Në përmbylljen e një viti të plotë të funksionimit të koalicionit PDK- LDK, pakënaqësitë me këtë koalicion joparimor po rriten edhe vetë brenda LDK-së, si partner në qeverisje.

Ky koalicion mendohet se është bërë në funksion të interesave të individëve dhe jo të elektoratit të partive politike dhe për këtë arsye kanë filluar lëvizje serioze brenda LDK-së, që në të ardhmen e afërt mund të ndikojnë në fillimin e dekompozimit serioz të këtij subjekti politik.

Lëvizje të reja në LDK po vijnë, e cila për shkak të synimit dhe lakmisë së kryetarit Mustafa, të mbetjes me çdo kusht në pushtet, që në fakt LDK-ja me këtë ambicie të individëve po e humb çdo cilësi të mirë, që i kishte mbetur nga koha e Rugovës, duke iu nënshtruar kështu ulët dhe krejtësisht përtokë SHIK-ut e PDK-së, shkruan Kosova Sot.

“Lëvizja e zyrtarëve në kohën e fundit nga subjektet politike të disa anëtarëve të tyre është një shenjë, e cila po rezulton në pakënaqësinë e politikëbërjes së partive të tyre. Rastet e fundit të reagimit të zyrtarëve të AAKsë në Podujevë dhe tani në Gjilan të LDK-së, japin sinjal se edhe vetë anëtarësia e çdo partie politike është vetëdijesuar dhe nuk dëshiron që të marrë njolla të këqija në historinë e kësaj faze të politikëbërjes”, shprehet Hertica. /Kosova Sot

Departamenti i Shtetit Amerikan (DASH) ka qëndrim të prerë lidhur me Kosovën, thotë se ajo duhet luftuar korrupsionin nga rrënjët, madje edhe nëse dikush është i përfshirë nga niveli i lartë duhet arrestuar dhe vuajtur dënimin në burg.

Kurse veprimet e opozitës i quan zhgënjyese. Hedhja e gazit në Parlament dhe veprimet në rrugë, djegien e veturave zyrtare dhe hedhjen e molotovit, e vlerësojnë prishje të rëndë të imazhit të vendit dhe komplikim të funksionimit të shtetit.

Në një intervistë ekskluzive për gazetën “Zëri”, zyrtari i lartë i DASH-it, Tom Yadzdgerdi, ish- zëvendës i ambasadores Tina Kaidanow në Kosovë, tash përfaqësues i Byrosë për Çështje të Evropës Jug-Qendrore, tha se opozita ka të drejtë të kërkojë sqarime për marrëveshjet, por jo në këtë mënyrë që po shkatërron imazhin.

Kurse Qeveria po ashtu duhet të jetë më transparente me marrëveshjet e nënshkruara, në mënyrë që t’i qetësojë qytetarët e saj. Thotë se sekretari i Shtetit amerikan, John Kerry, erdhi në Kosovë për të dhënë mesazhe të qarta.

Ky zyrtar i lartë i DASH-it foli për pritshmëritë e Washingtonit nga Kosova, luftimin e korrupsionit, veprimet e opozitës, Asociacionin e Komunave Serbe, rolin e Beogradit, pasojat e emigrimit masiv të kosovarëve, Gjykatën Speciale, ekstremizmin fetar, etj. /Zëri

Sot (e hënë), në orën 10:00, Kuvendi i Kosovës do ta mbajë seancën e radhës, në të cilën do të shqyrtohen 28 pika të rendit të ditës, mes të tjerash do të shqyrtohet në lexim të dytë edhe Projektligji për buxhetin e vitit 2016. Por, përfaqësuesit e tri partive opozitare, Lëvizjes Vetëvendosje!, Aleancës për Ardhmërinë e Kosovës dhe Nismës për Kosovën, kanë deklaruar për “Epokën e re” se nuk do të ndryshojnë qëndrim sa iu përket metodave që kanë përdorur deri më tani. Ata kanë thënë se nuk do ta lejojnë mbajtjen e seancës, pavarësisht se në këtë seancë do të shqyrtohet në lexim të dytë Projektligji për buxhetin e vitit 2016.

Zëvendëskryetarja e Komisionit për Buxhet dhe Financa nga radhët e PDK-së, deputetja Safete Hadërgjonaj, ka thënë për “Epokën e re” se pozita do ta gjejë mundësinë për ta kaluar buxhetin për vitin 2016, duke shprehur optimizëm se opozita këtë herë do të reflektojë pozitivisht.

