Nënkryetari i Komunës së Prizrenit, Lulzim Kabashi,para një grupi të zejtarëve të qytetit ka bërë të ditur se ai dhe kryetari Ramadan Muja nuk kanë koordinim të duhur për zbatimin e politikave publike.

Sipas tij, në një situatë të tillë të mungesës së bashkëpunimit të duhur edhe llogaridhënia brenda Ekzekutivit lokal ka qenë në nivel shumë të ulët. Ka pranuar se Prizreni nuk e ka merituar një qeverisje të tillë, shkruan sot “Koha Ditore”.

Për këtë arsye ka vlerësuar se kjo komunë ka nevojë për një lidership më të mirë. E në këtë drejtim ka marrë edhe përkrahjen e kryetarit të AAK-së, Ramush Haradinaj, i cili ka theksuar se nëse ndryshimi e zhvillimi ndodhin në Prizren atëherë ato shtrihen edhe në nivel vendi.

Paraprakisht nënkryetari Kabashi ka pohuar se në postin që mban ka pasur kufizime për veprim, ngase ligji nuk i jep ndonjë kompetencë të caktuar.

Medveci i Prizrenit ka ndryshuar shumë. Dikur jo larg atje kishte kultivues të njohur të rasteve të specave, domateve dhe perimeve të tjera. Mirëpo, mosha e re pak po merret me këtë veprimtari. Kryetari i këtij fshati, Qemajl Krasniqi, flet me admirim për një kohë, kur ishte e vështirë mbijetesa dhe kur nga bujqësia jetohej e përfitohej mjaft. Banorët e këtushëm njiheshin për kultivimin e hershëm të rasateve, pastaj herët nxirrnin pjepra e shalqinj, të cilët i kultivonin më sera improvizuese. Tani më vetëm 20 për qind e popullsisë merret më këtë veprimtari, ndërsa dikur angazhohen rreth 80 për qind e banorëve që fitonin bukën nga bujqësia.

Krasniqi tregon se kanë mbetur vetëm dy lagje që kultivojnë perimtarinë. si lagjet ‘Elshani’ dhe ‘Krasniqi’. Fshati Medvec shtrihet në veriperëndim të Prizrenit, gjegjësisht në kilometrin e 14-t të rrugës PrizrenPiranë-Mamushë. Ky lokalitet ka rreth 200 shtëpi dhe 1800 banorë. “Ky vendbanim daton qysh herët dhe kryesisht në të kaluarën është njohur si lokalitet i rritjes dhe kultivimit të bletarisë, mese 90 për qind e fshatit ishin bletarë dhe vetë emërtimi i këtij lokaliteti ka marrë këtë emër “med”- mjaltë. Fshati Medvec, përveçqë njihet si prodhues i dikurshëm i mjaltit, njihet edhe si lokalitet me rritjen dhe prodhimin e kulturave bujqësore, sepse ka një tokë shumë pjellore”, shprehet Krasniqi, shkruan gazeta Kosova Sot.

1/4 e popullsisë të këtij lokaliteti është larguar

Sipas Krasniqit, në të kaluarën, si në shumë lokalitete tjera, ashtu edhe në këtë lokalitet, ka pasur dëme nga luftërat dhe regjimet e ndryshme. “Duhet theksuar se me dhjetëra burra nga ky lokalitet kanë mbetur të vrarë në Bar-Tivar. Pastaj gjatë kohës së dorëzimit të pushkëve të viteve 50-ta janë rrahur barbarisht shumë burra të këtij lokaliteti. Gjatë viteve 80-ta një numër i konsiderueshëm i të rinjve morën pjesë në demonstrata ishin studentë të asaj kohe. Gjithashtu nga ky vendbanim, ka qenë aktiv një grup, i cili për çdo ditë është marrë me shkrimin e parullave në shumë lokalitete. Për shkak të gjendjes së rëndë ekonomike dhe politike, nga ky lokalitet u larguan një numër i madh i popullsisë. Që nga ajo kohë e deri tani, më se 1/4 e popullsisë të këtij lokaliteti punon dhe jeton në botën e jashtme, kryesisht në Zvicër, pastaj Gjermani, Itali, Austri, Slloveni, Angli, SHBA, Kanada”, është shprehur ai.

