Ambasadori britanik Ruairí O’Connell është takuar në qendër të Prishtinës me policët Nazmi Jahiri dhe Enver Sejfullahu të cilët ishin suspenduar pasi kishin dënuar shoferin e ministrit pa portofol në qeverinë e kosovës Rasim Demiri. O’Connell është parë gjatë ditës (të enjtes) në njëren nga kafiteritë e kryeqytetit teksa bisedonte me policët të cilët ishin suspenduar vitin e kaluar.

“Zëri”, merr vesh se ambasadori O’Connell është interesuar personalisht për këtë rast, pasi lajmi ishte botuar në gazetën “Zëri” me 12 shkurt të këtij viti. Policët Nazmi Jahiri dhe Enver Sejfullahu po bënin punën e tyre të zakonshme kur me 13 korrik të vitit të kaluar kishin vendosur të shqiptonin një gjobë për një person që kishte parkuar keq veturën.

Por vendimi për dënimin e këtij personi doli i gabuar pasi ai ishte shoferi ministrit Rasim Demiri. Në momentin sa policët po kryenin detyrën e tyre tek vetura ishte ofruar ministri Demiri i u kishte kërkuar policëve që të mos shqiptonin dënimin, ndërkohë që u kishte thënë atyre se ai ishte ministër. Por fakti se në atë veturë po futej një ministër nuk iu la fare përshtypje të dy policive të cilët thonë se në atë moment, vetëm po e kryenin detyrën. Vetëm pak minuta më pas ministri Rasim Demir menjëherë kishte ushtruar autoritetin e tij duke bërë kërkesë për suspendimin e policive gjë e cila kishte ndodhur mënjëherë.

Masa e suspendimit ishte e menjëhershme dhe atyre iu ishin marrë armët dhe kartelat zyrtare. Në njoftimin zyrtar të Njësisë së Standardeve brenda Policisë së Kosovës ishte arsyetuar veprimi i ministrit Rasim Demiri e për më shumë në këtë dokument thuhej se të dy policët kishin bërë shkelje të rënda disiplinore dhe se për këtë po fillonin hetimet.

Rasti kishte shkuar edhe në Inspektoratin Policor të Kosovës, institucion ky që kishte konstatuar se veprimi i policëve nuk përbënë vepër penale. Në këtë dokument të IPK-së thuhet: Nuk është argumentuar me asnjë fakt se me datën 13.07.2015, në rrugën Adem Jashari në Prizren se zyrtari Enver Sejfullahu derisa në detyrë zyrtare së bashku me kolegun e tij, Nazmi Jahiri kishte treguar sjellje të pahijshme ndaj ankuesit Rasim Demiri. Enver Sejfullahu njëri nga policët thotë se suspendimi dhe problemet që i janë krijuar nga ky rast i kanë shkaktuar atij probleme të shumta shëndetësore.

Jahiri posedon edhe raportin mjekësor të cilin e kishte botuar gazeta “Zëri” dhe në të cilin përshkruhet gjendja e tij shëndetësore, sipas së cilit raport Nazmi Jahiri ishte shtruar në spital si pasojë e pengesave në të folur dhe dobësimit të anës së djathë të trupit. Vet ministri Rasim Dmiri nuk kishte pranuar të fliste për këtë rast.

Gazetari Blerim Çoçaj ka vlerësuar se Legjislativi i Prizrenit nuk është i nivelit të lartë.

Sipas tij, Legjislaturë më të dobët asnjëherë nuk ka pasur Prizreni,transmeton OraInfo.

Ja postimi i plotë në Faceook

Legjislativ më të dobët kurrë s’ka pasur Prizreni. Ata që kanë përcjellë rregullisht legjislaturat e viteve të pasluftës, shumë lehtë mund të vijnë në këtë konstatim. Janë neveritëse ‘debatet’ që zhvillohen sot në Kuvendin e Prizrenit.

Sidomos, neveritëse janë “pyetjet” e tyre, që bëjnë për drejtorët e Ekzekutivit. Ata kanë probleme elementare në formulimin e pyetjeve.

Pastaj, ankohen se drejtorët e Ekzekutivit “nuk po përgjigjen në pyetjet tona”. Ata ende nuk po mund ta dallojnë pyetjen prej çështjes.

Nëse qytetarët ju kanë zgjedhur që t’ i përfaqësoni, kjo nuk do të thotë se nuk keni të drejtë të shfletoni fjalorin e shqipes, para se të shkoni në Kuvend, për të keqpërdor, sidomos pikën e rendit të ditës; pyetje-përgjigje.

Neveritëse është po ashtu edhe ngritja si çështje e problemeve personale të tyre. Në vend se në foltore të Kuvendit të trajtohen problemet e qytetarëve, ata flasin për problemet personale, se si kur shkojnë privatisht nëpër institucione nuk trajtohen si duhet!
Këta kuvendarë nuk mund të ndalin keqqeverisjen e Ramadan Mujës.

