimin e pasurisë jo financiare komunale, është shprehur se pas marrjes së vendimit për emërimin në këtë komision, të gjithë anëtarët e komisionit e kanë filluar punën. “Besoj se angazhimi ynë si grup do të këtë edhe rezultatet e veta”, ka theksuar ai.
Ekrem Bytyqi, kryesues i komisionit për regjistrimin inventarizimin e pasurive jofinanciare komunale, ka thënë se “deri më tani mund të them se është bërë rreth 90 % e këtij regjistrimi dhe shumë shpejtë, si kryesues i këtij komisioni, do të dalim edhe me raportin final”. “Numri total i inventarit të regjistruar deri me tani është 3958, 247 janë jashtë përdorimit, kurse 3711 janë në përdorim”, ka deklaruar ai.

Qamil Sylka, anëtar i komisionit për vlerësimin e pasurisë jofinanciare komunale ka thënë se pas fillimit të përdorimit të programit e-pasuria, është duke u bërë komunikimi i mirë me zyrtarin për regjistrimin e aseteve, pasi në mënyrë i elektronike i dërgohen të dhënat këtij zyrtari.

Kryetari i ri i OVL-UÇK-së, Hysni Gucati, më të marrë këtë post është shprehur se listën e veteranëve e ka fryrë vetë Qeveria, e jo komandantët apo organizatat e dala nga lufta. Ai tha se qeveritarët kanë sjellë mbi 3 mijë emra për t’i bërë veteranë, për të cilët Gucati pati thënë se nuk e dinë ku kanë qenë në luftë.

Rexhep Selimi, deputet nga radhët e Vetëvendosjes, njëherit dhe ish luftëtar i UÇK-së thotë se Komisioni për verifikimin e listave është komision qeveritar, por përbërja e atij komosioni është nga njerëz me përgjegjësi të tanishme, por edhe të dikurshme në hierarkinë e UÇK-së.

Dhe sa i përket deklaratës së kryetarit të OVL-UÇK-së, për çështjen e “fryerjes” së listave të veteranëve, Selimi tha se i vjen mirë që kanë filluar edhe organiztat e tilla të merren me këto lista.

“Më vjen mirë që kryetari i sapozgjedhur e ka identifikuar si problem të madh fryerjen e listave. Mirëpo ai e ka rastin tani që të reagojë dhe të veprojë”, ka thënë ai për InfoPress.

Ai po ashtu thotë se në pothuaje me ligjin aktual kryetari mund të jetë shembulli më i mirë se si bashkëpunohet me drejtësinë, duke i denoncuar për vepër penale kushdo që ka dëshmuar rrejshëm dhe përfiton paligjshëm nga statusi i veteranit apo invalidit të luftës.

“Sa i përket ligjit për veteranët e UÇK-së, patjetër që ka nevojë për amandamente ashtu siç në kohën e procedimit ne i kemi dhënë vërejtjet dhe sugjerimet tona. Deri atëherë mund të fillojë pastrimi i listave edhe në përputhje me ligjin aktual”, nënvizoi Selimi për Gazetën InfoPress.

Shemsi Syla njëri nga anëtarët e komisionit për verifikimin e listave, të Zonës Operative të Karadakut,dha dorëheqje nga kjo pozitë për arsye se ishte i pakënaqur me procesin e verifikimit të listave,e cila sipas tij kishte deformime, zvarritje e neglizhencë.

Syla në deklaratën e tij kishte pati thënë se po terhiqet nga ky proces për shkak se ky i fundit e kishte parë të pamundur mbajtjen e premtimit që e kishte bërë se do t`i përmirësonte të gjitha gabimet në lista, dhe nuk do t`i hynte në hak askujt.

“Edhe pse nuk jam pajtuar me daljen e atyre listave, atëherë kam marrë përgjegjësi, jo vetëm si anëtar i komisionit, por mbi të gjitha edhe si organizator dhe drejtues i luftës, në pozitën e ish-zëvendëskomandantit të Zonës Operative të Karadakut. Por, duke e parë të pamundur realizimin e këtij premtimi, detyrohem që tani e tutje të mos jem më pjesë e këtij procesi”, kishte thënë Syla

Syla thotë për Infopress se përkrah ligjin për vlerat e luftës së UÇK-së, edhe pse dihet se ky ligj ka mangësi, paqartësi e edhe lëshime e gabime, por thotë se ka shpresuar se me angazhim ato do të tejkalohen e korrigjohen me akte nënligjore, gjë që nuk ka ndodhur. Këtë proces sipas Sylës nuk e rrezikon vetëm ligji i paqartë, por edhe qasja joadekuate në mënyrën e verifikimit nga ana e atyre që kanë pasur për obligim ta bëjnë një gjë të tillë.