“Agrarët” më të shquar, nxënësit e këtij fshati

Pas luftës, si gjithkund tjetër, edhe në këtë lokalitet nisi një jetë e re. Me fillimin e investimeve komunale ky fshat në fillim përfitoi projektin e ndërtimit të disa shtëpive, riparimin e objektit të shkollës fillore, pastaj ndërtimin e projektit të kanalizimit, ujësjellësit, me vetëkontribut ndërtoi xhaminë e fshatit, më vonë filluan edhe shumë projekte tjera si: ndërtimi i shkollës se re, ndërtimi i urës dhe murit mbrojtës të lumit. “Ndërtimi i sheshit në qendër të fshatit, ndërtimi i lapidarit për ish-ushtarin e UÇK-së, Mirshit Krasniqi, ndërtimi i rrugëve të fshatit me elemente betoni, ndërtimi i Ambulancës. Ndërtimet e Qendrës rekreative sportive, e vetme e këtij lloji në rajon, janë projekte të pasluftës”, shprehet Krasniqi. E disa projekte të tjera me përmasa të vogla janë bërë falë angazhimit në punë të banorëve përmes tolerancës, mirëkuptimit dhe bashkëpunimit mes veti si lokalitet dhe me institucionet shtetërore.”Dukuri e veçantë e këtij lokaliteti është se kur është në pyetje interesi i këtij lokaliteti pak rëndësi kanë partitë politike”, tregon Krasniqi për gazetën “Kosova Sot”. Njëri ndër banorët e këtij fshati, Feim Kastrati, shpjegon se fshati ka ecur sa u përket ndërtimeve të reja, këtu tani mbi 80 për qind kanë ndërtuar shtëpi të reja.”Por, bujqësia është mjaft përfituese, por koha ka dërguar shumë djem të këtij fshati në kurbet, ku tani më numri i tyre është mbi 200 kurbetçinj. Edhe ata që merren me bujqësi, nuk kanë ngelur mbrapa materialisht, sepse toka këtu është e pëlleshme. Por, vreshtat e këtushëm dikur ishin të njohur, por tani ka ndërruar ky raport”, pohon Kastrati. Drejtori i shkollës së mesme të ulët në këtë fshat, “Brigada 125”, Hamëz Krasniqi, pohon se “agrarët” më të dalluar të fshatit kanë mbetur nxënësit e këtij fshati. Shkolla ka 280 nxënës të cilët kryesisht kanë mbetur “bujq të arave”, ngase të tjerët janë pakësuar dhe kanë marrë rrugën e kurbetit, pohon edhe drejtori Krasniqi.

(Kosova Sot)

Deputeti Shaip Muja vlerëson se Kosova tash e 18 muaj nuk qeveris me vetveten. Nëse vazhdohet me këtë gjendje, ai i sheh zgjedhjet e parakohshme si rrugëdalje nga kjo situatë.

Në një intervistë për emisionin Fakt Plus me Leotrim Berishën në Tribuna Channel, Muja ka thënë se problemi me demarkacionin është bërë për të mos u marr me problemet reale të cilat i ka Kosova.

“Edhe kjo forme e mos qeverisjes se vetvetes e sjell domosdoshmërinë nevojën për të kërkuar zgjedhje të parakohshme”, ka thënë Muja.

Zyrtari për paga dhe pagesa i Komunës së Rahovecit, Hasan Hoti, akuzohet se pagoi me mjetet e buxhetit të Komunës fatura të rrymës të dy banesave, njëra prej të cilave rezulton të jetë e tij.

