Tre persona të maskuar dhe të armatosur, të enjten pas mesnate, janë futur në ambientet e një lokali të lojëravë të fatit në rrugën “Jusuf Gërvalla” në lagjen “Ortakoll”, me ç’rast kanë kërcënuar dy punëtorë të cilët i kanë lidhur, dhe nga arkat kanë grabitur rreth 40 mijë euro, njoftuan burime të Televizionit të Prizrenit.

Ngjarjen në fjalë e ka konfirmuar edhe zëdhënësi i policisë rajonale të Prizrenit, kapiten Hazir Berisha, i cili thotë se tre sulmues të dyshuar me maska të cilët me vete kishin një pistoletë, një thikë dhe një shufër metali, kanë kanosur dy të punësuar në këtë objekt, të cilët më pas janë lidhur dhe janë dërguar në bodrum. Pas kësaj, ata nga arkat dhe pajisjet e këtij objekti kanë grabitur dhjetëra mijëra euro.

Berisha thotë se policia është vënë në kërkim të autorëve të kësaj vepre penale, ndërsa shton se e gjithë ngjarja është vëzhguar nga kamerat e sigurisë , por identifikimi i të dyshuarve është i vështirë për shkak se ata ishin të maskuar.

Kjo nuk është hera e parë që lagjja “Ortakoll” është në shënjestër të grupeve të ndryshme por edhe individëve, të cilët prej kohësh grabisin nën kërcënimin e armëve objekte të ndryshme, por edhe qytetarë të rëndomtë, sidomos janë të njohur për grabitje të çantave dhe stolive të çmuara për femra. /TVPZ

Shtatë të akuzuar për pengim të punës së një gurthyesi në Dobërdelan të Suharekës dolën dje para gjykatës.

Banorët e këtij fshati në vitin 2013 kundërshtuan me protestë hapjen e një gurthyesi, ndërsa ndaj shtatëve prej tyre u zhvillua sot seanca fillestare në Gjykatën Themelore të Prizrenit-Dega në Suharekë.

Hysni Gallapeni, Nexhat Cikaqi, Ramadan Balaj, Azem Shala, Fadil Balaja, Isaja Gallapeni dhe Qazim Shala, akuzohen për asgjësim apo dëmtim të pasurisë dhe pengim të personit zyrtar në kryerjen e detyrave zyrtare.

Ata akuzohen se me datën 10.09.2013, rreth orës 09:00, në hyrje të fshatit Dobërdelan në vendin e punishtes së kompanisë “Seti Comerc”, në bashkëveprim e bëjnë të papërdorshme pasurinë e personit tjetër, duke mbyllur 300 vrima që ishin hapur për minim(shpërthim), me ç’rast të dëmtuarit i shkaktojnë dëm në shumën prej 30. 000 euro.

I akuzuari dhe kryetari i fshatit Dobërdolan Hysni Gallapeni, për KALLXO.com mohoi se atë ditë u mbyllën vrimat me qëllim.

“Atë ditë firma ka qenë duke i bërë shpimet, tu e përgatit fushën për me minuar për ditën e mërkurë, atë ditë kanë qenë mbi 100 banorë, të cilët janë tubuar para se me shkuar te punishtja në pronën e ‘Seti Komerc’ dhe janë shkuar të revoltuar për m’i larguar makinat, për mos me lejuar me bë shpimin, derisa të zgjidhet problemi, i cili ishte ne kontest me dokumentacion dhe është e vërtetë që kanë hi nëpër fushë, por qe e ka paraqit lëndë që i kanë dëmtuar vrimat nuk është e vërtetë,” tha Gallapeni.

Banorët e fshatit Dobërdelan kundërshtuan hapjen e gurthyesit me arsyetimin se është i kundërligjshëm dhe në dëm të qytetarëve pasi ndodhet shumë afër shtëpive.

Komuna e Suharekës më 5 qershor 2013 i kishte dhënë pëlqimin kompanisë “Seti Komerc” për gurthyesin, por këtë pëlqim e kishte tërhequr më 11 shkurt 2014, pasi sipas komunës nuk ishin përfillur kushtet e veçanta të përcaktuara nga Komisioni i Pavarur i Minierave dhe Mineraleve.

Përveç për mbylljen e vrimave të minave, shtatë banorët e Dobërdelanit akuzohen edhe për pengim të policisë për hetimin e dëmit të shkaktuar ndaj kompanisë që hapte gurthyesin.

“Me datën 27.09.2013, rreth orës 08:30 min, në oborrin e Stacionit Policor në Suharekë, në bashkëveprim me kanosje serioze pengojnë personin zyrtar në kryerjen e detyrës zyrtare duke organizuar bashkëvendësit për të penguar kryerjen e hetimeve nga policia,” thuhet në aktakuzë.