“Unë nuk besoj se kjo qeveri dhe kjo klasë politike do të veprojë , sepse ata janë fajtorët e këtyre shkeljeve. Ata e kanë të kapur edhe prokurorinë edhe drejtuesit e ligjit sot në Kosovë, vetëm pas rrezimit të kësaj qeverie dhe ardhjes në pushtet të një qeverie parimore mund të anulojë si të tërë këtë verifikim dhe pastaj te krijojë komision të besueshëm dhe zbatues te ligjit me përpikeri”, ka thënë ai për InfoPress.

Përfaqësuesi i organizatave të dala nga lufta e Ushtrisë Çlirimtare të Kosovës (UÇK), Xhavit Jashari, tha se procesi i verifikimit është proces që ende nuk ka përfunduar,dhe sipas tij po shihet që nuk do përfundojë njëherë. Ai për këtë gjë thotë se fajtor në njëfarë mënyre është Qeveria, e cila nuk po merret më seriozisht me këtë çështje dhe nuk po e përshpejton këtë proces duke u mbështetur në Ligjin për Veteranët e UÇK-së.

“Qeveria është ajo që obligohet me ligj që të zbatojë të drejtat e këtyre kategorive dhe ta zbatojë në përpikmëri ligjin për vlerat e luftës,dhe të mos ndërhyjë as në lista e as në proceset tjera të Komisionit Verifikues të listave të Veteranëve të UÇK-së”, thekson Jashari për InfoPress.

Akademik Rexhep Qosja ka folur për debatin e fundit që është krijuar si pasojë e pjesëmarrjes së kryeministrit të Shqipërisë, Edi Rama, në Forumin e Sigurisë në Beograd, ku ai ka dhënë disa deklarata për Kosovën dhe të cilat pastaj janë komentuar në mënyra të ndryshme në Prishtinë dhe Tiranë.

Në një intervistë dhënë për gazetën “Epoka e re”, Qosja i ka vlerësuar pozitivisht deklaratat e Ramës në Beograd për Kosovën. “Nuk ngurroj të them se fjalimet e Edi Ramës në Beograd me nivelin e tyre janë leksione politike dhe intelektuale për klasën politikë serbe. Kjo e vërtetë e nderon politikën shqiptare në përgjithësi”, ka thënë Qosja.

Sipas Qosjes, kryeministri Rama me deklaratën e tij në Beograd ia tha Serbisë dy të vërteta të mëdha. “Me atë deklaratë kryeministri Edi Rama, me dhuntinë e tij krijuese, ia tha Serbisë dy të vërteta të mëdha, shumë të mëdha: e para, i tha Serbisë se Trepça është resurs i madh, tepër i madh, natyror, që kurrsesi, me kurrfarë mjetesh, nuk mund të nxirret prej vendit natyror, gjeografik, ku gjendet prej Kosovës dhe, e dyta, se Kosova është shtet i pavarur dhe më vete, që vendos vetë, pavarur, për të gjithë dhe të gjitha, që janë në hapësirën e saj gjeografike, njerëzore e shtetërore”, është shprehur Qosja.

Ndaj paraqitjes zyrtare të Edi Ramës në Beograd dhe në Nish, pati shumë reagime të zyrtarëve, të medieve dhe të individëve të ndryshëm në Prishtinë dhe Tiranë por, sipas akademik Qosjes, “për shumëkënd këto reagime në Prishtinë e në Tiranë mund të jenë befasi e madhe, e papritur e madhe”. “Si është e mundur që komunikimi midis Prishtinës e Tiranës, qoftë intelektual qoftë politik, të çoroditet, të degradojë, të fundoset deri në atë shkallë?”, ka thënë ai.

Kurse reagimin e ministrit të Punëve të Jashtme të Kosovës, Enver Hoxhaj, akademik Qosja e ka quajtur të mjerueshëm. “Mjerisht, një mijë herë mjerisht, Kosova nuk mund të quhet, ashtu si e quan Ministria jonë e Jashtme, ‘shtet i pavarur, sikurse çdo shtet tjetër në rajon’. Po të ishte shtet i pavarur, si çdo shtet tjetër në rajon, nuk do të ndodhte që në institucionet administrative, arsimore, kulturore e të tjera të komunave serbe në Kosovë të mos ketë simbole shtetërore të shtetit të Kosovës! Po të ishte Kosova shtet i pavarur si çdo shtet tjetër në rajon, nuk do të ngrihej përmendorja madhështore e car Lazarit në Mitrovicën Veriore me gisht të ngritur në shenjë pushtimi ndaj Kosovës! Po të ishte Kosova shtet i pavarur si çdo shtet tjetër në rajon, nuk do të ndodhte që edhe në disa zyra në Prishtinë a në ndonjë komunë tjetër të mos vihej fotografia e kryetarit të Kosovës po të viheshin fotografi të kryetarit të dikurshëm partiak! E të tjera, e të tjera”, ka deklaruar Qosja.

