Deputetët e Kuvendit të Kosovës po kërkojnë debat profesional-shkencor mes komisionit shtetëror për demarkacionit dhe grupit të njohësve profesionistë për diskutim dhe ballafaqim faktet për çështjen e demarkacionit Kosovë-Mali i Zi.

Komisionin Shtetëror për Demarkacion vazhdon ta udhëheqë Murat Meha, i cili është akuzuar edhe për tradhti kombëtare pasi ka udhëhequr procesin e shënimit të vijës kufitare me Malin e Zi, shkruan Express.

Ndryshe, deputetët, në kërkesë, kanë propozuar që pjesë e këtij debati të jenë edhe profesori Zejnullah Gruda, Enver Hasani, Florim Isufi, Përparim Ahmeti e Shpejtim Bulliqi.

Në kërkesën drejtuar Kryesisë së Kuvendit, thuhet se pjesë e këtij debati mund të jenë edhe deputetë e interesuar për këtë çështje.

Këtë kërkesë e kanë mbështetur Shpejtim Bulliqi, Arben Gashi, Vjosa Osmani, Fatmir Rexhepi, Hatim Baxhaku, Shaip Muja, Ismail Kurteshi, Nuredin Ibishi, Gëzim Kelmendi, Shqipe Pantina, Fisnik Ismaili, Nait Hasani, Sadri Ferati, Faton Topalli, Driton Çaushi, Salih Salihu etj.

Ndryshe, në korrik të vitit 2015, ende pa përfunduar procesi i demarkacionit me Malin e Zi, profesori Zejnullah Gruda pati deklaruar se Mali i Zi kishte hyrë 6 kilometra në territor të Kosovës.

Deputeti nga Nisma për Kosovën, Zafir Berisha, në një prononcim për gazetën Kosova Sot, thotë se nuk do të ketë ndonjë ndryshim të nevojshëm dhe të pritshëm për qytetarët në fushën e drejtësisë.

Megjithatë, sipas tij, Kryeprokurori i Shtetit i ka bërë disa akrobacione, por Berisha ngrit dilemën se sa do të vazhdohet me ato në mënyrën, siç tha, që të rritet intensiteti edhe në kontekst të njerëzve, të cilët kanë pasur përgjegjësi edhe më të mëdha institucionale, si ministra, kryeministra, pastaj kryetar të shtetit e kështu me radhë, të cilët kanë bërë shkelje ligjore dhe kjo, sipas tij, pritet të shihet përndryshe, siç tha ai, “në prokuroritë e nivelit të dytë, siç janë ato komunale dhe regjionale, d.m.th. nuk ka ndonjë simptomë se mund të ketë ndonjë ndryshim, kjo së paku në bazë të asaj që është publike nuk priten ndryshime në këtë drejtim”.

Tutje, Berisha, duke folur për disa nga prokurorët dhe gjyqtarët e ish- sistemit të kaluar, ka nënvizuar se nëse ata kanë hyrë si rezultat i bashkëpunimit të UNMIK-ut dhe të Serbisë që kanë qenë bashkë, duke i rehabilituar disa nga ishkomunistët dhe bashkëpunëtorët e regjimit të Milosheviqit dhe i kanë bërë prokurorë e gjykatës, Berisha kësisoj mendon se koha e tyre ka përfunduar, ngase, siç tha, se “tani kemi gjenerata të reja, por që këta banditë, të cilët e kanë uzurpuar drejtësinë, nuk u lëshojnë rend kuadrove të reja, gjë që kjo është edhe domosdoshmëri dhe jo rastësisht ne në Kosovë nuk kemi as rezolutë për ta ndarë të ardhmen nga e kaluara komuniste, që është një nga kriteret edhe për integrime në BE”.