I akuzuar për veprën penale të shpërdorimit të detyrës zyrtare apo autorizimit, zyrtari i Komunës së Rahovecit, Hasan Hoti, tha në Gjykatën e Gjakovës se nuk e di se si ka ndodhur që me mjete të Komunës ka paguar fatura të energjisë elektrike të disa objekteve private.

“Si ka ndodhë që bash kjo banesë është pagu me buxhet të Komunës, atë unë nuk e di. Unë kam pagu banesa vetëm nëpërmjet fakturave që ka pru KEDS-i për njehësorët e Kuvendit Komunal . Unë kurrë nuk kam çu sen në KEDS, qysh e kanë pagu KEDS-i le të merren punëtorët e KEDS-it”, tha në seancën ku dha mbrojtjen e tij i akuzuari Hoti.

Në aktakuzën e siguruar nga KALLXO.com përshkruhet mënyra se si Hoti në cilësinë e personit zyrtar kishte keqpërdorur mjetet buxhetore të komunës së Rahovecit për të paguar faturat e rrymës të dy banesave private, njëra prej të cilave rezulton të jetë e tij.

Sipas aktakuzës, i pandehuri me veprimet e tij e ka dëmtuar buxhetin e Komunës së Rahovecit në vlerë të përgjithshme prej 2 mijë e 371 euro.

“Në periudhën kohore nga muaji tetor i vitit 2010 e gjer më 22.04.2014 në Rahovec duke qenë në pozitën e personit zyrtar për paga dhe pagesa në Kuvendin Komunal të Rahovecit, me qëllim të përfitimit të kundërligjshëm pasuror për vete ka keqpërdorur pozitën zyrtare, në atë mënyrë që për periudhën e lartcekur kohore ka futur në faturat e pagesave të rrymës të shpenzuesve të energjisë elektrike pagesa e të cilave shpenzime bëhet nga buxheti i Komunës së Rahovecit njehsorin e shfrytëzuesit privat G.G. në shumën prej 1.394.35 euro si dhe njehësorin e shfrytëzuesit privat N.H., duke dëmtuar buxhetin e Komunës së Rahovecit në shumë të përgjithshme prej gjithsejt 2.371.90 euro”, thuhet ndër të tjera në aktakuzën e Prokurorisë Themelore të Gjakovës.

Shpallja e aktgjykimit në rastin kundër zyrtarit për paga dhe pagesa të Komunës së Rahovecit do të bëhet të martën./kallxo.com/

Remitancat nga diaspora që marrin qytetarët e vendeve të rajonit luajnë një rol të rëndësishëm në gjendjen ekonomike dhe sociale të qytetarëve.

Në disa familje remitancat janë burimi i vetëm i të ardhurave të tyre dhe ndikojnë dukshëm në standardin e jetesës, ndërsa pa këto të ardhura për disa familje do të ishte shumë më vështirë se sa tani.

Sipas të dhënave të marra nga (AA), Kosova është vendi i cili fiton më shumë remitanca nga mërgimtarët e diasporës, me një shumë prej 700 milion euro në vit, pastaj vijon Shqipëria me mbi 500 milion euro dhe Maqedonia me të paktën 400 milion dollarë. Këto informacione tregojnë se qytetarët të ardhurat nga diaspora, kryesisht i përdorin për nevojat themelore për jetesë.

Edhe pse duket se deri më tani është vështirë që këto të ardhura të përdoren për diçka tjetër, analistët e ekonomisë rekomandojnë se fondet nga remitancat mund të përdoren për fillimin e programeve për mikro-ndërmarrjet apo përdorimin e tyre për ndonjë program për punësim ose vetëpunësim.

Këshilltari i lartë politik në Ministrinë e Diasporës, Kushtrim Sheremeti, për AA bëri të ditur se diaspora e përbën fuqinë më të madhe ekonomike të Kosovës. Ai duke vënë në dukje se të ardhurat nga diaspora janë rreth 700 milion euro në vit, theksoi se, “Një prej të hyrave kryesore që shteti i Kosovës merr janë remitancat nga diaspora që jetojnë gjithandej botës.”

