Ministri i Integrimit Evropian, Bekim Çollaku, ka deklaruar të enjten se procesi i liberalizimit të vizave nuk ka dështuar.

Në një intervistë për “Epokën e re” ai ka thënë se është e sigurt lëvizja e qytetarëve të Kosovës pa viza në vitin 2016.

“Në radhë të parë procesi i liberalizimit të vizave është drejt përmbylljes. Kosova i ka përmbushur kushtet, prandaj ne nuk kemi dështuar. Por, tani radhën e ka BE-ja të dëshmojë se e trajton Kosovën dhe qytetarët e saj në mënyrë të barabartë me shtetet e tjera të rajonit. Dhe një gjë të tillë mund ta dëshmojë vetëm nëse Komisioni Evropian do të procedojë me rekomandim pozitiv. Është e sigurt lëvizja e qytetarëve të Kosovës pa viza në vitin 2016”, ka deklaruar Çollaku.

Ai ka thënë se shumë shpejt duhet të marrë fund situata paradoksale, ku kemi liri të lëvizjes së mallrave, por jo edhe liri të lëvizjes së njerëzve.

“MSA-ja është mundësi e shkëlqyeshme për vendin, sepse forcon perspektiven evropiane të vendit që do ta ketë ndikimin edhe në ekonominë e vendit, duke mundësuar rritjen e shkëmbimeve tregtare. Por, MSA-ja nuk ka kuptim pa liberalizimin e vizave. Dhe kjo situatë paradoksale, ku kemi liri të lëvizjes së mallrave, por jo të njerëzve, duhet të marrë fund tani”, është shprehur Çollaku, duke shtuar se përderisa konkluzionet vlerësojnë të arriturat tona si vend sidomos me nënshkrimin e MSA-së, jemi të zhgënjyer me gjuhën e rezervuar në raport me procesin e liberalizimit të vizave.

“Duke qenë se jemi krejt në fund të procesit, Kosova ka pritur nga Këshilli i BE-së gjuhë më afirmative dhe mbështetëse për këtë proces. Sidoqoftë, këto konkluzione nuk e paragjykojnë raportin e Komisionit Evropian për liberalizimin e vizave dhe ne presim me bindje se ky raport do të jetë pozitiv dhe do të hapë rrugë për institucionet e BE-së që ta fillojnë procedurën e ndryshimit të Rregullores 539/2001, përkatësisht heqjen e vizave për qytetarët e Kosovës”, ka theksuar ministri Çollaku.

Ai ka thënë se tani është momenti që BE-ja të reflektojë për qasjen e vet ndaj Kosovës. Në këtë kontekst, Çollaku ka vlerësuar se zëvendëskryeministri Hashim Thaçi nuk ka qenë i ashpër me deklarata ndaj BE-së sa i përket liberalizimit të vizave.

“Nuk pajtohem fare se ka qenë i ashpër, por e ka thënë publikisht një të vërtetë e cila në veshët e BE-së mund të mos tingëllojë këndshëm. Por, partneriteti kërkon besim të dyanshëm, respektim të njeri-tjetrit dhe trajtim të barabartë. Ndërsa BE-ja deri më tani ka dështuar shpesh t’i kultivojë këto parime fondamentale në raport me Kosovën”, është shprehur Çollaku. /Epoka e Re

Mund të ketë vota kundër, por Hashim Thaçi do të bëhet president në muajt e parë të vitit të ardhshëm.

Këtë bindje e ka bashkëpartiaku i tij, Enver Hoxhaj, që aktualisht është në pozitën e nënkryetarit të Partisë Demokratike të Kosovës.

Në emisionin ‘Politikë’ me Sejdi Demirin, Hoxhaj ka deklaruar se ardhja e Thaçit në krye të shtetit do ta mbush Presidencën me lidership, për sa kohë që PDK-në do ta shtyjë në zgjedhje të një lideri të ri.

Hoxhaj beson se Partia Demokratike ka mjaft figura që mund të jenë liderë, por personalisht ka mohuar ta ketë synim postin e kryetarit të kësaj partie. /Tribuna Channel

Zëvendëskryeministri i Kosovës, Hashim Thaçi, ka reaguar edhe një herë për vonesat që i bëhen Kosovës për liberalizimin e vizave, duke e quajtur provokim nga lidershipi në Bruksel – të cilët, sipas tij, duhet t’i japin fund trajtimit diskriminues ndaj Kosovës.

Në seancën e Kuvendit, ai ka deklaruar se Kosova ka 111 njohje dhe është anëtarësuar në shumë organizata ndërkombëtare.

“Jemi shumë mirënjohës ndaj BE-së për nënshkrimin e MSA-së”.

“Por, dua të them me përgjegjësinë më të lartë, sepse kemi kemi punuar për gjithë këto vite, që na takon e drejta të trajtohemi si europianë”.

Thaçi ka shtuar se këto vonesa të BE-së për liberalizimin e vizave për Kosovën janë një provokim i rëndë dhe mungesë e vullnetit politik të lidershipit në Bruksel.

“Institucionet qëndrore dhe lokale kanë implementuar të gjitha kriteret e kërkuara. Është marrëzi të shtyhet ky proces, qoftë edhe për disa ditë, lere më për disa javë”.

“Qytetarët dhe institucionet janë lodhur me premtime shterpe. Këto vonesa janë të padrejta për Kosovën, por në të njëjtën kohë mund të nxisin reagime dhe përsëri të mbetemi fajtorë”.

“Mosnxjerrja e raportit të Kosovës për liberalizmin e vizave është fyerje direkte që u bëhet qytetarëve të Kosovës. Qytetarët kanë të drejtë ta ngrisin zërin e protestës për këtë vonesë”, ka deklaruar Thaçi.