Duke iu referuar deklaratave të Edi Ramës, Qosja ka thënë se kjo është e drejtë natyrore dhe politike e popullit shqiptar të Shqipërisë për t’u interesuar për vëllezërit e vet në Kosovë dhe kudoqofshin. Ai ka theksuar se prej përfundimit të luftës çlirimtare në Kosovë, Shqipëria ka bërë dhe vazhdon të bëjë shumë punë për Kosovën, për njohjen e saj shtet i pavarur e më vete, për pranimin e saj në organizata e në institucione të ndryshme ndërkombëtare. “Reagimet në Prishtinë, ndaj paraqitjes së kryeministrit Edi Rama në Serbi dhe një pjesë e reagimeve në Tiranë, ndaj këtyre reagimeve në Prishtinë, në të vërtetë janë shprehje e një provincializmi në të dy anët e kufirit, që tingëllojnë si përçarje. E provincializmi i bënë viktimat e tij ta shohin vetëm veten! Dhe, provincializmi i bënë viktimat të shohin vetëm sa mund të shohin ata: deri te kthesa e parë. Fatkeqësisht, klasa e sotme politike shqiptare, shumë më tepër se për jetën e popullit, po mendon për interesat e veta”, ka thënë Qosja.

Qosja në këtë intervistë ka folur edhe për çështjen e demarkacionit me Malin e Zi dhe asociacionin e komunave me shumicë serbe.

Akademik Qosja e ka komentuar edhe iniciativën e presidentit Hashim Thaçi për zbardhjen e krimeve gjatë dhe pas luftës. “Kërkesa e Hashim Thaçit “për t’u zbardhur, si e thatë ju, të gjitha krimet gjatë dhe pas luftës”, është përsëritje e kërkesave me qindra herë të përsëritura gjatë 16 vjetëve të shkuara të Lidhjes Demokratike të Kosovës dhe të gazetës së saj “Bota sot”. Prej se është bërë kryetar i Kosovës, jo vetëm me këtë kërkesë, jo vetëm me ato katër letra, Hashim Thaçi kur e kur po paraqitet njëkohësisht si kryetar e si kryeministër, kurse tani në fund, edhe si Prokurori e Gjykatë e Kosovës! Por, a duhet a jo të paraqitet Hashim Thaçi me të gjitha këto kompetenca është e drejtë e çdo intelektuali, prandaj edhe e imja ta them si një intelektual i angazhuar, por është obligim ligjor ta thonë sidomos ata që janë zgjedhur për të gjykuar për zbatimin e drejtë e për shkeljet e Kushtetutës së Kosovës”, ka thënë akademik Rexhep Qosja. /Epoka e re/

Dyshimi i ngritur së fundi nga deputeti i LDK-së, Anton Quni, deputet i Lidhjes Demokratike të Kosovës në këto dy mandatet e fundit dhe ish-epror i UÇK-së, sipas të cilit presidenti i tanishëm ivendit, Hashim Thaçi, mund të jetë një dëshmitar kyç i ofrimit të të dhënave sa u takon vrasjeve politike të pasluftës, pasi që ai ka pasur njohuri edhe për funksionimin e disa shërbimeve të zbulimit dhe kundërzbulimit në vend gjatë asaj periudhe kohore, për analistët politikë dhe njohësit e fushës së sundimit të ligjit duhet të merret në konsideratë,shkruan gazeta Kosova Sot.

Sipas tyre, paraqitet edhe si nevojë e domosdoshme inicimi i procesit hetimor për rolin që ka pasur SHIK-u, qoftë gjatë dhe pas periudhës së luftës. Deputeti Adem Salihaj, nga LDK-ja, konsideron se bashkëpartiaku i tij nuk ka thënë diçka shumë të re, por vetëm sa është shpalosur edhe një herë para opinionit një e vërtetë që nuk mund të fshihet, e për të cilën duhet të japin llogari të gjithë ata që kanë qenë pjesë e asaj strukture, kanë qenë të afërt me ato struktura dhe kanë pasur e vazhdojnë të kenë edhe sot informacione për fushat dhe mënyrat e operimit të saj. Salihaj thotë se Hashim Thaçi nuk mund të jetë vetëm dëshmitar, por edhe përgjegjës kyç për ato vrasje që kanë ndodhur para15-16 vjetësh.

