Policia në Rio De Zhaniero ka thënë se një diplomat rus që ishte viktimë e një vjedhje në tentativë afër Parkut Olimpik e ka vrarë me armë zjarri sulmuesin, por ambasada ruse e ka hedhur poshtë lajmin.

Policia thotë se zëvendës konsulli rus që është identifikuar si banor vendës i Brazilit, është përleshur me sulmuesin e armatosur që tentonte ta vidhte, duke shkaktuar që arma të shkrepej dhe kështu krimineli të qëllohej për vdekje.

Mirëpo, ambasada ruse në Brazilia e ka hedhur poshtë raportin duke thënë se asnjë nga diplomatët e saj nuk janë të armatosur. Ambasada ka shtuar se të gjithë punonjësit e saj kanë “emra rusë, e një të tillë nuk kishte” në sulmin e raportuar.

Ky rast është një nga rastet e mëdha të krimit të raportuar në qytetin ku 85 mijë policë dhe ushtarë janë vendosur për të ruajtur paqen dhe rregullin gjatë mbajtjes së Lojërave Olimpike që fillojnë sot.

Janë 46 persona të arrestuar nga FBI si anëtarë të grupeve mafioze. Nga sa raportojnë mediat amerikane të arrestuarit janë pjesë e familjeve mafioze Genovese, Gambino, Luchese dhe Bonanno, pjesë e “Cosa Nostra”.

Ndërkohë mediat amerikane shkruajnë se mes të arrestuarve është dhe ish-kreu i mafias në Filadefia, Josef Merlino, i cili së bashku me Eugene O’Nofri dhe Pasquale Parello dyshohet se janë supervizorët e këtij grupi.

Sipas FBI-së, ky operacion është ekzekutuar pas disa vitesh hetime e ka përfshirë të gjithë territorin e brigjeve lindore të Shteteve të Bashkuara të Amerikës. /Tch

Presidenti amerikan, Barack Obama ka lavdëruar suksesin e arritur nga trupat amerikane dhe ato ndërkombëtare kundër grupit militant, Shteti Islamik, por ka tërhequr vërejtjen se përkrahësit e IS-it që veprojnë të vetëm do të vazhdojnë të jenë problem.

“Jam i kënaqur me progresin që është arritur në terren në Irak dhe Siri”, ka thënë Obama më 4 gusht ndonëse “ne ende jemi larg çlirimit të Mosulit dhe Rakës”, dy qytete që mbahen nën kontroll nga IS-i në Siri dhe Irak.

Derisa Shteti Islamik ka humbur territor në beteja, ai ka nënvizuar se grupi ka shtuar përpjekjet për të frymëzuar dhe organizuar sulme ndaj civilëve jashtë këtyre dy vendeve të Lindjes.

“Ata e kanë vërejtur se çfarë vëmendje fitojnë kur kryhen sulme të tilla më të vogla duke përdorur armë apo pushkë”, ka thënë Obama.

“Mundësia që sulmues të vetmuar apo grupe të vogla të kryejnë sulme që do vrasin njerëz është reale”, ka vlerësuar më tej lideri amerikan.

“Rrjetet e IS-it janë më aktive në Evropë se sa që janë në SHBA, por…është e mundshme që edhe në Amerikë të ketë rrjete që mund të aktivizohen”, ka thënë më tej presidenti amerikan.

“Se si reagojmë ne ndaj kësaj është e rëndësishme në përpjekjet tona për të shkatërruar ISIL”, ka thënë Obama dhe ka shtuar se “kur shoqëritë frikësohen ato mund të reagojnë në mënyra që minojnë vet përbërjen e shoqërisë”.