Sipas Berishës, ne si shtet nuk kemi ligj për lustracionin dhe kjo nuk është krejt rastësisht, pasi po ta kemi një ligj të tillë, faktikisht disa nga njerëzit që sot drejtojnë organet e drejtësisë jo që nuk duhet të jenë në ato pozita, por të njëjtët duhet të jenë në burg, për dëmet të cilat ia kanë shkaktuar këtij vendi dhe këtij populli.

“Ja që kemi një politikë të poshtër në krye me Isa Mustafën dhe Hashim Thaçin dhe rrjedhimisht nuk pritet që të bëhen ndryshime pozitive në këtë sferë”, ka potencuar deputeti Zafir Berisha për gazetën Kosova Sot.

PDK e LDK janë duke dështuar të marrin edhe vendime të parëndësishme në Parlamentin e Kosovës. Kjo për shkak se deputetët e pushtetit herë s’po shkojnë në seancë e herë s’po gjejnë pajtim. Për të zgjidhur këtë bllokadë një deputet i PDK’së po kërkon zgjedhje të jashtëzakonshme. Një kërkesë të tillë, prej kohësh, opozita e ka artikuluar edhe përmes protestave.

Mosfunksioni i Kuvendit të Kosovës nga vjeshta e kaluar ka bllokuar jo vetëm kushtin që duhet votuar për liberalizim të vizave, Demarkacionin, por edhe ligjet tjera. Në seancat plenare partnerët e koalicionit nuk po janë fare prezent për të shqyrtuar dhe votuar projektligjet e reja.

Përplasjen më të madhe në këtë mandat e kanë pasur këtë të premte derisa kanë prezantuar argumentet pro dhe kundër Projektligjit për investime strategjike.

E zgjidhja më e mirë e kësaj bllokade sipas deputetit të PDK’së Nait Hasanit është që vendi të shkojë në zgjedhje të reja.

Idenë që vendi duhet të shkojë në zgjedhje të reja nuk po e përkrahë vetëm opozita. Nait Hasani, si njëri ndër deputetët që e kritikon më së shumti partinë e tij, PDK’në, ka thënë që vendi duhet të shkoj në zgjedhje.

Hasani në një prononcim për Express ka thënë se mosfunksioni i Kuvendit të Kosovës tash e një kohë është arsye pse duhet të mbahen zgjedhjet e reja.

“Unë mendoj që vendi duhet të shkoj në zgjedhje për shkak të natyrës së Kuvendit. Ne presim që herët apo vone s’kemi qare pa shkuar në zgjedhje”, ka thënë Hasani.

I pyetur nëse është diskutuar edhe brenda PDK’së mundësia që vendi të shkoj në zgjedhje, Hasani ka thënë që ende jo.

“Ky është mendimi i im. Në PDK ende nuk është shqyrtuar se cila është zgjidhja që mund ta tejkalojmë këtë krizë”, ka thënë Hasani.

Kuvendi i Kosovës është jofunksional që nga vjeshta e vitit 2015. Opozita fillimisht e kishte bllokuar seancat plenare duke hedhur ujë, më pas vezë e në fund me metoda më agresive- duke gjuajtur gaz lotsjellës. Ata kundërshtonin ashpër dy marrëveshjet e fundit: ASK’në dhe Demarkacionin dhe kërkonin që vendi të shkoj në zgjedhje të reja.

Pas prishjes së bllokut opozitar, dukej se pozita i ka dyert e hapura për të votuar projektligjet e nevojshme. Mirëpo një gjë e tillë nuk ndodhi.

Në seancat plenare partnerët e koalicionit munguan shumë duke e pamundësuar miratimin e ligjeve. Rasti i fundit është këtë të premte ku diskutohej për kontrollin për pronën shoqërore, ku shumica e deputetëve të Partisë Demokratike (PDK) nuk kanë marrë pjesë në votim, duke mos u deklaruar as për, as kundër dhe as abstenim.

Po ashtu ka dështuar të zgjidhet edhe zëvendësdrejtori i ri i Autoritetit Rregullator për Shërbimet e Ujit. /Express