Salihaj drejton gishtin nga presidenti

Sipas Salihajt, SHIK-u nuk i zbulon vrasjet që i ka kryer vetë. “Hashim Thaçi nuk mund të jetë dëshmitar, ai është përgjegjës për shumicën e vrasjeve politike që janë kryer gjatë luftës dhe pas saj në Kosovë. Sa për hetim të SHIK-ut nga Parlamenti, tash për tash nuk ka mundësi, sepse nuk mund të sigurohen votat, por do të vijë koha kur do të hapet edhe në Parlament çështja e organizatës kriminale SHIK dhe të gjithë ata që e kanë krijuar dhe udhëhequr do të dënohen politikisht dhe para drejtësisë. Derisa të mos e bëjmë këtë ne nuk do të jemi një shtet i mirëfilltë, në të cilin sundojnë rendi dhe ligji”, tha Adem Salihaj për “Kosova Sot”. Si dëshmitar kyç e sheh rolin e tij në procesin hetimor edhe eksperti për çështje të sundimit të ligjit, Blerim Burjani. Mirëpo jo vetëm Thaçi, por, sipas Burjanit, krahas tij duhet të dëshmojë edhe vetë Kadri Veseli, si drejtues i SHIK-ut.

“Thaçi do të jetë njëri nga dëshmitarët që do të deklarohet për informata që eventualisht mund të ketë para Gjykatës Speciale, pra mund të jenë me gjasë shumë dëshmitar. Kjo gjykatë mund ta ftojë madje edhe Veselin në cilësi të dëshmitarit të ndërlidhur me punën e tij në këtë shërbim. SHIK-u ka funksionuar dhe ka pasur raporte të ngushta me disa shtete dhe ka punuar edhe me sektorë të sigurisë jashtë Kosovës”, tha Burjani për “Kosova Sot”.

Kelmendi: Thaçin e bënë lider shërbimet sekrete

Domosdoshmërinë për të qenë dëshmitar kyç për vrasjet politike të pasluftës presidentin Thaçi e sheh si të arsyeshme edhe eksperti i shkencave të sigurisë Jeton Kelmendi. “Po, është e vërtetë se Thaçi mund të ketë qenë i lidhur me shërbimet e ndryshme inteligjente, madje edhe producent i shërbimeve informative, sepse niveli intelektual i tij nuk i lejonte këtij, Hashim Thaçit, që të bëhej lider ndryshe, sikur mos ta mbështesnin shërbimet inteligjente.

Bllaca e Suharekës është një fshat i bukur dhe piktoresk, por është edhe fshati i trimërive të shumta. Kur flasim për Bllacën, menjëherë ky emër të kujton Ramë Bllacën, figurën emblematike, që ishte këmbëngulës që mos të lëshohen trojet tona e të shkohet në Anadoll të Turqisë. Historiani Demir Zekolli shprehet se është tashmë e njohur nga të gjithë figura frymëzuese e patriotit të madh, Ramë Bllaca, që me fjalën, punën e veprën e tij mbajti gjallë shpresën e shqiptarëve, frymëzoi shqiptarët për të mos e lëshuar Kosovën, për të mos ua dhënë Kosovën serbëve.”Po ashtu është e njohur dhe e vlerësuar sakrifica e pashembullt e Qazim Bllacës, që e shkriu rininë e tij në kohën e komunizmit nëpër burgje e internime në Kosovë dhe Shqipëri. Pastaj atje domosdo të kujtohet rapsodi më i madh i këngëve shqipe, Riza Bllaca, për të cilën në vitin 1974 Instituti Albanologjik i Kosovës dhe ai i Tiranës për tri ditë mezi arritën t’i marrin të gjithë opusin e këtij rapsodi të pavdekshëm”, shpjegon për “Kosova Sot” historiani Demir Zekolli.