“Ne do ta mbajmë seancën. Opozita do të kishte bërë mirë që më në fund të reflektojë pozitivisht, pasi veprimet të cilat janë duke ndodhur, edhe ajo e sheh se janë veprime jo në harmoni me ligjin dhe rregullat me të cilat veprojmë dhe punojmë aty”, ka thënë Hadërgjonaj, duke shtuar se nëse opozita vepron në mënyrë të njëjtë siç ka vepruar deri më tani, pozita do të bëjë përpjekje maksimale që ta mbajë seancën dhe ta miratojë në lexim të dytë Projektligjin për buxhetin e viti 2016.

“Shpresoj shumë se nuk do të ketë probleme të tilla siç ishin deri më tani, por nëse do të ketë, do të gjejmë mënyra për ta mbajtur seancën”, ka deklaruar Hadërgjonaj.

Frashër Krasniqi nga Lëvizja Vetëvendosje! ka thënë se deputetët opozitarë nuk do të lejojnë që Kuvendi ta aktrojë normalitetin, përderisa sovraniteti i Kosovës cenohet nga marrëveshjet e dëmshme të nënshkruara me Serbinë, nga “Zajednica” dhe nga tri marrëveshjet e tjera të 25 gushtit, si dhe nga marrëveshja për demarkacion me Malin e Zi. Ai ka thënë se deputetët e Kuvendit të Kosovës kanë për obligim ruajtjen e sovranitetit dhe integritetit territorial të vendit.

“Qeveria e Kosovës duhet sa më parë të tërhiqet nga marrëveshjet, ashtu që të mund të funksionojnë normalisht institucionet e Kosovës. Nëse Isa Mustafa në asnjë mënyrë nuk guxon të tërhiqet nga marrëveshjet, atëherë le t’i hedhë në referendum, ashtu që populli i Kosovës të vendosë për to. Nëse as referendumin nuk kanë guxim ta organizojnë, atëherë vendi duhet të shkojë në zgjedhje”, ka thënë Krasniqi.

Kurse Haki Shatri nga Aleanca për Ardhmërinë e Kosovës (AAK) ka thënë se po të mos ishin problemet e tjera, ky subjekt politik nuk do të ishte sot kundër seancës, në të cilën do të shqyrtohet në lexim të dytë Projektligji për buxhetin e vitit 2016.

“Qëndrimi i Aleancës do të jetë i njëjtë. Ne s’kemi marrë pjesë në shqyrtimin e buxhetit dhe pozita e ka shqyrtuar buxhetin në mënyrë komode, pa opozitën. Po të kishte qenë gjendja normale, deputetët e AAK-së do të merrnin pjesë në seancë, ku do t’i jepnin vërejtjet dhe sugjerimet e tyre sa i përket buxhetit. Por meqë pozita nuk ka reaguar në kërkesat e opozitës, duke e mohuar çdo kërkesë tonën (opozitës), atëherë edhe ne jemi të gatshëm për të reaguar”, ka thënë Shatri, duke shtuar se i vetmi instrument që Qeveria e ka në dorë për t’i realizuar politikat e veta është buxheti. Ai ka thënë se në kushte normale opozita nuk pajtohet me atë buxhet.

I pyetur në rast se dështon të kalojë në lexim të dytë Projektligji për buxhetin e vitit 2016, a është e vetëdijshme opozita se Kosova rrezikon humbjen e 185 milionë eurove nga FMN-ja. Shatri ka thënë se ky është arsyetim i Qeverisë, vetëm për ta gjetur mënyrën e kalimit të buxhetit.

“Buxheti ka kohë për t’u miratuar. Janë edhe dy muaj pas vitit të ri, por këto janë arsyetime sa për ta tejkaluar buxhetin shpejt e shpejtë. Nëse i kanë 83 vota dhe nuk kanë gajle për ne, atëherë pse po na thërrasin”, ka deklaruar Shatri.

Po ashtu, edhe anëtari i Komisionit për Mbikëqyrjen e Financave Publike nga Nisma për Kosovën, Enver Hoti, ka thënë për “Epokën e re” se të gjitha përgjegjësitë për situatën e bllokuar në Kuvend i ka Qeveria.

“Ne nuk po e pengojmë seancën, por jemi duke i mbrojtur qëndrimet tona që janë në interes të republikës. Të gjitha përgjegjësitë i mban Qeveria, e cila ka krijuar këtë krizë politike për shkak të gabimeve të veta. Përgjegjësia bie mbi këtë Qeveri”, ka thënë Hoti.