Ai shtoi se këto shuma janë sipas të dhënave nga Banka Qendrore e Kosovës dhe nënvizoi se një shumë tjetër e madhe vjen në mënyra jo formale tek familjarët e diasporës, të cilat nuk i monitoron Banka Qendrore.

“Gati secila familje kosovare pranon remitanca nga diaspora. Nëse llogariten edhe këto mund të themi që të ardhurat nga diaspora për një vit janë rreth 1 miliardë euro”, tha Sheremeti.

Ai gjithashtu bëri të ditur se përveç remitancave, diaspora kontribuon edhe nëpërmjet asaj që quhen investime të huaja direkte. “Një pjesë e madhe e këtyre investimeve janë investime pikërisht të diasporës sonë, por trajtohen si investime të huaja për shkak se pjesëtarët e diasporës tonë janë njëkohësisht edhe shtetas të huaj”, tha ai.

Sa i përket shfrytëzimit të këtyre remitancave, Sheremeti theksoi se ekzistojnë disa programe, nëpërmjet të cilave që nga viti i ardhshëm këto të ardhura do të kanalizohen në zhvillimin ekonomik të vendit, sidomos në fushën e bujqësisë dhe në atë të teknologjisë informative.

(Kosova Sot)

Transparenca e partive politike në fushën e financave të tyre, veç- mas pjesa e donacioneve që ato marrin sidomos gjatë fushatave zgjedhore, vazhdon të jetë pjesa më e errët e funksionit të tyre dhe pa informacione në raport me qytetarin. KQZ-ja e ka bërë publike për herë të fundit në vitin 2011 një dosje të informimit publik, që ka të bëjë me financat e partive politike, listën e donatorëve në zgjedhje, por që nga ajo kohë, pas ndryshimit të Ligjit për financimin e partive politike, ky institucion vazhdon të mbetet krejtësisht i mbyllur sa i takon publikimit të këtyre të dhënave. Kjo fshehje e këtyre të dhënave konsiderohet nga analistët politikë dhe njohësit e tjerë të kësaj fushe si një mungesë joserioze e transparencës, që bën për të dyshuar se partitë në pushtet abuzojnë rëndë me buxhetin e shtetit pas përfundimit të zgjedhjeve, duke shpërblyer me tenderë të shtrenjtë, në shuma marramendëse, qindra milionëshe bizneset që kanë financuar paraprakisht fushatat e tyre zgjedhore. Abuzuesi më i madh për vite të tëra dyshohet të ketë qenë dhe të mbetet PDK-ja, subjekt politik, i cili ka hezituar të japë çfarëdo informacioni lidhur me listën e donatorëve edhe në insistimin më të ri të gazetës.

Shpërblimi korruptiv Sipas dosjes së informimit publik të KQZ-së të vitit 2011, si dhe organizatës për antikorrupsion “Çohu” dhe rrjetit të gazetarëve hulumtues të Kosovës PREPORTR, të publikuar para një viti, konstatohet se falë lidhjeve të politikës me biznesin, këmbimit të ndërsjellë të të mirave materiale, mbështetjes financiare me donacione nga bizneset për partitë politike, dhe favoret që u bëhen atyre nga politika pas përfundimit të zgjedhjeve, del se një shifër prej rreth 220 milionë euro i kanë përfituar financuesit e partive politike nga tenderët publikë përgjatë një periudhe të monitoruar kohore mes zgjedhjeve, që përfshin periudhën gusht 2007 – maj 2014. Në këtë raport del se PDK-ja gjatë viteve 2009-2012 ka marrë nga bizneset gjoja vetëm 333 mijë e 460 euro, të deklaruara, e kushedi sa të tjera kanë përfunduar në xhepat e “shefave”, të cilat kanë përfituar në tenderë në vlerën e 162 milionë eurove. Tani nga njohësit e funksionimit të këtij sistemi konsiderohet se pikërisht kjo është mënyra e shpërblimit korruptiv, që kompanitë që financojnë partitë gjatë fushatës zgjedhore, janë ato që gjatë qeverisjes së atij subjekti politik përfitojnë benefitet në të gjitha mënyrat e mundshme, derisaAgjencia Kundër Korrupsionit dhe Prokuroria e Shtetit asnjëherë nuk janë marrë me trajtimin e një fenomeni të tillë të lidhjeve kriminale mes politikës dhe rrjetit të bizneseve.

