Tri partitë opozitare, në një deklaratë të përbashkët për media, kanë pohuar se janë të vendosura të mos e lejojnë kalimin e Asociacionit dhe Demarkacionit.

Ato kanë thënë se nuk do të ndalen dhe nomaliteti do të kthehet vetëm kur të kthehet demokracia.

Deklarata e plotë e Opozitës së bashkuar:

Triumvirati i rrenave: Veseli-Mustafa-Thaçi

Seanca e sotme e improvizuar nëpër skuta i ka nxjerrë në pah tre gënjeshtarë të mëdhenj, të cilët edhe sot nuk hezituan të vazhdojnë ta mbulojnë diktaturën e tyre me fjalime hipokrite e patetike.

I pari foli ish shefi i SHIK-ut, i rehabilituar si kryetar i institucionit më të lartë të një demokracie parlamentare, siç është Kuvendi. Të gjithë e mbani mend kur, para pak ditësh Kadri Veseli betohej se kurrë nuk do të lejonte të hynte policia në Kuvend, dhe kurrë nuk do të përjashtohej opozita, për sa kohë që Ai, do të ishte kryetar kuvendi. E sot, Kadri Veseli bën thirrje për skanera specialë, ndërkohë që e ka mbushur sallën e Kuvendit me policë me maska gazi. Kadri Veseli ka urdhëruar kontrollin e deputetëve të opozitës, ndërkohë që shumë prej bashkëpunëtorëve të tij në SHIK, që sot janë deputetë e ministra të partive në pushtet, kurrë nuk janë kontrolluar e kurrë nuk janë hetuar. Kadri Veseli ka kërkuar sot edhe masa të shtuara represive kundër opozitës, sepse sipas tij policia nuk mjafton, edhe pse i kemi parë të gjithë arrestimet dhe ndërhyrjet policore ndaj opozitës dhe mbështetësve të saj.

Në seancën e turpshme ku partitë në pushtet u mblodhën të diskutojnë pasi e përjashtuan opozitën, kryeministri i Qeverisë së Rashkës, Isa Mustafa, ka përsëritur edhe një herë se kërkesat e opozitës për tërheqje të marrëveshjeve nuk janë të sinqerta, dhe kinse Opozita e Bashkuar paska kërkesa të tjera.

Kjo nuk është hera e parë që Mustafa e thotë të njëjtën gënjeshtër, pasi ai këtë gjë e ka pretenduar edhe në kohën kur Opozita protestonte kundër ministrit të tij me qëndrime raciste, Jabllanoviqit. Por veprimet opozitare gjithnjë kanë qenë të përgjegjshme, dhe kanë vërtetuar të kundërtën. Mjafton që Isa Mustafa të heqë dorë nga dy marrëveshjet e dëmshme për të ardhmen e Kosovës, dhe ne garantojmë se secili aktivist e secili deputet opozitar do t’i kthehet normalitetit.

Mashtruesi i tretë ishte Hashim Thaçi, personi i cili i ka ndërtuar gjithë këto marrëveshje të cilat tash i ka nënshkruar Mustafa. Thaçi ka deklaruar me pafytyrësinë më të madhe se me bllokimin e këtyre marrëveshjeve, opozita ia paska pamundësuar Kosovës përfitimin e 60 milion eurove. Sipas zëvendësit të Mustafës ia vlen ta ndërtojmë Republikën Serbe në Kosovë, me një çmim të tillë. Hashim Thaçi mendon se qytetarët i kanë harruar aferat me qindra milionë të cilat ai dhe njerëzit e tij i kanë përfituar nëpër privatizime shkatërruese të pronës publike. Vetëm kontrata që Hashim Thaçi ka lidhur për privatizimin e KEDS-it, ia ka vjedhur fitimin mbi një qarkullim prej 300 milionë eurosh në vit. E kësaj i shtohen qindra milionë prej shumë privatizimeve e koncesioneve të dyshimta. Pra Thaçi nuk duhet të na tregojë çmimin me të cilin duhet të shesim Kosovën përmes marrëveshjeve, por duhet të shkojë sa më parë në Gjykatë për korrupsionin masiv të partisë të tij, korrupsion që tashmë është bërë shqetësimi kryesor edhe i ndërkombëtarëve në Kosovë.

Këta tre zyrtarë po thonë se në emër të demokracisë do të përjashtojnë e do të arrestojnë opozitën. Këta po thonë se në emër të drejtësisë do të përndjekin opozitën dhe do të mbrojnë korrupsionin e tyre.

Por ne jemi të vendosur se marrëveshjet për “Zajednicë” e Demarkacion, nuk kalojnë! Opozita nuk ndahet! Normaliteti do të kthehet vetëm kur të kthehet demokracia! Protestat nuk ndalen!