Seanca e ardhshme u caktua më 28 dhjetor. /Kallxo.com

Kryetari i Bashkimit Demokratik(BD) në Prizren, Zafir Berisha thotë se viti 2015-të, do të mbahet në mend për ngritje të aktakuzave dhe burgosjen e drejtorëve të Qeverisë së Ramadan Mujës.

Sipas tij, qeverisja e Prizrenit, edhe gjatë këtij viti, është renditur në “top listën” e qyteteve me keqqeverisje dhe korrupsion më të madh.

“’Qeveria Muja’ në Prizren, për vitin 2015-të, do të mbahet në mend për dhjetëra aktakuza dhe arrestime spektakulare të drejtorëve dhe stafit që qeverisë me Prizrenin”, thotë Berisha për “PrizrenPress”.

Ai vlerësoi se Qeveria e Mujës nuk e ka as idenë më të vogël se cili është roli i saj.

“Kemi dështime të mëdha. Fatkeqësisht Prizreni vazhdon të jetë në ‘top listën’ e qyteteve me qeverisje më të keqe dhe të korruptuar”.

Berisha thotë se nuk ka dëgjuar apo lexuar në media një lajm të mirë për Prizrenin.

“Sa herë flitet në media për Prizrenin nuk flitet për ndonjë të arritur, por flitet për arrestime e hetime të zyrtarëve të Komunës“, shprehet Berisha.

Ai beson se qytetarët e Prizrenit,tashmë janë penduar për gabimin që kanë për në zgjedhjet e kaluara,kur kanë votuar PDK-ë.

“Të penduar duhet të jenë edhe liderët e partive minoritare të cilët manipuluan me votuesit e tyre dhe tash dalin e flasin se si po ju kidnapohen fëmijët nga banditët e Ramadan Mujës”. /PrizrenPress.com

Qeveria e koalicionit, e kushtëzuar nga mafia politike. LDK-ja u bë pjesë e kapjes së shtetit nga PDK-ja

Analistët dhe opozita theksojnë se kryeministri aktual formalisht udhëheq Qeverinë, por de facto janë grupet kriminale të interesit, të lidhura me PDK-në, por dhe LDK-në, që kontrollojnë gjithçka

Para një viti, Isa Mustafa i ktheu shpinën bllokut VLAN dhe kështu pas marrëveshjes me Thaçin fitoi postin e kryeministrit të Kosovës. Mënyra sesi lideri i LDK-së erdhi deri tek pozita më e lartë e ekzekutivit, si dhe fakti që nuk ishte kandidati me më së shumti vota në zgjedhjet nacionale, siç duket, e zbehu në publik namin e tij si kryeministër. Udhëheqja e dobët e Qeverisë, e dobësoi edhe më tej figurën e tij, shkruan Kosova Sot.

Së fundmi, pak ditë më parë Mustafa kërkoi nga ministrat e kabinetit të tij qeveritar, që të jenë më shumë prezent në Kosovë sesa jashtë, duke dëshmuar kështu se nuk po arrin t’i ketë nën kontroll anëtarët e ekzekutivit. Për këtë, deputetja nga radhët e AAK-së, Time Kadriaj, tha se është një deklaratë apo kërkesë absurde nga ana e kryeministrit.

“U adresua se duhet të marrë masa se ministrat po udhëtojnë shumë, po në fakt menaxhues i ministrave është vetë kryeministri Isa Mustafa”, tha Kadriaj. /Kosova Sot

Me nënshkrimin e marrëveshjes ndërmjet Kosovës dhe Mbretërisë së Holandës për funksionalizimin e Gjykatës Speciale për krime lufte, vendi i ka kryer obligimet e veta në këtë proces dhe tani funksionalizimi i saj varet tërësisht nga bashkësia ndërkombëtare.

Sipas njohësve të këtij procesi, funksionalizimi i Speciales do të bëhet brenda pak muajsh, pasi ata vlerësojnë se kohët e fundit është vërejtur interesim më i madh i faktorit ndërkombëtar për ta jetësuar këtë Gjykatë. Përveç konfirmimit nga ana e kryeministrit të vendit, Isa Mustafa, për arritjen e marrëveshjes me Holandën, Qeveria e Kosovës refuzon të japë më shumë detaje për këtë çështje.

Gazeta “Zëri” ka kërkuar sqarime shtesë edhe nga përfaqësuesit e Bashkimit Evropian dhe nga Holanda, por as ata nuk kanë dhënë detaje për këtë çështje. Ndërsa, Fisnik Korenica nga Grupi për Studime Juridike e Politike, ka thënë për gazetën “Zëri” se nëse marrëveshja me Holandën përfshin çështjen e vuajtjes së dënimit për të dënuarit potencialë, si dhe çështjen e vendndodhjes së selisë së Gjykatës, atëherë Kosova teknikisht e përfundon nga ana e saj pjesën e angazhimit për themelimin e Gjykatës.

Në këtë rast, sipas tij, “topi” kalon në anën e Bashkimit Evropian. /Zëri