Elektorati i bashkuar Rugovian në Kosovë dhe Diasporë organizon peticion për largimin e kryetarit auktual, Isa Mustafa, nga kreu i LDK-së, thuhet në një njoftimin e Këshillit të iniciativës për Reformimin e LDK-së.

Sipas njoftimit, kërkohet shkarkimi i menjëhershëm i Isa Mustafës nga posti i kryetarit të LDK-së dhe prishja e koalicionit me PDK-në, raporton Indeksonline.

Lexoni njoftimin e plotë të Këshillit të Iniciativës për Reformimin e LDK-së:

Të nderuar miq, vëllezër dhe motra, elektorat besnik i LDK-së!
Ne, anëtarët dhe veprimtarët e LDK-së të viteve të 90-ta, nuk e kemi të lehtë të pajtohemi me realitetin e krijuar në partinë tonë pas vdekjes së liderit të saj, Dr. Ibrahim Rugova, sepse ne nuk jemi mësuar t’i themi të zezës e bardhë dhe anasjelltas, dhe as nuk mund t’i themi sot, as nesër dhe asnjëherë…!

Përkrahja jonë e vazhdueshme ndaj LDK-së, nuk ka qenë përkrahje ndaj një udhëheqësi të caktuar, nuk është sot dhe nuk do të jetë as në të ardhmen, sikurse që edhe kritikat nuk kanë të bëjnë kundër një individi të caktuar, por kundër një orientimi të gabuar politik. Pas shkuarjes në amshim të liderit historik, Ibrahim Rugova, LDK-ja nuk ka guxuar të personifikohet me udhëheqësin e partisë, për arsye se personaliteti i Rugovës është i pa zëvendësueshëm dhe i pa arritshëm për kë do qoftë.

Prandaj, fillimisht duhet nisur nga faktet, se kryetari aktual i LDK-së, si humbës serik i tri palë zgjedhjeve (dy herë të zgjedhjeve nacionale dhe një herë të atyre lokale) e ka humbur të drejtën politike dhe morale të udhëheqjes me subjektin tonë politik, LDK-në, simbolin e krenarisë sonë kombëtare, shtet formuese, të besës dhe shpresës shqiptare, e formuar dhe udhëhequr për 17 vite nga presidenti historik, Dr. Ibrahim Rugova.

Efektet e dëmeve politike të Isa Mustafës, janë shumëfish më të mëdha se sa ato ekonomike.
Pas ardhjes së tij në krye të LDK-së në vitin 2010-të përmes puçit politik, sa herë që e kërkonte nevoja LDK-ja e Isa Mustafës ratifikonte në Kuvend marrëveshjet e Hashim Thaçit me Daçiqin në Bruksel, siç ishte ajo e 19 prillit 2013, kumbar i së cilës u bë vetë Isa Mustafa me vënien e nënshkrimit të tij mbi atë marrëveshje, më 25 gusht të këtij viti në Bruksel. Kjo shënon kulmin e copëtimit territorial të vendit si dhe serbizimit të Kosovës përmes “Zajednicës”..!?

Nëse i analizojmë zhvillimet e ngjarjeve pas zgjedhjeve nacionale të 2010-s, atëherë Isa Mustafa na del përgjegjësi numër 1 i të këqijave më të mëdha që goditën vendin tonë, i cili më metoda perfide e ndihmoi dhe e mbajti në pushtet H. Thaçin dhe keq qeverisjen e PDK-së, si e keqja më e madhe për vendin në periudhën e pasluftës.

Ngjashëm, por akoma më keq, I. Mustafa veprojë edhe pas zgjedhjeve të 8 qershorit të vitit të kaluar, ku si humbës i zgjedhjeve, për t’i shpëtuar ndëshkimit të elektoratit të LDK-së, dy ditë pas zgjedhjeve do i manipulon dy partitë opozitare AAK-në dhe NISMA-në, e më vonë edhe VV-në, duke e formuar Bllokun opozitar pas zgjedhor “V-LAN”, përmes të cilit për afro gjashtë muaj e pamundësoi formimin e institucioneve shtetërore duke mbajtur shtetin tonë në ngërç të plotë.