Lëvizja VETËVENDOSJE!
Aleanca për Ardhmërinë e Kosovës
Nisma për Kosovën

Aleanca për Ardhmërine e Kosovës (AAK) ka reaguar ndaj arrestimit të dy deputeteve të AAK-së, Time Kadriaj dhe Teuta Haxhiu. Sipas AAK-së, ata që po arrestojnë deputetët po ia shkurtojnë jetën qeverisë së vet.

“Paranoja e shefave politik të qeverisë nuk ka të ndalur. Pas arrestimit, me urdhër të tyre, të deputetit Pal Lekaj dhe djalit të tij, i cili po mbahet në burg tash e sa ditë, në orët e vona, policia ka arrestuar edhe dy deputete të AAK-së, Time Kadriajn dhe Teuta Haxhiun”, thuhet në reagimin e AAK-së.

“Me arrestimet e fundit, ky pushtet po dëshmon se është diktatorial dhe komunist dhe përballë paranojës së humbjes së pushtetit, nuk po lë gjë pa bërë, vetëm për t’i mbrojtur pozitat e veta. Skenaret e qeverisë për mbajtjen e seancave plenare dhe përpjekja e tyre për të kriminalizuar opozitën dhe për ta bërë njejtë si veten, nuk do të kalojë, sikundër nuk do të kalojnë as marrëveshjet anti-Kosovë që i kanë nënshkruar ata.”

AAK përmes komunikatës ka thënë se deputetët e saj do të jenë gjithmmonë në mbrojtje të interesit kombëtar të Kosovës, pavarësisht skenarëve të kryeministrit Isa Mustafa dhe zëvendëskryeministrit, Hashim Thaçi.

Deputetëve të opozitës, të cilët edhe më tej po qëndrojnë në sallën kryesore të Kuvendit, u ka mbërritur buka nga kryetari i Kuvendit, Kadri Veseli.

Opozitarët nuk e kanë pranuar bukën për vete. Ata ua dhanë gazetarëve shujtën që ua ofroi kryekuvendari.

Kryetari i Kuvendit të Kosovë ka mbajtur një fjalim para deputetëve të Kuvendit në sallën alternative në të vilën po mbahet në këto momente. Veseli ka thënë se Kuvendit tash e tre muaj po ballafaqohet me një gjendje jo të mirë, ai ka akuzuar opozitën duke thënë se qëndrimi i tyre është kokëfortë dhe se po dëshirojnë të imponojnë qëndrimin e tyre tek shumica.

“ Ka 3 muaj e gjysmë që kuvendi ballafaqohet me një tentativë për gjendje kaotike. Opozita përmes një qëndrimi kokëfortë po dëshiron të na imponon qëndrimin e saj, ata po tregojnë një konsistencë të jashtëzakonshme por situata shpesh herë po na krijon gjendje jo të kënaqshme”, ka thënë Veseli.

Ai gjithashtu ka thënë se Kuvendi duhet ta vazhdojë seancën kur vendos kryesia dhe se nuk do të duhej të pengohej nga opozita.

“ Ne e kemi një shqetësim si me ndal këtë gaz lotsjellës. Ne gjithë jemi munduar të ndalim, veç kot po mundoheni, marre u qoftë. Kuvendi do të vazhdojë seanca çdo herë që vendos kryesia” ka thënë Veseli. /Zeri

Zëvendëskryeministri Hashim Thaçi para deputetëve të Kosovës ka thënë se me gjendjen aktuale politike në vend po rrezikohen marrëveshjet ndërkombëtare.

Madje Thaçi thotë se Kuvendi është uzurpuar nga deputetët opozitar duke ushtruar dhunë me gaz lotsjellës.

“ Kuvendi është i uzurpuar nga disa deputetë të dhunshëm opozitar, nuk mund të sillemi se nuk po ndodh asgjë. Po na mohohet e drejta për të komunikuar me qytetarët e Kosovës, nga ana e opozitës. Ata përdorin mjete të papranueshme prandaj shqetësimi im. Ne u detyruam me ardh në këtë sall dhe në njëjtën kohem e i tejkalu veprimet jo të mira, po rrezikojmë marrëveshjet ndërkombëtare me këtë gjendje aktuale dhe se është shqetësuese” ka thënë Thaçi

Ndër të tjera Thaçi ka kërkuar nga deputet që të formulojnë një deklaratë të përbashkët të deputetëve dhe Qeverisë që të dënojnë dhunën e opozitës brenda Kuvendit të Kosovës.

“Kërkojë nga ju të gjithë që të formulojmë një deklaratë të përbashkët duke dënuar uzurpimin e Kuvendit nga një grup i deputeteve të opozitës” ka thëne Thaçi./ZËRI