Hulumtimi i organizatës për antikorrupsion “Çohu” tregon se financuesit e Partisë Demokratike të Kosovës (PDK), që për shtatë vite drejtoi Qeverinë e Kosovës, janë në krye të listës së përfituesve nga tenderët publikë. Në total, specifikohet se financuesit e PDK-së kanë përfituar mbi 160 milionë euro nga tenderët, saktë- sisht nga partia në pushtet PDK, për mbështetjen financiare që kanë dhënë donatorët gjatë fushatave zgjedhore. Ky hulumtim, kur u referohet prokurimeve publike, nxjerr të dhëna, sipas të cilave miliona të buxhetit të shpërndarë nga partia e ishkryeministrit Thaçi, tani president i vendit, thotë se për kompanitë që atij ia zgjatën dorën gjatë fushatave zgjedhore shkojnë në rreth 100 milionë, si këmbim për donacionet në shumën prej 280 mijë euro. “Nga dokumentet zyrtare ky hulumtim ka gjetur se 43 subjekte të ndryshme, kryesisht kompani ndërtimore si biznese dhe persona fizikë financuan Partinë Demokratike të Kosovës (PDK), në dy fushatat e fundit elektorale kanë përfituar rreth 100 milionë euro nga tenderët publikë.

Sipas Raportit të auditimit të financave të partive për fushatën e vitit 2009 dhe atij për fushatën e vitit 2010, shuma e donacioneve që këto 43 subjekte dhanë për PDK-në është pak më shumë se 280 mijë euro. Për 11 nga to u shkel edhe ligji dhe u dëmtua buxheti për t’i shpërblyer. Kjo i bie që kompanitë kanë rritur të ardhurat e tyre nga pushteti për mbi 350 herë në krahasim me atë që i dhanë donacion partisë në pushtet”, thuhet në këtë raport.

Raporti në fjalë konstaton se këtu flitet vetëm për kompanitë, për të cilat ka mbështetje me dokumente zyrtare se janë të përfshira në financimin e partisë në pushtet, por duhet pasur parasysh se një numër i madh i tenderëve publikë u jepet kompanive që janë të afërta me PDKnë, por se nuk kanë ndonjë bashkëpronësi formale, apo nuk dalin as si financues të partive politike. Sipas këtij raporti të organizatës për antikorrupsion “Çohu” dhe rrjetit të gazetarëve hulumtues të Kosovës PREPORTR , “Al-Trade”, pronë e Bajram Gashanit, është një kompani shumë e pranishme në tenderët publikë, pronari i së cilës është me origjinë nga bastioni i PDK-së, Drenasi. Kjo kompani,sipas këtij raporti, vetëm në Ministrinë e Arsimit ka marrë shtatë tenderë me vlerë prej afro 9 milionë euro. Kjo kompani në konsorcium me kompaninë “Ada Consalting Group”, pronë e zyrtarit të Shërbimit Informativ të Kosovës (SHIK), Avni Kastrati, ka marrë një tender prej 600 mijë eurosh nga Ministria e Punës dhe Mirëqenies Sociale. Megjithëse, sipas Auditorit Gjeneral, ishin shkelur kërkesat e donatorit, Ambasadës britanike për procedura të veçanta të prokurimit, Ministria e Kthimit ia ka vazhduar kontratën kësaj kompanie për projektin për ndërtimin e banesave për minoritete.