Këta kuvendarë janë bashkëfajtorë, për degradimin e qytetit të Prizrenit./Orainfo.com/

Një ditë para seancës së Kuvendit të Kosovës ku do të votohen për zgjedhjen e Presidentit, Lidhja Demokratike e Kosovës nëpërmjet një njoftimi për media ka bërë me dije se do ta respektojë marrëveshjen me PDK’në që Hashim Thaçit të jetë President. Aty thuhet se një gjë të tillë e kanë kërkuar strukturat e partisë gjatë konsultave ditëve të fundit.

Njoftimi i plotë:

Lidhja Demokratike e Kosovës, ditët e fundit, ka zhvilluar takime dhe konsulta shteruese me strukturat e LDK-së, ku është diskutuar për zhvillimet politike në Republikën e Kosovës.

Gjatë takimeve të Kryesisë së LDK-së, të Grupit Parlamentar si dhe me kryetarët e degëve të LDK-së, ka dominuar plotësisht qëndrimi dhe ka qenë konkluzion i përbashkët se Lidhja Demokratike e Kosovës duhet të vazhdojë me përkushtim të plotë kontributin e saj shtetndërtues në institucionet e Republikës së Kosovës.

Anëtarët e të gjitha strukturave të LDK-së, kanë kërkuar pa ekuivok nga përfaqësuesit e saj në institucionet qendrore që LDK-ja si parti me traditë të gjatë institucionale dhe me kontribut vendimtar në themelimin dhe ndërtimin e shtetit të Kosovës, t’i përmbahet parimeve të saj, duke përmbushur obligimet politike e kushtetuese të dala nga marrëveshja për krijimin e institucioneve në këtë mandat qeverisës, duke përfshirë zgjedhjen e Presidentit të Kosovës, sipas kësaj marrëveshjeje.

Duke iu referuar gjendjes aktuale në vend, të gjitha strukturat e LDK-së kanë kërkuar që LDK-ja, si gjithnjë, të luaj rol konstruktiv në funksionalizmin e plotë të institucioneve të shtetit dhe krijimin e kushteve për realizimin e prioriteteve dhe objektivave nacionale.

Kryetarët e degëve, anëtarët e Kryesisë dhe deputetët e LDK-së kanë kërkuar që LDK-ja, përmes udhëheqjes së Qeverisë dhe deputetëve të saj në Kuvend të vazhdojë përkushtimin maksimal për zhvillim ekonomik, ndërtim të institucioneve demokratike dhe proceset integruese euroatlantike.

Lidhja Demokratike e Kosovës, më këtë rast, thekson përkushtimin e saj të plotë për realizimin e synimeve dhe aspiratave të qytetarëve për ndërtimin shtetit të Kosovës, në miqësi të përhershme me Shtetet e Bashkuara të Amerikës dhe vendet tjera mike.

Ky vizion nacional, sot, mund të realizohet përmes punës së përbashkët, dialogut institucional dhe në koordinim të plotë me partnerët perëndimorë dhe jo përmes veprimeve anarkiste anti-perëndimore.

Lidhja Demokratike e Kosovës pret që të premten të gjithë deputetët e LDK-së në Kuvendin e Kosovës të veprojnë në përputhje me marrëveshjen politike të përkrahur nga strukturat e LDK-së, në mënyrë që t’i shërbejnë funksionalizmit të plotë të institucioneve të Kosovës.

Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit S. H., për shkak se ka kryer veprën penale, keqpërdorimi i pozitës apo autoritetit zyrtar nga neni 422 paragrafi 1 lidhur me paragrafin 2.1 të KP-së.

I pandehuri S.H., në cilësi të personit zyrtar në Komunën e Suharekës, duke e shfrytëzuar detyrën zyrtare, i ka tejkaluar kompetencat e tija me qëllim që të përfitojë çfarëdo dobie për personin tjetër, dhe me këtë rast ka shkelur me dashje ligjin lidhur me detyrat e punësimit të tij.

S.H., në kundërshtim me Ligjin 04/L-144 për dhënie në shfrytëzim dhe këmbim të pronës së paluajtshme, që është në pronësi të komunës, dhe Rregullores 23/2013 për përcaktimin e procedurave për dhënie në shfrytëzim dhe këmbim të pronës së paluajtshme, që është në pronësi të komunës, ka lidhur kontratën mbi dhënien e tokës ndërtimore në shfrytëzim të përkohshëm me qira, si përfaqësues i komunës së Suharekës me një ndërmarrje po nga komuna e Suharekës.

Me këtë S.H., pa autorizim nga Kryetari i Komunës ka nënshkruar kontratë, me ç’ rast kontraktuesit nga Suhareka i ka mundësuar dobi edhe atë shfrytëzimin e kësaj parcele kadastrale pa i ndjekur procedurat e rregullta ligjore dhe ka shkelur me dashje ligjin dhe rregulloren e lartcekur. Me këto veprime S.H., ka kryer veprën penale, keqpërdorimi i pozitës apo autoritetit zyrtar nga neni 422 paragrafi 1 lidhur me paragrafin 2.1 të KP-së.