Kur Gjykata kushtetuese e rrëzoi Isa Mustafën nga posti i kryeparlamentarit të zgjedhur nga “V-LAN-i”, ai e mori këtë si shkas për largimin nga ky bllok për ta shpëtuar sërish Hashim Thaçin, jo vetëm nga rënia nga pushteti, por edhe nga “vdekja” politike e tij, duke e rehabilituar në kundërshtim me vullnetin politik të tërë anëtarësisë së LDK-së.

Thënë troç, ardhja e Isa Mustafës në krye të ekzekutivit në mënyrë paradoksale (puçiste) e ka shndërruar atë në gogol të politikës kosovare! Tashmë e kanë të qartë edhe deputetët e LDK-së, se lideri i tyre është në pozicionin e gabuar politik. Ai nuk ka ardhur më qeverisë për të mirën e vendit, por për të mirën e Serbisë dhe interesave të Hashim Thaçit. Më një fjalë, është shndërruar në marionetë të PDK-së dhe SHIK-ut si dhe shërbimeve tjera antikombëtare.

Qeveria “Isa Mustafës – Thaçi 3” me veprimet e fundit ka dëshmuar se nuk është produkt i votës qytetare, por i krimit të organizuar, korrupsionit dhe kontrabandimit ndërkombëtar për finalizimin e bisedimeve të Brukselit në shërbim të interesave të Serbisë në Kosovë dhe rajon.

Gjendja e mjerueshme në skenën politike në Kosovë, sidomos ajo sociale dhe ekonomike, është një impuls shtesë për largimin sa më parë të I. M. nga pushteti për zhbllokimin e vendit nga uzurpatorët dhe debilët politik. Njëherit, Isa Mustafa mbetët ogurziu më i keq për të ardhmen politike të Lidhjes Demokratike të Kosovës (LDK), të cilën nga një parti e besës dhe shpresës së shqiptarëve për ndryshime pozitive e ka shndërruar në ngulfatëse të shprehjes dhe mendimit të lirë si dhe humbëse të shpresave të qytetarëve për një jetë më të mirë në këtë vend.

Zgjidhja më e mirë për shkatërruesit e shumëfishtë të LDK-së, do të ishte dorëheqja nga postet drejtuese në parti, të cilën e kanë marrë peng, veprime këto që do t’iu hapnin rrugë ndryshimeve pozitive brenda LDK-së, sikurse edhe iniciativa për shkarkimin e kryetarit ishte dasht të rrjedhë më herët nga degët dhe nëndegët e LDK-së. Mirëpo, mjerisht disa nga ato janë të marrura peng nga kreu i LDK-së, I. Mustafa. Si pasojë, kryesitë e degëve nuk guxojnë as të hapin gojën nga frika e humbjes së vendeve të tyre të punës.

Prandaj, ne elektorati besnik Rugovian, të cilët jetojmë në Kosovë dhe mërgatë, të nxitur nga patriotizmi dhe dashuria për atdhe, morëm këtë iniciativë shumë fisnike, që për hir të sakrificave dhe mundit që kemi investuar në forcimin e saj si dhe ruajtjen e trashëgimisë politike dhe kombëtare të presidentit Ibrahim Rugova, ta nënshkruajmë këtë peticion për shkarkimin e Isa Mustafës nga posti i kryetarit të LDK-së…!!!

Ky është momenti i fundit, për t’ia ndalur hovin të keqes së madhe në keqqeverisjen e vendit dhe marrjen peng të LDK-së, në veçanti.

Kërkesat tona urgjente që dalin nga ky peticion janë:

1). Shkarkimi i menjëhershëm i kryesisë së LDK-së bashkë me kryetarin Isa Mustafa,
2). Tërheqja e menjëhershme e LDK-së nga koalicioni qeverisës më PDK-në e H. Thaçit,
3). Fillimi i menjëhershëm i procesit të jashtëzakonshëm zgjedhor në LDK, duke filluar nga Aktivet, Nëndegët dhe Degët e LDK-së,
4). Formimi i komisioneve të reja zgjedhore nga anëtarësia e LDK-së;
5). Pjesëmarrja direkte në procesin zgjedhor e degëve të LDK-së në Diasporë, aktivistëve dhe veprimtarëve të devotshëm të LDK-së në mërgatë,
6). Mbajtja e Kuvendit të jashtëzakonshëm zgjedhor të LDK-së, nën drejtimin e kryesisë së re të punës deri në përfundimin e punimeve të kuvendit, nga i cili do të zgjidhet më pas Këshilli i Përgjithshëm, Kryesia si dhe organet tjera të reja të LDK-së…/