Analistë të skenës politike dhe ekspertë të kësaj fushe janë të mendimit se dorëheqja e ofruar nga Adem Grabovci prej postit të shefit të Grupit parlamentar të PDK-së në Kuvendin e Kosovës është vetëm se një dorëheqje qesharake nga ana e të ashtuquajturit “shefi i shefave”. Sipas njohësve të kësaj fushe, Grabovci përveç dorëheqjes së ofruar do të duhej që të tërhiqet në tërësi nga skena politike kosovare dhe atë së bashku me shumicën e shokëve të tij partiakë të PDK-së dhe të LDK-së, por edhe të partnerëve të tyre të tjerë që janë të involvuar në krimet e pasluftës, shkruan gazeta Kosova Sot.

Analisti politik Nexhmedin Spahiu tha për “Kosova Sot” se vendimi i deputetit Grabovci për të dhënë dorëheqje nga posti i shefit të Grupit parlamentar të PDKsë të paktën mund të konsiderohet se është një gjest moral, por nuk është ndonjë gjë shumë e madhe, pasi bëhet fjalë për një post partiak dhe jo për një post shtetëror. “Dorëheqja e Grabovcit është vetëm një gjest simbolik dhe si i tillë mund të konsiderohet si një gjest i mirë nga ana e tij”. Sipas Spahiut, veprimi i tij është një gjest “më mirë pak sesa hiç”. Analisti Spahiu vlerëson se po të kishte një reflektim sadopak në skenën tonë politike shumë veta nga krerët e spektrit politik aktual do të duhej që të jepnin dorëheqje nga ato veprime të këqija.

Balanca në PDK ruhet

Ndërsa juristi dhe analisti Blerim Burjani tha për “Kosova Sot” se dorëheqja e Adem Grabovcit nuk e prish balancën funksionale të PDKsë, ngase vjen një shef tjetër dhe vazhdon me punën e tyre atje ku ka mbërritur Adem Grabovci, me listën e punësimit të njerëzve të partisë. “Duke e ditur se PDK-ja është një parti politike, e cila mbijeton në saje të privilegjeve partiake që u bën njerëzve-servilëve, të cilët kryejnë punë për shefa dhe së këndejmi kjo asgjë nuk do të thotë, sepse pra kjo nuk e ndalë procesin, por caktohet dikush tjetër për t’u marrë me punë të kundërligjshme dhe në kundërshtim me kodin penal të Kosovës, pra me keqpërdorimin e detyrës zyrtare”, tha ai.

Analisti Burjani thotë se e drejta në punë është një e drejtë elementare për të siguruar ekzistencën dhe zhvillimin e mirëqenies së individit dhe shoqërisë. Sipas Burjanit, pa trajtim të barabartë ligjor nuk ka bazë të shëndoshë dhe rrezikon qenien njerëzore, dhënie prioritete punësim me parën publike dhe pa përmbushur kritere quhet keqpërdorim i detyrës zyrtare. Ai sqaroi se me Kodin Penal të Kosovës thuhet, në nenin 65 dhe nenin 66 pika 1,2,3, kur zyrtari keqpërdor pozitën, pastaj pjesa e kodit ku flet për dhënie përparësi që cenon statusin e barabarte të qytetarëve që ka të bëjë me keqpërdorim të pozitës zyrtare, shih nenin 193 pika 1 te kodit penal, pastaj në nenin 222 pika 1 cenimi i të drejtave të punësimit dhe papunësisë ku thuhet decidivisht : “Kushdo që ia mohon apo kufizon personave tjerë të drejtën në punësim në kushte të njëjta, ashtu siç që është përcaktuar me ligj, dënohet me gjobë ose me burgim deri në dy vjet dhe pika e këtij neni ku thuhet: Kushdo që nuk vepron në pajtim me legjislacionin mbi të drejtat e personave të papunësuar dhe me këtë ia mohon apo ia kufizon të drejtat që atyre u takojnë ,dënohet me dënimin nga paragrafi 1 i këtij neni, pra nuk mund të thuhet se “punësimi familjar apo nepotist, apo partiak është i ligjshëm” , pra kjo është shkelje e barazisë para ligjit dhe se çfarëdo gjëra tjera që mund të ndodhin në fushën e dhënies së përparësisë paraqet vepër penale, duke shkaktuar diskriminim në punësim”

Vizita e fundit e zëvendëspresidentit amerikan, Joe Biden, në vendin tonë, veç tjerash, mund të shërbejë për të mirë edhe në drejtësinë kosovare, e cila në një mënyrë edhe mund t’ua hap sytë disa politikanëve kosovarë, të cilët ndonëse ishin në mesin e atyre që e pritën njeriun e dytë të shtetit mik kjo nuk do të thotë se ata mund të amnistohen nga Gjykata Speciale. Këtë e thonë njohësit e kësaj fushe, teksa veçojnë edhe faktin se gjykata në fjalë mund edhe të shënojë një kthesë të madhe në drejtësinë kosovare, që i ka munguar aq shumë, që një kohë të gjatë, shkruan gazeta Kosova Sot.