Bllaca, me histori të lashtë Studiuesi tjetër, Jusuf Osmani, shprehet se gjurmët e vendbanimit të këtij fshati shtrihen thellë në lashtësi, derisa në dokumentet e shkruara e hasim në ato të periudhës osmane. “Bllaca është fshat në komunën e Therandës, që shtrihet rreth 8 km në veri të saj. Me emrin Blladqi përmendet në defterin kadastral të vilajetit të vitit 1455, me 34 shtëpi. Jeton popullsia autoktone shqiptare. Sa i përket numrit të banorëve, sipas shënimeve të konsullit rus, Jastrebovit, rreth vitit 1879 kishe 60 shtëpi, të gjitha shqiptare”, na thotë Osmani. Sipas tij, kjo përputhet edhe me deklarimet e Mahmut Sherif Fangut. Sipas këtij të fundit, Munish Dërguti në vitet 1875-1948 dëshmonte se në kohën e tij fshati Bllacë kishte 60 shtëpi, të gjitha të mbuluara me kashtë, kurse në fund të shekullit XIX kishe 100 shtëpi. Ndryshe, në regjistrimin e vitit 1913 fshati kishe 1052 banorë. “Para se të flasim për arsimin në Bllacë, që është i pandarë me historinë e arsimit të Duhles, duhet të themi dy fjalë për historinë në tërësi. Por, gjithsesi, ngado që ta nisim, çfarëdo që të themi, ne nuk mund të dalim askund dhe nuk do të bëjmë dot asgjë, nëse nuk e fillojmë e mbarojmë me figura të tilla si Fetah Bllaca, pjesëmarrës i Lidhjes Shqiptare të Prizrenit e i shumë kuvendeve shqiptare, Ramë Bllaca, Qazim Bllaca e Asllan Fazlia”, shprehet Jusuf Osmani.

Zekolli thotë se Bllaca ka toponime shqipe dhe gjetje të rëndë- sishme arkeologjike Duke folur për “Kosova Sot”, historiani Demir Zekolli shpjegon edhe faktin se Bllaca si lokalitet i moçëm ka toponime tërësisht shqipe. “Nisur nga lagjet ku ato janë lagjja “Fangu”, lagjja “Suka”,”Lumi”, Guraziu: etj. Këto flasin për toponime kaq autoktone, por edhe toponimet tjera kanë frymë të shqipes, p.sh. “Shëngjina”, që është një toponim se këtu ka pasur festime të lashta, pastaj edhe “Ara e Mihalit”, që dëshmojë se ka një lashtësi të vjetër ky lokalitet. Kurse në fshat brenda ka një vend të gjetjeve arkeologjike “Bregishta”, që flet për kohën e periudhës dardano-ilire. Kjo e bën një lokalitet të rëndësishëm të historisë së fshatit Bllacë”, tregon Zekolli.

Fshati me 800 familje, mbi 25 për qind prej tyre me vendbanim jashtë atdheut Si në të gjitha fshatrat tashmë të Kosovës, edhe në fshatin Bllacë të Therandës për fat të keq kurbeti është bërë pjesë e jetës. Kështu nga ky fshat janë mbi 25 për qind e banorëve që jetojnë jashtë, si në Itali, Gjermani, Zvicër dhe shtete të tjera. Ne arritëm të kontaktojmë me Fatmir Zekollin, tashmë në Itali. ‘Po, unë është e vërtetë se me gjithë familjen time, me bijtë e mi, jam në Itali. Por, më duhet të them se atje kam ndërtuar shtëpi të reja. Kurdo që të kthehemi atje e kemi jetën dhe bazën tonë në Bllacë. Atdheu nuk paguhet me asgjë”, na thotë Fatmiri. Ndërsa, historiani Demir Zekolli shprehet se gjithkund në Kosovë, edhe në këtë fshat, po dëmtohet shumë trashëgimia kulturore. Sipas tij, Bllaca ka nxjerrë njerëz të shquar.”Është vend që ka ditur të luftojë kundër Perandorisë turke, kurse “Qafa e Duhles” njihet si vend ku janë mundur ushtritë pushtuese. Bllacjanët kanë luftuar kundër turqve, bullgarëve dhe serbëve”, na thotë Zekolli. Sipas tij, bllacjanët morën pjesë dhe sakrifikuan në luftën Antifashiste Nacional-Çlirimtare për të larguar pushtuesit e huaj, derisa shumë bllacjanë humbën jetën në Tivar. Edhe në luftën e fundit kundër Serbisë ranë shumë dëshmorë në këtë fshat, si: Imer Krasniqi (1957- 1998) nga Carralluka e Malishevës, Bislim Zekolli (1953-1998), Mehmet Lumi (1969-1999), Shaban Iballi (1971-1999), Sahit Tixha nga Arbana e Prizrenit, nip Bllace (1974-1999), Sadri Guraziu (1980-1999), Kadri Qollaku (1981- 1999), Salih Kermeni (1983-1999). Për çdo vit, këta dëshmorë përkujtohen më 7 qershor, në lagjen Sukaj, ku prehen edhe emrat e tyre në lapidarin e lirisë. Por, tash fshati është plot jetë dhe në të mësojnë 700 nxënësit e shkollës fillore

(Kosova Sot)