Financuesit e PDK-së pothuajse tradicionalisht janë edhe kontraktorë të komunave që drejton kjo parti PDK-ja, sipas hulumtimit të organizatës për antikorrupsion “Çohu”, ka shpërblyer edhe të afërmit e gazetarëve që mbajtën anën e kësaj partie. Kompania “Albes” nga Istogu, pronë e Hajredin Mavrajt, ka marrë nga 5.7 milionë euro vetëm nga MASHT-i, kur atë e udhëhiqte ish-ministri Enver Hoxhaj, tash kryediplomat i Kosovës. Kjo kompani, pos tenderëve në MASHT, ka marrë tender milionësh edhe nga institucionet e tjera që udhëhiqen nga njerëzit e PDK-së, madje edhe duke ofertuar me çmime 1200 % më të shtrenjta se ato në treg. Gjithnjë sipas këtij hulumtimi dhe raportit të tyre, në tenderin e Ministrisë së Administratës Publike (MAP) “Ndërtimi i ndërtesës së Prokurorisë së Qarkut në Pejë”, përfaqësuesi i kompanisë “Albes”, në seancën e mbajtur në OSHP në lidhje me problemet që dolën me këtë tender, e pranon publikisht se qëllimisht ka përdorur çmime 1200 % më të shtrenjta sesa në treg. Në po këtë seancë, përfaqësuesi i kësaj kompanie thotë se të njëjtën, sipas tij strategji, e ka aplikuar edhe në mbi 100 projekte tjera, por megjithatë është shpërblyer me kontratë.

Financuesit e PDK-së pothuajse tradicionalisht janë edhe kontraktorë të komunave që drejton kjo parti, por si në nivelin qendror, ashtu edhe në atë lokal, për t’u dhënë kontratat publike atyre institucionet nuk ishin “kursyer” në shkeljen e ligjit. “Preportr” ka gjetur se nga 43 financues të PDK-së, duke përfshirë këtu edhe ata që donacionet për partinë në pushtet i dhanë si biznese, por edhe ata që i dhanë si persona fizikë, por me kompanitë e tyre përfituan kontrata publike, për 11 prej tyre, pa përfshirë këtu kontratën mes Postës dhe Telekomit të Kosovës (PTK dhe “Devolli Group”, u shkel Ligji për t’i shpërblyer ato. Shkeljet në këto raste janë konstatuar nga Zyra e Auditorit të Përgjithshëm (ZAP) dhe nga Organi Shqyrtues i Prokurimit (OSHP). Sipas “Preportr” , “Devolli Group”, pronë e vëllezërve Blerim e Shkëlqim Devolli, edhe pse zyrtarisht për PDK-në ka dhënë vetëm 1 mijë euro, dhe atë vetëm për degën e saj në Pejë, kjo korporatë u shpërblye me tenderin për operatorin virtual në kuadër të telefonisë mobile publike, ‘Vala 900’, të njohur në treg si “Z-Mobile”. Kjo kontratë, nga e cila kompania “Devolli”, realizon miliona euro qarkullim është nënshkruar, pos nga ish-kryeshefi ekzekutiv i PTK-së, Shyqri Haxha, edhe nga kryetari i Bordit të kësaj korporate, Rexhë Gjonbalaj, ish-kryetar i degës së PDK-së në Pejë”, ka konstatuar raporti i para një viti. Aty zë vend edhe konstatimi tjetër i shpërblimit të Devollit nga politika, kur “Devolli Group” privatizoi dy ndërmarrje: “Amortizatorët” dhe “Emin Duraku”- n.(Më gjersisht mund t’a lexoni në numrin e sotëm të gazetës Kosova Sot)

(Kosova Sot)