Deputeti nga radhët e koalicionit në pushtet, nga LDK-ja, Adem Salihaj, në një prononcim për gazetën “Kosova Sot”, ka thënë se ka pritje të mëdha nga Gjykata Speciale, derisa sipas tij Kosova e sheh një shpresë dhe një mundësi që të lirohet sadopak nga kthetrat e krimit, të cilat janë bërë lak në fytin e saj.”Do të ishte ndihmë e madhe nga SHBA-ja që të mos i përkrah strukturat kriminale që qëndrojnë edhe më tutje në pushtet, por që në krye të Kosovës të vijnë politikanë të pastër, që i mbrojnë me shpirt vlerat e demokracisë dhe interesat e shtetit të Kosovës, të cilat në këto momente janë marrë tërë- sisht nëpër këmbë”, ka theksuar deputeti Adem Salihaj.

Gjykimi i krimeve të luftës

Analisti Florim Zeqa ka vlerësuar se vizita e zëvendëspresidentit amerikan, Joe Biden, paraprakisht në Serbi dhe së fundmi edhe në Kosovë, vjen si formë e drejtpërdrejtë e presionit politik ndaj palëve në negociata, në këtë rast Serbisë dhe Kosovës, lidhur me Asociacionin e komunave serbe në veri të vendit, përderisa, sipas tij, mbi palën kosovare bie edhe presioni shtesë për ratifikimin e Demarkacionit të kufirit me Malin e Zi, si kushtin kryesor për liberalizimin e vizave për shtetasit kosovarë. “Pos tjerash, vizita e Joe Biden në Kosovë është edhe tërheqja e fundit e vërejtjes për politikanët që rrezikojnë të preken nga Gjykata Speciale, derisa fillimi i punës së Gjykatës Speciale pritet të shënojë edhe një kthesë të madhe në drejtësi, e në veçanti pritet të jetë një udhërrëfyes pune për drejtësinë kosovare”, është shprehur analisti Florim Zeqa për gazetën “Kosova Sot”.

Avokati Tomë Gashi thotë se zëvendëspresidenti amerikan, Joe Biden, nuk do t’i thotë askujt direkt me emër dhe mbiemër se mund të jetë i akuzuari i ardhshëm në Gjykatën Speciale, por, sipas tij, takimi me burrështetas të Kosovës nga ana e Joe Biden nuk do të thotë se ndonjëri prej tyre nuk mund të jetë në të ardhmen edhe i akuzuar në Gjykatën Speciale.

Hetues policorë të sektorit kundër narkotikëve nga Prizreni të mbështetur edhe nga njësi tjera policore kanë kryer një bastisje në shtëpi dhe prona të një të dyshuari me mbiemër Kodra në Leshan të Suharekës në kërkim të bimëve narkotike.

Gjatë ushtrimit të kontrollit janë gjetur dhe ç’rrënjosur 80 bimë 2-3 metra të gjata që dyshohet të jenë kanabis sativa.

Po ashtu, sipas Policisë së Kosovës, është sekuestruar edhe një pushkë gjysmë automatike e kalibrit 7.62mm me një fishekë.

Për të gjitha këto është informuar prokurori i shtetit i cili ka urdhëruar që i dyshuari të ndalët nën masën e arrestit policor.

Sot paradite është raportuar se një qytetar i Kosovës, Xhavit Kolgeci nga Suhareka është arrestuar dje në Serbi dhe është dërguar menjëherë në burgun e Nishit.

Ndërsa, shefi i kabinetit të ministrit Hoxhaj, Bashmir Xhemaj ka konfirmuar për KTV se Kolgeci është liruar.

“Ministria e Punëve të Jashtme ka qenë në komunikim të vazhdueshëm me ambasadorin e Kosovës në Beograd dhe autoritetet serbe qysh mbrëmë në momentin kur është arrestuar ,po ashtu pas sqarimit Kolgeci është liruar nga arresti. Ka të bëjë ka qenë në burg nuk i kanë ripërtërirë listat në të gjitha vendet në Serbi dhe Interpolin ndërkombëtar gjë për të cilën kemi ngritur vazhdimisht shqetësimet te autoritetet serbe dhe instancat ndërkombëtare sepse ky nuk është rast i vetëm”, ka thënë Xhemaj.